Te Tpakbꞌalil Galan Tiꞌj Te Qajaw Jesukrist Aj Oqet Stzꞌibꞌaꞌ Mak
1
Aj Txik Tqꞌumaꞌ Waꞌnch Tyol Dios Bꞌix Aj Tjaw Tsiꞌ Aꞌ Kywiꞌ Xjal
1 Bwen, ntons te tpakbꞌalil galan tiꞌj Jesukrist Tkꞌwaꞌal Dios owaqꞌik ikxjani: 2 Owaqꞌik iktzaꞌx oqet tzꞌibꞌaꞌ tzan te Chay aj yolil tyol Dios oqtxiꞌ, oqet stzꞌibꞌaꞌ tyol Qtata Dios ikxjani:a “Tzaj awen, oxeꞌl nlajoꞌ jun yolil nmandad tbꞌayon awitz tzan txik tqꞌumaꞌ kye xjal tzan kyten list chaꞌoj apon kyukyꞌiꞌl.* 3 Tuj te luwar kyꞌixkꞌoj txꞌoꞌtxꞌ aj jaꞌ kꞌontiꞌl najayon, tetz oxeꞌl tpakbꞌaꞌ kongan ikxjani: ‘Intqet ekꞌuluꞌ etibꞌ tzan tpaj tzul te Qajawil; intjaw ekyꞌixpuꞌ enabꞌlin tzan ekꞌamon te Qajawil.’ ”*
4 Bwen, astilji at tuq jun xjal Waꞌnch tbꞌi bꞌix njaw tuq tsiꞌ aꞌ kywiꞌ xjal tuj jun luwar kyꞌixkꞌoj txꞌoꞌtxꞌ aj jaꞌ kꞌontiꞌl najayon. Nxik tpakbꞌaꞌ tuq tzan tjaw aꞌ kywiꞌ tzan tpaj tjawlen kkyꞌixpuꞌ kynabꞌlin tzan tuq tqet najsaꞌ kchoj. 5 Nkyepon tuq tukyꞌi Waꞌnch bꞌan kyꞌilaꞌj xjal tzajnaqeꞌ tuq tuj kyaqil tkwentil Judey bꞌix ax kye aj amaqꞌ Jerusalen. Njatz tuq kyqꞌumaꞌ kchoj bꞌix njaw tuq siꞌ aꞌ kywiꞌ tzan Waꞌnch tuj te Jordan Aꞌ. 6 Te Waꞌnch tetz tqꞌanaq cha stzamal tuq kway kamey bꞌix te tkꞌalel tzꞌuꞌm tuq bꞌix te tweꞌ cha kochiꞌ tuq tukyꞌi taꞌal tzeꞌ.* 7 Nxik tpakbꞌaꞌ tuq kye xjal ikxjani: “Wetz ajnaꞌl atinqet per yajxiꞌ tzul junky aj mas nim tajwalil nwitz; wetz twitz tetz kꞌontiꞌl npon wajwalil ni iktzaꞌ jun aqꞌunon aj nꞌel tkotpiꞌ txajabꞌ tajaw.b 8 Wetz oje jaw nsiꞌ aꞌ ewiꞌ per te aj tzul, tetz otzajel tsiꞌ te Txew Dios tuj etanim.”
Aj Tjaw Siꞌ Aꞌ Twiꞌ Jesus Tzan Waꞌnch
9 Bwen, tuj aj tyempji te Jesus owex tuj amaqꞌ Nasaret tuj tkwentil Galiley bꞌix opon stziꞌ te Jordan Aꞌ, tzi ojaw siꞌ aꞌ twiꞌ tzan Waꞌnch. 10 Aj tjatz tuj te aꞌ, ojax ten te kaꞌj ojetq tuq tzꞌel jaqlik bꞌix ojax ten ikjaꞌn tuq tqetz te Txew Dios tiꞌj iktzaꞌ jun palom ikjaꞌn tqetz 11 bꞌix oxik chaꞌoꞌ te Qtata Dios, otzaj yolin tuj kaꞌj ikxjani: “Yatz aꞌich nkꞌwaꞌal aj ganimich nim witzaꞌ. Nkyinchalaj awiꞌj.”*
Aj Tqet Kꞌuluꞌ Probar Jesus Tzan Te Tajaw Choj
12 Bwen, yaji te Jesus oxik eqꞌiꞌ tzan te Txew Dios tuj te kyꞌixkꞌoj txꞌoꞌtxꞌ aj jaꞌ kꞌontiꞌl najayon. 13 Onachqꞌin kawnaq (40) qꞌij tuj aj luwarji bꞌix atqet tuq kxol txkup tuj kꞌul bꞌix te Satanas nxik tqꞌumaꞌ tuq tiꞌchq tetz tzan tqet tuq tzꞌaqik titzaꞌ. Yaji kye ángel eꞌonen tiꞌj.
Aj Taqꞌik Txnaqꞌtzan Jesus Kxol Kye Xjal Aj Galiley
14 Bwen, yaji te Waꞌnch oqex siꞌ tuj pres, bꞌix yatzun te Jesus oxik Galiley, npakbꞌan tuq te tpakbꞌalil galan tiꞌj titzaꞌ te Qtata Dios nkolon qiꞌj. 15 Nxik tuq tqꞌumaꞌ ikxjani: “Maꞌtx pon te tyemp bꞌix ajnaꞌl okꞌuluyon mandad te Qtata Dios exol tukyꞌi nim tajwalil. ¡Intjaw ekyꞌixpuꞌ waq enabꞌlin! ¡Intxik etokslaꞌ waq te tpakbꞌalil galan!”*
Aj Ktzaj Tukꞌleꞌ Jesus Kaj Tzyul Kyiy Tzan Kyok Lapet Tiꞌj
16 Bwen, jun qꞌij te Jesus nbꞌet tuq stziꞌ te Galiley Aꞌ bꞌix oxik ten kabꞌeꞌ xjal bꞌix kye xjal kyerman tuq kyibꞌ. Jun Simon tuq bꞌix te junky Lexh. Kyetz kyaqꞌun tzyul kyiy tuq bꞌix nqex ksiꞌ tuq kypa tuj te aꞌ tzan tjatz kyin kye kyiy. 17 Yaji oxik tqꞌumaꞌ Jesus kyetz: “Se etok lapet wiꞌj, bꞌix wetz oxeꞌl nsiꞌ junky etaqꞌun, per [nyaꞌtx chimol kyiy sinoke] kxchimoyon xjal te Qtata Dios.” 18 Ntons okaj naj ksiꞌ te kypa bꞌix eꞌok lapet tiꞌj Jesus.
19 Ntons yaji exik bꞌet chꞌimusit stziꞌ-eleꞌ aꞌ bꞌix te Jesus oxik teꞌeꞌ kabꞌeꞌky xjal, aꞌeꞌ tkꞌajol Sebedey. Jun Jacoboc tuq tbꞌi bꞌix te junky Waꞌnch, bꞌix kyetz nkyexbꞌuqin tuq kypa tuj kybark. 20 Te Jesus exik tukꞌleꞌ te Jacobo tukyꞌi Waꞌnch bꞌix kyetz okaj naj ksiꞌ te kytat kyukyꞌi kye kymos tuj te bark bꞌix eꞌok lapet tiꞌj.
Aj Tjatz Teqꞌiꞌ Jesus Jun Malspirit Tuj Tanim Jun Ichan
21 Ntons te Jesus kyukyꞌi aꞌeꞌ tukyꞌiꞌl exwaꞌq tuj amaqꞌ Capernaúm. Aj tpon te qꞌij ojlaꞌmj, tetz owox tuj jun jay nabꞌil Dios kyukyꞌi aꞌeꞌ tukyꞌiꞌl bꞌix owaqꞌik txnaqꞌtzan [Tyol Dios] kxol kye xjal tzi. 22 Kye xjal nkyelabꞌan tuq tiꞌj tzan tpaj titzaꞌ tuq tetz nxnaqꞌtzan tukyꞌi jun tajwalil bꞌix nyaꞌtx cha iktzaꞌ kye aj xnaqꞌtzal Kawbꞌil.
23 Ntons atqet tuq tzi tuj te jay nabꞌil Dios jun xjal aj atqex tuq jun malspirit tuj tanim, bꞌix [man tuq nxnaqꞌtzan te Jesus,] tjaw sikyꞌin te xjal kxol bꞌix oxik tqꞌumaꞌ ikxjani: 24 “Yatz Jesus aj Nasaret ¿tiꞌ nꞌajoyoꞌ tzani qxola? ¿Tiꞌtzun, yatz cha ma xhchꞌul kꞌulul joder qetza? Wetz wotzqiꞌ aꞌich. Yatz pawamich aꞌox te Dios.” 25 Yaji te Jesus oxik tkꞌuluꞌ mandad te malspirit aj atqex tuq tuj tanim te xjal, kyi ikxjani: “¡Xnatziꞌ! ¡Pajatz tuj tanim!” 26 Ntons te malspirit oxik tsiꞌ jun atak tiꞌj te xjal bꞌix owayun tjatz tuj tanim bꞌix oxik.
27 Yaji kyaqil kye aj nkyechaꞌon tuq oje kyelabꞌan, nkyyoliꞌ tuq ikxjani: “¿Tiꞌtzun ja ntzani? Tetz ntzaj txnaqꞌtzaꞌ jun tumeꞌl aj minaꞌ tok qchaꞌoꞌ bꞌix tukyꞌi nim tajwalil. Nxik tkꞌuluꞌ mandad kye malspirit bꞌix nqet kyokslaꞌ.” 28 Ntons jun rat naj tok chaꞌoꞌ jaꞌchq tuj tkwentil Galiley tidiꞌ aj ojetq tuq qet tkꞌuluꞌ Jesus.
Aj Tqet Tqꞌanaꞌ Jesus Tjiꞌ Simon
29 Ntons, kyetzlen Jesus tukyꞌi Jacobod tukyꞌi Waꞌnch tukyꞌi Simon bꞌix Lexh tuj te jay nabꞌil Dios, exwaꞌq tuj tjay Simon bꞌix Lexh. 30 Tzi atqet tuq tjiꞌ xuj te Simon bꞌix yabꞌ tuq tukyꞌi kyaq, astilji nwitan tuq. Oxik kyqꞌumaꞌ naj te Jesus, te bꞌiꞌxh yabꞌ tuq. 31 Yatzun te Jesus, aj tok xhchaꞌoꞌji, tetz oxik laqꞌchet tkꞌatzaj tiꞌj twatubꞌ bꞌix ojaw stzyuꞌ tqꞌabꞌ bꞌix ojaw twitꞌbꞌaꞌ tuj twatubꞌ. Yatzun te bꞌiꞌxh, aj tjawlen witꞌbꞌaꞌ tuj twatubꞌ tzan Jesus, owel laqꞌchet te tyabꞌil. Yaji exik tkꞌaꞌchaꞌ tetz te Jesus kyukyꞌi tukyꞌiꞌl.
Aj Kyqet Tqꞌanaꞌ Jesus Kyꞌilaꞌj Yabꞌ
32 Yaji qaleꞌ ikjaꞌn tuq qxmutxꞌeꞌ, ojetq tuq tzꞌex te qꞌij, kye xjal ebꞌajtzaj kyeqꞌiꞌ kyaqil kye yabꞌ tukyꞌi Jesus bꞌix ax ebꞌajtzaj kyeqꞌiꞌ xjal aj ateqex tuq malspirit tuj kyanim. 33 Kyaqil kye xjal tuj amaqꞌ ebꞌajpon kchimoꞌ kyibꞌ twitz tjay Simon. 34 Te Jesus kyꞌilaꞌj xjal tiꞌchq tuq kyyabꞌil ebꞌajqet tqꞌanaꞌ bꞌix ax ejatz teqꞌiꞌ malspirit tuj kyanim kyꞌilaꞌj. Aj man nkyejatz teqꞌiꞌ tuq kye malspirit, te Jesus kꞌontiꞌl ostzoqpij tzan kyyolin tiꞌj tetz tzan tpaj kyotzqiꞌky tuq.
Aj Taqꞌik Tpakbꞌan Jesus Te Tpakbꞌalil Galan Tiꞌj Qtata Dios Tuj Kyaqil Tkwentil Galiley
35 Bwen, tuj junky iwitq, tzunx tuq qlolj aj tel twatl te Jesus, ojaw waꞌlet bꞌix owex tuj amaqꞌ, oxwaꞌq xnaqꞌtzon tuj jun luwar aj jaꞌ kꞌontiꞌl xjal najayon. 36 Ntons, yaj chꞌinky, oxik te Simon kyukyꞌi tukyꞌiꞌl joyol te Jesus. 37 Ya ma tzꞌok noj kywitz, oxik kyqꞌumaꞌ tetz ikxjani: “Kyaqil kye xjal nkyejoyon awiꞌj.” 38 Ntons tetz oxik tqꞌumaꞌ kyetz ikxjani: “Mejor qwaꞌq kxol txqꞌanky amaqꞌ qaynin tzan txik npakbꞌaꞌ tzi [te tpakbꞌalil galan tiꞌj Qtata Dios]; komo astilji wetz maꞌtx kyinꞌul.” 39 Ntons exik bꞌet jaꞌchq tuj tkwentil Galiley bꞌix te Jesus nxik tuq tpakbꞌaꞌ [te tpakbꞌalil galan] kyuj kye jay nabꞌil Dios bꞌix njatz tuq tin malspirit tuj kyanim kye xjal.*
Aj Tqet Tqꞌanaꞌ Jesus Jun Xjal Cha Nqꞌay Tuq Xhchiꞌjel
40 Bwen, jun qꞌij opon tukyꞌi Jesus jun xjal yabꞌ tuq bꞌix te tyabꞌil cha nqꞌay tuq xhchiꞌjel.e Oqet mejlet twitz Jesus bꞌix oxik tqꞌumaꞌ: “Qa yatz agan, bꞌaꞌn tzan tel awin chꞌin te nyabꞌil.” 41 Ntons te Jesus owok loꞌet tkꞌuꞌj tiꞌj bꞌix owok tmakoꞌ te xjal bꞌix oxik tqꞌumaꞌ: “Ngan tzan abꞌantik. Ntons pabꞌantik.” 42 Ntons aꞌilnajji obꞌantik naj te xjal.
43 Per te Jesus oxik tkawiꞌ, oxik tkukꞌsaꞌ tkꞌuꞌj te xjal, bꞌix okaj tkawiꞌ, 44 kyi ikxjani: “Kꞌon xik aqꞌumaꞌ kye xjal tidiꞌ maꞌtx kyꞌik awiꞌj. Mejor pax yekꞌul awibꞌ tukyꞌi te pal bꞌix oxeꞌl aqꞌapoꞌ te Qtata Dios te oyej aj okaj tqꞌumaꞌ Moisés* oqtxiꞌ, te aj presis iktzaꞌ techaꞌl qa ojetq qobꞌantik tukyꞌi jun qyabꞌil iktzaꞌ ntzaꞌn.” 45 Ntons, yaji te xjal oxik, per kꞌontiꞌl oqet tewaꞌ tidiꞌ okyꞌik tiꞌj, oxik tqꞌumaꞌ kye xjal [titzaꞌ obꞌantik]. Astilji te Jesus kꞌontiꞌl tuq nbꞌantik tox tyekꞌuꞌ tibꞌ tuj nijunwt amaqꞌ, astilji onachqꞌin aj jaꞌ kꞌontiꞌl najayon; per yatzun kye xjal nkyeponkix tuq tukyꞌiꞌl bꞌix jaꞌchq tuq nkyetzaj.