5
Aj Tjatz Tin Jesus Kyꞌilaꞌj Malspirit Tuj Tanim Jun Xjal
1 Ntons te Jesus kyukyꞌi kye tukyꞌiꞌl ekyꞌikon junxlaꞌ te aꞌ, epon tuj tkwentil Jeras. 2 Yatzun ma qetz te Jesus tuj bark, jun xjal opon naj tukyꞌiꞌl tzajnaq tuq tajsik anim, bꞌix te xjal ateqex tuq kyꞌilaꞌj malspirit tuj tanim. 3 Tetz nnajan tuq tzi kxol kye muqbꞌil anim bꞌix nijunwt tuq nbꞌantik tzan tqet tkꞌaloꞌ ni tukyꞌi kaden. 4 Kyꞌilaꞌj-el kye tqꞌabꞌ tukyꞌi toq nqet tuq wakuꞌ tukyꞌi kaden tukyꞌi xhapbꞌil oqj per nꞌel tuq tlaquꞌ te kaden bꞌix nꞌel tuq tbꞌuchiꞌ te xhapbꞌil oqj, bꞌix ikxji kꞌontiꞌl nꞌajtz tuq tiꞌj tzan nijunwt. 5 Tetz nbꞌet tuq bꞌajqꞌij bꞌix bꞌajaqꞌbꞌil kxol kye muqbꞌil anim bꞌix jaꞌchq twiwitz bꞌix njaw tuq wayun bꞌix nqet tuq tokꞌonsaꞌ tibꞌx tukyꞌi abꞌj.
6 Ya ma xik teꞌeꞌ ikjaꞌn tuq stzaj te Jesus laqꞌchik, tetz oxik karedin bꞌix oqet mejlet twitz. 7 Yaji ojaw sikyꞌin ikxjani: “¿Tidiꞌ nꞌajoyoꞌ yatz tzani? Yatz aꞌich Jesus Tkꞌwaꞌal Dios, te Dios aj mas nim tajwalil kywitz kyaqil. Oxeꞌl nqaniꞌ yatz twitz Dios tzan kꞌon kyinqet akꞌuluꞌ joder.” 8 Tetz nyolin tuq ikxji tzan tpaj te Jesus ojetq tuq xik tqꞌumaꞌ ikxjani: “Yatz malspirit, pajatz tuj tanim ja xjalni.” 9 Bꞌix nxik tuq tqaniꞌ tukyꞌi te xjal ikxjani: “¿Tidiꞌ abꞌi?” [Yaji kyi te xjal ikxjani:] “Wetz nbꞌi Bꞌuchꞌuj tzan tpaj kyꞌilaꞌj qbꞌetna.”a 10 Bꞌix te xjal oqet twitz twitz Jesus tzan kꞌon kyex tlajoꞌ tuj aj luwarji. 11 Ntons komo qaynin tiꞌj te witz tzi ateꞌ tuq kyꞌilaꞌj kuch nkyewaꞌan, 12 kye malspirit oqet kywitz twitz Jesus ikxjani: “Qoxik alajoꞌna kxol kye kuchni tzan jqexa tuj kykꞌuꞌj.” 13 Ntons te Jesus oxik tqꞌumaꞌ tzan kyqex tuj kykꞌuꞌj kye kuch, bꞌix kye malspirit ejatz tuj tanim te xjal bꞌix eqex tuj kykꞌuꞌj kye kuch. Bꞌix kye kuch, qanq kabꞌeꞌ mil (2000) tuq kybꞌet, bꞌeyxnajji eqex karedin qetl bꞌix komo te aꞌ atok txeꞌ te witz, dech ebꞌajxik kyaqil tuj te aꞌ bꞌix ebꞌajkamik.
14 Yaji kye pastoril kuch ebꞌajꞌoqik tzan kxobꞌal, exwaꞌq qꞌumal tetz tuj amaqꞌ bꞌix jaꞌchq, tidiꞌ ojetq tuq kyꞌik kyiꞌj. Yaji kye xjal ebꞌajxwaꞌq eꞌel aj tidiꞌ ojetq tuq kyꞌik. 15 Ya ma kyepon aj jaꞌ atqet tuq te Jesus, owok kyen te xjal aj kyꞌilaꞌj tuq malspirit tuj tanim tbꞌay, tetz witꞌliqet tuq, atok tqꞌanaq bꞌix kꞌontiꞌlky tuq tidiꞌ ntkꞌuluꞌky. Yatzun kye xjal ebꞌajxobꞌ. 16 Kye pastoril kuch oxik kyqꞌumaꞌ kye xjal tidiꞌ tuq ojetq kyꞌik tiꞌj te xjal bꞌix ax tidiꞌ tuq ojetq kyꞌik kyiꞌj kye kuch. 17 Yaji kye xjal oqet kywitz twitz Jesus tzan tex tuq tzi.
18 Yaji te Jesus ojax tuj te bark, bꞌix te xjal nqet tuq twitz twitz tzan txik tuq tukyꞌiꞌl. 19 Per te Jesus kꞌontiꞌl ostzoqpij tzan txik tukyꞌiꞌl sinoke oxik tqꞌumaꞌ ikxjani: “Pax ajay bꞌix intxik aqꞌumaꞌ kyukyꞌi kye aj tuj ajay kyaqil aj maꞌtx kyꞌik awiꞌjni bꞌix te Dios ma tzꞌok loꞌet tkꞌuꞌj awiꞌj.” 20 Yaji, te xjal owaj tzi bꞌix okyꞌik tuj tkwentil Dekaplb bꞌix oxik tqꞌumaꞌ kye xjal aj ojetq tzꞌok kꞌuluꞌ tiꞌj tzan Jesus. Yatzun kye xjal kyaqil oje kyelabꞌan.
Aj Tqet Tqꞌanaꞌ Jesus Jun Xuj Bꞌix Aj Tjaw Tanqꞌinsaꞌ Jun Tal Xuj
21 Bwen, te Jesus kyukyꞌi aꞌeꞌ tukyꞌiꞌl emeltzꞌjik tuj te bark bꞌix epon stziꞌ te aꞌ aj jaꞌ tuq nkyeqeten tbꞌay bꞌix kye xjal ebꞌajponoj junkyꞌelky chaꞌoyon tiꞌj. 22 Ax opon jun xjal, Jayr tuq tbꞌi. Tetz jun xjal kꞌulul mandad tuj te jay nabꞌil Dios. Ntons ya ma xik ten tetz te Jesus, tetz oqet mejlet twitz 23 bꞌix oqet twitz twitz, oxik tqꞌumaꞌ ikxjani: “[Tat,] wetz nmeꞌal chꞌinky tkamik. Patzaj chꞌin njay tzan tqet asiꞌ aqꞌabꞌ tajsik tzan tbꞌantik ikxji tzan tanqꞌin.”
24 Ntons yaji te Jesus oxik tukyꞌi Jayr bꞌix kye xjal bꞌan nkyelabꞌtik tuq tiꞌj bꞌix nꞌok tuq kybꞌetzꞌaꞌ. 25 Bꞌix kxol kye xjal, atqet tuq jun xuj yabꞌ tuq. Kabꞌlajuj aqꞌbꞌixiꞌ tuq nꞌel tuq kyikꞌ tiꞌj. 26 Te xuj ojetq tuq kyꞌik kyukyꞌi kyꞌilaꞌj qꞌanon bꞌix ojetq tuq tzꞌok ten twitz xhchoꞌnal tzan kypaj bꞌix ojetq tuq najsan kyaqil tidiꞌchq tuq tetz tiꞌj te twiꞌ kykꞌuꞌj per kꞌontiꞌl tuq nbꞌantik sinoke cha mas tuq njaw ikyin. 27 Komo ojetq tuq tzꞌok xhchaꞌoꞌ kye yabꞌ nkyebꞌantik tuq tzan Jesus, yaji owox ewj kxol kye xjal makol xtxaꞌm tqꞌanaq te Jesus. 28 Komo nyolin tuq tanim ikxjani: “Chaꞌoj tok nmakoꞌ chꞌin nkesey cha aꞌox xtxaꞌm tqꞌanaq, okyinbꞌantel.” 29 Ntons aj tok tmakoꞌ tqꞌanaq te Jesus, bꞌeyxnajji owaꞌlet te kyikꞌ tiꞌj bꞌix otnaꞌoj ojetq tuq bꞌantik. 30 Yatzun te Jesus, tetz otnaꞌoj ojetq tuq bꞌantik jun xjal titzaꞌ. Owaj ten tiꞌjx bꞌix oxik tqaniꞌ kye aj ajuneꞌ tuq tukyꞌiꞌl ikxjani: “¿Abꞌl ma tzꞌok makon nqꞌanaq?”
31 Ntons kye txnaqꞌatz oxik kyqꞌumaꞌ ikxjani: “¿Tiꞌtzun, kꞌontiꞌl nꞌok awen kye xjal nkylimlaꞌ kyibꞌ awiꞌj, nxhchꞌok kybꞌetzꞌaꞌ bꞌix ikxji ntzaj aqaniꞌ qetza abꞌl ma tzꞌok makon te aqꞌanaqni?” 32 Yatzun te Jesus nxik teꞌeꞌ tuq xtxalaj jaꞌchq tzan tok ten abꞌl tuq te aj ojetq tzꞌok makon te tqꞌanaq. 33 Te xuj, komo tetz otnaꞌoj tidiꞌ ojetq tuq kyꞌik tiꞌj, tetz nxobꞌ tuq bꞌix nluꞌlun; opon twitz Jesus, oqet mejlet, bꞌix ojatz tqꞌumaꞌ kyaqil aj ojetq tuq kyꞌik tiꞌj. 34 Yaji te Jesus oxik tqꞌumaꞌ tetz ikxjani: “Nmeꞌal, te ayabꞌil maꞌtx tzꞌel tzan tpaj ma tzꞌok witꞌlet akꞌuꞌj wiꞌj. Bꞌaꞌn tzan awaj bꞌix kꞌon chbꞌisun bꞌix maꞌtx chbꞌantik.”
35 Bwen, man tuq nyolin te Jesus tukyꞌi te xuj, kypon txqꞌanky xjal tzajnaqeꞌ tuq tjay Jayr, oxik kyqꞌumaꞌ te Jayr ikxjani: “Kꞌonky chkꞌulun molestar tiꞌj te Xnaqꞌtzon tzan tpaj te ameꞌal maꞌtx kamik.” 36 Te Jesus kꞌontiꞌl oxik tkꞌuluꞌ kas, oxik tqꞌumaꞌ tetz te Jayr ikxjani: “Kꞌon chbꞌisun. Cha intok witꞌlet yatz akꞌuꞌj wiꞌj.” 37 Yaji kꞌontiꞌl ostzoqpij tzan kxik txqꞌanky tukyꞌiꞌl sinoke aꞌox te Xhpeꞌy tukyꞌi Jacoboc tukyꞌi Waꞌnch aj terman Jacobo, bꞌix exik tjay Jayr.
38 Aj kypon tjay, kye xjal tzi nkyelabꞌun tuq, nkyebꞌajꞌoqꞌ bꞌix nkyebꞌajwayun. 39 Yaji te Jesus oxik tqꞌumaꞌ ikxjani: “¿Tistil nkxꞌoqꞌ waq aleꞌji? Te kꞌwaꞌl nyaꞌtx kamnaq, cha nwitan.” 40 Yatzun kye xjal cha ejaw tzeꞌen tiꞌj. Yaji tetz eꞌex tlajoꞌ kyaqil bꞌix okajten tetz tuj jay aꞌox kyukyꞌi tukyꞌiꞌl bꞌix te Jayr tukyꞌi txuꞌjel bꞌix eꞌox aj jaꞌ tuq tanlik te anim. 41 Te Jesus ojaw stzyuꞌ tqꞌabꞌ te tal xuj bꞌix oxik tqꞌumaꞌ: “Talita koꞌum.” (Ja yol ntzani tuj kyyol kyetz, bꞌix telponx iktzaꞌ “Tal xuj, pajaw waꞌlet.”) 42 Yatzun txiklen tqꞌumaꞌ te Jesus ikxji, te kꞌwaꞌl ojaw waꞌlet bꞌix ojaw bꞌet, komo tetz kabꞌlajuj aqꞌbꞌixiꞌ tuq. Yatzun kye aj akyeqet tuq tukyꞌiꞌl oje kyelabꞌan. 43 Te Jesus oxik tqꞌumaꞌ kyetz tzan kꞌon txik kyqꞌumaꞌ te nijunwt xjal* bꞌix ax oxik tqꞌumaꞌ tzan txik kykꞌaꞌchaꞌ te kꞌwaꞌl.