Kagero nu kota Babeli rapokatono i suruga
19
1 Roo awetu, ria anu kuepe ewa wotu nu tau wori anu mauni i suruga, raulira:“Haleluia! Tatoiamo i Pue Ala!
Lawi Ia anu mokiraka kita katuwu malompe.
Ia anu mabose sangaNa ai anu makuasa.
2 Tetoiamo Ia, lawi pobotusiNa manoto ai matopa.
Nasukumo towawine anu madaa mpii babeiana,
anu mopakadaa dunia ei ai pebualosina.
Nasukumo towawine anu madaa etu,
lawi masala nakenimpampopatena tudua ni Pue Ala.”
3 Tau wori mololita mbuimo sira mauni-uni, raulira:
“Haleluia!
Rambu lako i apu anu mangkoni kota etu, mengkaore liliu duduuna kasae-saeana.”
4 Lako ni se etu, tadulako anu rompulu iba, ai iba mpangka pinatuwu molingkudumo sira ope-ope motumpa ai menomba i lio ni Pue Ala, anu momeso i kadatuaNa, raulira, “Amin! Haleluia!”
5 Roo etu, kuepe sambua wotu anu mololita gompi i pomesoa datu etu, nauli:
“Komi ope-ope anu mewali tuduaNa,
Toiamo i Pue Ala Pueta!
Komi anu mengkoru si Ia, nitoiamo
malompe anu i woi katuwumi ba anu i wongko katuwumi!”
Susa pebua Ana Dimba
6 Roo awetu, kuepe mbuimo wotu nu tau wori. Wotura etu ewa powoo nu ue anu mabose, ai ewa pomomoni nu gumpata. Niepeku niulira:
“Haleluia!
Lawi Pueta i Pue Ala meparentamo!
Melumbu kuasaNa lako i sinangka-nangkana.
7 Maimo kita modulua i katono-tono,
motoia sangaNa.
Lawi dongkamo eo karabua nu Ana Dimba.
Towawine anu rabua masilolongamo.
8 Rakiraka Ia sampi anu malulu,
anu bula mengkila-ngkila.”
[Lempona sampi nu towawine anu malulu anu rabua etu, iamo babeia nu tau ni Pue Ala anu malompe.]
9 Lako ni se etu, malaeka etu mangulika aku, “Ukimode ewa ei: matono mpuu sira tau anu raronde lau i posusaa pebua Ana Dimba.” Mpane nauli mbui, “Eimo lolita ni Pue Ala, ai batena mamonso.”
10 Molingkudu aku motumpa i lio nu malaeka etu, bona menomba aku si ia, agaiana naulika aku, “Inee! Inee aku nupenombai. Batena i Pue Ala anu sintoto nupenombai. Lawi aku ei, tudua ni Pue Ala, ewa etu mbui iko ai ope-ope pokamu anu mopangaku ka i Yesuna Puera. Lawi pesabiki ni Yesu etumo anu mopatudu tau anu mopadongka pololitaNa.”
Topensawi i dara bula anu lau mombeala
11 Roo awetu, kuita suruga tebungkasi, mpane kuita sambaa dara anu bula. Anu mampensawii dara etu, sangaNa, “Anu Rapotuu ai anu Manoto.” Manoto pobotusiNa i rarana mobotusi sukua, ai i rara nu pombeala anu Nababei. 12 MataNa mewangka ewa apu anu mambugi mpii, mpane i wooNa ria maisi songko datu. I wotoNa teuki sanga, agaiana batena Ia anu manginsani lempo nu sanga etu. 13 SampiNa teeme i rara nu raa. SangaNa iamo “Ngkora ni Pue Ala.” 14 Mawori surudado lako i suruga anu meula i talikuNa, mampensawii mbui sira dara anu bula. Sampira, bana anu malulu, bula ai anu baria keraki.
15 Lako i rara ngangaNa, mensuwumo samata guma anu mataru. GumaNa etu, ina monangi ope-ope tau i dunia. Roo awetu, ina meparenta Ia ai karosoNa ewa karoso nu lai besi. Ia anu mopie wua anggoro i rara nu popiea anggoro. Popieaa anggoro etu iamo karumpu ni Pue Ala anu melumbu kamakuasaNa lako i ope-opena. 16 I jubaNa ai i paaNa teuki sanga ei:
“Datu lako i ope-ope datu,
Tua lako i ope-ope tua.”
17 Roo awetu, kuitamo sadua malaeka anu meongko i wongko eo. Malaeka etu morondemo mauni-uni ope-ope tosi anu meloko-loko i laerawa, nauli, “Maingkomode komi i posusaa anu mabose anu naparia ni Pue Ala. 18 Maingkomode komi mangkoni isi nu datu ai tadulako, isi nu surudado anu keate, isi nu dara ai isi nu topensawi i dara. Maingkomode komi mangkoni isi nu manusia, malompe anu kono raita katuwura ba anu baria kono raita katuwura, malompe anu batua katuwura ba anu baria batua.”
19 Roo etu, kuitamo binata anu maseke, ai datu-datu i dunia ai ope-ope surudadona, mogulumo sira bona mampombealaka sira Topensawi i dara anu bula simbela-mbela ai surudadoNa. 20 Agaiana binata anu maseke etu rasokoda; ewa etu mbui nabi anu mepakanawu etu. Anu rodua aretu, ratendemo sira i rara nu sambua pearia anu nabuketi nu apu anu mambugi mpii ai anu mogate. Nabi anu mepakanawu etu, ni banimpia iamo anu mobabei tanda kuasa i lio nu binata anu maseke etu. Ai tanda kuasa etu, mopakanawu tau sira anu modoko tanda binata ai anu menomba i watu anu rababei ewa lense nu binata etu. 21 Mewali, Topensawi i dara anu bula mampopate ope-ope surudado nu binata, Natimbe sira ai gumaNa anu mensuwu lako i ngangaNa. Mpane roo awetu, dongka mpuu sira tosi. Tosi aretu, mangkoni isi nu tau anu rapopate, duduura mabosu.