17
Aj Tkyꞌixpjik Tkaꞌyin Jesus Twiꞌ Jun Witz
1 Ntons tkyꞌiklen waqaq qꞌij, te Jesus exik tukꞌleꞌ tukyꞌiꞌl te Xhpeꞌy bꞌix Jacoboa bꞌix Waꞌnch aj titzꞌin te Jacobo, bꞌix exik tukꞌleꞌ tzan kxik twiꞌ jun witz kchukel tukyꞌiꞌl. 2 Bꞌix tzi, kyetz owok kyen aj tkyꞌixpjik tkaꞌyin te Jesus bꞌix te twitz otxaqtxon iktzaꞌ toq qꞌij bꞌix te tqꞌanaq owok bꞌan sjapun iktzaꞌ toq qꞌij.* 3 Bꞌix ax ejaw kanet junx tukyꞌiꞌl te Moisés bꞌix Eliys [aj aꞌeꞌ tlajen Qtata Dios oqtxiꞌ], nkyeyolin tuq tukyꞌiꞌl.
4 Ntons tzaj te Xhpeꞌy, oxik tqꞌumaꞌ te Jesus ikxjani: “Tat, galan qa aqoqetna qetza tzani; qa yatz agan ojawel jkꞌuluꞌna ox tal pach, jun te yatz bꞌix jun te Moisés bꞌix junky te Eliys.”
5 Aj man tuq nyolin te Xhpeꞌy, derepent jun chkꞌatunal otxaqtxon tuj muj oqet kyiꞌj bꞌix yaji otzaj qꞌolbꞌen [te Qtata Dios] ikxjani: “Aj ntzani wetz nkꞌwaꞌal aj nqet nganiꞌ bꞌix bꞌan nkyinchalaj tiꞌj. Intok esiꞌ ewiꞌ tiꞌj tetz.”*
6 Ya ma xik kchaꞌoꞌ ikxjani kye txnaqꞌatz, kyetz eqet mejlet tukyꞌi tajsik kywitz max twitz txꞌoꞌtxꞌ bꞌix ebꞌajxobꞌ nim. 7 Ntons te Jesus owok laqꞌchet kyiꞌj bꞌix oxik tqꞌumaꞌ kyetz ikxjani: “Peꞌejaw waꞌlet waq bꞌix kꞌon kxobꞌ.” 8 Ya ma jaw kyeqꞌiꞌ kywitz jawnaq kꞌontiꞌl oxik kyeꞌeꞌ kye txqꞌanky sinoke aꞌox te Jesus xhchukel tuq atqet. 9 Aj man tuq ikjaꞌn kyqetz twiꞌ te witz, te Jesus oxik tkꞌuluꞌ mandad kyetz ikxjani: “Kꞌon xik eqꞌumaꞌ te nijunwt aj maꞌtx tzꞌok eteꞌeꞌ, max oj njaw anqꞌin kxol kye kamnaq [wetz] te Ichan Aj Tkꞌwaꞌal Dios [aꞌin].”
10 Ntons kye txnaqꞌatz oxik kchaꞌoꞌ tetz ikxjani: “¿Tistil nkyqꞌumaꞌ kye xnaqꞌtzal Kawbꞌil qa presis tzan tul te Eliys tbꞌayaꞌ [twitz te Koloyon Aj Qꞌumankaj Oqtxiꞌ]?”*
11 Yaji te Jesus oxik tqꞌumaꞌ ikxjani: “Bꞌanꞌax te Eliys uleꞌ tetz, bꞌix aji tetz oqtel tkꞌuluꞌ kyaqil tuj tumeꞌl. 12 Per wetz oxeꞌl nqꞌumaꞌ etetz, te Eliys oje tzul, bꞌix kꞌontiꞌl owel kynikyꞌ tiꞌj, sinoke oqet kykꞌuluꞌ tidiꞌchq tukyꞌiꞌl iktzaꞌ tuq kyetz kygan. Ax ikxji [wetz] te Ichan Aj Tkꞌwaꞌal Dios [aꞌin] owokel wen twitz xhchoꞌnal tzan kypaj.” 13 Ntons kye txnaqꞌatz owel kynikyꞌ tiꞌj, tetz nyolin tuq tiꞌj te Waꞌnch Aj Swal Aꞌ.*
Aj Tqet Tqꞌanaꞌ Jesus Jun Kꞌwaꞌl Yabꞌ Tuq Tzan Tpaj Jun Malspirit
14 Ya ma kyepon aj jaꞌ tuq akyeqet txqꞌan xjal chimoꞌ kyibꞌ, opon twitz Jesus jun xjal bꞌix oqet mejlet twitz bꞌix oxik tqꞌumaꞌ tetz ikxjani: 15 “Tat, intok loꞌet chꞌin akꞌuꞌj tiꞌj nkꞌwaꞌal tzan tpaj nꞌukul atak tiꞌj bꞌix nꞌok ten twitz nim xhchoꞌnal. Kyꞌilaꞌj-el nqet tzꞌaqik tuj qꞌaqꞌ bꞌix tuj te nim aꞌ. 16 Wetz ma tzul win kywitz kye axnaqꞌatz per kꞌontiꞌl ma bꞌantik tzan tqet kyqꞌanaꞌ.”
17 Yaji te Jesus oxik tqꞌumaꞌ ikxjani: “Etetz kꞌontiꞌl nꞌox tuj ewiꞌ bꞌix cha nkxbꞌisun nyaꞌtx tumeꞌl. ¿Janikꞌbꞌaꞌnx-alo a tgan tzan nten etukyꞌiꞌl [tzan etokslan]? ¿Janikꞌbꞌaꞌnx-alo a tgan tzan wipan etetz? Instzaj awin akꞌajol tzani.” 18 Ntons te Jesus oxik tiliꞌ te malspirit bꞌix ojatz teqꞌiꞌ tuj tanim te kꞌwaꞌl, bꞌix bꞌeyxnajji obꞌantik te kꞌwaꞌl.
19 Yaji kye txnaqꞌatz ebꞌajyolin apart tukyꞌi Jesus bꞌix oxik kchaꞌoꞌ tetz ikxjani: “¿Tistil kꞌontiꞌl ma bꞌantik tzan tjatz te malspirit qitzaꞌna?” 20 Yaji te Jesus oxik tqꞌumaꞌ kyetz ikxjani: “Tzan tpaj etetz nyaꞌtx nim witꞌlik ekꞌuꞌj tiꞌj te Qtat. Oxeꞌl nqꞌumaꞌ etetz te bꞌanꞌax, cha witꞌlik-wit ekꞌuꞌj chꞌimuꞌs, iktzaꞌ jun tbꞌaqꞌ mostas [bꞌan chꞌi nekit], ntons bꞌaꞌn-tal tzan txik eqꞌumaꞌ te ja witzni “pawel tzani bꞌix pax tuj junky luwar” bꞌix te witz owelal. Ikxji kꞌontiꞌl jun tidiꞌ aj nlay-wit bꞌantik etitzaꞌ.* 21 Per yatzun ja txakl malspiritni, aꞌox njatz oj qxnaqꞌtzan bꞌix oj qipan waꞌij.”b
Aj Tyolin Jesus Tkaꞌmjjiꞌn-el Tiꞌj Tkamiky
22 Ntons aj man tuq nkyebꞌet junx kkyaqil tuj tkwentil Galiley, te Jesus oxik tqꞌumaꞌ kyetz ikxjani: “[Wetz] te Ichan Aj Tkꞌwaꞌal Dios [aꞌin] okyinxeꞌl qꞌapoꞌ tuj kyqꞌabꞌ xjal, 23 bꞌix okyinqtel kykansaꞌ; per tuj toxiꞌn qꞌij okyinjawel anqꞌin.” Aj tok kchaꞌoꞌ ja tpakbꞌalil ntzani, kyetz oje kyebꞌisun nim.
Aj Txik Xhchojoꞌ Jesus Te Chojenj Tiꞌj Te Nin Jay Nabꞌil Qtata Dios
24 Aj tpon te Jesus bꞌix kye txnaqꞌatz tuj Capernaúm, kye aj peyul chojenjc tiꞌj te Nin Jay Nabꞌil Qtata Dios eꞌok laqꞌchet tiꞌj Xhpeꞌy bꞌix oxik kchaꞌoꞌ tetz ikxjani: “¿Te xnaqꞌtzon te etetz, kꞌontiꞌl peꞌ nchojon?” 25 “Tzun, nchojon” kyi te Xhpeꞌy. Ya ma tzꞌox te Xhpeꞌy tuj te jay, te Jesus oxik tqꞌolbꞌeꞌ tbꞌayaꞌ bꞌix oxik tqꞌumaꞌ ikxjani: “¿Titzaꞌ yatz tuj anabꞌl Simon? ¿Abꞌl qiꞌj nkyepeyun alkabal bꞌix chojenj kye kꞌulul mandad twitz ja txꞌoꞌtxꞌni? ¿Kyiꞌjx kye tkꞌwaꞌal amaqꞌ qatzun kyiꞌj kye aj nyaꞌtx tkꞌwaꞌal amaqꞌ aj nkyeꞌulji?” 26 Ntons te Xhpeꞌy owaj stzaqꞌbꞌeꞌ ikxjani: “Kyiꞌj kye aj nyaꞌtx tkꞌwaꞌal amaqꞌ.” Yaji te Jesus oxik tqꞌumaꞌ ikxjani: “Ntons kye tkꞌwaꞌal amaqꞌ kꞌontiꞌl nkyechojon. 27 Per tzan kꞌon jkaj nyaꞌtx galan tuj kywitz, pax tuj te nim aꞌ bꞌix intqex asiꞌ te answel bꞌix te tbꞌay kyiy aj ojawetz awin, oj tjaw ajaqoꞌ stziꞌ, owelatz awin jun tmin; oxeꞌl awin bꞌix oxeꞌl achojoꞌ te nchojen wetz bꞌix te yatz.”