12
A Te Jesus Tajaw Te Qꞌij Ojlaꞌmj
1 Ntons tuj aj tyempji, tuj jun qꞌij ojlaꞌmj, te Jesus nbꞌet tuq tuj jun bꞌey tuj jun awalj triw. Kye txnaqꞌatz [nkyebꞌet tuq tukyꞌiꞌl, bꞌix] otzajꞌel kykꞌuꞌj, eꞌokten potxꞌol te triw bꞌix oxik kykꞌuxuꞌ.a 2 Kye aj bꞌuchꞌuj Parisey nkyekaꞌyin tuq, bꞌix oxik kyqꞌumaꞌ te Jesus ikxjani: “Tzaj awen, kye axnaqꞌatz nkyekꞌulun jun tidiꞌ aj xjan tzan jkꞌulun tuj jun qꞌij ojlaꞌmj.”* 3 Ntons tetz owaj stzaqꞌbꞌeꞌ kyetz ikxjani: “¿Tiꞌtzun, minaꞌ tjaw eten tidiꞌ otkꞌuluj te Dawid jun-el aj stzaj jun waꞌij tiꞌj bꞌix kyiꞌj kye aj ajuneꞌ tuq tukyꞌiꞌl? 4 Owox tuj te jay tabernáculo aj jaꞌ tuq atqet te xhchkꞌatunal te Qtata Dios bꞌix oxik twaꞌaꞌ te wabꞌj aj qꞌapomaj tuq te Qtat, bꞌix xjan tuq tzan txik twaꞌaꞌ tetz bꞌix kye aj ajuneꞌ tuq tukyꞌiꞌl, sinoke aꞌox tuq bꞌaꞌn tzan txik waꞌaꞌ tzan kye pal.* 5 ¿Qatzun etetz minaꞌ tjaw eteꞌeꞌ tuj te Kawbꞌil aj oqet stzꞌibꞌaꞌ Moisés, kye pal [nkyeꞌaqꞌunan] tuj te Nin Jay Nabꞌil Qtata Dios tuj jun qꞌij ojlaꞌmj, bꞌix ikxji kꞌontiꞌl nkyejoyon choj tuj twitz Qtata Dios?* 6 Ntons wetz oxeꞌl nqꞌumaꞌ etetz ajnaꞌl, tzani atqet jun aj mas presis twitz te Nin Jay Nabꞌil Qtata Dios. 7 Etetz minaꞌ tel enikyꞌ tidiꞌ telponx te [aj tzꞌibꞌaꞌ tuj Tuꞌjal Dios] ikxjani: “Wetz ngan tzan tok loꞌet ekꞌuꞌj tiꞌj junky, bꞌix nyaꞌtx cha aꞌox tzan stzaj eqꞌapoꞌ epresent wetz.”* Ntons cha oje-wit tzꞌel enikyꞌ tiꞌj, kꞌontiꞌl-tal nkyexik esiꞌ tuj il kye aj kꞌontiꞌl kypaj. 8 Komo [wetz] te Ichan Aj Tkꞌwaꞌal Dios [aꞌin], at wajwalil tiꞌj te qꞌij ojlaꞌmj.”
Aj Tqet Tqꞌanaꞌ Jesus Jun Xjal Tuj Jun Qꞌij Ojlaꞌmj
9 Ntons te Jesus oxik bꞌix owox tuj te jay nabꞌil Dios tuj aj luwarji. 10 At tuq jun xjal tzi kamnaq tuq tqꞌabꞌ, bꞌix komo [kye pal] nkyejoyon tuq tumeꞌl titzaꞌ tzan txik kyqꞌumaꞌ tuq til te Jesus, ntons oxik kchaꞌoꞌ tetz ikxjani: “¿Bꞌaꞌn peꞌ tukyꞌi te Kawbꞌil tzan tqet jqꞌanaꞌ jun xjal tuj jun qꞌij ojlaꞌmj?”*
11 Ntons te Jesus oxik xhchaꞌoꞌ kyetz ikxjani: “¿Abꞌl jun te etetz exol oj txik tolj jun taloꞌ tuj jun jul tuj qꞌij ojlaꞌmj, kꞌontiꞌl petz nxik bꞌix njatz teqꞌiꞌ? 12 ¿Nyaꞌtx petzun mas presis jun xjal twitz jun karner? Astilji ntumelaꞌ tukyꞌi te Kawbꞌil tzan jkꞌulun jun galan tuj qꞌij ojlaꞌmj.”
13 Ntons oxik tqꞌumaꞌ tukyꞌi te yabꞌ ikxjani: “Intel aqinuꞌ aqꞌabꞌ.” Ntons te xjal owel tqinuꞌ bꞌix okaj bꞌan galan iktzaꞌx tuq te junky tqꞌabꞌ. 14 Per ya ma kyeꞌetz kye aj bꞌuchꞌuj Parisey, kyetz oqet kykawlaꞌ kxol tzan tuq tqet kykansaꞌ te Jesus.
Te Jesus Nkꞌulun Tuq Iktzaꞌx Aj Ojetq Kaj Tzꞌibꞌaꞌ Tiꞌj Oqtxiꞌ
15 Ntons, ya ma tzꞌok xhchaꞌoꞌ te Jesus, tetz owex tzi bꞌix kyꞌilaꞌj xjal ebꞌajxik lapet tiꞌj. Te Jesus nkyeqet tuq tqꞌanaꞌ kyaqil kye yabꞌ, 16 bꞌix nxik tuq tqꞌumaꞌ kyetz tzan kꞌon tuq txik kyyoliꞌ tiꞌj tetz kywitz xjal.
17 Kyaqil ntzani okyꞌik tzan tponkix tyol te Chay aj yolil tyol Dios oqtxiꞌ ikxjani: 18 “Tzani atqet te aj qꞌapoꞌ tibꞌ nꞌaqꞌunan te wetz, aj oje tzꞌel njoyoꞌ bꞌix aj ganiꞌ nim witzaꞌ, bꞌix nkyinchalaj tiꞌj. Oxeꞌl nsiꞌ Nxew tuj tanim, bꞌix tuj kyaqil amaqꞌ oxeꞌl tpakbꞌaꞌ alkyetz te tumeꞌl iktzaꞌ wetz ngan. 19 Tetz nlay jaw kaw qa kye txqꞌanky nyaꞌtx dyakwerd ateꞌ tukyꞌiꞌl bꞌix nlay jaw xtxꞌay; bꞌix nlay tzꞌok eꞌeꞌ tuj bꞌey nwululun. 20 Tetz nlay modin bꞌan kaw kyukyꞌi kye aj nyaꞌtx jwert-eꞌ, bꞌix nlay tzꞌok txobꞌsaꞌ kyanim kye aj nyaꞌtx jwert-eꞌ, sinoke tetz otkꞌuluꞌtz tzan tbꞌantik kyaqil tuj tumeꞌl 21 bꞌix kyaqil amaqꞌ owokel kywitꞌbꞌaꞌ kykꞌuꞌj tiꞌj.”*
Aj Kyyolin Kye Xjal Qa Te Jesus At Tuq Jun Malspirit Tuj Tanim
22 Opon in tukyꞌi Jesus jun xjal moy tuq bꞌix men, at tuq jun malspirit tuj tanim, per te Jesus oqet tqꞌanaꞌ bꞌix obꞌantik tkaꞌyin bꞌix obꞌantik tyolin. 23 Kyaqil kye xjal bꞌan nkyelabꞌan tuq, nkyechaꞌon tuq kyibꞌkyibꞌx ikxjani: “¿Aj ntzani peꞌ te tijajil Dawid [aj qꞌumankaj tuq tzan tul]?” 24 Per ya ma tzꞌok kchaꞌoꞌ ikxjani, kye aj bꞌuchꞌuj Parisey okyyolij ikxjani: “Tetz bꞌaꞌn tzan kyjatz tin kye malspirit cha tzan tpaj te Belsebu aj twitzaleꞌ kyiꞌj kye malspirit, a tetz nxik sin tajwalil.”*
25 Yaji te Jesus tebꞌen tuq te aj nqet kybꞌisuꞌ, bꞌix oxik tqꞌumaꞌ kyetz ikxjani: “Qa kye xjal tuj jun amaqꞌ pawaꞌ kyibꞌ [tzan tpaj pur qꞌoj kxol], kyebꞌayleꞌ nponaj te amaqꞌ. Bꞌix qa kye xjal tuj jun jay kꞌontiꞌl eqꞌiꞌ kyibꞌ, nlay bꞌantik tzan kyten junx nim tuj. 26 Ax ikxji te Satanas, qa ojawetz tin tibꞌx, ikxji tiꞌjx tetz nqꞌojin. Qa ikxji, ¿titzaꞌ obꞌantel tzan sten tajwalil nim tuj? 27 Etetz nꞌeqꞌumaꞌ wetz nkyejatz win kye malspirit tzan tpaj tajwalil te Belsebu; qa bꞌanꞌax ikxji ntons kye aj lapikeꞌ etiꞌj etetz, ¿abꞌl nxik sin kyajwalil tzan tjatz kyin malspirit? Astilji aꞌeꞌxk kyetz oxeꞌl kyqꞌumaꞌ etiꞌj tidiꞌ nyaꞌtx galan nkxkꞌulun. 28 Qa wetz nkyejatz win kye malspirit tzan tpaj te Txew Dios, te nini telponx te Qtata Dios maꞌtx tzꞌaqꞌik tkꞌulun mandad qxol tukyꞌi jun nim tajwalil. 29 Komo ¿titzaꞌ owokex jun xjal elqꞌon tuj tjay junky aj bꞌan nim tbalor bꞌix tzan txik teqꞌiꞌ kyaqil tidiꞌ tetz qa nlay qet tkꞌaloꞌ tbꞌayaꞌ? Ikxji obꞌantel tzan txik tin kyaqil.
30 Abꞌl te aj nyaꞌtx dyakwerd wukyꞌiꞌl, tetz jun wajqꞌoj; bꞌix abꞌl te aj kꞌontiꞌl nꞌonen wukyꞌiꞌl tzan xhchimon, cha nkyeꞌel tslabꞌuꞌ. 31 Astilji wetz oxeꞌl nqꞌumaꞌ etetz, te Qtata Dios oqtel tnajsaꞌ kyaqil xhchoj jun xjal bꞌix kyaqil aj yol nyaꞌtx galan aj nxik tqꞌumaꞌ, per nlay qet najsaꞌ te yol nyaꞌtx galan aj nxik qꞌumaꞌ tiꞌj te Txew Dios. 32 Te Qtata Dios oqtel tnajsaꞌ kyaqil aj nyaꞌtx galan oxeꞌl tqꞌumaꞌ jun xjal wiꞌj [wetz] te Ichan Aj Tkꞌwaꞌal Dios [aꞌin], per nlay qet tnajsaꞌ jun yol nyaꞌtx galan tiꞌj te Txew Dios, ni ajnaꞌl tzani twitz txꞌoꞌtxꞌ bꞌix ni tuj junky tyemp mas yaj tuj kaꞌj.
33 Etetz etebꞌen qa jun awalj galan, ntons ax otswaꞌtz jun twitz tbꞌanil, per qa te awalj nyaꞌtx galan, ntons ax otswaꞌtz jun twitz nyaꞌtx galan. Jun tzeꞌ nꞌel qnikyꞌ tiꞌj tzan tpaj te twitz aj ntswaꞌ.*
34 Etetz aꞌix tijajil kan.* ¿Bꞌaꞌn petzun tzan txik eqꞌumaꞌ jun tidiꞌ galan qa etetz pur nyaꞌtx galan aꞌix? Komo iktzaꞌx aj atqex tuj tanim jun xjal, ax ikxji te aj ntyoliꞌ.* 35 Jun xjal galan, nyolin tidiꞌchq galan tzan tpaj pur galan tuj tanim. Jun xjal aj nyaꞌtx galan, nyolin pur nyaꞌtx galan tzan tpaj pur nyaꞌtx galan atqex tuj tanim. 36 Wetz oxeꞌl nqꞌumaꞌ etetz, oj tul te jwisy, kyaqil xjal ojawetz kyqꞌumaꞌ kyiꞌj kyaqil yol aj kꞌontiꞌl token aj oje xik kyyoliꞌ. 37 Komo iktzaꞌx te eyol aj oje xik eqꞌumaꞌ, ax ikxji oxeꞌl qꞌumaꞌ etiꞌj at etil qa kꞌontiꞌlji.”
Aj Tyolin Jesus Kye Xjal Nlay Tzꞌok Kyen Junky Seny Sinoke Aꞌox Oj Tjaw Anqꞌin
38 Ntons junjun aj bꞌuchꞌuj Parisey bꞌix kye aj xnaqꞌtzal Kawbꞌil oxik kyqꞌumaꞌ te Jesus ikxjani: “Xnaqꞌtzon, qetza qgana tzan tok qen nchkꞌulun jun seny [tukyꞌi nim tajwalil Qtata Dios].”* 39 Te Jesus owaj stzaqꞌbꞌeꞌ kyetz ikxjani: “Kye xjal aj pur nyaꞌtx galan kyenabꞌlin bꞌix aj oje kaj kykolaꞌ tzan kynaꞌon Qtata Dios tukyꞌi jun tkꞌuꞌjlal, kyetz nkyeqanin jun seny, per nlay qet kꞌulet jun seny te kyetz sinoke aꞌox te aj okyꞌik tiꞌj te Jonas aj yolil tyol Dios oqtxiꞌ.* 40 Komo iktzaꞌx te Jonas oqex ten oxe aqꞌbꞌil bꞌix oxe qꞌij tuj tkꞌuꞌj te chman txkup tuj aꞌ,* ax ikxji te Ichan Aj Tkꞌwaꞌal Dios oqtexten oxe qꞌij bꞌix oxe aqꞌbꞌil tjaqꞌ txꞌoꞌtxꞌ. 41 Oj tul te jwisy, kye xjal aj Nínive okyeqtel ten qꞌumal kyil kye ja xjal tuj ja tyemp ajnaꞌl, tzan tpaj kye aj Nínive ojaw kkyꞌixpuꞌ kynabꞌlin aj tok kchaꞌoꞌ te tpakbꞌalil aj oxik tqꞌumaꞌ te Jonas,* per ajnaꞌl wetz akyinqet tzani bꞌix mas nim wajwalil twitz te Jonas. 42 Bꞌix oj tul te jwisy, ax te xuj aj twitzaleꞌ kꞌulul mandad tuj Saba, ax tetz oqtel ten qꞌumal kyil kye xjal tuj ja tyemp ajnaꞌl, tzan tpaj tetz otzaj bꞌan laqꞌchik chaꞌol tyol Salomon,* per ajnaꞌl wetz akyinqet tzani bꞌix mas nim wajwalil twitz te Salomon.
43 Ntons, oj tjatz in jun malspirit tuj tanim jun xjal, yaji jaꞌchq nbꞌet njoyon jaꞌ tzan tnajan, bꞌix nbꞌet iktzaꞌ tuj kyꞌixkꞌoj txꞌoꞌtxꞌ, kꞌontiꞌl nꞌoknoj jaꞌ tzan tnajan, bꞌix nqet tbꞌisuꞌ ikxjani: 44 “Okyinmeltzꞌjel tuj njay aj jaꞌ inꞌetz.” Ntons, oj tmeltzꞌjik, ntzaj tkꞌulbꞌaꞌ te aj xjalji, iktzaꞌ jun jay kꞌontiꞌl junky tuj, bꞌan kyꞌisuꞌ kyaqil, bꞌix bꞌan kꞌuluꞌ kyaqil. 45 Ntons yaji nxik tukꞌleꞌ junky wuq malspirit tukyꞌiꞌl aj mas bꞌan nyaꞌtx galan kyenabꞌlin twitz tetz, yaji kkyaqil nkyeqex najan tuj tanim te xjal, bꞌix te xjal nkaj mas bꞌan pyor twitz te tbꞌay-el. Ax ikxji okyꞌel kyiꞌj kye ja xjal ajnaꞌl aj pur nyaꞌtx galan kyenabꞌlinni.”
Aj Tyolin Jesus Abꞌleꞌ Kye Aj Tuj Tjay
46 Te Jesus tzunx tuq nyolin kyukyꞌi kye xjal, aj tpon te tnan bꞌix kye titzꞌin, kyetz akyeqet tuq tzijay bꞌix kygan tuq yolin tukyꞌiꞌl. 47 Ntons tzaj jun xjal, oxik tqꞌumaꞌ tukyꞌi Jesus ikxjani: “Te anan bꞌix kye awitzꞌin akyeꞌex tzijay bꞌix kygan tzan kyyolin awukyꞌiꞌl.” 48 Per yaji tetz oxik tqꞌumaꞌ ikxjani: “¿Abꞌl wetz nnan bꞌix abꞌleꞌ kye witzꞌin?” 49 Ntons exik tyekꞌuꞌ kye txnaqꞌatz bꞌix oxik tqꞌumaꞌ ikxjani: “Kyaqil kye aj ja ntzanijeꞌ, aꞌeꞌ kye nnan bꞌix kye witzꞌin. 50 Komo kyaqil kye aj nqet kykꞌuluꞌ iktzaꞌ tgan te Ntat aj atjax tuj kaꞌj, aꞌeꞌ kyetz kye witzꞌin bꞌix kye nnan.”