3
Aj Taqꞌik Tpakbꞌan Te Waꞌnch Aj Swal Aꞌ
1 Ntons, tuj jun tyemp owul te Waꞌnch Aj Swal Aꞌ npakbꞌan tuq tuj tkwentil Judey tuj te kyꞌixkꞌoj txꞌoꞌtxꞌ aj jaꞌ kꞌontiꞌl najayon. 2 Nxik tuq tqꞌumaꞌ ikxjani: “Sekꞌ intjaw ekyꞌixpuꞌ enabꞌlin tzan tpaj maꞌtx pon te tyemp bꞌix ajnaꞌl exol, te Qtat aj nnajan tuj kaꞌj okꞌuluyon mandad tukyꞌi nim tajwalil.”*
3 Te Waꞌnch, a tetz te aj oqet tzꞌibꞌaꞌ tiꞌj bꞌan oqtxiꞌ tzan te Chay aj yolil tyol Dios, oqet tzꞌibꞌaꞌ tiꞌj ikxjani: “Jun xjal opakbꞌayon tukyꞌi nim twiꞌ tuj jun luwar aj kyꞌixkꞌoj txꞌoꞌtxꞌ aj jaꞌ kꞌontiꞌl najayon bꞌix tzi oxeꞌl tpakbꞌaꞌ kye xjal aj okyepoyon tukyꞌiꞌl, oxeꞌl tqꞌumaꞌ ikxjani: ‘Intqet ekꞌuluꞌ [etibꞌ] tzan tpaj tzul te Qajawil, intjaw ekyꞌixpuꞌ enabꞌlin tzan eten list oj tul te Qajawil.’ ”a
4 Tqꞌanaq te Waꞌnch, kꞌuluꞌ tuq tukyꞌi pur xtxꞌotxꞌal stzamal kway kamey, bꞌix nꞌok tuq tsiꞌ tiꞌj tukyꞌi jun tsinch pur tzꞌuꞌm,* bꞌix te tweꞌ pur tuq kochiꞌ tukyꞌi taꞌal tzeꞌ. 5 Kye xjal tuj Jerusalen bꞌix tuj kyaqil tkwentil Judey bꞌix kye luwar qaynin tiꞌj te Jordan Aꞌ, kyetz nkyepon tuq chaꞌoyon tiꞌj. 6 Njatz tuq kyqꞌumaꞌ kchoj bꞌix te Waꞌnch njaw tuq tsiꞌ aꞌ kywiꞌ tuj te Jordan Aꞌ. 7 Per ya ma tzꞌok ten te Waꞌnch kyꞌilaꞌj tuq kye aj bꞌuchꞌuj Parisey bꞌix kye aj bꞌuchꞌuj Sadusey nkyepon tuq tukyꞌiꞌl tzan tuq tjaw tsiꞌ aꞌ kywiꞌ, oxik tqꞌumaꞌ kyetz ikxjani: “Etetz aꞌix tijajil kan.* ¿Abꞌl oje xik qꞌuman etetz qa okxkoletel tiꞌj tqꞌoj Qtata Dios aj chꞌinky tulni? 8 Peꞌebꞌet waq tuj jun tumeꞌl galan bꞌix intqet eyekꞌuꞌ tukyꞌi ekꞌulbꞌen galan qa bꞌanꞌax maꞌtx jaw ekyꞌixpuꞌ enabꞌlin. 9 Bꞌix kꞌontiꞌl tzan txik eqꞌumaꞌ tuj etanim “qetza aꞌoꞌna tijajil Abran.”* Wetz bꞌanꞌax oxeꞌl nqꞌumaꞌ etetz, kyiꞌj kye ja abꞌjni te Qtata Dios bꞌaꞌn tzan kyjaw tin tijajil Abran kyiꞌj. 10 Chꞌinky tul te jwisy kyajsik kyaqil aj kꞌon kygan tzan tjaw kkyꞌixpuꞌ kynabꞌlin, iktzaꞌx tajawil jun tzeꞌ, qa te tzeꞌ kꞌontiꞌl nkaj twitz, njaw xtxꞌemuꞌ tukyꞌi ach bꞌix te tzeꞌ owokex xoꞌoꞌ tuj qꞌaqꞌ.* 11 Wetz bꞌanꞌax oj tjaw nsiꞌ aꞌ ewiꞌ telponx maꞌtx jaw ekyꞌixpuꞌ enabꞌlin. Per yatzun te aj tzul mas yaj nwitz wetz, tetz mas nim tajwalil nwitz; wetz twitz tetz kꞌontiꞌl npon wajwalil ni iktzaꞌ jun aqꞌunon aj nꞌel tkotpiꞌb txajabꞌ tajaw. Tetz otzajel tsiꞌ Txew Dios tuj etanim bꞌix owelal teqꞌiꞌ te nyaꞌtx galan. 12 Tetz [iktzaꞌ] eqꞌiꞌ txpulbꞌil tuj tqꞌabꞌ, owelal tpawaꞌ te triw tiꞌj tibꞌen, bꞌix oqtex tkꞌuꞌuꞌ tuj tkajon, per oqtel tkyꞌeꞌsaꞌ te kyꞌis tuj jun qꞌaqꞌ aj ni nlay qex tzaj.”
Aj Tjaw Siꞌ Aꞌ Twiꞌ Jesus Tzan Waꞌnch
13 Ntons te Jesus owetz tuj Galiley bꞌix opon stziꞌ te Jordan Aꞌ tzan tuq tjaw siꞌ aꞌ twiꞌ tzan Waꞌnch. 14 Tbꞌay te Waꞌnch kꞌon tuq tgan tzan tjaw tsiꞌ aꞌ twiꞌ Jesus, oxik tqꞌumaꞌ ikxjani: “Aꞌin-tal wetz aj presis tzan tjaw asiꞌ aꞌ nwiꞌ. ¿Aꞌin petzun wetz ojawel nsiꞌ aꞌ awiꞌ?” 15 Per te Jesus owaj stzaqꞌbꞌeꞌ: “Tzoqpij tzan tkyꞌik kyaqil ikxji ajnaꞌl, presis tzan tbꞌantik kyaqil tuj jun tumeꞌl galan iktzaꞌ te Qtata Dios tgan.” 16 Ntons ya ma jaw siꞌ aꞌ twiꞌ te Jesus, tetz ojatz tuj te aꞌ bꞌix te kaꞌj owel jaqlik, bꞌix te Jesus oxik ten te Txew Dios ikjaꞌn tuq tqetz tajsik iktzaꞌ jun palom. 17 Ntons oxik chaꞌoꞌ twiꞌ [te Qtata Dios] ntzaj yolin tuq tuj kaꞌj ikxjani: “Aj ntzani wetz nkꞌwaꞌal aj ganiꞌ nim witzaꞌ bꞌix bꞌan nkyinchalaj tiꞌj.”*