22
1 Malaeka etu mampopeitaka mbui aku sambua koro ue, anu uena moparia katuwu, anu maninto, uluna mensuwu lako i pomesoa nu datu anu napomesoi ni Pue Ala ai Ana Dimba. 2 Koro ue etu, moili i tongo-tongo dala i kota etu. Mpotimali wiwi ue etu, ria kau anu rasanga kau ngkatuwu.a Kau etu mowua sampulu rombela i rarana sampae, wula-wulana mowua. Tawena rapopakuli bona mopakaosa tau i sumalele dunia.b 3 I rara nu kota etu bariamo ria kapari.Pomesoa ni Pue Ala ai Ana Dimba ria i rara nu kota etu. Mpane tuduaNa ina menomba sira si Ia 4 ai ina mangita sira lioNa. Sanga ni Pue Ala teuki i wingkera. 5 Bariamo ria kawengi, tumpu nu kota etu baria sira moparaluu sulo ba pesimbaki eo, lawi i Pue Ala anu mowangkasi sira. Mpane ina meparenta sira ewa datu duduuna kasae-saeana.
Kasopoana lolita
6 Roo awetu, malaeka etu mangulika aku, “Ope-ope lolita ei batena mamonso ai ina tepabukei. I Pue Ala anu mokiraka InosaNa i ope-ope nabiNa, Iamo anu motudu malaekaNa mai mampopainsanika tuduaNa apa anu sangangaa bariamo masae ina mewali.”
7 Nauli ni Pue Yesu, “Bariamo masae ina dongka Aku! Morasi sira tau anu mampeulai patudu anu teuki i rara nu sura ei.”
8 Aku ei i Yohane, kuepe ai kuita ope-ope anu napopeitaka aku nu malaeka etu. Awetu kuepe ai kuita etu, molingkudumo aku motumpa i liona, bona menomba si ia. 9 Agaiana nasombo aku, nauli, “Inee! Inee iko menomba si aku! Si Pue Ala ngkida iko menomba. Lawi aku mbui tudua ni Pue Ala, simbela ai iko ai singka nabimu ai ope-ope tau anu mampeulai apa anu teuki i rara nu sura ei.” 10 Mpane naulika mbuimo aku, “Inee nuwunikai apa anu teuki i rara nu sura ei, lawi gompimo tempona.
11 Tau anu madaa, pogeaka liliu sira mobabei anu madaa.
Tau anu madosa, pogeaka liliu sira madosa.
Tau anu manoto, pogeaka liliu sira mobabei anu manoto.
Tau anu Napelisi, pogeaka liliu sira mobabei peundeaNa.”
12 Nauli ni Pue Yesu, “Bariamo masae ina dongka Aku, ai ina Kusurungi babeia nu ope-ope tau sira sintoto ai apa anu rababeira. 13 Aku ei Alpa ai Omega, iamo Pepuuana ai Kasopoana.
14 Matono sira tau anu mobakosi sampira duduuna maningku, etumo mpane pensani sira mesua i rara nu kota etu moliu i boboka, ai rapaliu sira mangkoni wua nu kau ngkatuwu. 15 Agaiana tau anu madaa, topedoti, topobabei babeia anu merikati, topepopate, topenomba i anitu, topodongko, ai tau anu mampokatono podongkora, baria sira rapaliu mesua i rara nu kota etu.
16 Akumo i Yesu anu motudu malaekaKu, bona mobambari si komi i jumaa-jumaa, ope-ope anu ina mewali. Aku ei pemulea ni Datu Daudi. Akumo Betue mbai i pensibea eo anu mewangka mpii.”
17 Inosa Magali ai towawine anu rabua manguli, “Maingkomode!” Ima anu mangepe lolita ei, sangangaa manguli, “Maingkomode!” Ima anu mangkamara, maingkomode! Ane niunde, maingkomode manginu ue anu moparia katuwu. Baria paraluu nibaluki!
18 Ima ngkida anu mangepe apa anu teuki i rara nu sura ei, kupopaingaka komi: ane ria tau anu motambai ba apa-apa i isi nu sura ei, i Pue Ala ina motambai mbui pesukuNa i tau etu: ina mansumba sira pepopesiasi anu teuki i rara nu sura ei. 19 Mpane ane ria tau anu mopakakura ba apa-apa i isi nu sura ei, i Pue Ala ina mopakakura mbui pewatiNa: bariamo sira pensani mangkoni wua nu kau ngkatuwu, ai baria sira pensani mesua i rara nu kota anu magali, ewa anu teuki i rara nu sura ei.
20 I Yesu anu mopadongka ope-ope lolita ei, Nauli, “Mamonso mpuu. Bariamo masae ina dongkamo Aku.”
Amin! Maingkomode, O Pue Yesu!
21 Mekakae aku bona i Pue Yesu mowati ope-ope tau ni Pue Ala lako i kabula nu raraNa.
Amin.