7
Te Qtata Dios Otkꞌuluꞌtz Qukyꞌiꞌl Iktzaꞌx Qetz Nqokꞌulun Kyukyꞌi Kye Txqꞌanky
1 “Kꞌon xik epoqoꞌ junky tzan kꞌon exik poqoꞌ [tzan te Qtata Dios]. 2 Komo te [Qtata Dios] okxtel ten iktzaꞌx etetz nkyeqet eten kye txqꞌanky; bꞌix iktzaꞌx etetz nkxkꞌulun kyukyꞌi kye txqꞌanky, ax ikxji te Qtata Dios okꞌuluyon etukyꞌiꞌl.* 3 ¿Tistil yatz nꞌok asiꞌ anabꞌl tiꞌj te tal muꞌp tuj twitz jun awerman bꞌix kꞌontiꞌl nꞌok asiꞌ anabꞌl tiꞌj te tros aj atox tuj awitzni? 4 Qa yatz at jun tros tuj awitz, ¿titzaꞌ ntnimsaꞌ yatz akꞌuꞌj tzan txik aqꞌumaꞌ te junky: “Tzoqpij tzan tetz win te tal muꞌp tuj awitzni”? 5 ¡Xmeletzꞌ kaꞌr! Intetz awin tbꞌayaꞌ te tros tuj tbꞌaqꞌ awitzni bꞌix ikxji akayiꞌtz galan tzan tetz awin te tal muꞌp tuj tbꞌaqꞌ twitz jun awerman.
6 Kꞌon xik esiꞌ jun tidiꞌ aj xjan te jun txꞌyaꞌn, bꞌix kꞌon xik esiꞌ kye kuch jun tidiꞌ aj tbꞌanil,a kebal cha oqtelbꞌaj kywabꞌeꞌ bꞌix yaji okyeꞌajetz meltzꞌjik etiꞌj bꞌix okxꞌelal kybꞌaꞌoꞌ.
7 Peꞌeqanin bꞌix otzajel siꞌ etetz, peꞌejoyon bꞌix owokelnoj etitzaꞌ, peꞌeqꞌolbꞌen bꞌix owelatz jaqoꞌ te jay ewitz. 8 Komo abꞌl aj nqanin, ntzaj siꞌ tetz; bꞌix te aj njoyon, nꞌoknoj titzaꞌ; bꞌix te aj nqꞌolbꞌen, nꞌex jaqoꞌ te jay twitz.
9 ¿At petzun jun te etetz aj otnimsaꞌtz tkꞌuꞌj tzan txik tsiꞌ jun abꞌj te tkꞌwaꞌal qa te tkꞌwaꞌal oxeꞌl tqaniꞌ jun wabꞌj tetz? 10 Qatzun ¿oxeꞌl tsiꞌ petzun jun kan oj txik tqaniꞌ jun kyiy? 11 Etetz aj nyaꞌtx galan xjal aꞌix, etetz etebꞌen alkyetz te galan tzan txik esiꞌ te ekꞌwaꞌal, ntons pyorx-alo te Qtata Diosb aj atjax tuj kaꞌj, tetz oxeꞌl tsiꞌ tidiꞌchq galan kye aj okyexeꞌl qanin tukyꞌiꞌl.
12 Ntons ikxji intqet ekꞌuluꞌ kyukyꞌi txqꞌanky iktzaꞌx egan etetz tzan tqet kꞌuluꞌ etukyꞌiꞌl tzan txqꞌanky; komo ikxji a tgan tzan tqet jkꞌuluꞌ iktzaꞌx tzꞌibꞌankaj tuj te Kawbꞌil bꞌix tuj te ktzꞌibꞌen kye aj yolil tyol Dios oqtxiꞌ.”
Te Bꞌey Aj Nxik In Qetz Tuj Kaꞌj Iktzaꞌ Jun Tal Bꞌey
13 “Ntons, a tgan tzan etox [tuj kaꞌj] iktzaꞌ oj etox tuj jun lamel aj nekit twitz. Komo te lamel bꞌix te bꞌey aj nxik in kye xjal tzan kyponaj tuj te nim qꞌaqꞌ, tetzji nim twitz bꞌix kyꞌilaꞌj nkyexik tzi, 14 yatzun te lamel bꞌix te bꞌey aj nxik in qetz te jun qanqꞌin te jun-eleꞌx, tetzji nekit twitz bꞌix nyaꞌtx kyꞌilaꞌj kye aj nꞌoknoj kyitzaꞌ.”*
Intok Esiꞌ Enabꞌl Kyiꞌj Kye Pakbꞌon Aj Nyaꞌtx Bꞌanꞌax Kyitzaꞌ
15 “Intok esiꞌ enabꞌl tzan kꞌon eqet eqꞌiꞌ kyitzaꞌ kye aj cha sqꞌoꞌl-eꞌ aj nkyeqꞌuman qa kyetz aꞌeꞌ aj yolil tyol Dios. Nkyeꞌul exol etetz iktzaꞌ jun karner bꞌan mans, per tuj kyanim iktzaꞌ xoꞌj-eꞌ aj tgan tzan txik kchiꞌ kye karner. 16 Etetz owelal enikyꞌ kyiꞌj tzan tpaj aj nkykꞌuluꞌ. Komo twitz jun lobꞌj ub kꞌontiꞌl nꞌel kanet tiꞌj jun wiꞌ kyꞌiꞌx, bꞌix twitz jun lobꞌj igos kꞌontiꞌl nꞌel kanet tiꞌj jun wiꞌ txakaꞌ kyꞌiꞌx. 17 Jun tzeꞌ aj galan, ax ntswaꞌ jun twitz galan, yatzun te jun tzeꞌ aj nyaꞌtx galan, ax ntswaꞌ jun twitz nyaꞌtx galan. 18 Jun tzeꞌ galan nlay bꞌantik tzan tkaj tsiꞌ jun twitz nyaꞌtx galan, bꞌix jun tzeꞌ nyaꞌtx galan nlay bꞌantik tzan tkaj tsiꞌ jun twitz galan. 19 Kyaqil tzeꞌ aj kꞌontiꞌl nkaj tsiꞌ jun twitz galan, njaw txꞌemlet bꞌix nꞌox xoꞌlet tuj qꞌaqꞌ.* 20 Ntons etetz owelal enikyꞌ kyiꞌj [kye aj sqꞌoꞌl-eꞌ] tzan tpaj te aj nkykꞌuluꞌ.”*
Nyaꞌtx Kyaqil Okyeꞌokex Aj Jaꞌ Atqet Te Qtata Dios
21 “Nyaꞌtx kyaqil kye xjal aj nꞌok kyqꞌumaꞌ wetz, “Tat, yatz Wajaw aꞌich,”* nyaꞌtx kyaqil kyetz okyekajel tuj tqꞌabꞌ Qtata Dios aj nnajan tuj kaꞌj, sinoke aꞌox kye aj nqet kykꞌuluꞌ iktzaꞌ tgan te Ntat aj atjax tuj kaꞌj. 22 Tuj aj qꞌij [tuj te jwisy], kyꞌilaꞌj otzajel kyqꞌumaꞌ wetz ikxjani: “Tat, yatz aj Qajaw aꞌich, qetza oxik qyoliꞌna ayol, bꞌix tukyꞌi yatz abꞌi ebꞌajjatz qina malspirit tuj kyanim xjal, bꞌix tukyꞌi yatz abꞌi oqet jkꞌuluꞌna tidiꞌchq labꞌal aj aꞌox tukyꞌi awajwalil bꞌaꞌn tzan tbꞌantik.” 23 Per tuj aj qꞌijji wetz owajel ntzaqꞌbꞌeꞌ kyetz ikxjani: “Wetz kꞌontiꞌl okxꞌok wotzqilaꞌ. Peꞌetel laqꞌchet wiꞌj etetz aj cha ekꞌulunqet pur nyaꞌtx galan.””*
Te Yekꞌbꞌil Kyiꞌj Kye Kabꞌeꞌ Kꞌulul Jay
24 “Abꞌl te aj nꞌok tsiꞌ twiꞌ tiꞌj te aj nxik nqꞌumaꞌ wetz bꞌix nqet tkꞌuluꞌ ikxji, tetz iktzaꞌ jun kꞌulul jay aj oqet tbꞌisuꞌ bꞌan galan, oqet tkꞌuluꞌ tjay tajsik chiꞌabꞌj. 25 Yaji otzaj te jabꞌ, te aꞌ ojaw nim bꞌix te kyaqꞌiqꞌ oje xukꞌin; per te jay kꞌontiꞌl oqet tzꞌaqik tzan tpaj atqet tuq te twitꞌlel tajsik chiꞌabꞌj. 26 Per te aj kꞌontiꞌl nꞌok tsiꞌ twiꞌ wiꞌj bꞌix kꞌontiꞌl nqet tkꞌuluꞌ te aj nxik nqꞌumaꞌ, tetz iktzaꞌ jun kꞌulul jay mokꞌ aj oqet tkꞌuluꞌ tjay tajsik tzꞌajon. 27 Yaji otzaj te jabꞌ, ojaw te aꞌ, bꞌix te kyaqꞌiqꞌ oje xukꞌin, yaji te jay oqet tilan; kyaqil oponaj.”
28 Ntons, ya ma mankun txnaqꞌtzan te Jesus, kyaqil kye xjal aj nkyechaꞌon tuq tiꞌj, kyetz bꞌan nkyelabꞌan tuq tzan tpaj te tumeꞌl titzaꞌ tuq nkyexik txnaqꞌtzaꞌ, 29 tzan tpaj nxnaqꞌtzan tuq tukyꞌi jun tajwalil bꞌan bꞌanꞌax, bꞌix nyaꞌtx iktzaꞌ kye aj xnaqꞌtzal Kawbꞌil.*