12
Aj Tyolin Jesus Tzan Kꞌon Qok Xmeletzꞌ
1 Ntons man tuq nkyeyolin, owok kchimoꞌ kyibꞌ kyꞌilaꞌj mil xjal tzi, bꞌix kꞌontiꞌl tuq nbꞌantik tzan kybꞌet kxolx. Ntons te Jesus owaqꞌik tzan tyolin kyukyꞌi kye txnaqꞌatz ikxjani: “Intok esiꞌ waq enabꞌl tiꞌj kxmeletzꞌul kye aj bꞌuchꞌuj Parisey, [aj naqe jun] malsbꞌil [aj nxik tsipaꞌ tibꞌ jaꞌchq].* 2 Kꞌontiꞌl jun tidiꞌ aj ewj aj nlay-wit tzꞌok chaꞌoꞌ, bꞌix kꞌontiꞌl jun tidiꞌ aj ewaꞌ nlay-wit tzꞌok eꞌeꞌ.* 3 Ikxji kyaqil tidiꞌ aj oje xik qyoliꞌ tuj qlolj, owokel chaꞌoꞌ chijqꞌij, bꞌix aj oje xik jqꞌumaꞌ ewj tuj jun jay lamoꞌ qibꞌ, oxeꞌl pakbꞌaꞌ tzan tok chaꞌoꞌ tzan kyaqil.”
A Te Qtata Dios Te Aj Presis Tzan Tqet Qxobꞌleꞌ
4 “Etetz aj wajyol aꞌix, wetz ajnaꞌl nxik nqꞌumaꞌ etetz kꞌon qet exobꞌleꞌ te aj aꞌox bꞌaꞌn tzan tpon tnajsaꞌ te echiꞌjel bꞌix nlay pon tnajsaꞌ te etanim. 5 Wetz oxeꞌl nqꞌumaꞌ etetz abꞌl te aj presis tzan tqet exobꞌleꞌ: Intqet exobꞌleꞌ te [Qtata Dios] aj at tajwalil tzan tel tin tanqꞌin jun xjal bꞌix yaji bꞌaꞌn tzan txik tsiꞌ tuj te nim qꞌaqꞌ aj jaꞌ te xhchoꞌnal kꞌontiꞌl nmankun. Tiꞌj tetz presis tzan tqet exobꞌleꞌ.
6 ¿Tiꞌtzun kꞌontiꞌl nkyetzaj kꞌayiꞌ jwebꞌ tal pichꞌ tzan kabꞌeꞌ tmin nyaꞌtx nim tbalor? Per te Qtata Dios kꞌontiꞌl nꞌajnaj tiꞌj tkꞌuꞌj tiꞌj junjun te kyetz. 7 Pyorx-alo etetz, [te Qtata Dios nkxqet tkꞌuluꞌ kwent] asta kyaqil te stzamal ewiꞌ bꞌan ajlaꞌ titzaꞌ. Ntons kꞌon kxobꞌ, etetz mas ganimix aꞌix kywitz kyꞌilaꞌj tal pichꞌ.”
Aj Tyolin Jesus Kyiꞌj Kye Aj Kꞌontiꞌl Nkyekyꞌixwik Tiꞌj Tetz Kywitz Xjal
8 “Wetz oxeꞌl nqꞌumaꞌ etetz, abꞌl te aj oxeꞌl tqꞌumaꞌ kywitz xjal qa tetz nꞌokslan wiꞌj, ax [wetz] te Ichan Aj Tkꞌwaꞌal Dios [aꞌin] okyinyoliyon galan tiꞌj tetz kywitz kye ángel aj tuj kaꞌj. 9 Per te aj okyinꞌelal tikꞌoꞌ kywitz xjal, ax tetz owelal wikꞌoꞌ kywitz kye ángel aj tuj kaꞌj. 10 Abꞌl te aj oxeꞌl tqꞌumaꞌ tyol nyaꞌtx galan wiꞌj [wetz] te Ichan Aj Tkꞌwaꞌal Dios [aꞌin], bꞌaꞌn tzan tqet najsaꞌ te aj maꞌtx xik tqꞌumaꞌ, per nlay qet najsaꞌ qa nyolin nyaꞌtx galan tiꞌj te Txew Dios.* 11 Bꞌix oj exik in tuj te jay nabꞌil Dios bꞌix kywitz kye kꞌulul mandad bꞌix kye aj at nim kyajwalil, kꞌon kxbꞌisun tiꞌj tidiꞌ oxeꞌl eqꞌumaꞌ bꞌix tiꞌj tidiꞌ owajel etzaqꞌbꞌeꞌ kyetz. 12 Komo tuj aj orji te Txew Dios oxeꞌl tqꞌumaꞌ etetz te aj presis tzan txik eqꞌumaꞌ.”*
Te Yekꞌbꞌil Tiꞌj Te Qꞌinomal
13 Ntons, tzaj te jun xjal aj atqet tuq kxol kye xjal, oxik tqꞌumaꞌ ikxjani: “Xnaqꞌtzon, intxik aqꞌumaꞌ chꞌin te witzik tzan tqet tpawaꞌ te erensy qxola.” 14 Ntons te Jesus oxik tqꞌumaꞌ: “¡Ombre! ¿Aꞌin petzun wetz exol etetz iktzaꞌ jun pujul il qatzun jun pawona exolji?” 15 Yaji oxik tqꞌumaꞌ kye kyaqil ikxjani: “Intok esiꞌ waq enabꞌl tzan kꞌon tel eganiꞌ tidiꞌchq. Komo tzan qanqꞌin, nyaꞌtx presis qa at tidiꞌchq nim qetz.”
16 Yaji oxik tqꞌumaꞌ jun yekꞌbꞌil kyetz ikxjani: “At tuq jun xjal bꞌan qꞌinon, bꞌix te tawal okaj bꞌan tbꞌanil. 17 Ntons te qꞌinon oqeten bꞌisuyon ikxjani: “¿Tidiꞌ nkꞌuluꞌtz ajnaꞌl? Maꞌtx noj kyaqil jaꞌ nqex nkꞌuꞌuꞌ te twitz wawal bꞌix kꞌontiꞌl jaꞌ tzan tqex nkꞌuꞌuꞌ txqꞌanky.” 18 Yaji otqꞌumaj ikxjani: “Ya webꞌenky tidiꞌ nkꞌuluꞌtz. Okyeqtel nxituꞌ aj jaꞌ nqex nkꞌuꞌuꞌ twitz wawal, bꞌix yaji okyeqtel nkꞌuluꞌ kye tqatel mas limaq tzan tqex nkꞌuꞌuꞌ kyaqil twitz te wawal bꞌix kyaqil tidiꞌchq wetz tuj. 19 Yaji onqꞌumaꞌtz wetzx tuj wanim ikxjani: ‘Wetz tidiꞌchq kꞌuꞌuꞌ witzaꞌ te kyꞌilaꞌj aqꞌbꞌi. Ajnaꞌl okyinꞌojlayon, bꞌix okyinwaꞌyon bꞌix okyinꞌukꞌayon bꞌix okyinchalajel.’ ” 20 Per yaji te Qtata Dios oxik tqꞌumaꞌ tetz ikxjani: “¡Tꞌaꞌq kaꞌr! Ja aqꞌbꞌilni yatz ochkamel, bꞌix kyaqil aj tidiꞌ yatz ¿abꞌl qetz okajel asiꞌ?” 21 Ntons ikxji nkyꞌik tukyꞌi jun xjal aj tidiꞌchq tqꞌinomal nqet xhchimoꞌ cha te tetzx tzani twitz txꞌoꞌtxꞌ bꞌix kꞌontiꞌl jun tqꞌinomal tukyꞌi Qtata Dios.”
Te Qtata Dios Nkyeqet Tkꞌuluꞌ Kwent Kye Tkꞌwaꞌal
22 Te Jesus oxik tqꞌumaꞌ kye txnaqꞌatz ikxjani: “Wetz oxeꞌl nqꞌumaꞌ etetz, kꞌon kxbꞌisun tiꞌj titzaꞌ okxꞌanqꞌiyon, tiꞌj tidiꞌ oxeꞌl ewaꞌaꞌ bꞌix tiꞌj tidiꞌ eqꞌanaq owokel esiꞌ etiꞌj. 23 Qa itzꞌojoꞌ a te mas presisji twitz te qweꞌ, bꞌix te qchiꞌjel a te mas presis twitz te jqꞌanaq. 24 Intok esiꞌ enabꞌl kyiꞌj kye pichꞌ, kyetz kꞌontiꞌl nkyeꞌawan bꞌix kꞌontiꞌl njaw kyin tidiꞌ, kꞌontiꞌl kykꞌubꞌl ni kykajon, per te Qtata Dios nxik tsiꞌ kyweꞌ tzan kywaꞌan. Per yatzun etetz mas ganimix aꞌix kywitz kye pichꞌ. 25 ¿Abꞌl jun etetz, qa obꞌisuyon tiꞌjx, obꞌantel tzan tjaw tkyꞌibꞌsaꞌx tibꞌ junky txejqꞌabꞌ? 26 Qa etetz kꞌontiꞌl nbꞌantik etitzaꞌ jun tidiꞌ aj bꞌan chꞌi nekit, ntons ¿tistil nkxbꞌisun tiꞌj tidiꞌchq?
27 Intok esiꞌ enabꞌl titzaꞌ nkyejaw kyꞌibꞌ kye ubꞌechb tuj kꞌul. Kyetz kꞌontiꞌl nkyeꞌaqꞌunan bꞌix kꞌontiꞌl nkyekyimon, per wetz oxeꞌl nqꞌumaꞌ etetz, ni siker te Salomon* [aj kꞌulul mandad oqtxiꞌ], ni tetz tzan tpaj kyaqil aj bꞌan tbꞌanil tidiꞌchq tuq tetz bꞌaꞌn tuq tzan tok txqꞌaptzaꞌ tibꞌ iktzaꞌ kyetz. 28 Qa te Qtata Dios nxqꞌaptzan bꞌan tbꞌanil kye ubꞌech tuj kꞌul, aj akyeqet bꞌan tbꞌanil ajnaꞌl per nchiꞌj ojetq kyeponaj bꞌix okyeꞌokex siꞌ tuj qꞌaqꞌ, ntons pyorx-alo etiꞌj etetz aꞌix, te Qtata Dios oxqꞌaptzayon etetz aj nyaꞌtx nim witꞌlik ekꞌuꞌj tiꞌj. 29 Ntons kꞌon kxbꞌisun tiꞌj tidiꞌ oxeꞌl ewaꞌaꞌ bꞌix tidiꞌ oxeꞌl etukꞌaꞌ, bꞌix kꞌontiꞌl tzan ebꞌisun tiꞌj chꞌinwt, kꞌon qex esiꞌ bꞌis tuj etanim. 30 Kyaqil kye aj nyaꞌtx qxjalil tijajil Israel aj kꞌontiꞌl nkyeꞌokslan te Qtata Dios, kyetz nkyebꞌisun tiꞌj kyaqil nini, per etetz ntzaj enaꞌoꞌ jun etat aj tebꞌen tidiꞌ presis te etetz. 31 Intok esiꞌ etetz ekꞌuꞌj tzan tqet etokslaꞌ titzaꞌ tgan te Qajawil, bꞌix kyaqil te aj presis te etetz, otzajel siꞌ.”
Te Aj At Te Qetz Tuj Kaꞌj
32 “Kꞌon kxbꞌisun, komo etetz aꞌix iktzaꞌ waloꞌ. Anke etetz nyaꞌtx kyꞌilaꞌj ebꞌet bꞌix nyaꞌtx nim ebalor, per a te Ntat te twitzaleꞌ kꞌulul mandad tiꞌj kyaqil, bꞌix oqet tuj twitz tzan txik tsiꞌ etajwalil tzan ekꞌulun mandad tukyꞌiꞌl. 33 Intxik ekꞌayiꞌ tidiꞌchq aj at etetz, bꞌix intxik etoyeꞌ kye mebꞌaꞌ xjal. Intqet echimoꞌ jun eqꞌinomal aj kꞌontiꞌl nponaj; intqet echimoꞌ jun eqꞌinomal tuj kaꞌj aj jaꞌ te eqꞌinomal kꞌontiꞌl nmankun bꞌix jaꞌ kye eleqꞌ kꞌontiꞌl nkyeꞌox bꞌix te pokꞌ kꞌontiꞌl npon tnajsaꞌ. 34 Komo aj jaꞌ atqet te eqꞌinomal, ax tzi okajel te etanim.”
A Tgan Tzan Qten List
35 “Peꞌeten waq list iktzaꞌ jun xjal atok tqꞌanaq bꞌix at tqꞌanal txaqoꞌ.* 36 Peꞌeten waq list iktzaꞌ kye aqꞌunon aj nkyeꞌiyon tiꞌj te kyajawil chꞌinky tmeltzꞌjik aj jaꞌ ojetq xik ukꞌleꞌ tzan tpaj telentz mojlet jun xjal, iktzaꞌ kye aqꞌunon nkyeꞌiyon tzan totz kyjaqoꞌ te jay twitz oj tok tzkꞌonkꞌaꞌ te lamel, ax ikxji peꞌeten etetz.* 37 Galanx-alo kye aj mosj aj list ateꞌ, oj tul te kyajawil okyetzajel kꞌulbꞌaꞌ nkyeꞌiyon tiꞌj. Wetz oxeꞌl nqꞌumaꞌ etetz te bꞌanꞌax, te kyajawil owokel tsiꞌ tqꞌanaq taqꞌumbꞌil tzan kxik tkꞌaꞌchaꞌ, bꞌix oxeꞌl tqꞌumaꞌ tzan kyqet witꞌlet tiꞌj tmes bꞌix ajixk tetz oxeꞌl kꞌaꞌchan te kyetz.* 38 Galanx-alo kyetz okyetzajel kꞌulbꞌaꞌ tzunx itzꞌojeꞌx, nkesey te kypatron owulel bꞌan chukaqꞌbꞌil qatzun bꞌan qꞌeqombwenji. 39 Ntons, instzaj echaꞌoꞌ junky yekꞌbꞌil ntzani: Qa te tajaw jay tebꞌen-wit janikꞌor owulel jun eleqꞌ, tetz nlay-tal tzꞌotz stzoqpiꞌ tzan totz tuj te jay. 40 Ax ikxji etetz, peꞌeten waq list tzan tpaj [wetz] te Ichan Aj Tkꞌwaꞌal Dios [aꞌin] kyinꞌul tuj jun qꞌij aj kꞌontiꞌl etebꞌen etetz janikꞌbꞌaꞌn.”*
Te Yekꞌbꞌil Tiꞌj Te Mosj Galan Bꞌix Te Mosj Aj Nyaꞌtx Galan
41 Yaji te Xhpeꞌy oxik xhchaꞌoꞌ tetz ikxjani: “Tat, ¿ma tzaj aqꞌumaꞌ te ja yekꞌbꞌil aꞌox te qetza qatzun kye kyaqilji?” 42 Yaji te Twitzaleꞌ oxik tqꞌumaꞌ: “¿Titzaꞌ nabꞌlin jun mosj aj bꞌan tumeꞌl nbꞌisun bꞌix nkꞌulun kyaqil iktzaꞌ te tpatron tgan, bꞌix te tpatron nkaj tsiꞌ tuj tqꞌabꞌ tetz kye txqꞌanky tuj tjay tzan kxik tkꞌaꞌchaꞌ oj tpon or? 43 Galanx-alo te aj mosjji oj tul te tpatron otzajel kꞌulbꞌaꞌ nkꞌulun kyaqil taqꞌun iktzaꞌx ojetq kaj qꞌumaꞌ tetz. 44 Oxeꞌl nqꞌumaꞌ etetz te bꞌanꞌax, te tpatron okajel tsiꞌ te kꞌulul mandad tiꞌj kyaqil tidiꞌchq tetz. 45 Per qa te mosj oqtel tbꞌisuꞌ tuj tanim, “Te wajawil nlay tzul luwew,” bꞌix yaji qa tetz owaqꞌel tzan kyqet tbꞌujuꞌ kye txqꞌanky mosj xuj tukyꞌi ichan, bꞌix cha owokelten waꞌil bꞌix ukꞌayon bꞌix oboliyon, 46 ntons yaji tuj jun qꞌij aj kꞌontiꞌl tebꞌen, te tpatron omeltzꞌjel bꞌix oxeꞌl tsiꞌ nim xhchoꞌnal tiꞌj, bꞌix te xjal okajel kyukyꞌi kye aj kꞌontiꞌl nkyeꞌokslan.
47 Te jun mosj aj tebꞌen tidiꞌ tgan te tpatron, bꞌix qa kꞌontiꞌl nqet tkꞌuluꞌ te aqꞌunj, yaji oj tul te tpatron oxeꞌl siꞌ jun nim xhchoꞌnal tiꞌj. 48 Per qa te jun aqꞌunon tzan tpaj kꞌontiꞌl tuq tebꞌen ma tkꞌuluj jun tidiꞌ nyaꞌtx galan, tetz oxeꞌl siꞌ xhchoꞌnal tiꞌj per nyaꞌtx nim. Abꞌlchaq xjal aj nxik siꞌ nim [tajwalil], te tpatron otzajel xhchaꞌoꞌ nim tukyꞌiꞌl; bꞌix te aj nkaj siꞌ nim tuj tqꞌabꞌ, te tpatron oxeꞌl tqaniꞌ tukyꞌiꞌl mas nim kywitz kye txqꞌanky.”
Tzan Tpaj Te Jesus Kye Xjal Oqtel Kypawaꞌ Kyibꞌ Kxol
49 “Wetz maꞌtx kyinꞌul twitz ja txꞌoꞌtxꞌni [iktzaꞌ] tzan nswan qꞌaqꞌ [tzan tpon tnajsaꞌ te nyaꞌtx galan]. Bꞌix galan-talo qa oje-wit tzꞌaqꞌik tzan strenun. 50 Wetz presis tzan tok wen jun xhchoꞌnal nim, bꞌix bꞌan nꞌok wen twitz tzan tpaj minaꞌ tkyꞌik. 51 ¿Etetz tuj enabꞌl qa wetz inꞌul tzan kyten galan kye xjal twitz ja txꞌoꞌtxꞌni? Nyaꞌtx sinoke tzan tqet kypawaꞌ kyibꞌ. 52 Ajnali jwebꞌ xjal tuj jun jay oqtel kypawaꞌ kyibꞌ, ox okyejawel meltzꞌjik kyiꞌj kabꞌeꞌ bꞌix kabꞌeꞌ okyejawel meltzꞌjik kyiꞌj ox. 53 Te kꞌwaꞌlon ojawel meltzꞌjik tiꞌj tkꞌwaꞌal bꞌix te kꞌwaꞌalbꞌaj ojawel meltzꞌjik tiꞌj te kꞌwaꞌlon; te alon ojawel meltzꞌjik tiꞌj tal, bꞌix te tal ojawel meltzꞌjik tiꞌj tnan; bꞌix jun alibꞌon ojawel meltzꞌjik tiꞌj talibꞌ, bꞌix te alibꞌj ojawel meltzꞌjik tiꞌj te alibꞌon.”*
Aj Txik Tqꞌumaꞌ Jesus Tzan Tok Qsiꞌ Qnabꞌl Tiꞌj Te Aj Nkyꞌik Twitz Txꞌoꞌtxꞌ
54 Ntons te Jesus ax oxik tqꞌumaꞌ kye xjal ikxjani: “Oj txik eten etetz te muj ikjaꞌn stzaj aj jaꞌ nqet te qꞌij, nxik eqꞌumaꞌ “tzul jabꞌ” bꞌix ikxji nkyꞌik. 55 Bꞌix qa te kyaqꞌiqꞌ tzajnaq tuj te kyꞌixkꞌoj txꞌoꞌtxꞌ ntons nꞌeqꞌumaꞌ “tzul qꞌijal” bꞌix ikxji nkyꞌik. 56 ¡Xmeletzꞌ kaꞌr! Qa etetz nꞌel enikyꞌ tidiꞌ nkyꞌik twitz kaꞌj bꞌix twitz txꞌoꞌtxꞌ, ntons ¿tistil kꞌontiꞌl nꞌel enikyꞌ tiꞌj te aj nkyꞌik tuj ja tyemp ajnaꞌlni?”
Tok Asiꞌ Akꞌuꞌj Tzan Aqeten Galan Tukyꞌi Awajqꞌoj
57 “¿Tistil kꞌontiꞌl nqet ebꞌisuꞌ byenech alkyetz te galan? 58 Qa at abꞌl ma xik qaniyon etiꞌj bꞌix okxeꞌl teqꞌiꞌ twitz te pujul il, peꞌeyolin tzan eten galan exol tzunx tuq atx luwar. Ikxji tzan kꞌon epon teqꞌiꞌ max tukyꞌi te pujul il, bꞌix tetz okxeꞌl tqꞌapoꞌ tuj kyqꞌabꞌ kye mulon, bꞌix okxtex ksiꞌ tuj pres. 59 Wetz oxeꞌl nqꞌumaꞌ, etetz nlay kxjatz tuj te pres qa minaꞌ tuq tokbꞌaj echojoꞌ te emult kyaqil.”