6
Aj Txik Tqꞌumaꞌ Jesus A Tetz Te Tajaw Te Qꞌij Ojlaꞌmj
1 Ntons jun qꞌij ojlaꞌmj, te Jesus nbꞌet tuq tuj jun awalj. Kye txnaqꞌatz njaw tuq kytoqiꞌ chꞌin twitz triw, nꞌetz tuq kypoqꞌoꞌ, bꞌix nxik tuq kykꞌuxuꞌ. 2 Tzaj kye txqꞌan aj bꞌuchꞌuj Parisey, oxik kchaꞌoꞌ ikxjani: “¿Tistil etetz nqet ekꞌuluꞌ jun tidiꞌ aj xjan tzan jkꞌulun tuj jun qꞌij ojlaꞌmj?” 3 Yaji te Jesus owaj stzaqꞌbꞌeꞌ kyetz ikxjani: “¿Tiꞌtzun, minaꞌ tjaw eten tidiꞌ oqet tkꞌuluꞌ te Dawid aj at tuq waꞌij tiꞌj tetz kyukyꞌi aꞌeꞌ tukyꞌiꞌl? 4 Owox tuj te jay tabernáculo aj jaꞌ tuq atqet xhchkꞌatunal te Qtata Dios, ojaw stzyuꞌ te wabꞌj aj qꞌapomaj tuq te Qtat bꞌix owaꞌan tiꞌj bꞌix ax oxik tsiꞌ kye aꞌeꞌ tukyꞌiꞌl, anke te Kawbꞌil nyolin aꞌox kye pal bꞌaꞌn tzan kywaꞌan aj wabꞌjji.”* 5 Ntons, yaji te Jesus oxik tqꞌumaꞌ kyetz ikxjani: “[Wetz] te Ichan Aj Tkꞌwaꞌal Dios [aꞌin] at wajwalil tiꞌj te qꞌij ojlaꞌmj.”
Aj Tqet Tqꞌanaꞌ Jesus Jun Yabꞌ Tuj Jun Qꞌij Ojlaꞌmj
6 Ntons tuj junky qꞌij ojlaꞌmj te Jesus owox tuj te jay nabꞌil Dios, owaqꞌik tzan txnaqꞌtzan kye xjal. Atqet tuq jun xjal tzi kamnaq tuq te tqꞌabꞌ aj tbꞌanqꞌabꞌ, 7 bꞌix kye xnaqꞌtzal Kawbꞌil bꞌix kye aj bꞌuchꞌuj Parisey nkyekaꞌyin tuq tiꞌj Jesus qa oqtel tuq tqꞌanaꞌ tuj te qꞌij ojlaꞌmj, ikxji tzan tuq txik kypoqoꞌ te Jesus tukyꞌi jun til. 8 Per tetz tebꞌen tuq te aj nkybꞌisuꞌ, astilji oxik tqꞌumaꞌ te yabꞌ ikxjani: “Pajaw waꞌlet bꞌix paqeten ninkꞌajchaq kxol kye xjal.” Ntons te yabꞌ ojaw waꞌlet bꞌix oqeten kxol. 9 Ntons te Jesus oxik tqꞌumaꞌ kye txqꞌanky: “Wetz oxeꞌl nchaꞌoꞌ jun tidiꞌ etetz. ¿Nyolin peꞌ te Kawbꞌil tzan jkꞌulun jun galan tuj jun qꞌij ojlaꞌmj, qatzun tzan jkꞌulun jun nyaꞌtx galanji? ¿Nyolin peꞌ tzan jkolon kyiꞌj xjal qatzun tzan kyqet jkansaꞌji?” 10 Yaji exik teꞌeꞌ kyaqil kye aj akyeqet tuq tkꞌatzaj bꞌix oxik tqꞌumaꞌ tetz te yabꞌ ikxjani: “Intel awin aqꞌabꞌ.” Yaji te yabꞌ owel tin tqꞌabꞌ bꞌix obꞌantik. 11 Per kye aj nkyeqꞌojin tuq tiꞌj te Jesus, kyetz ebꞌajjaw qꞌojlik nim bꞌix eꞌaqꞌik tzan kywululun aber tidiꞌ tuq owokel kykꞌuluꞌ tiꞌj.
Aj Kyel Tjoyoꞌ Jesus Kykabꞌlajujil Tkyꞌixel
12 Ntons tuj aj tyempji, jun qꞌij te Jesus oxik xnaqꞌtzon twiꞌ jun witz, bꞌix owex taqꞌbꞌil tzan txnaqꞌtzan tukyꞌi Qtata Dios. 13 Ya ma qo xhkꞌateꞌ, etzaj tukꞌleꞌ kye txnaqꞌatz bꞌix eꞌel tjoyoꞌ kabꞌlajuj kxol kyaqil bꞌix eꞌok tqꞌumaꞌ kyetz tkyꞌixel. 14 [Aj ntzanijeꞌ kye aj eꞌel tjoyoꞌ:] Owel tjoyoꞌ te Simon, bꞌix owok tsiꞌ tbꞌi Xhpeꞌy; bꞌix owel tjoyoꞌ te Lexh aj titzꞌin Xhpeꞌy, bꞌix te Jacoboa bꞌix te Waꞌnch, bꞌix te Lip bꞌix te Xhtoꞌl, 15 bꞌix te Matey, bꞌix te Maxh, bꞌix te Jacobob aj tkꞌajol Alfey, bꞌix te Simon aj nꞌok qꞌumaꞌ Selot, 16 bꞌix te Juds aj terman Jacobo,c bꞌix te junky Juds aj Judas Iskaryot aj ojaw meltzꞌjik tiꞌj.
Aj Kxik Txnaqꞌtzaꞌ Jesus Kyꞌilaꞌj Xjal
17 Te Jesus oqetz twiꞌ te witz kyukyꞌiꞌl bꞌix eqeten tuj jun chqꞌaj bꞌix ojetq tuq tzꞌok kchimoꞌ kyibꞌ kyꞌilaꞌj xjal aj nkyeꞌok tuq lapet tiꞌj bꞌix ax kyꞌilaꞌj xjal aj jaꞌchq tuj tkwentil Judey bꞌix aj amaqꞌ Jerusalen bꞌix aj te nim chqꞌaj tkwentil Tir xtxaꞌm te nim aꞌ bꞌix aj tkwentil Sidon. Ebꞌajpon chaꞌoyon tiꞌj Jesus bꞌix ebꞌajpon tzan kyqet qꞌanaꞌ tiꞌj kyyabꞌil. 18 Kye xjal aj nꞌok kyen tuq twitz xhchoꞌnal tzan kypaj kye malspirit ax nkyebꞌantik tuq titzaꞌ. 19 Kkyaqil tuq kye xjal kygan tuq tzan tok kymakoꞌ te Jesus tzan tpaj at tuq jun tajwalil tzan tqꞌanan bꞌix oj tok kymakoꞌ nꞌel tuq te kyyabꞌil.
Te Aj Tbꞌanil Okyꞌel Kyiꞌj Kye Aj Nꞌok Kyen Twitz Xhchoꞌnal
20 Te Jesus ebꞌajxik ten kye aj nkyeꞌok tuq lapet tiꞌj bꞌix oxik tyoliꞌ kyetz ikxjani: “Galanx-alo etetz aj bꞌis atix,d komo etetz atikxqet tuj tqꞌabꞌ Qtata Dios.
21 Galanx-alo etetz aj nꞌok eten twitz waꞌij, komo etetz okxnojel bꞌan byenech. Galanx-alo etetz aj nkxꞌoqꞌ ajnaꞌl, komo mas yaj etetz okxtzeꞌyon.*
22 Galanx-alo etetz qa kye xjal nkxꞌok kyqꞌojiꞌ tzan npaj [wetz] te Ichan Aj Tkꞌwaꞌal Dios [aꞌin], bꞌix qa kye xjal kꞌontiꞌlky nkxꞌok kyqꞌolbꞌeꞌ, bꞌix nkxꞌok yasoꞌ, bꞌix oj etel kyikꞌoꞌ iktzaꞌ etetz nyaꞌtx galan xjal aꞌix.* 23 Peꞌeten waq kontent bꞌix peꞌechalaj waq tuj aj qꞌijji tzan tpaj etetz otzajel siꞌ jun nim bꞌaꞌn tbꞌanil te etetz tuj kaꞌj. Ax ikxji okykꞌuluj kye kyijajil kyetz kyiꞌj kye aj yolil tyol Dios oqtxiꞌ, [ebꞌajꞌel kyikꞌoꞌ].*
24 Per last etetz aj qꞌinon aꞌix ajnaꞌl, komo etetz maꞌtx ekꞌamoj kyaqil. 25 Last etetz aꞌix aj at kyaqil etetz ajnaꞌl, komo owokel eten twitz waꞌij. Last etetz aꞌix aj nkxtzeꞌen ajnaꞌl, komo otzajel enaꞌon tetz bꞌix okxꞌoqꞌel tzan xhchoꞌnal. 26 Last etetz aꞌix aj nkxqet jiqꞌbꞌaꞌ tzan kyaqil xjal, komo ikxji okykꞌuluj kye kyijajil kyetz kyiꞌj kye aj nyaꞌtx bꞌanꞌax yolil tyol Dios.”
Presis Tzan Kyqet Qganiꞌ Kye Qajqꞌoj
27 “Per etetz aj nkxchaꞌon wiꞌj ajnaꞌl oxeꞌl nqꞌumaꞌ etetz: Inkyqet eganiꞌ kye etajqꞌoj, bꞌix peꞌekꞌulun jun galan kyiꞌj kye aj nkyeꞌok ajqꞌojan etetz, 28 bꞌix inkyqet ekyꞌiwlaꞌ kye aj nkyeqanbꞌen etajsik, bꞌix peꞌexnaqꞌtzan jun galan kyiꞌj kye aj nꞌok kykꞌuluꞌ nyaꞌtx galan etiꞌj. 29 Qa at abꞌl nꞌok loqtzꞌan jun aqꞌoꞌtx, intxik asiꞌ te junky palaj; bꞌix qa at abꞌl owelal eqꞌin te atxoꞌw, kꞌon qet axkꞌayiꞌ tzan txik tin te akamixh. 30 Abꞌl aj otzajel tqaniꞌ jun tidiꞌ yatz, intxik asiꞌ; bꞌix te aj owelal teqꞌiꞌ jun tidiꞌ yatz, kꞌon xik aqaniꞌ junkyꞌel. 31 Intqet ekꞌuluꞌ etetz kyukyꞌi txqꞌanky iktzaꞌx etetz egan tzan kykꞌulun txqꞌanky etukyꞌiꞌl.
32 Komo qa etetz nkyeqet eganiꞌ aꞌox kye aj nkyeqet ganin te etetz, ¿tidiꞌ jun galan nꞌekꞌuluꞌ ikxji? Komo ax kye aj chimol choj nkyekꞌulun ikxji. 33 Bꞌix qa etetz nqet ekꞌuluꞌ jun galan aꞌox kyiꞌj kye aj nkyekꞌulun jun galan etiꞌj, ¿tidiꞌ jun tbꞌanil nqet ekꞌuluꞌ ikxji? Komo ax kye aj chimol choj nkyekꞌulun ikxji kxol kyetz. 34 Bꞌix qa etetz nxik esiꞌ tkyꞌex junky aj bꞌaꞌn tzan tok xhchojoꞌ junkyꞌel, ¿tidiꞌ jun galan nꞌekꞌuluꞌ ikxji? Komo ax kye aj chimol choj nxik ksiꞌ tkyꞌex junky aj bꞌaꞌn tzan tok xhchojoꞌ junkyꞌel. 35 Yatzun etetz inkyqet eganiꞌ kye aj nkyeꞌok ajqꞌojan etetz, bꞌix intqet ekꞌuluꞌ jun galan te kyetz, bꞌix intxik esiꞌ kkyꞌex bꞌix kꞌon tzꞌok loꞌet ekꞌuꞌj tzan tajtz ksiꞌ junkyꞌel te aj oje xik esiꞌ. Ikxji ekꞌamoꞌtz junky tidiꞌ mas tbꞌanil, bꞌix okxtel kyꞌiwlaꞌ iktzaꞌ tkꞌwaꞌal Qtata Dios aj atjax tuj kaꞌj, komo tetz bꞌan galan nabꞌlin kyukyꞌi kye aj kꞌontiꞌl nxik ksiꞌ jun pixon tetz, bꞌix ax kyukyꞌi kye aj nyaꞌtx galan kyemodin. 36 Ax etetz intok loꞌet ekꞌuꞌj tiꞌj junky iktzaꞌ te Qtata Dios nꞌok loꞌet tkꞌuꞌj tiꞌj junky.”
Kꞌon Qet Eyoliꞌ Junky
37 “Kꞌon xik epoqoꞌ junky bꞌix ax etetz nlay kxik poqoꞌ [tzan te Qtata Dios]. Kꞌon xik eqꞌumaꞌ til junky bꞌix ax etetz nlay xik qꞌumaꞌ etil. Intqet enajsaꞌ junky bꞌix ax etetz okxtel najsaꞌ.* 38 Aj at etetz, intxik esipaꞌ chꞌin te junky bꞌix ikxji otzajel siꞌ mas etetz. Otzajel siꞌ kabal, bꞌitzꞌoꞌ, txijoꞌ bꞌix ochꞌuqel. Iktzaꞌx etetz kxmalon, ax ikxji oqtel maloꞌ te etetz.”
39 Yaji te Jesus oxik tqꞌumaꞌ jun yekꞌbꞌil kyetz ikxjani: “¿Jun moy obꞌantel petzun tzan txik tjochoꞌ junky moy? Qa at jun jul ¿nyaꞌtx petzun kykabꞌil okyexeꞌl tuj te jul?* 40 Nijunwt aj man nxnaqꞌtzan tibꞌ mas totzqiꞌ twitz te xnaqꞌtzon, oj tmankun tzan tqetbꞌaj xnaqꞌtzaꞌ, ntons owokel iktzaꞌ te xnaqꞌtzal tetz.* 41 ¿Tistil nꞌok asiꞌ anabꞌl tiꞌj te tal muꞌp tuj twitz junky awerman bꞌix kꞌontiꞌl nꞌok asiꞌ anabꞌl tiꞌj te tros aj atox tuj awitz yatz? 42 Qa yatz kꞌontiꞌl nꞌok asiꞌ anabꞌl tiꞌj te tros aj atox tuj awitzni, ¿titzaꞌ ntnimsaꞌ akꞌuꞌj tzan txik aqꞌumaꞌ te junky awerman, “Erman, tzoqpij chꞌin tzan tetz win te tal muꞌp tuj awitzni”? ¡Xmeletzꞌ kaꞌr! Intetz awin tbꞌay te tros tuj awitzni bꞌix ikxji bꞌaꞌn tzan txik awen byenech tzan tetz awin te muꞌp tuj twitz junky awerman.”
Jun Tzeꞌ Nꞌel Qnikyꞌ Tiꞌj Tzan Tpaj Te Twitz Aj Ntswaꞌ
43 “Jun tzeꞌ galan kꞌontiꞌl nkaj twitz nyaꞌtx galan, bꞌix ax jun tzeꞌ nyaꞌtx galan kꞌontiꞌl nkaj twitz galan. 44 Komo kyaqil tzeꞌ nꞌel qnikyꞌ tiꞌj tzan tpaj te twitz. Kꞌontiꞌl njaw qin lobꞌj igos tiꞌj jun wiꞌ kyꞌiꞌx bꞌix ax kꞌontiꞌl njaw qin lobꞌj ub tiꞌj jun wiꞌ txakaꞌ kyꞌiꞌx. 45 Jun galan xjal [nyolin] iktzaꞌx te galan aj atqex tuj tanim. Bꞌix jun xjal aj nyaꞌtx galan [nyolin] iktzaꞌx te nyaꞌtx galan aj atqex tuj tanim. Komo iktzaꞌx te aj atqex tuj qanim, ax ikxji te aj nꞌetz tuj qtziꞌ.”
Te Yekꞌbꞌil Kyiꞌj Kabꞌeꞌ Kꞌulul Jay
46 “¿Tistil nkxyolin qa wetz aꞌin etajawil bꞌix kꞌontiꞌl nkyinqet etokslaꞌ? 47 Wetz oxeꞌl nqꞌumaꞌ etetz titzaꞌ te xjal aj nꞌok lapet wiꞌj bꞌix nꞌok tsiꞌ twiꞌ wiꞌj bꞌix nkyinqet tokslaꞌ. 48 Tetz iktzaꞌ jun xjal aj tqet tkꞌuluꞌ jun tjay, oqex tjuliꞌ nim txeꞌ te tkajonil bꞌix oqet tsiꞌ te twitꞌlel tajsik pur chiꞌabꞌj. Aj tjaw te aꞌ, te aꞌ owok pulan tiꞌj, per te jay kꞌontiꞌl obꞌantik tzan tyakꞌun tzan tpaj bꞌan galan tkajlen kꞌuluꞌ. 49 Yatzun junky xjal aj nkyinꞌok xhchaꞌoꞌ per kꞌontiꞌl nkyinqet tokslaꞌ, tetz iktzaꞌ jun xjal aj tqet tkꞌuluꞌ jun tjay, cha oqet tkꞌuluꞌ tajsik txꞌoꞌtxꞌ bꞌix kꞌontiꞌl twitꞌlel. Aj tjaw te aꞌ, te aꞌ owok pulan tiꞌj, per te jay oqet tzꞌaqik bꞌix okaj bꞌan xituꞌ kyaqil.”