5
Aj Kxik Txnaqꞌtzaꞌ Jesus Kye Xjal Twiꞌ Jun Witz
1 Ya ma kyexik ten bꞌan kyꞌilaꞌj kye xjal, tetz ojax twiꞌ te muluꞌj bꞌix oqet witꞌlet txini. Yatzun kye xjal aj nkyeꞌok tuq lapet tiꞌj, ebꞌajꞌok laqꞌchet tiꞌj tzan tok kchaꞌoꞌ 2 bꞌix tetz owaqꞌik tzan kxik txnaqꞌtzaꞌ ikxjani: 3 “Galanx-alo kye aj nꞌel kynikyꞌ qa bꞌan presis te Qtata Dios te kyetz, komo aꞌeꞌ kyetz okyekajel tuj tqꞌabꞌ Qtata Dios tzan kyox tuj kaꞌj.
5 Galanx-alo kye aj loꞌik kykꞌuꞌj tiꞌj Qtata Dios bꞌix nyaꞌtx kyiꞌjx kyetz, komo kyetz okykꞌamoꞌtz tukyꞌi Qtat kyaqil te twitz txꞌoꞌtxꞌ iktzaꞌx ojetq xik tsiꞌ tyol kyetz.*
6 Galanx-alo kye aj kygankix tzan tbꞌantik kyaqil tuj tumeꞌl iktzaꞌ te Qtata Dios tgan, komo kyetz owokel kyenkix titzaꞌ [te Qtat] okꞌuluyon kyaqil tuj tumeꞌl.
7 Galanx-alo kye aj nꞌok loꞌet kykꞌuꞌj kyiꞌj txqꞌanky, komo te Qtata Dios owokel loꞌet tkꞌuꞌj kyiꞌj kyetz.
9 Galanx-alo kye aj nkyejoyon jun tumeꞌl tzan kyten galan kye xjal kxolx, komo kyetz okyeꞌokel qꞌumaꞌ tkꞌwaꞌal Dios-eꞌ.
10 Galanx-alo kye aj nkyejaw lajoꞌ tzan tpaj nkyekꞌulun kyaqil tuj tumeꞌl iktzaꞌ tgan te Qtata Dios, komo kyetz okyekajel tuj tqꞌabꞌ Qtata Dios tzan kyox tuj kaꞌj.*
11 Galanx-alo etetz aꞌix oj etok yasoꞌ bꞌix chaꞌoj ejaw lajoꞌ bꞌix chaꞌoj tjaw kynikꞌoꞌ tidiꞌchq nyaꞌtx galan etiꞌj tzan npaj wetz bꞌix nyaꞌtx bꞌanꞌax kyitzaꞌ.* 12 Peꞌechalaj waq, peꞌeten kontent tzan tpaj ekꞌamoꞌtz jun nim bꞌan tbꞌanil tuj kaꞌj; komo ax ikxji ejaw lajoꞌ kye aj yolil tyol Dios oqtxiꞌ.”*
Kye Aj Nkyeꞌokslan Tiꞌj Jesus, Kyetz Iktzaꞌ Atzꞌan Bꞌix Jun Chkꞌatunal
13 “Etetz aꞌix kxol kye xjal twitz ja txꞌoꞌtxꞌni, etetz aꞌix iktzaꞌ te atzꞌan [aj nim token]; per qa te atzꞌan owelal tqꞌabꞌ,a ntons ¿titzaꞌ owokel kꞌakꞌj junkyꞌel? Ya kꞌontiꞌl token chꞌinwt, cha owelax xoꞌlet tzijay bꞌix oqtel wabꞌeꞌ.
14 Etetz aꞌix iktzaꞌ jun chkꞌatunal kxol kye xjal twitz ja txꞌoꞌtxꞌni.* Jun amaqꞌ aj atjax twiꞌ jun witz, kꞌontiꞌl nbꞌantik tzan tkaj ewj [tzan tpaj ntxaqtxon qonikꞌan]. 15 Bꞌix ax kꞌontiꞌl nꞌok qtxaqoꞌ jun jqꞌanal tzan tox qsiꞌ tjaqꞌ jun almun; sinoke njaw siꞌlet jawnaq tajsik jun mos tzan txik tqꞌanaliꞌ kyaqil kye aj ateꞌ tuj jay.* 16 Ax ikxji etetz intok esiꞌ enabꞌl tzan ekꞌulun jun ekꞌulbꞌen galan kxol kye xjal tzan txik en etiꞌj iktzaꞌ jun chkꞌatunal tuj kywitz bꞌix tzan tqet kyjiqꞌbꞌaꞌ Qtata Dios aj atjax tuj kaꞌj.”*
Te Jesus Owul Kꞌulul Kyaqil Iktzaꞌ Te Kawbꞌil Tgan
17 “Kꞌon kxbꞌisun waq etetz qa wetz maꞌtx kyinꞌul tzan tpon nnajsaꞌ te Kawbꞌil bꞌix te ktzꞌibꞌen kye aj yolil tyol Dios oqtxiꞌ; wetz kꞌontiꞌl ma kyinꞌul tzan tpon nnajsaꞌ sinoke tzan tponkix ikxji iktzaꞌx nyolin. 18 Komo oxeꞌl nqꞌumaꞌ bꞌanꞌax etetz, aj man atqet te twitz kaꞌj bꞌix te twitz txꞌoꞌtxꞌ, ni jun chꞌi tal letr nlay tzꞌel eqꞌiꞌ tiꞌj te Kawbꞌil sinoke okyꞌel kixiꞌ kyaqil aj tzꞌibꞌankaj.* 19 Astilji abꞌl te aj nlay qet tokslaꞌ jun tidiꞌ aj nyolin te Kawbꞌil, anke jun tidiꞌ aj nyaꞌtx nim, bꞌix ikxji nxik txnaqꞌtzaꞌ kye txqꞌanky, tetz nlay qet jiqꞌbꞌaꞌ tuj kaꞌj. Per abꞌl te aj oqtel tokslaꞌ bꞌix nxik txnaqꞌtzaꞌ kye txqꞌanky tzan kykꞌulun ikxji, tetz oqtel jiqꞌbꞌaꞌ nim tuj kaꞌj.
20 Komo qa etetz nlay qet ekꞌuluꞌ tuj tumeꞌl mas galan kywitz kye xnaqꞌtzal Kawbꞌil bꞌix kye aj bꞌuchꞌuj Parisey, ikxji etetz nlay kxkaj tuj tqꞌabꞌ Qtata Dios tzan etox tuj kaꞌj.”
A Tgan Tzan Qjoyon Tumeꞌl Tzan Qten Galan Qxolx
21 “Etetz oje tzꞌok echaꞌoꞌ te aj oxik qꞌumaꞌ kye aꞌeꞌ etijajil oqtxiꞌ: “Kꞌon chkansan,” bꞌix “abꞌl te aj okansayon, oxeꞌl siꞌ tuj il.”* 22 Per wetz oxeꞌl nqꞌumaꞌ etetz, abꞌl jun aj exol ojawel qꞌojlik tukyꞌi junky terman, oxeꞌl siꞌ tuj il. Bꞌix abꞌl te aj owokel tyasoꞌ junky terman, oxeꞌl siꞌ tuj il tzan kye tijxjal aj at mas kyajwalil; bꞌix abꞌl te aj oxeꞌl tqꞌumaꞌ “bꞌan kuch aꞌich” te junky terman, tetz tmeres tzan txik tuj te nim qꞌaqꞌ aj jaꞌ te xhchoꞌnal kꞌontiꞌl nmankun.
23 Astilji qa oj txik awin te awoyej tajsik te tzꞌeꞌsbꞌil bꞌix otzajel tiktzꞌan tuj awanim jun awerman at tidiꞌ tqꞌoj awiꞌj, 24 ntons intkaj asiꞌ te awoyej tzi twitz te tzꞌeꞌsbꞌil bꞌix tbꞌay pax yoliyon tukyꞌiꞌl tzan eten galan exol, bꞌix yaji bꞌaꞌn tzan ameltzꞌjik junkyꞌel tzan txik aqꞌapoꞌ te awoyej.
25 Qa at abꞌl aj tgan tzan txik qaniyon awiꞌj, intok asiꞌ akꞌuꞌj tzan axik qanil najsbꞌil tukyꞌiꞌl, tzunx tuq at tyemp ajnaꞌl, tzan kꞌon axik qꞌapoꞌ tuj tqꞌabꞌ te pujul il, qa kꞌon yaji te pujul il otxeꞌl tqꞌapoꞌ tuj tqꞌabꞌ te mulonb bꞌix ochtex tsiꞌ tuj pres. 26 Oxeꞌl nqꞌumaꞌ bꞌanꞌax, yatz nlay chjatz tuj te pres qa minaꞌ tuq xhchojet kyaqil te amult.”
Aj Tyolin Jesus Nyaꞌtx Galan Te Kꞌajajbꞌilj
27 “Etetz oje tzꞌok echaꞌoꞌ [oqtxiꞌ] otzaj qꞌumaꞌ ikxjani: “Kꞌon chkꞌajajin.”* 28 Per wetz oxeꞌl nqꞌumaꞌ etetz, abꞌl aj owelal tqꞌajabꞌ tiꞌj jun xuj, maꞌtx kꞌajajin tukyꞌiꞌl tuj tanim.
29 Astilji qa te awitzc ntkꞌuluꞌ tzan ajoyon choj, mejor intetz awin bꞌix intex axon, mejor tzan tponaj aꞌox cha jun tbꞌaqꞌ awitz bꞌix nyaꞌtx tzan txik xoꞌoꞌ kyaqil achiꞌjel tuj te luwar aj jaꞌ te xhchoꞌnal kꞌontiꞌl nmankun tuj te nim qꞌaqꞌ.* 30 Bꞌix qa te aqꞌabꞌ aj abꞌanqꞌabꞌ ntkꞌuluꞌ tzan ajoyon choj, mejor intel atxꞌemuꞌ bꞌix intex axon, mejor tzan tponaj aꞌox cha jun aqꞌabꞌ bꞌix nyaꞌtx tzan txik xoꞌoꞌ kyaqil achiꞌjel tuj te luwar aj jaꞌ te xhchoꞌnal kꞌontiꞌl nmankun tuj te nim qꞌaqꞌ.”*
Aj Tyolin Jesus Tzan Kꞌon Kyqet Pawjik Kye Xjal
31 “Bꞌix okaj qꞌumaꞌ oqtxiꞌ ikxjani: “Abꞌl aj oqtel tpawaꞌ tibꞌ tukyꞌi txuꞌjel, presis tzan tbꞌantik jun tuꞌjal titzaꞌ.”* 32 Per wetz oxeꞌl nqꞌumaꞌ etetz, qa jun ichan oqtel tpawaꞌ tibꞌ tukyꞌi txuꞌjel bꞌix qa nyaꞌtx tzan tpaj te txuꞌjel nkꞌajajin, cha ntkꞌuluꞌ tzan tkꞌajajin. Bꞌix abꞌl te aj owokel junan tukyꞌi jun aj cha oqet tpawaꞌ tibꞌ tukyꞌi tichmil, ax ikxji cha nkꞌajajin.”*
Aj Txik Txnaqꞌtzaꞌ Jesus Tiꞌj Te Jurament
33 “Ax oje tzꞌok echaꞌoꞌ etetz, oqtxiꞌ oxik qꞌumaꞌ kye etijajil ikxjani: “Kꞌon xik asiꞌ ayol tukyꞌi tbꞌi Qajawil qa nyaꞌtx bꞌanꞌax awitzaꞌ, sinoke akꞌuluꞌtz kixiꞌ kyaqil iktzaꞌx oje xik asiꞌ ayol tukyꞌi tbꞌi Qajawil.”* 34 Per wetz oxeꞌl nqꞌumaꞌ etetz, kꞌon txik esiꞌ eyol tukyꞌi tbꞌi nijunwt. Kꞌon xik esiꞌ eyol tiꞌj te kaꞌj tzan tpaj aji te twitꞌlel Qtata Dios,* 35 bꞌix kꞌon xik esiꞌ eyol tiꞌj te twitz txꞌoꞌtxꞌ tzan tpaj aji tujlbꞌil toq Qtata Dios. Bꞌix nyaꞌtx tiꞌj Jerusalen tzan tpaj aji tamaqꞌ te Qtata Dios aj twitzaleꞌ kꞌulul mandad qiꞌj.* 36 Bꞌix ax kꞌontiꞌl tzan txik esiꞌ eyol tiꞌj [jun stzamal] ewiꞌ, tzan tpaj etetz kꞌontiꞌl nbꞌantik etitzaꞌ tzan tqet esjukinsaꞌ ni jun stzamal ewiꞌ qatzun tzan sten qꞌeq etitzaꞌji. 37 Ntons etetz qa a tgan tzan txik eqꞌumaꞌ “oꞌ,” intxik eqꞌumaꞌ cha aꞌox “Oꞌ.” Qatzun tzan txik eqꞌumaꞌ “nlay,” intxik eqꞌumaꞌ cha aꞌox “Nlay.” Bꞌix qa ma xik esiꞌ eyol tukyꞌi tbꞌi jun tidiꞌ, ntons te nini cha tzajnaq tiꞌj te nyaꞌtx galan.”
Qokꞌulun Galan Kyukyꞌi Kye Qajqꞌoj
38 “Etetz oje tzꞌok echaꞌoꞌ [oqtxiꞌ] okaj qꞌumaꞌ ikxjani: “Qa ojawetz in tbꞌaqꞌ twitz jun, ax ojawetz in tbꞌaqꞌ twitzky te junky; qa owelatz in twitz teꞌ jun, ax owelatz in twitz teꞌky te junky.”* 39 Per wetz oxeꞌl nqꞌumaꞌ etetz, kꞌon kxjaw kaw tukyꞌi jun aj nꞌok tkꞌuluꞌ nyaꞌtx galan etiꞌj, sinoke qa at abꞌl ma tzꞌok joton jun eqꞌoꞌtx, ax intxik asiꞌ junky palaj; 40 qa at abꞌl ma xik qaniyon awiꞌj bꞌix tgan tzan tel teqꞌiꞌ te akamixh, ax tzoqpij tzan txik teqꞌiꞌ te aswetr. 41 Bꞌix qa otxeꞌl in alajwers tzan txik awiqaꞌ jun iqtz jun kilómetr,d ntons pax bꞌix intxik awin te iqtz kabꞌeꞌ kilómetr. 42 Abꞌl te aj otzajel tqaniꞌ jun tidiꞌ yatz, intxik asiꞌ tetz, bꞌix kꞌon qet axkꞌayiꞌ te aj otzajel tqaniꞌ jun tkyꞌex awukyꞌiꞌl.
43 Ax oje tzꞌok echaꞌoꞌ ikxjani: “Inkyqet eganiꞌ abꞌl etetz bꞌix inkyok etajqꞌojaꞌ kye etajqꞌoj.”* 44 Per wetz oxeꞌl nqꞌumaꞌ etetz, inkyqet eganiꞌ kye etajqꞌoj bꞌix peꞌexnaqꞌtzan kyiꞌj kye aj nkyejaw lajon etetz. 45 Ikxji tzan tqet eyekꞌuꞌ etetz aꞌix tkꞌwaꞌal Qtata Dios aj atjax tuj kaꞌj, komo tetz ntkꞌuluꞌ tzan tjakul te qꞌij kyajsik xjal aj nyaꞌtx galan bꞌix ax kyajsik kye xjal aj galan-eꞌ, bꞌix ntzaj tsiꞌ te jabꞌ kyajsik kye aj nkyeꞌokslan tetz bꞌix ax kyajsik kye aj kꞌontiꞌl nkyeꞌokslan tetz.
46 Qa etetz nkyeqet eganiꞌ aꞌox kye aj nkyeqet ganin etetz, ¿tidiꞌ ekambꞌaꞌtz ikxji? Komo kye xjal aj peyul chojenj [aj nyaꞌtx tumeꞌl nkyekꞌulun] ax kyetz nkyekꞌulun ikxji. 47 Bꞌix qa etetz nkxliman aꞌox kye aj eterman ¿tidiꞌ mas tbꞌanil nkxkꞌulun ikxji? Komo kye xjal aj kꞌontiꞌl nkyeꞌokslan te Qtata Dios ax kyetz nkyekꞌulun ikxji. 48 Peꞌekꞌulun waq etetz kyaqil tuj tumeꞌl iktzaꞌ te Qtata Dios aj atjax tuj kaꞌj nkꞌulun kyaqil tuj tumeꞌl.”*