8
Aj Tqet Tqꞌanaꞌ Jesus Jun Xjal Yabꞌ Tuq Tukyꞌi Lepr
1 Ntons, ya ma qetz te Jesus twiꞌ te tal muluꞌj [aj jaꞌ tuq nxnaqꞌtzan kye xjal], ntons kyꞌilaꞌj xjal ebꞌajꞌok lapet tiꞌj. 2 Ntons jun xjal yabꞌ tuq, cha nqꞌay tuq xhchiꞌjel,a owok laqꞌchet tiꞌj bꞌix oqet mejlet twitz, oxik tqꞌumaꞌ tetz ikxjani: “Tat, qa yatz agan, bꞌaꞌn tzan tel awin chꞌin nyabꞌil wiꞌjni.” 3 Yaji tzaj te Jesus, owok tmakoꞌ te xjal bꞌix oxik tqꞌumaꞌ tetz ikxjani: “Ngan tzan tel win ayabꞌil. Pabꞌantik ajnaꞌl.” Bꞌeyxnajji te yabꞌ obꞌantik tiꞌj te tyabꞌil. 4 Te Jesus ax oxik tqꞌumaꞌ tetz ikxjani: “Tzaj achaꞌoꞌ, kꞌon xik aqꞌumaꞌ te nijunwt, aꞌox pax yekꞌul awibꞌ twitz te pal, bꞌix intxik awin tukyꞌiꞌl te awoyej aj okaj tqꞌumaꞌ Moisés [tuj te Kawbꞌil], tzan tok en yatz maꞌtx chbꞌantik.”*
Aj Tqet Tqꞌanaꞌ Jesus Tmos Jun Kꞌulul Mandad Kye Mulon
5 Ntons, ya ma pon Jesus tuj te amaqꞌ Capernaúm, jun kꞌulul mandad kxol kye soldad aj Rom opon tukyꞌi Jesus bꞌix oqet twitz twitz, 6 oxik tqꞌumaꞌ ikxjani: “Tat, wetz nmos bꞌan yabꞌ, atox tjaqꞌ xnoqꞌl, kamnaq xhchiꞌjel bꞌix nꞌok ten twitz nim xhchoꞌnal.” 7 Ntons te Jesus oxik tqꞌumaꞌ ikxjani: “Okyinxeꞌl qꞌanal tetz.” 8 Ntons te kꞌulul mandad oxik tqꞌumaꞌ ikxjani: “Tat, wetz kꞌontiꞌl nwajoꞌ tzan awox tuj njay. Aꞌox intxik aqꞌumaꞌ ayol tzani, bꞌix te nmos obꞌantel. 9 Komo ax wetz ateꞌ xjal kꞌulul mandad wiꞌj aj mas nim kyajwalil nwitz, bꞌix ax ateꞌ soldad aj nkyinkꞌulun mandad kyiꞌj. Oj txik nkꞌuluꞌ mandad jun te kyetz tzan txik, ntons nxik, bꞌix oj txik nkꞌuluꞌ mandad jun te kyetz tzan stzaj, ntons ntzaj, bꞌix oj txik nkꞌuluꞌ mandad te nmos tzan tqet tkꞌuluꞌ jun tidiꞌ, ntons nqet tkꞌuluꞌ.”
10 Ntons, ya ma tzꞌok xhchaꞌoꞌ te Jesus ikxji, oje labꞌan tiꞌj tyol te xjal, bꞌix oxik tqꞌumaꞌ ikxjani kyukyꞌi kye aj lapikeꞌ tuq tiꞌj: “Oxeꞌl nqꞌumaꞌ etetz te bꞌanꞌax, kxol kyaqil kye aj tijajil Israel minaꞌ toknoj witzaꞌ jun xjal iktzaꞌ ntzani bꞌan witꞌlik tkꞌuꞌj wiꞌj bꞌan byenech. 11 Wetz oxeꞌl nqꞌumaꞌ etetz, [iktzaꞌ ja xjal ntzani] kyꞌilaꞌj xjal aj tzajnaqeꞌ jaꞌchq twitz txꞌoꞌtxꞌ bꞌix tidiꞌchq kyijajil,b kyetz okyeꞌokex tuj kaꞌj bꞌix okyeqtel witꞌlet waꞌil tukyꞌi Abran bꞌix Isak bꞌix Jacob, 12 per kyꞌilaꞌj txqꞌanky kye aj tijajil Israel [aj bꞌaꞌn tuq tzan kyten tuj tqꞌabꞌ Qtata Dios], kyetz okyeꞌelax lajoꞌ tuj qlolj aj jaꞌ okyeꞌoqꞌel bꞌix ma qitxꞌitxꞌin txeꞌ kyeꞌ.”*
13 Ntons te Jesus oxik tqꞌumaꞌ tukyꞌi te kꞌulul mandad kye mulon ikxjani: “Pax ajay, bꞌix iktzaꞌx yatz maꞌtx awokslaj, te yabꞌ obꞌantel.” Ntons, bꞌeyx aj orji te xjal obꞌantik.
Aj Tqet Tqꞌanaꞌ Jesus Tjiꞌ Xhpeꞌy Bꞌix Kyꞌilaꞌj Txqꞌanky Yabꞌ
14 Yaji te Jesus oxik tjay Xhpeꞌy, bꞌix tjiꞌ xuj te Xhpeꞌy atqet tuq tjaqꞌ xnoqꞌl tzan tpaj yabꞌ tuq bꞌix ajun kyaq tuq tiꞌj. 15 Ntons te Jesus owok tmakoꞌ tqꞌabꞌ, bꞌix te kyaq bꞌeyx owel. Ntons tetz ojaw waꞌlet bꞌix exik tkꞌaꞌchaꞌ.
16 Ntons, ya ma qoqet yupan, ebꞌajpon tukyꞌi Jesus kyꞌilaꞌj xjal aj akyeqex tuq malspirit tuj kyanim, bꞌix cha aꞌox tukyꞌi tyol ebꞌajjatz tin kye malspirit bꞌix ebꞌajqet tqꞌanaꞌ kyaqil kye yabꞌ. 17 Te ntzani okyꞌik tzan tponkix tuq te aj oxik tpakbꞌaꞌ te Chay aj yolil tyol Dios oqtxiꞌ aj txik tqꞌumaꞌ ikxjani: “Tetz owel tin te aj nchoꞌon tuq qetz, bꞌix owel teqꞌiꞌ te qyabꞌil.”*
Tzan Qok Lapet Tiꞌj Jesus A Tgan Dispwest Aꞌoꞌ Tzan Tkaj Qsiꞌ Tidiꞌchq Qetz
18 Ntons, te Jesus ya ma tzꞌok ten ajun xjal tuq nkyelabꞌun tiꞌj, oxik tqꞌumaꞌ [kye txnaqꞌatz] tzan kxik junxlaꞌ te aꞌ. 19 Ntons owok laqꞌchet tiꞌj tetz jun xnaqꞌtzal Kawbꞌil bꞌix oxik tqꞌumaꞌ ikxjani: “Xnaqꞌtzon, ax wetz okyinꞌokel lapet awiꞌj aj jaꞌ yatz otxeꞌl.” 20 Ntons te Jesus oxik tqꞌumaꞌ ikxjani: “Kye xhiꞌwl at kyjul, bꞌix kye pichꞌ aj nkyelipan twitz kaꞌj at kyqꞌuꞌ, per [wetz] te Ichan Aj Tkꞌwaꞌal Dios [aꞌin] kꞌontiꞌl jaꞌ tzan nqet ojlan chꞌin.”
21 Yaji jun aj txnaqꞌatz tuq, oxik tqꞌumaꞌ ikxjani: “Tat, tzoqpij chꞌin tzan tkaj nmuquꞌ tbꞌay te ntat.” 22 Ntons te Jesus oxik tqꞌumaꞌ ikxjani: “Yatz, pawok lapet wiꞌj. Qaltetz kye kamnaq, intqex kymuquꞌ kye kymuqenx.”
Aj Tlumet Te Aꞌ Bꞌix Te Kyaqꞌiqꞌ Tzan Jesus
23 Ntons, te Jesus ojax tuj bark bꞌix kye txnaqꞌatz ebꞌajjax tukyꞌiꞌl. 24 Yaji ojaw jun nim kyaqꞌiqꞌ tuj te aꞌ bꞌix te aꞌ owaqꞌik tzan tox pulan tuj te bark bꞌix chꞌinky tuq kxik mulan, bꞌix te Jesus nwitan tuq. 25 Kye txnaqꞌatz ojaw kykꞌasuꞌ bꞌix oxik kyqꞌumaꞌ tetz ikxjani: “¡Tat, kolon chꞌin qiꞌj! ¡Chꞌinky qxik mulan!” 26 Ntons tetz [ojaw kꞌasik bꞌix] oxik tqꞌumaꞌ ikxjani: “¿Tistil etetz bꞌan nkxobꞌ? Etetz nyaꞌtx nim witꞌlik ekꞌuꞌj wiꞌj.” Ya ma xik tqꞌumaꞌ ikxji, tetz ojaw waꞌlet bꞌix oxik tmiyoꞌ te kyaqꞌiqꞌ tukyꞌi aꞌ, bꞌix olumet kyaqil. 27 Kyetz bꞌan nkyelabꞌan tuq, nkyechaꞌon tuq kyibꞌkyibꞌx ikxjani: “¿Abꞌltzun ja xjal ntzani? ¡Komo te kyaqꞌiqꞌ bꞌix te aꞌ nqet kyokslaꞌ!”
Te Jesus Mas Nim Tajwalil Twitz Kyajwalil Kye Malspirit
28 Ntons aj tpon Jesus tuj tkwentil Gadar junxlaꞌ te alawun, eꞌetz kabꞌeꞌ xjal kanol tetz. Bꞌix ateqex tuq malspirit tuj kyanim bꞌix cha nkyenajan tuq tajsik anim bꞌix bꞌan xobꞌajil-eꞌ tuq kyiꞌj, astilji nijunwt tuq nbꞌantik tkyꞌik txini. 29 Bꞌix ebꞌajjaw sikyꞌin ikxjani: “¿Tiꞌ nꞌajoyoꞌ qxola yatz Jesus aj Tkꞌwaꞌal Dios aꞌich? ¿Tiꞌtzun, ma xhchꞌul swal xhchoꞌnal qiꞌja bꞌix minaꞌ tpon or?”
30 Ntons, laqꞌchik chꞌinky tzi, akyeqet tuq kyꞌilaꞌj kuch nkyewaꞌan tuq, 31 bꞌix kye malspirit oqet kywitz twitz Jesus ikxjani: “Qa yatz oqojawetz awina, ntons tzoqpij chꞌin tzan jqex tuj kykꞌuꞌj kye kuch.” 32 Yaji te Jesus oxik tqꞌumaꞌ ikxjani: “Pex waq.” Ntons kye malspirit ebꞌajjatz tuj kyanim kye xjal bꞌix ebꞌajqex tuj kykꞌuꞌj kye kuch, bꞌeyxnajji kye kuch ebꞌajjaw qitun, ebꞌajxik qetl bꞌix okyaqon kytiluꞌ kyibꞌ tuj aꞌ, kkyaqil ebꞌajjaw jeqꞌbꞌik. 33 Kye aj nkyepastorin tuq kye kuch ebꞌajꞌoqik bꞌix ya ma kyepon tuj te amaqꞌ, oxik kyqꞌumaꞌ kyaqil aj ojetq tuq kyꞌik kyiꞌj kye kuch bꞌix ax aj ojetq tuq kyꞌik kyukyꞌi kye xjal aj ateqex tuq malspirit tuj kyanim. 34 Ntons kyaqil kye xjal ebꞌajpon aj jaꞌ tuq atqet te Jesus, bꞌix ya ma xik kyen, oqet kywitz twitz tzan tuq tex tuj te aj luwarji.