3
Aj Npakbꞌan Tuq Te Waꞌnch Aj Swal Aꞌ Tuj Kyꞌixkꞌoj Txꞌoꞌtxꞌ
1 Bwen, jwebꞌlajuj aqꞌbꞌixiꞌ tuq tkꞌulbꞌen mandad te twitzaleꞌ kꞌulul mandad Tibério César,a ntons te Pónsio Piláto a tuq tetz nkꞌulun mandad tuj tkwentil Judey, bꞌix te Eródes nkꞌulun mandad tuq tuj tkwentil Galiley, bꞌix te Lip aj terman nkꞌulun mandad tuq tuj tkwentil Iturey bꞌix Trakonit, bꞌix te Lisánias nkꞌulun mandad tuq tuj tkwentil Abiliny, 2 bꞌix te Anas bꞌix Kaypas aꞌeꞌ tuq kye pal mas nim kyajwalilji. Ntons tuj aj tyempji, te Qtata Dios oyolin tukyꞌi Waꞌnch aj tkꞌajol Sakariy, tuj te kyꞌixkꞌoj txꞌoꞌtxꞌ aj jaꞌ kꞌontiꞌl najayon. 3 Ntons te Waꞌnch okyꞌik tuj kyaqil luwar qaynin stziꞌ te Jordan Aꞌ, nxik tpakbꞌaꞌ tuq kye xjal tzan tjaw siꞌ aꞌ kywiꞌ tzan tpaj tjawlen kkyꞌixpuꞌ kynabꞌlin tzan tqet najsaꞌ kchoj. 4 Te ntzani okyꞌik iktzaꞌx ojetq tuq kaj stzꞌibꞌaꞌ te Chay aj yolil tyol Dios oqtxiꞌ: “Jun xjal opakbꞌayon tukyꞌi nim twiꞌ tuj te kyꞌixkꞌoj txꞌoꞌtxꞌ aj jaꞌ kꞌontiꞌl najayon, oxeꞌl tqꞌumaꞌ kye xjal, ‘Intqet ekꞌuluꞌ etibꞌ tzan tpaj tzul te Qajawil, intqet ekꞌuluꞌ etibꞌ tzan ekꞌamon tetz.b 5 Kyaqil [oqtel kꞌuluꞌ tzan sten list oj tul te Qajawil, iktzaꞌ tuj jun] bꞌey oqtel nojslet kyaqil jokoꞌj, oqtel eqꞌiꞌ kyaqil te witz, qa xqꞌeꞌw okajel siꞌ rekt, bꞌix kyaqil xbꞌukꞌ oqtel parejsaꞌ. 6 Kyaqil xjal owokel kyen titzaꞌ te Qtata Dios okoloyon kyiꞌj.’ ”
7 Astilji te Waꞌnch nxik tuq tqꞌumaꞌ ikxjani kyukyꞌi kye xjal aj nkyepon tuq tukyꞌiꞌl tzan tjaw siꞌ aꞌ kywiꞌ: “¡Etetz aꞌix tijajil kan!* ¿Abꞌl oje xik qꞌuman etetz qa okxkoletel tiꞌj te xhchoꞌnal aj chꞌinky stzaj tsiꞌ [te Qtata Dios]? 8 Astilji peꞌebꞌetnajji tuj tumeꞌl tzan tqet eyekꞌuꞌ jun ekꞌulbꞌen aj telponx bꞌan bꞌanꞌax oje jaw ekyꞌixpuꞌ enabꞌlin. Bꞌix kꞌon kxyolin ikxjani: “Qetza aꞌoꞌna tijajil Abran.”* Komo wetz oxeꞌl nqꞌumaꞌ etetz, te Qtata Dios kyiꞌj ja abꞌj ntzanijeꞌni bꞌaꞌn tzan tkꞌulun tzan kyok tijajil Abran. 9 Chꞌinky stzaj tsiꞌ te Qtata Dios jun xhchoꞌnal kyiꞌj kye xjal aj nlay jaw kkyꞌexpuꞌ kynabꞌlin, iktzaꞌx qa jun tzeꞌ kꞌontiꞌl nkaj twitz, ojawel txꞌemuꞌ bꞌix te tzeꞌ owokex xoꞌoꞌ tuj qꞌaqꞌ.”* 10 Ntons kye xjal oxik kyqaniꞌ tetz ikxjani: “¿Tidiꞌ presis tzan jkꞌulun qetza ajnaꞌl?” 11 Te Waꞌnch owaj stzaqꞌbꞌeꞌ: “Abꞌl te aj at kyꞌilaꞌjc moj tqꞌanaq, intxik tsiꞌ jun moj te aj chꞌi mebꞌaꞌ xjal;d bꞌix te aj at tweꞌ, ax a tgan tzan tkꞌulun ikxji [kyukyꞌi kye aj kꞌontiꞌl kyweꞌ].” 12 Ntons ax eꞌok laqꞌchet tukyꞌi Waꞌnch txqꞌan xjal aj peyul chojenj bꞌix ax kyetz kygan tuq tzan tjaw siꞌ aꞌ kywiꞌ,* bꞌix oxik kchaꞌoꞌ te Waꞌnch ikxjani: “Xnaqꞌtzon, yatzun qetza, ¿tidiꞌ presis tzan jkꞌuluna?” 13 Ntons te Waꞌnch owaj stzaqꞌbꞌeꞌ kyetz ikxjani: “Kꞌon tzꞌel epeyuꞌ mas tajsik aj oje kaj qꞌumaꞌ.” 14 Ntons ax txqꞌan soldad oxik kchaꞌoꞌ te Waꞌnch ikxjani: “Yatzun qetza, ¿tidiꞌ presis tzan jkꞌuluna?” Te Waꞌnch owaj stzaqꞌbꞌeꞌ kyetz: “Kꞌon tzꞌel epeyuꞌ tiꞌj nijunwt, kꞌon jaw enikꞌoꞌ kyil xjal, bꞌix peꞌeten kontent tukyꞌi te twiꞌ ekꞌuꞌj.”
15 Ntons kye xjal tuj kynabꞌl, chꞌinky tuq tul te Koloyon Aj Qꞌumankaj Oqtxiꞌ, bꞌix nkyebꞌisun tuq qa a tuq te Waꞌnch, 16 per te Waꞌnch oxik tqꞌumaꞌ kyetz ikxjani: “Wetz bꞌanꞌax njaw nsiꞌ aꞌ ewiꞌ cha aꞌox tukyꞌi aꞌ. Per mas yaj tzul junky aj mas nim tajwalil nwitz wetz. Wetz twitz tetz kꞌontiꞌl npon wajwalil ni iktzaꞌ jun aqꞌunon aj nꞌel tkotpiꞌ txajabꞌ tajaw.e Tetz otzajel tsiꞌ te Txew Dios tuj etanim bꞌix owelal teqꞌiꞌ te nyaꞌtx galan.f 17 [Tetz otkꞌuluꞌtz etukyꞌiꞌl iktzaꞌ jun aqꞌunon tukyꞌi] te txpulbꞌil eqꞌiꞌ tuj tqꞌabꞌ, owelal tpawaꞌ te triw tiꞌj tibꞌen, te triw oqtex tkꞌuꞌuꞌ tuj tkajon, bꞌix oqtel stzꞌeꞌsaꞌ te kyꞌis tuj jun qꞌaqꞌ aj ni nlay qex tzaj.” 18 Ikxjani te Waꞌnch tidiꞌchq tuq konsej nxik tqꞌumaꞌ bꞌix ikxji nxik tuq tpakbꞌaꞌ te tpakbꞌalil galan kyukyꞌi kye xjal.
19 Ntons te Eródes aj nkꞌulun tuq mandad tuj kyaqil tkwentil Galiley, te Waꞌnch oje xik tqꞌumaꞌ tetz nyaꞌtx tuq galan tzan tjaw txujelaꞌ te Erodías aj txuꞌjel tuq Lip aj termanx, bꞌix ax nyaꞌtx tuq galan kyaqil aj tidiꞌchq aj ntkꞌuluꞌ. 20 Per mas yaj, te Eródes oqet tkꞌuluꞌ junky tidiꞌ bꞌan nyaꞌtx galan: Oqex tsiꞌ te Waꞌnch tuj pres.*
Aj Tjaw Siꞌ Aꞌ Twiꞌ Jesus Tzan Waꞌnch
21 Ntons, [tzunx tuq] njaw siꞌ aꞌ kywiꞌ kye xjal tzan te Waꞌnch, ax te Jesus ojaw siꞌ aꞌ twiꞌ tzan Waꞌnch. Bꞌix aj man tuq nxnaqꞌtzan, te kaꞌj owel jaqlik 22 bꞌix te Txew Dios oqetz tajsik, bꞌix txik eꞌen aj tqetz iktzaꞌ [txik eꞌen] jun palom, bꞌix oxik chaꞌon twiꞌ Qtata Dios tuj kaꞌj nyolin tuq ikxjani: “Yatz aꞌich nkꞌwaꞌal aj ganimich nim witzaꞌ. Oje xhchꞌel njoyoꞌ bꞌix nkyinchalaj awiꞌj.”g
Kye Tijajil Aj Jaꞌ Owel Te Jesukrist Tiꞌj Te Stat
23 Ntons, aj taqꞌik tpakbꞌan Jesus bꞌix tzan tonen kxol kye xjal, ojetq tuq jakon lajuj tuj kawnaq (30) aqꞌbꞌi tetz. Tuj kynabꞌl kye xjal tetz tkꞌajol Chep. Te Chep tkꞌajol Eli, 24 bꞌix te Eli tkꞌajol Matat, te Matat tkꞌajol Lewi, te Lewi tkꞌajol Melkiy, te Melkiy tkꞌajol Jannay, te Jannay tkꞌajol Chep. 25 Te Chep tkꞌajol Matatiy, te Matatiy tkꞌajol Amos, te Amos tkꞌajol Naum, te Naum tkꞌajol Exhli, te Exhli tkꞌajol Nagay. 26 Te Nagay tkꞌajol Xhmat, te Xhmat tkꞌajol Matatiy, te Matatiy tkꞌajol Semeyin, te Semeyin tkꞌajol Josek, te Josek tkꞌajol Xhjoda. 27 Te Xhjoda tkꞌajol Xhwaꞌnan, te Xhwaꞌnan tkꞌajol Xheꞌs, te Xheꞌs tkꞌajol Xhbabeꞌl, te Xhbabeꞌl tkꞌajol Xhlatyeꞌl, te Xhlatyeꞌl tkꞌajol Neri. 28 Te Neri tkꞌajol Melkiy, te Melkiy tkꞌajol Adiy, te Adiy tkꞌajol Kosam, te Kosam tkꞌajol Elmadam, te Elmadam tkꞌajol Xhꞌer. 29 Te Xhꞌer tkꞌajol Chowe,h te Chowe tkꞌajol Elyeꞌxh, te Elyeꞌxh tkꞌajol Chorim, te Chorim tkꞌajol Mattat, te Mattat tkꞌajol Lewi. 30 Te Lewi tkꞌajol Xhmoꞌnch, te Xhmoꞌnch tkꞌajol Juda, te Juda tkꞌajol Chep, te Chep tkꞌajol Jonan, te Jonan tkꞌajol Elyakim. 31 Te Elyakim tkꞌajol Meley, te Meley tkꞌajol Menn, te Menn tkꞌajol Mattatay, te Mattatay tkꞌajol Natam. 32 Te Natam tkꞌajol Dawid, te Dawid tkꞌajol Jesay,i te Jesay tkꞌajol Jobed, te Jobed tkꞌajol Boxh, te Boxh tkꞌajol Xhaꞌl,j te Xhaꞌl tkꞌajol Nason. 33 Te Nason tkꞌajol Aminadab, te Aminadab tkꞌajol Admin, te Admin tkꞌajol Arni, te Arni tkꞌajol Esrom, te Esrom tkꞌajol Pars, te Pars tkꞌajol Juda. 34 Te Juda tkꞌajol Jacob, te Jacob tkꞌajol Isak, te Isak tkꞌajol Abran, te Abran tkꞌajol Tar, te Tar tkꞌajol Nakor. 35 Te Nakor tkꞌajol Xheruk, te Xheruk tkꞌajol Xhagaw, te Xhagaw tkꞌajol Palek, te Palek tkꞌajol Eber, te Eber tkꞌajol Xhaꞌl. 36 Te Xhaꞌl tkꞌajol Kaynan, te Kaynan tkꞌajol Arpaks, te Arpaks tkꞌajol Xhem, te Xhem tkꞌajol Noe, te Noe tkꞌajol Xhmeꞌk. 37 Te Xhmeꞌk tkꞌajol Matoxhaꞌl, te Matoxhaꞌl tkꞌajol Enok, te Enok tkꞌajol Jaret, te Jaret tkꞌajol Xhmaleꞌl, te Xhmaleꞌl tkꞌajol Kaynan. 38 Te Kaynan tkꞌajol Enos, te Enos tkꞌajol Set, te Set tkꞌajol Adan, te Adan tkꞌwaꞌal Qtata Dios.