Datu nu Seta rasilu
20
1 Roo awetu, kuitamo sadua malaeka mendolu lako i suruga. I palena nakeni sambua rante anu mabose, ai pegili boboka kabe nu kamate anu baria tesoka kandalana. 2-3 Malaeka etu mosokomo naga etu, iamo ule anu matuamo anu rasanga Datu nu Seta ba Datu nu sinangka anu madaa. Roo awetu, nasilumo ai rante, mpane natende i rara nu kabe kamate anu baria tesoka kandalana. Bobokana nagilimo mpane napekatandai bona ntena rabungkasi i rarana sansobu mpae kasaena. Mewali, Datu nu Seta etu baria pensani mopakanawu manusia i rarana sansobu mpaena. Ane liumo tempo etu, sangangaa rapawia sampalai.Katuwu mpesola nu tomate anu mpolinguruna, ai poparenta anu sansobu mpae
4 Roo awetu, kuita basangkia pomesoa nu datu anu rapomesoi nu tau anu rakiraka kuasa mobotusi kara-kara nu tau. Kuita mbui tanuana nu tau anu ratompoki tambolora nakenimpopangakura ka i Yesuna Puera ai popadongkara Ngkora ni Pue Ala. Tau aretu, baria sira sambela menomba i binata etu, ba i watu anu rababei ewa lense nu binata etu, ai baria mbui sira modoko tanda nu binata etu i wingkera ba i palera. Etumo mpane tuwu mpesola sira mpane meparenta sira simbela-mbela ai i Kerisitu i rarana sansobu mpae. 5 Etumo pengkawangu nu tomate anu mpolinguruna. Agaiana tau ntanina anu mamate, baria mani sira rapatuwu mpesola, lako baria mani sopo sansobu mpae etu. 6 Morasi sira ai magali sira tau anu rapatuwu mpesola i pengkaore nu tomate anu mpolinguruna. Baria mpuu sira ina nakuasai nu kamate karombelana. Tau anu rapatuwu mpesola i pengkaore anu mpolinguruna etu, ina mewali sira tadulako menomba si Pue Ala ai si Kerisitu. Ina meparenta sira simbela-mbela ai i Kerisitu i rarana sansobu mpae.
Datu nu Seta rasuku
7 Awetu liumo sansobu mpae etu, Datu nu Seta ina rapawia lako i potarunggua ia, 8 mpane ina lau ia mopakanawu tau i sumalele dunia, anu rapandiri ewa Gog ai Magog.a Mewali Datu nu Seta etu, nagulumo sira tauna, bona nakeni sira lau mombeala. Kaworira ewa kaisi nu wungi i wiwi nu tasi. 9 Laumo sira i sambua pearia, mpane motolobui kota anu napokaasi ni Pue Ala anu rapearii nu tauNa. Agaiana ungangkidamo mendolu apu lako i langi mampopate sira. 10 Roo ewa etu, Datu nu Seta anu mopakanawu tau aretu, ratende i rara nu pearia anu maemba mpii i apu anu mambugi mpii ai anu mogate. Tasi apu etu iamo potendea binata anu maseke ai nabi anu mepakanawu. Ni se etu, rapopesiasi liliu sira duduuna kasae-saeana.
I Pue Ala mosuku tau anu madaa
11 Roo awetu, kuitamo sambua pomesoa nu datu anu mabose, lensena mabula, mpane kuita mbui sadua Tau anu momeso i wongko nu pomesoa etu. NakeningkamakuasaNa, langi ai dunia ungangkidamo matonto, bariamo ria. 12-13 Mpane kuita sira tau anu mamate, malompe anu baria kono raita katuwura ba anu kono raita katuwura, meongko sira i lio nu pomesoa etu. Tau anu mamate malinso i tasi ai ope-ope tau anu ria i pearia nu tomate, meongkomo sira ope-ope i lio nu pomesoa etu. Mpane sura-sura rabungkasimo. I rara nu sura-sura aretu, teuki babeia nu tomate aretu. Mewali, ope-ope tomate ina rasuku sintoto ai apa anu teuki i rara nu sura-sura aretu, karasukura mangula babeiara. Mpane rabungkasi mbuimo sura anu sambuana, sangana Sura Ngkatuwu. 14-15 Ope-ope tau anu baria teuki sangara i rara nu Sura Ngkatuwu, ratende i rara nu sambua pearia anu maemba mpii anu nabuketi nu apu. Roo awetu, bariamo ria kamate, bariamo ria pearia nu tomate, lawi ope-ope tau anu baria teuki sangara i rara nu Sura Ngkatuwu, batera ratende i rara nu sambua pearia anu maemba mpii anu nabuketi nu apu. Pesuku etu iamo kamate karombelana.