4
Aj Tqet Siꞌ Te Jesus Tuj Preb Tzan Te Tajaw Choj
1 Ntons, yaji te Jesus oxik in tzan te Txew Dios tuj te kyꞌixkꞌoj txꞌoꞌtxꞌ aj jaꞌ kꞌontiꞌl najayon, tzan tok ten titzaꞌ te Tajaw Choj oqtel tsiꞌ jun preb tiꞌj tzan tuq tqet tzꞌaqik titzaꞌ.*
2 Ntons, tzi otipaj waꞌij kawnaq (40) qꞌij tukyꞌi kawnaq aqꞌbꞌil [tzan txnaqꞌtzan], bꞌix otzaj waꞌij tiꞌj. 3 Ntons te [Tajaw Choj] aj njoyon tumeꞌl tzan jqet tzꞌaqik titzaꞌ, tetz owok laqꞌchet tiꞌj bꞌix oxik tqꞌumaꞌ ikxjani: “Qa yatz bꞌanꞌax aꞌich Tkꞌwaꞌal Dios, intxik aqꞌumaꞌ kye ja abꞌjni tzan kyok wabꞌj.”
4 Per yaji te Jesus oxik tqꞌumaꞌ tetz ikxjani: “[Tuj te Tuꞌjal Dios] tzꞌibꞌankaj ikxjani: “Nyaꞌtx aꞌox tukyꞌi wabꞌj itzꞌoj jun xjal sinoke ax tukyꞌi kyaqil aj ntyoliꞌ te Qtata Dios.””*
5 Yaji te Tajaw Choj oxik tin tuj [Jerusalen], te amaqꞌ aj pawaꞌ te Qtata Dios, bꞌix ojax tin twiꞌ te Nin Jay Nabꞌil Qtata Dios aj jaꞌ mas nim twaꞌlkal, 6 bꞌix oxik tqꞌumaꞌ tetz ikxjani: “Qa yatz bꞌanꞌax aꞌich Tkꞌwaꞌal Dios, intxik axon awibꞌ qetl, komo tzꞌibꞌankaj [tuj Tuꞌjal Dios] ikxjani: “Ochkajel tsiꞌ tuj kyqꞌabꞌ kye ángel aj nkyeꞌaqꞌunan te tetz,” bꞌix “ochjawel kyin tuj kyqꞌabꞌ tzan kꞌon aqet tzꞌaqik tiꞌj abꞌj.””* 7 Yaji te Jesus owaj stzaqꞌbꞌeꞌ ikxjani: “Ax tzꞌibꞌenkaj tuj Tuꞌjal Dios ikxjani: “Kꞌon qet asiꞌ tuj preb te Qtata Dios aj Awajawil.””* 8 Yaji te Tajaw Choj oxik teqꞌiꞌ twiꞌ jun ma nim witz, bꞌix oxik tyekꞌuꞌ tetz kyaqil amaqꞌ twitz txꞌoꞌtxꞌ bꞌix kyaqil aj bꞌan tbꞌanil aj at te kyetz, 9 bꞌix oxik tqꞌumaꞌ ikxjani: “Wetz oxeꞌl nsiꞌ kyaqil ntzani te yatz, qa yatz ochtel mejlet nwitz bꞌix okyinqtel anaꞌoꞌ.”
10 Yaji te Jesus oxik tqꞌumaꞌ ikxjani: “¡Pax yatz Satanas! Komo te Tuꞌjal Dios nyolin ikxjani: “Intqet anaꞌoꞌ aꞌox te Qtata Dios aj Awajawil, bꞌix intqet awokslaꞌ aꞌox te tetz.””* 11 Ntons te Tajaw Choj okaj tsiꞌ te Jesus bꞌix yaji txqꞌan ángel ebꞌajpon onel tetz.
Aj Taqꞌik Tpakbꞌan Te Jesus Kxol Kye Xjal Tuj Galiley
12 Ntons ya ma tzꞌok xhchaꞌoꞌ te Jesus te Waꞌnch ojetq tuq qex siꞌ tuj pres,* yaji oxik tuj tkwentil Galiley. 13 Per kꞌontiꞌl okaj najan tuj Nasaret, sinoke oxik najayon tuj Capernaúm* qaynin stziꞌ te aꞌ aj jaꞌ nkyenajan kye aꞌeꞌ tijajil Sabulon bꞌix tijajil Nep.a 14 Te ntzani okyꞌik tzan tponkix iktzaꞌx okaj stzꞌibꞌaꞌ te Chay aj yolil tyol Dios oqtxiꞌ, aj okaj stzꞌibꞌaꞌ ikxjani: 15 “Etetz aj xtxꞌoꞌotxꞌ Sabulon bꞌix etetz aj xtxꞌoꞌotxꞌ Nep, etetz aj qaynin tiꞌj te nim aꞌ, etetz aj junxlaꞌ te Jordan Aꞌ, tbꞌeyil te Galiley Aꞌ, te Galiley aj jaꞌ nkyenajan kye aj nyaꞌtx tijajil Israel, 16 etetz aj atikxqex tuq tuj jun qlolj, otzaj jun chkꞌatunal bꞌan nim exol, jun chkꞌatunal bꞌan ntxaqtxon kxol kye aj nkyenajan tuq tuj qlolj aj nqoxik tin tuj jkamiky.”*
17 Atxji te Jesus owaqꞌik tzan tpakbꞌan ikxjani: “Sekꞌ intjaw ekyꞌixpuꞌ enabꞌlin, tzan tpaj maꞌtx pon te tyemp bꞌix ajnaꞌl te Qtat aj nnajan tuj kaꞌj okꞌuluyon mandad exol tukyꞌi jun tajwalil.”*
Aj Ktzaj Tukꞌleꞌ Jesus Kaj Tzyul Kyiy Tzan Kyok Lapet Tiꞌj
18 Ntons te Jesus nbꞌet tuq stziꞌ te Galiley Aꞌ, aj txik teꞌeꞌ kabꞌeꞌ xjal kyerman tuq kyibꞌ, jun Simon tbꞌi aj nꞌok qꞌumaꞌ tuq Xhpeꞌy, bꞌix te junky Lexh. Kyetz kyaqꞌun tzyul kyiy tuq, bꞌix nqex tuq ksiꞌ te kypa tuj te aꞌ. 19 Te Jesus oxik tqꞌumaꞌ kyetz ikxjani: “Peꞌetok lapet wiꞌj bꞌix wetz nkꞌuluꞌtz tzan etok chimol xjal [tzan kyok lapet wiꞌj].” 20 Bꞌeyxnajji okaj ksiꞌ te kypa bꞌix eꞌok lapet tiꞌj Jesus. 21 Yaji chꞌinky ikxjani, te Jesus oxik teꞌeꞌ kabꞌeꞌky xjal ax kyerman tuq kyibꞌ, Jacobob tukyꞌi Waꞌnch, aꞌeꞌ tkꞌajol Sebedey, kyetz akyeqet tuq tukyꞌi kytat tuj jun bark nkyekꞌulun tuq kypa. Yaji te Jesus etzaj tukꞌleꞌ, 22 bꞌix kyetz bꞌeyxnajji okaj ksiꞌ te kybark bꞌix te kytat, bꞌix eꞌok lapet tiꞌj Jesus.
Aj Kxik Txnaqꞌtzaꞌ Jesus Kyꞌilaꞌj Xjal Tzajnaqeꞌ Tuq Jaꞌchq
23 Te Jesus nbꞌet tuq tuj kyaqil tkwentil Galiley, nxnaqꞌtzan tuq kyuj kye jay nabꞌil Dios tuj junjun luwarchaq. Nxik tuq tpakbꞌaꞌ tpakbꞌalil galan tiꞌj titzaꞌ te Qtata Dios nkolon qiꞌj tzan jkaj tuj tqꞌabꞌ bꞌix nkyeqet tuq tqꞌanaꞌ kye xjal tiꞌj kyaqil kyyabꞌil bꞌix kyaqil aj tidiꞌ nchoꞌon kyetz.* 24 Te tpakbꞌalil tiꞌj te Jesus jaꞌchq owok chaꞌoꞌ tuj kyaqil tkwentil Siry bꞌix nkyetzaj kyin tuq twitz kyaqil aj yabꞌeꞌ tuq tukyꞌi tidiꞌchq kyyabꞌil bꞌix xhchoꞌnal bꞌix ax kye aj akyeqex tuq malspirit tuj kyanim bꞌix kye aj nꞌukul tuq atak kyiꞌj bꞌix aj kamnaq tuq kchiꞌjel, bꞌix te Jesus, tetz nkyeqet tuq tqꞌanaꞌ. 25 Kyꞌilaꞌj xjal aj tuj tkwentil Galiley bꞌix tuj tkwentil Dekapl bꞌix tuj amaqꞌ Jerusalen bꞌix tuj tkwentil Judey bꞌix aꞌeꞌ aj tuj tkwentil junky palaj te Jordan Aꞌ nkyeꞌok tuq lapet tiꞌj Jesus.