Langi ai dunia anu bou
21
1 Roo awetu, kuitamo langi ai dunia anu bou. Langi ai dunia anu mpolinguruna matonto, mpane tasi bariamo ria. 2 Mpane kuitamo kota anu magali, anu rasanga Yerusale anu bou. Kota etu mendolu mai lako si Pue Ala i suruga. Meawa mpuu kota etu, ewa sadua towawine anu ina rabua anu merae karabaduina, lawi ina dongka tomoane anu ina rabua ai ia. 3 Mpane kuepe sambua wotu lako i pomesoa kadatua anu manguli mauni-uni, “Ei-ei pearia ni Pue Ala ria simbela-mbela ai manusia. I Pue Ala ina meari simbela-mbela ai sira, mpane sira mewali tauNa. Ia saduduaNa ina mamporangai sira mpane mewali Puera. 4 Ia ina moparisi ope-ope ue mata anu moili lako i matara. Bariamo ria anu mamate, bariamo ria anu mapari rarana ba anu motumangi, bariamo ria anu madua. Ope-ope anu ni banimpia etu, liumo.”5 Roo awetu, nauli nu sadua Tau anu momeso i pomesoa nu datu, “Ei-ei ina Kupakabou sinangkana. Ukimode pololitaKu ei, lawi batena mamonso ai ina tepabukei mpuu.” 6 Lako ni se etu, Naulika mbuimo aku, “Sopomo! Aku iamo Alpa ai Omega. Aku anu Pepuuana ai anu Kasopoana. I tau anu mangkamara, Kukiraka sira ue lako i ulu ue anu moparia katuwu malompe anu baria mokasopoa. Ue etu Kukiraka ntoo si sira, baria paraluu rabalukira. 7 Ima anu menangi lako i kuasa anu madaa, ope-ope etu ina rasumbara. Aku ina mewali Puera mpane sira ina mewali AnaKu. 8 Agaiana tau sira anu maeka meula si Aku, tau anu baria sira mepotuu si Aku, tau anu madaa babeiara, topepopate, topobabei babeia anu merikati, topedoti, topenomba i anitu, ai topodongko, batera rasuku ope-ope i rara nu sambua pearia anu maemba mpii anu nabuketi nu apu anu mambugi mpii ai anu mogate. Etumo anu rauli kamate karombelana.”
PepopeitakaNa anu kaibana
I Yohane mangita Yerusale anu bou
9 Roo awetu, maimo sadua lako i malaeka anu pitu anu mopatoro pambolia anu buke ai pitu mpangkana pepopesiasi anu kasopoana. Malaeka etu mangulika aku, “Maingkomode, ina Kupopeitaka iko towawine anu rabua, iamo towawine nu Ana Dimba.”
10 Nakuasai aku nu Inosa Magali, mpane malaeka etu mangkeni aku lau i wowo bulu anu mabose ai mawane. Lako ni se etu, napopeitaka aku Yerusale, kota anu magali. Kuita kota etu mendolu mai lako si Pue Ala i suruga, 11 mewangka nakenimpeawa ni Pue Ala. Mengkila-ngkila ewa paramata anu masuli ai ewa paramata yaspis. Maninto ewa watu anu maninto. 12 Kota etu natoleliki nu bente anu mawane ai maroso. I bente etu, ria sampulu roogu bobokana. Sambua-sambua boboka nakampai nu sadua malaeka. Mpane i boboka-boboka aretu, teuki sanga-sanga ana ni Saraeli ni banimpia anu sampulu rodua. 13 Bente etu, iba sulapana, mpane sansulapa-sansulapa tolu mbua bobokana: tolu mbai i pensibea eo, tolu mbai moure, tolu mbai monsau, tolu mbai i kalimpaa eo. 14 Bente nu kota etu rawangu i wongko watu anu sampulu roogu, mpane i watu etu teuki sangara suro nu Ana Dimba anu sampulu rodua.
15 Malaeka anu mololita si aku etu, mopatoro sambua lai popesoka anu rababei lako i bulawa. Kota etu nasoka, ewa etu mbui bentena ai bobokana. 16 Kota etu iba sulapana. Karatena ai kapekana simbela. Malaeka etu moonamo palena i kota etu mosoka ai lai popesokana: karatena ronsobu iba atu kilo mete. Kapekana ai kawanena simbela ai karatena. 17 Bente nu kota etu nasoka mbui: kapekanaa aono mpulu mete. Popesoka anu napake nu malaeka etu simbela ai popesoka anu napake nu manusia. 18 Bente etu rababei lako i paramata anu masuli, sangana paramata yaspis. Kota etu rababei lako i bulawa anu bariamo ria galona anu mengkila ai maninto ewa kaca.
19 Watu peongkoa nu kota etu, rababei lako i sampulu rompangka watu paramata anu merae.
Anu mpolinguruna iamo watu anu maninto maalusu, sangana watu yaspis.
Anu karombuana iamo watu anu maninto malewau mpii ewa tasi anu malene, sangana watu nilam.
Anu katolu iamo watu anu bula mpane maninto, sangana watu mirah.
Anu kaiba iamo watu anu maninto malewau ewa tawe, sangana watu samrud.
20 Anu kalima iamo watu anu loba bula makamumu, sangana watu unam.
Anu kaaono iamo watu anu mawaaga maetaeta, sangana watu sardis.
Anu kapitu iamo watu anu meningki ai makuni ewa bulawa, sangana watu ratna cempaka.
Anu kawalu iamo watu anu malewau ewa teme nu tosi timboko, sangana watu beril.
Anu kasasio iamo watu anu makuni mpii anu maninto, sangana watu krisolit.
Anu kasampulu iamo watu anu malewau ewa loka anu baria mani mamongko, sangana watu krisopras.
Anu kasampulu isa iamo watu anu malewau ewa langi, sangana watu lasuardi.
Mpane anu kasampulu rooguna iamo watu anu maninto mpane makamumu, sangana watu kecubung.
21 Boboka anu sampulu roogu etu, ope-ope rababei lako i watu mutiara. Boboka aretu rababei lako i saogu mutiara anu mabose. Dala i kota etu rababei lako i bulawa anu bariamo ria galona anu mengkila-ngkila ewa kaca anu maninto.
22 Baria ria Tombi Penombaa anu kuita i rara nu kota etu, lawi i Pue Ala anu melumbu kuasaNa ai Ana Dimba anu mewali Tombi Penombaa i se etu. 23 Kota etu baria paraluu nasimbaki eo ba wula, lawi pewangka ni Pue Ala mopakabaa kota etu, mpane Ana Dimba mewali ewa sulo nu kota. 24 Ope-ope tau i dunia molumako i rara pewangkaina, mpane datu-datu i dunia mangkeni peawara mesua i rara nu kota etu. 25 Boboka-boboka bente nu kota etu, ina tebungkasi liliu eo-eona, ai baria ina ratuko, lawi kadedi bariamo ria. 26 Kapebuku ai pebila nu ope-ope tau, ina rakeni i rarana. 27 Agaiana apa anu merikati baria mpuu pensani mesua i rarana. Mewali, tau anu mobabei kadaa ba anu modongko, baria sira pensani mesua. Anu pensani mesua, batena ngkida tau anu teuki sangara i rara Sura nu Ana Dimba, sura poukia sanga nu tau sira anu mansumba katuwu malompe anu baria mokasopoa.