9
Aj Txik Tlajoꞌ Jesus Kye Txnaqꞌatz Pakbꞌal Tyol Qtata Dios
1 Te Jesus eꞌok xhchimoꞌ kykabꞌlajujil kye txnaqꞌatz bꞌix oxik tsiꞌ kypoder bꞌix kyajwalil tzan tjatz kyin kyaqil malspirit tuj kyanim xjal bꞌix tzan kyqꞌanan, 2 bꞌix exik tlajoꞌ pakbꞌal te tpakbꞌalil tiꞌj te tumeꞌl titzaꞌ tzan kykaj kye xjal tuj tqꞌabꞌ Qtata Dios bꞌix tzan kyqꞌanan xjal. 3 Oxik tqꞌumaꞌ kyetz ikxjani: “Kꞌontiꞌl tzan txik etin chꞌinwt tuj ebꞌey, kꞌontiꞌl tzan txik etin etzeꞌ ni jun ebꞌeꞌeq ni jun eweꞌ ni jun etumin ni junky moj eqꞌanaq.* 4 Oj etox tuj jun jay, ax tzi okxkajel max oj exik tuj junky amaqꞌ. 5 Bꞌix aj jaꞌ nlay kxkꞌamet, oj etetz tuj aj amaqꞌji, owelal ekyitoꞌ te quq tiꞌj etoq, nini telponx nyaꞌtx galan te aj maꞌtx kykꞌuluj.”* 6 Ntons ya ma kyeꞌex tzi, nkyekyꞌik tuq tuj jun aldey bꞌix yaji tuj junky, nkyepakbꞌan tuq te tpakbꞌalil galan tiꞌj Qtata Dios bꞌix nkyeqꞌanan tuq xjal jaꞌchq.
Aj Tbꞌisun Te Eródes Tiꞌj Te Jesus Qa Tetz A Tuq Te Waꞌnch Aj Swal Aꞌ
7 Ntons te Eródes aj nkꞌulun mandada tuq tiꞌj jun part te tkwentil Galiley, tetz owok xhchaꞌoꞌ tiꞌj Jesus bꞌix kyaqil aj nbꞌantik tuq titzaꞌ. Tetz bꞌan nbꞌisun tuq tzan tpaj junjun nkyqꞌumaꞌ tuq te Waꞌnch [Aj Swal Aꞌ] maꞌtx jaw anqꞌin kxol kye kamnaq. 8 Junjunky nkyqꞌumaꞌ tuq, te Eliys aj yolil tyol Dios oqtxiꞌ ojetq tuq jaw kanet junkyꞌel; bꞌix junjunky nkyqꞌumaꞌ tuq, te Jesus jun tlajen Dios oqtxiꞌ aj ojetq tuq jaw anqꞌin.* 9 Per te Eródes ntqꞌumaꞌ tuq ikxjani: “Wetz oxik nkꞌuluꞌ mandad tzan tel in twiꞌ te Waꞌnch. ¿Ntons abꞌl te xjal aj nꞌok nchaꞌoꞌ tidiꞌchq tiꞌjni?” Komo te Eródes nꞌok il tuq njoyon tumeꞌl tzan tok teꞌeꞌ.
Aj Txik Tsiꞌ Jesus Kyweꞌ Jwebꞌ Mil Xjal
10 Ntons ya ma kyemeltzꞌjik kye tkyꞌixel Jesus, oxik kyqꞌumaꞌ tetz kyaqil aj ojetq tuq qet kykꞌuluꞌ. Yaji te Jesus exik tukꞌleꞌ tzan kxik kchukel tukyꞌiꞌl tuj jun amaqꞌ Betsayd tbꞌi. 11 Ya ma tzꞌel kynikyꞌ kye xjal jaꞌ ikjaꞌn tuq kxik, ebꞌajxik tzan kypon aj jaꞌ tuq opoyon tetz. Yatzun te Jesus aj tpon, etkꞌamoj bꞌix oxik tyoliꞌ kyukyꞌiꞌl tiꞌj te tumeꞌl titzaꞌ tzan kykaj tuj tqꞌabꞌ Qtata Dios, bꞌix ebꞌajqet tqꞌanaꞌ kye yabꞌ.
12 Yaji ikjaꞌn tuq tex te qꞌij, kye kykabꞌlajujil txnaqꞌatz eꞌok laqꞌchet tiꞌj Jesus bꞌix oxik kyqꞌumaꞌ tetz ikxjani: “Pakawin chꞌin kyukyꞌiꞌl kye xjal, bꞌix inkxik alajoꞌ kyuj kye aldey bꞌix jaꞌchq jay qaynin tzani, aj jaꞌ bꞌaꞌn tzan kyposadin bꞌix tzan kywaꞌan, komo tzani kꞌontiꞌl jay.” 13 Ntons te Jesus oxik tqꞌumaꞌ kyetz ikxjani: “Inkxik ekꞌaꞌchaꞌ etetz.” Yaji kyetz oxik kyqꞌumaꞌ: “Qetza kꞌontiꞌl tidiꞌ at. Cha aꞌox jwebꞌ wabꞌj bꞌix kabꞌeꞌ kyiy at. Aꞌox qa ma qoxika loqꞌol kyweꞌ kyaqil ja xjalni.” 14 Komo qanq at tuq jwebꞌ mil (5000) ichan tzan kyaqil. Ntons te Jesus oxik tqꞌumaꞌ kye txnaqꞌatz ikxjani: “Inkyqet ewitꞌbꞌaꞌ kye xjal, junjun bꞌuchꞌuj te lajuj tuj oxqal (50) xjalchaq junjun.” 15 Ntons oqet kykꞌuluꞌ ikxji, bꞌix kkyaqil kye xjal ebꞌajqet witꞌlet. 16 Ntons te Jesus ojaw stzyuꞌ kye jwebꞌ wabꞌj bꞌix kye kabꞌeꞌ kyiy, ojax ten twitz kaꞌj bꞌix oxik tsiꞌ pixon te Qtata Dios. Yaji oqet tpawaꞌ te wabꞌj bꞌix nxik tuq tsipaꞌ kye txnaqꞌatz tzan txik ksipaꞌ kyetz kye xjal. 17 Kyaqil kye xjal ebꞌajwaꞌan bꞌix ebꞌajnoj byenech, bꞌix tiꞌj te aj osobrin ojaw kchimoꞌ kabꞌlajuj chiꞌl.
Aj Txik Tqꞌumaꞌ Xhpeꞌy Abꞌl Tuq Te Jesus
18 Ntons jun qꞌij aj nxnaqꞌtzan tuq te Jesus xhchukel kyukyꞌi txnaqꞌatz, oxik xhchaꞌoꞌ kyetz ikxjani: “¿Abꞌl aꞌin tuj kynabꞌl kye xjal?” 19 Ntons kyetz oxik kyqꞌumaꞌ tetz ikxjani: “Junjun nkyqꞌumaꞌ, aꞌich te Waꞌnch Aj Swal Aꞌ, bꞌix junjunky nkyqꞌumaꞌ, yatz aꞌich Eliys qatzun jun aj yolil tyol Dios oqtxiꞌ aj maꞌtx jaw anqꞌin.”* 20 Yaji tetz oxik xhchaꞌoꞌ kyetz ikxjani: “Yatzun etetz tuj enabꞌl ¿abꞌl aꞌin etetz tuj enabꞌl?” Ntons tzaj te Xhpeꞌy, oxik tqꞌumaꞌ ikxjani: “Yatz aꞌich te Koloyon Aj Qꞌumankaj Oqtxiꞌ tzan te Qtata Dios.”* 21 Per yaji te Jesus exik tkawiꞌ byenech tzan kꞌon txik kyqꞌumaꞌ te nijunwt.
Aj Txik Tqꞌumaꞌ Jesus Tiꞌj Tkamiky
22 Bꞌix oxik tqꞌumaꞌ kyetz ikxjani: “Presiskix tzan tkyꞌik nim xhchoꞌnal wiꞌj [wetz] te Ichan Aj Tkꞌwaꞌal Dios [aꞌin], bꞌix okyinꞌelal ikꞌoꞌ tzan kye tijxjal aj nim kyajwalil bꞌix tzan kye pal aj nim kyajwalil bꞌix kye xnaqꞌtzal Kawbꞌil, bꞌix presiskix tzan nkamik bꞌix tzan njaw anqꞌin tuj toxiꞌn qꞌij.” 23 Tetz nxik tuq tqꞌumaꞌ ikxjani kye kyaqil: “Abꞌl aj tgan tzan tok lapet wiꞌj, ntons bꞌajqꞌij a tgan tzan tkaj tkolaꞌ te aj cha nꞌel tganiꞌ, a tgan tzan sten dispwest tzan tok ten twitz tkamiky tzan npaj wetz,b bꞌix ntons intok lapet wiꞌj. 24 Komo abꞌl aj cha njoyon tumeꞌl tzan tkolon tibꞌx tzan tanqꞌin, opoyonaj kixiꞌ; yatzun te aj okamel tzan tpaj tokslbꞌen wiꞌj, tetz otkambꞌaꞌtz jun tanqꞌin.* 25 Komo ¿tidiꞌ token qa jun xjal otkambꞌaꞌtz kyaqil aj at tzani twitz ja txꞌoꞌtxꞌni per qa axk tetz opoyon tnajsaꞌx tanqꞌin? 26 Komo abꞌl te aj okyꞌixwel wiꞌj bꞌix tiꞌj te npakbꞌalil, ntons tiꞌj tetz ax [wetz] te Ichan Aj Tkꞌwaꞌal Dios [aꞌin] okyinqtel kyꞌixwik tiꞌj oj wul wetz tukyꞌi nim wajwalil bꞌix tukyꞌi tajwalil te Ntat bꞌix kyukyꞌi kye ángel aj pawameꞌ te Qtata Dios. 27 Wetz oxeꞌl nqꞌumaꞌ etetz te bꞌanꞌax, junjun exol etetz tzani nlay kyekamik max oj tok kyen chaꞌoj tkꞌulun mandad te Qtata Dios [tukyꞌi nim tajwalil tzani twitz txꞌoꞌtxꞌ].”
Aj Xhchukjik Tkaꞌyin Jesus
28 Ntons ya ma kyꞌik jun saman txiklen tqꞌumaꞌ ja tyol ikxjani, ntons ebꞌajxik tukꞌleꞌ tukyꞌiꞌl, te Xhpeꞌy, Waꞌnch bꞌix Jacobo,c bꞌix exik twiꞌ jun witz xnaqꞌtzon. 29 Aj man tuq nxnaqꞌtzan te Jesus, ojaw kyꞌixpjik tkaꞌyin bꞌix te tqꞌanaq owok bꞌan saq bꞌix ntxaqtxon. 30 Yaji ejaw kanet kabꞌeꞌ xjal nkyeyolin tuq tukyꞌiꞌl, jun te [tzqan] Moisés* tuq bꞌix te junky te [tzqan] Eliys,* 31 bꞌix kxik eꞌen bꞌan nkyetxaqtxon tuq bꞌix nkyeyolin tuq tukyꞌi Jesus tiꞌj aj okyꞌel tuq tiꞌj tuj Jerusalen, tetz chꞌinky tuq tkamik tzan tkyꞌik kyaqil aj oje qet tzꞌibꞌaꞌ tiꞌj oqtxiꞌ. 32 Ntons, te Xhpeꞌy bꞌix kye tukyꞌiꞌl bꞌan ajun kywatl tuq, per ya ma tzꞌel kywatl byenech, oxik kyen xhchqitzꞌunal te Jesus bꞌix kye kabꞌeꞌky xjal aj akyeqet tuq tukyꞌiꞌl. 33 Bꞌix aj man tuq ikjaꞌn kxik kye kabꞌeꞌ xjal, te Xhpeꞌy oxik tqꞌumaꞌ te Jesus ikxjani: “Xnaqꞌtzon, galan qa aqoqetna tzani. Ojawel jkꞌuluꞌna ox tal pach, jun te yatz bꞌix jun te Moisés bꞌix jun te Eliys.” Komo te Xhpeꞌy kꞌontiꞌl tuq nꞌel tnikyꞌ tidiꞌ nxik tqꞌumaꞌ, cha nxik-oq tyoliꞌ. 34 Aj man tuq nyolin ikxjani, oqet jun muj kyiꞌj, bꞌix aj ikjaꞌn tqet te muj kyiꞌj, te Xhpeꞌy bꞌix kye txqꞌanky ebꞌajxobꞌ. 35 Ntons tuj te muj otzaj yolin te Qtata Dios, otzaj tqꞌumaꞌ ikxjani: “Aj ntzani wetz nkꞌwaꞌal aj joyomaj witzaꞌ.* Intok esiꞌ ewiꞌ tiꞌj.” 36 Yaji, ya ma mankun tyolin, ntons te Jesus okaj xhchukel junkyꞌel kyukyꞌiꞌl. Per kyetz cha oqet kyewaꞌ kyaqil, kꞌontiꞌl oxik kyqꞌumaꞌ te nijunwt te aj ojetq tuq tzꞌok kyen.
Aj Tqet Tqꞌanaꞌ Jesus Jun Kꞌwaꞌl Aj At Tuq Jun Malspirit Tuj Tanim
37 Yaji tuj junky iwitq, aj ojetq tuq kyemeltzꞌjik twiꞌ te witz, kyꞌilaꞌj xjal ebꞌajpon kanol tetz. 38 Kxol kye xjal at tuq jun ichan aj ojaw sikyꞌin kongan ikxjani: “Xnaqꞌtzon, nqet nwitz awitz tzan tok awen chꞌin te nkꞌajol, aꞌox jun chꞌi nkꞌajol nini. 39 Tetz tzyuꞌ tzan jun malspirit aj ntkꞌuluꞌ tzan tjaw sikyꞌin bꞌix nxik tsiꞌ atak tiꞌj bꞌix ntkꞌuluꞌ tzan tpulutin stziꞌ. Kꞌontiꞌl nkaj stzoqpiꞌ luwew bꞌix ikjaꞌn tpon tnajsaꞌ. 40 Wetz maꞌtx qet nwitz kywitz kye axnaqꞌatz tzan tuq tjatz kyin per kꞌontiꞌl ma bꞌantik kyitzaꞌ.” 41 Yaji te Jesus oxik tqꞌumaꞌ ikxjani: “Etetz kꞌontiꞌl nꞌox tuj ewiꞌ bꞌix cha nkxbꞌisun nyaꞌtx tumeꞌl. ¿Janikꞌbꞌaꞌnx-alo tzunx okyinqtelten exol bꞌix janikꞌbꞌaꞌnx okxwipaꞌtz? Instzaj awin akꞌajol tzani.” 42 Aj man tuq ikjaꞌn tpon laqꞌchet te kꞌwaꞌl, te malspirit oqet txoꞌoꞌ te kꞌwaꞌl twitz txꞌoꞌtxꞌ bꞌix oxik tsiꞌ atak tiꞌj. Per te Jesus oxik tkꞌuluꞌ mandad tzan tjatz te malspirit, oqet tqꞌanaꞌ te kꞌwaꞌl bꞌix okaj tqꞌapoꞌ tuj tqꞌabꞌ stat.
Aj Txik Tqꞌumaꞌ Jesus Tkaꞌmjjiꞌn-el Tiꞌj Tkamiky
43 Ntons kyaqil kye xjal bꞌan nkyelabꞌan tuq tiꞌj tajwalil te Qtata Dios. Kyetz nkyechalaj tuq, nkyeyolin tuq galan tiꞌj kyaqil aj nqet tuq tkꞌuluꞌ, per yatzun te Jesus oxik tqꞌumaꞌ kye txnaqꞌatz ikxjani: 44 “Intox tuj ewiꞌ bꞌan byenech te aj oxeꞌl nqꞌumaꞌni. [Wetz] te Ichan Aj Tkꞌwaꞌal Dios [aꞌin] okyinxeꞌl qꞌapoꞌ tuj kyqꞌabꞌ kye xjal.” 45 Per kyetz kꞌontiꞌl owel kynikyꞌ tiꞌj aj oxik tqꞌumaꞌ tzan tpaj txayiꞌ tuq te kywitz, kꞌontiꞌl owel kynikyꞌ tiꞌj, bꞌix ax nkyexobꞌ tuq tzan txik kyqaniꞌ tukyꞌiꞌl tidiꞌ telponx.
Aj Txik Tyoliꞌ Jesus Abꞌl Te Aj Mas Nim Tajwalil Twitz Junky
46 Ntons kxol kye txnaqꞌatz ebꞌajjaw wululun tzan tpaj nkyeyolin tuq abꞌl tuq jun te kyetz owokel mas nim tajwalil kxol.* 47 Per te Jesus owel tnikyꞌ tiꞌ tuq nkybꞌisuꞌ tuj kyanim, astilji otzaj teqꞌiꞌ jun kꞌwaꞌl bꞌix oqet tsiꞌ tkꞌatzaj 48 bꞌix oxik tqꞌumaꞌ kyetz ikxjani: “Abꞌl aj otkꞌamoꞌtz ja kꞌwaꞌl tzan npaj wetz, ntons [aꞌin nkyintkꞌamoꞌ]; bꞌix abꞌl te aj nkyintkꞌamoꞌ, ntons nkꞌamon te aj otzaj lajon te wetz.* Komo te aj mas kꞌontiꞌl jiqꞌbꞌaꞌ exol etetz, aji tetz te aj mas jiqꞌbꞌaꞌ tuj twitz te Qtata Dios.”
Te Aj Nyaꞌtx Qajqꞌoj, Tetz Jun Qukyꞌiꞌl Qibꞌ
49 Ntons te Waꞌnch owaj stzaqꞌbꞌeꞌ ikxjani: “Xnaqꞌtzon, qetza owok qena jun xjal, nkyejatz teqꞌiꞌ tuq malspirit tuj kyanim xjal tzan tpaj nxik tqꞌumaꞌ tuq abꞌi, per qetza owel qin gan tetz tzan tpaj kꞌontiꞌl ajun qxol.” 50 Ntons te Jesus oxik tqꞌumaꞌ tetz ikxjani: “Kꞌon tzꞌel etin gan tetz. Komo abꞌl kye aj kꞌontiꞌl nqoꞌok kyajqꞌojaꞌ, dyakwerd ateꞌ qukyꞌiꞌl.”
Aj Tel Ikꞌoꞌ Jesus Tzan Kye Aj Samary
51 Ntons jun qꞌij, aj chꞌinky tuq tpon tyemp tzan txik te Jesus tuj kaꞌj, tetz oxik Jerusalen per tukyꞌi jun tkꞌuꞌjlal. 52 Ebꞌajxik tlajoꞌ tmandader tbꞌayon twitz tuj jun aldey aj jaꞌ nkyenajan kye aj Samary, tzan tok kyjoyoꞌ jaꞌ bꞌaꞌn tuq tzan kyposadin. 53 Per kye xjal tzi kꞌontiꞌl okykꞌamoj tzan tpaj kyebꞌenky tuq tetz ikjaꞌn tuq txik tuj te amaqꞌ Jerusalen.d 54 Ya ma tzꞌok kyen ikxji, te Jacoboe bꞌix Waꞌnch, aꞌeꞌ aj txnaqꞌatz Jesus, kyetz oxik kyqꞌumaꞌ tetz ikxjani: “Tat, ¿agan peꞌ tzan txik jkꞌuluꞌ mandad tzan stzaj qꞌaqꞌ tuj kaꞌj kyajsik tzan kyponaj?”* 55 Ntons tetz owaj kaꞌyin kyiꞌj bꞌix exik tkawiꞌ.f 56 Yaji ebꞌajxik tuj junky aldey.g
Kye Aj Kygan Tuq Tzan Kyok Lapet Tiꞌj Jesus
57 Aj man tuq nkyebꞌet tuj bꞌey, jun xjal oxik tqꞌumaꞌ te Jesus ikxjani: “Tat, wetz okyinꞌokel lapet awiꞌj. Aj jaꞌ otxeꞌl yatz, ax okyinxeꞌl wetz.” 58 Ntons te Jesus oxik tqꞌumaꞌ tetz ikxjani: “Kye xhiꞌwl at kyjul, bꞌix kye pichꞌ kyetz at kyqꞌuꞌ, per [wetz] te Ichan Aj Tkꞌwaꞌal Dios [aꞌin] kꞌontiꞌl jaꞌ bꞌaꞌn tzan nqet ojlan chꞌin.”
59 Ntons oxik tqꞌumaꞌ tukyꞌi junky xjal ikxjani: “Pawok lapet wiꞌj.” Per tzaj te xjal, oxik tqꞌumaꞌ tetz ikxjani: “Tat, tkamik-yun tbꞌay te ntat, maxji okyinꞌokel lapet awiꞌj.” 60 Yaji oxik tqꞌumaꞌ te Jesus tetz: “Qaltetz, kye aj kamnaqeꞌ intqex kymuquꞌ kye kymuqenx, per yatz pax bꞌix intxik apakbꞌaꞌ te tpakbꞌalil tiꞌj te tumeꞌl titzaꞌ tzan kykaj kye xjal tuj tqꞌabꞌ Qtata Dios.”
61 Ntons tzaj junky xjal, oxik tqꞌumaꞌ tetz ikxjani: “Tat, wetz okyinꞌokel lapet awiꞌj, per tzoqpij chꞌin tzan nxik kawil kye aꞌeꞌ aj tuj njay.” 62 Per tzaj te Jesus, oxik tqꞌumaꞌ tetz ikxjani: “Abꞌl aj nꞌok lapet wiꞌj bꞌix kabꞌ tkꞌuꞌj, tetzji nyaꞌtx galan tzan taqꞌunan tzan kykaj xjal tuj tqꞌabꞌ Qtata Dios.”h