2
Aj Tqet Tqꞌanaꞌ Jesus Jun Yabꞌ Kamnaq Tuq Toq
1 Bwen, yatzun tkyꞌiklen kabꞌe qꞌij, te Jesus omeltzꞌjikky tuj amaqꞌ Capernaúm bꞌix owok naj chaꞌoꞌ luwew tzan kye xjal, tetz atqet tuq tjay. 2 Ntons ebꞌajpon kye xjal bꞌix ebꞌajnoj tuj tjay ni kꞌontiꞌl obꞌantik kyten tuj. Ntons, man tuq npakbꞌan te Jesus Tyol Dios kyukyꞌiꞌl, 3 kypon kaj ichan, tanoꞌ tuq jun yabꞌ kyitzaꞌ. Te yabꞌ kamnaq tuq toq. 4 Komo kꞌontiꞌl obꞌantik kyox tuj te jay tzan kypaj kye xjal ojetq kyenoj tuj, mejor ebꞌajjax twiꞌ jaya bꞌix ojaw kypujuꞌ jun pedas twiꞌ te jay tzan tqex kytumbꞌaꞌ te yabꞌ. Komo te yabꞌ atqet tuq twitz jun twatbꞌil, oqex kytumbꞌaꞌ te yabꞌ tuj te jay tzan tkyaqon aj jaꞌ atqet tuq te Jesus. 5 Yatzun te Jesus, ya ma tzꞌok ten kyetz bꞌan witꞌlik tuq kykꞌuꞌj tiꞌj, oxik tqꞌumaꞌ tetz te yabꞌ ikxjani: “Last aꞌich tey, per ajnaꞌl maꞌtx najslet kyaqil achoj.”
6 Ntons akyeqet tuq tzi junjun xnaqꞌtzal Kawbꞌil witꞌlikeꞌ tuq tzi bꞌix kyetz, aj txik kchaꞌoꞌ tyol Jesus, owaqꞌik tximan kyanim ikxjani: 7 “¿Tistil nxik tyoliꞌ tetz ikxji? Ikxji cha nxmayin tiꞌj te Qtata Dios, komo nijunwt xjal bꞌaꞌn tzan tnajsan qchoj. Aꞌox te Qtata Dios bꞌaꞌn tzan tnajsan qchoj” kyekyi kyetz. 8 Per yatzun te Jesus bꞌeyxnajji otnaꞌoj tuj tanim aj nyolin tuq [kyanim]. Yaji oxik tqꞌumaꞌ tetz kyetz ikxjani: “¿Tistil etetz nkxyolin tuj etanim ikxji? 9 ¿Tidiꞌ mas kwest tzan txik qyoliꞌ te jun aj kamnaq toq? ¿Tzan txik qyoliꞌ: “Te achoj maꞌtx qet najslet,” qatzun tzan txik qyoliꞌ: “Pajaw waꞌlet, eqꞌiꞌx awatbꞌil bꞌix pabꞌet”? 10 Ntons, ajnaꞌl wetz oqtel nyekꞌuꞌ wajwalil tzan tok eten, [wetz] te Ichan Aj Tkꞌwaꞌal Dios [aꞌin] at wajwalil tzan nnajsan kchoj kye xjal tzani twitz txꞌoꞌtxꞌ.” Ntons yaji tetz oxik tqꞌumaꞌ te yabꞌ aj kamnaq tuq toq: 11 “Pajaw waꞌlet, eqꞌiꞌx awatbꞌil bꞌix pax ajay.” Ntons te yabꞌ ojaw naj waꞌlet, oxik teqꞌiꞌ twatbꞌil bꞌix owex tuj te jay kywitz kyaqil kye xjal. 12 Bꞌix kye xjal kyaqil ebꞌajlabꞌan bꞌix oqet kyjiqꞌbꞌaꞌ Qtata Dios, nkyyoliꞌ tuq ikxjani: “Ni jun-el minaꞌ tok qen iktzaꞌ ntzani” kyekyi.
Aj Stzaj Ukꞌleꞌ Lewi Tzan Jesus Tzan Tok Lapet Tuq Tiꞌj
13 Bwen, yaji te Jesus oxik junkyꞌelky stziꞌ te Galiley Aꞌ bꞌix bꞌan kyꞌilaꞌj kye xjal ebꞌajpon chaꞌoyon tiꞌj bꞌix tetz nkyexik tuq txnaqꞌtzaꞌ. 14 Ntons, yaji [oxik stzyuꞌ tbꞌey bꞌix] aj man tuq ikjaꞌn tkyꞌik stziꞌ jun jay aj jaꞌ tuq nꞌel peyuꞌ chojenj, oxik teꞌeꞌ jun xjal witꞌliqet tuq tzi, Lewib tbꞌi, tetz stat Alfey tuq, bꞌix kyi te Jesus te Lewi: “Qalan, pawok lapet wiꞌj.” Bꞌix te Lewi ojaw waꞌlet bꞌix owok lapet tiꞌj.
15 Yaji te Jesus kyukyꞌi kye txnaqꞌatz exwaꞌq tjay Lewi bꞌix nkyewaꞌan tuq junx kyukyꞌi kyꞌilaꞌj aj peyul chojenj tukyꞌi txqꞌanky xjal chimol choj; komo kyꞌilaꞌj xjal iktzaꞌ kyetz lapikeꞌ tuq tiꞌj Jesus. 16 Yaji txqꞌan aj bꞌuchꞌuj xnaqꞌtzal Kawbꞌil kyukyꞌi aj bꞌuchꞌuj Parisey aj akyeqet tuq tzi, kyetz owok kyeꞌeꞌ te Jesus nwaꞌan tuq junx kyukyꞌi kye chimol choj bꞌix kye aj peyul chojenj, ntons kye xnaqꞌtzal Kawbꞌil bꞌix kye aj bꞌuchꞌuj Parisey oxik kyqꞌumaꞌ kye txnaqꞌatz Jesus ikxjani: “¿Tistil nwaꞌan Jesus kyukyꞌi aj peyul chojenj bꞌix kyukyꞌi aj chimol chojni?” 17 Ya ma tzꞌok xhchaꞌoꞌ te Jesus aj nkyqꞌumaꞌ tuq, tetz oxik tqꞌumaꞌ kyetz ikxjani: “Kye aj bꞌaꞌneꞌ nyaꞌtx presis jun qꞌanon kyiꞌj per yatzun kye aj yabꞌeꞌ a tgan jun qꞌanon kyiꞌj. Ikxji wetz kꞌontiꞌl inꞌul tzan kypaj aꞌeꞌ aj kꞌontiꞌl kchoj sinoke inꞌul ukꞌlel kye aj at kchoj.”
Aj Tyolin Jesus Tiꞌj Te Oj Qipan Waꞌij Tzan Qxnaqꞌtzan
18 Bwen, jun qꞌij kye txnaqꞌatz Waꞌnch [Swal Aꞌ] bꞌix kye kxnaqꞌatz aj bꞌuchꞌuj Parisey, kyetz nqet tuq kyipaꞌ waꞌij [tzan kxnaqꞌtzan]. Yaji kyetz oxik kyqꞌumaꞌ te Jesus ikxjani: “Kye txnaqꞌatz Waꞌnch bꞌix kye kxnaqꞌatz kye aj bꞌuchꞌuj Parisey, nqet kyipaꞌ waꞌij [tzan kxnaqꞌtzan]. Per yatz axnaqꞌatzni, kyetz kꞌontiꞌl nkykꞌuluꞌ ikxji, bꞌix ¿tistilji?” 19 Ntons oxik tqꞌumaꞌ Jesus kyetz [jun yekꞌbꞌil] ikxjani: “¿Nqet peꞌ kyipaꞌ waꞌij kye aj xtxoken aj xjal aj owelatz mojlet? Kꞌontiꞌl, tzan tpaj atqet kyukyꞌiꞌl. 20 Per owokel eten jun qꞌij chaꞌoj txik eqꞌiꞌ te aj owokel mojlet, maxji kyeꞌipayon waꞌij kye aj xtxoken tzan kybꞌis. 21 [Ax junky yekꞌbꞌil ntzani:] Nijunwt xjal nqet txbꞌuqiꞌ jun xqꞌapj qꞌanq tukyꞌi jun akꞌaꞌj tzan tpaj te remyent akꞌaꞌj owokel jukꞌlik bꞌix yatzun te xqꞌapj qꞌanq oxeꞌl laqik mas. 22 [Ax junky yekꞌbꞌil ntzani:] Nijunwt xjal nqex tsiꞌ taꞌal ub aj man telentz tuj jun txꞌuꞌy tzꞌuꞌm qꞌanq tzan tpaj te taꞌal ub opusiyon tzan tpaj man telentz bꞌix te txꞌuꞌy tzꞌuꞌm olaqel. Ikxji opoyonaj te taꞌal ub bꞌix ax te txꞌuꞌy. A tgan tzan tqex siꞌlet te taꞌal ub aj man telentz tuj jun txꞌuꞌy tzꞌuꞌm akꞌaꞌj” kyi te Jesus.
Aj Tyolin Jesus Tiꞌj Te Qꞌij Ojlaꞌmj
23 Bwen, tuj jun qꞌij ojlaꞌmj nkyebꞌet tuq Jesus kyukyꞌi aꞌeꞌ txnaqꞌatz tuj jun luwar jaꞌ at tuq awalj triw kamawky tuq. Kye txnaqꞌatz Jesus [ojetq tuq tzajꞌel kykꞌuꞌj; astilji] njaw tuq kytoqiꞌ chꞌin triw.* 24 Yaji etzaj kye aj bꞌuchꞌuj Parisey, oxik kyqꞌumaꞌ te Jesus: “¿Tistil nkyetoqin triw kye axnaqꞌatzni? Komo xjan tzan jkꞌulun ikxji tuj jun qꞌij ojlaꞌmj.” 25 Yaji tzaj te Jesus, oxik tqꞌumaꞌ tetz kyetz: “¿Tiꞌtzun, minaꞌ tjaw eten etetz titzaꞌ oqet tkꞌuluꞌ te Dawid oqtxiꞌ aj at tuq waꞌij tiꞌj tetz kyukyꞌi tukyꞌiꞌl? 26 Tuj aj tyempji te Abiatar a tuq te twitzaleꞌ pal bꞌix te Dawid owox tuj te jay tabernáculo aj jaꞌ tuq atqet xhchkꞌatunal te Qtata Dios bꞌix oxik twaꞌaꞌ te wabꞌj aj qꞌapomaj tuq te Qtata Dios, bꞌix xjan tuq tzan tpaj aꞌox kye pal bꞌaꞌn tzan kywaꞌan aj wabꞌjji,* per te Dawid oxik twaꞌaꞌ bꞌix ax oxik tsiꞌ kye aꞌeꞌ tukyꞌiꞌl.”* 27 Yaji tetz oxik tqꞌumaꞌ kyetz ikxjani: “Te Qtata Dios okaj tsiꞌ te qꞌij ojlaꞌmj te jun galan te qetz bꞌix nyaꞌtx aꞌoꞌ qetz te jun galan te qꞌij. 28 Ntons [wetz] te Ichan Aj Tkꞌwaꞌal Dios [aꞌin] bꞌaꞌn tzan txik nqꞌumaꞌc alkyetz te galan tzan jkꞌulun tuj qꞌij ojlaꞌmj.”