Kagero nu Babeli rabambari lako i suruga
18
1 Awetu malaeka etu roomo mololita ewa etu, kuita mbuimo malaeka anu saduana mendolu lako i suruga. Mabose kuasana, ai nakenimpewangkana, sumalele dunia mewali mabaa. 2 Mongangamo ia mauni-uni, nauli, “Magero! Mageromo Babeli, kota anu mabose! Mepuu ei-ei, kota ei ina rapearii nu seta, kuasa-kuasa anu madaa, ai sinangka tosi anu rapalia ai rakasisi. 3 Mageromo kota Babeli, lawi kota Babeli mobawai tau i sumalele dunia bona manginu anu melangui. Lempona, mobawai ia tau mampeulai babeiana anu madaa. Ope-ope datu i dunia mampeulai babeiana anu madaa etu. Mpane topobalu-balu i dunia mewali sira tau anu pebuku nakenimpampobalura parewa anu masuli anu mangula peundea nu rarara.”4 Roo awetu, kuepe mbuimo sambua wotu lako i suruga anu manguli, “Komi tauKu! Pelosomode komi lako i kota ei, bona ntena nipeulai dosa nu kota ei, bona ntena ai komi anu mamposurunga sukuana. 5 Lawi maisi mpuu dosana, mombetitiwongkomo dongka i langi. Mpane i Pue Ala ina mosurungi ope-ope dosana. 6 Nisurungimode apa anu nababeikamo komi, nisurungi rombela kadaana lako i apa anu nababeikamo komi. Niisii mangkuna ai anggoro anu maruminsi mpii pelanguina, mpane lako i pelangui nu anggorona anu nakiraka komi. 7 Nikiraka ia pepopesiasi ai kapari rara, sintimba ai kasana nu katuwu anu naepekamo, lawi nakenimpampemabosena paka nauli nu rarana: ‘Aku ei datu towawine anu meparenta. Baria aku tobemba. Baria aku ina mansumba kapari rara.’ 8 Nakeningkaawetuna pampekirina, i rarana saeoa ngkida kota Babeli ina narumpa nu pepopesiasi ewa: kamate, kapari rara ai oro. Ai kota ei ina tesuwe. Lawi anu mosuku kota ei, iamo i Pue Ala anu makuasa.”
Kagero nu Babeli ratumangisi nu tau i dunia
9 Datu-datu i dunia mampeulai sira pebualosi nu kota Babeli ai mobabei ngkida sira peundea nu wotora. Ane datu aretu mangita sira rambu nu apu anu mosuwe kota Babeli mengkaore, ina ratumangisira kagerona. 10 Metotoki ngkarao sira lawi maeka sira ina nalelesi nu pepopesiasi anu morumpa kota etu. Ina raulira, “Masurewu! Masurewu mpuu kowo kota Babeli anu mabose ai maroso! I rarana sajaa ngkida, rapakatuna nakenimpesuku ni Pue Ala.”
11 Ane topobalu-balu i dunia, ina mapari rarara motumangisi kagero nu Babeli, lawi bariamo ria anu mobaluki balu-balura, 12 ewa: bulawa, salaka, paramata, ai mutiara. Ria pesampi anu malulu anu rababei lako i bana lena ai bana anu makamumu. Ria anu-anu, anu rababei lako i kau anu mawongi, rababei lako i ngisi nu gaja, rababei lako i kau anu masuli, ba lako i tambaga, besi ba watu pualam. 13 Ria kau kanino ai rampa-rampa ntanina. Ria anu-anu, anu mawongi, mur ai dupa. Ria anggoro, lana, tampu roti ai gandu. Ria japi, dimba, dara, kareta, ai batua. Duduuna dongka-dongka i manusia, rapobalura i kota Babeli etu. Agaiana nakeningkagerona kota Babeli, bariamo sira ria anu mobaluki. 14 Etumo mpane topobalu-balu motumangisi sira kota Babeli, raulira, “Ope-ope anu niunde bariamo ria. Ope-ope anu-anu, anu merae anu niunde, ope-ope anu nipake mampoperae wotomi, matontomo.”
15 Topobalu-balu aretu mewali sira tau anu pebuku lawi mampobalu sira ope-ope anu-anura i kota Babeli. Agaiana ni tempo etu, ina metotoki ngkarao ngkida sira, lawi maeka sira ina nalelesi nu pepopesiasi anu morumpa kota etu. Motutumangi sira ai mapari rarara, 16 raulira, “Masurewu! Masurewu mpuu kowo kota anu mabose! Ni banimpia kota Babeli mopake sampi anu malulu, anu bula ai anu makamumu. Mopake sira parewa ewa: bulawa, paramata ai mutiara. 17 Agaiana i rarana sajaa ngkida, ungangkidamo matonto peawana anu maisi etu!”
Ope-ope tau anu mangkadelo sira katuwura i tasi, malompe anu mangkeni kapala tasi, malompe topobago i kapala ai ope-ope tau anu mampensawii kapala, meongko ngkarao sira 18 mampeita rambu anu mengkaore lako i apu anu mangkoni kota etu. Ina raulira masisimbuku, “Marugi mpuu kota anu mabose etu, ni banimpia baria ria kasimbelaana!” 19 Ina moawui sira woora tanda kapari nu rarara. Ina motumangi sira mpane monganga sira, raulira, “Masurewu! Masurewu mpuu kowo kota anu mabose etu! Nakeningka nu kota Babelina, etumo mpane ope-ope kita anu mobago i kapala tasi mewali tau anu pebuku. Agaiana peita: i rarana sajaa ngkida, matunamo!”
20 Sangangaa matono komi, komi anu meari i suruga.
Nipokatonomo kagerona!
Sangangaa matono komi, komi tau ni Pue Ala,
suro-suroNa ai nabi-nabiNa!
Lawi i Pue Ala mosuku kota Babeli,
Nasurungi babeiana anu madaa si komi.
21 Roo awetu, sadua malaeka anu maroso moongkomo saogu watu anu mabose mpii, mpane naweduka i rara nu tasi, nauli, “Ewa watu ei anu raweduka i rara nu tasi, bariamo ina rasumba mpesola, ewa etu mbui kota Babeli anu mabose ina rapatuna sambela lau, ai bariamo ina rawangu mpesola. 22 Mapaia mpuumo ope-ope peawana ai peraena. Topokecapi, topodulua, topotulali ai topotatamburu, bariamo sira rasumba i kota etu. Topowangu tombi ai topotumampa bariamo sira ria. Pomomoni nu watu pogilia gandu bariamo raepe. 23 Bariamo ria anu mopatuwu sulo. Bariamo ria posusa pebua.