6
Aj Kꞌontiꞌl Tuq Nqet Okslaꞌ Jesus Tzan Kye Txjalil Tuj Tamaqꞌx
1 Ntons yaji te Jesus owex tzi bꞌix oponky tuj tamaqꞌ bꞌix kye txnaqꞌatz ajuneꞌ tuq tukyꞌiꞌl. 2 Yaji opon te qꞌij ojlaꞌmj bꞌix te Jesus owaqꞌik tzan txnaqꞌtzan kye xjal tuj te jay nabꞌil Dios. Kyꞌilaꞌj kye aj xjal aj nkyechaꞌon tuq tiꞌj bꞌan nkyelabꞌan tuq, bꞌix nkyyoliꞌ tuq kyibꞌkyibꞌx ikxjani: “¿Jaꞌ otzaj txnaqꞌtzaꞌ tetz kyaqil nini? ¿Abꞌl oxik sin jun tnabꞌl? ¿Abꞌl oxik sin tajwalil tzan tkꞌulun kye ja yekꞌbꞌilni? 3 Tetz aj kalpinter aj qotzqiꞌ bꞌix tetz tnan Liy bꞌix tetz titzꞌin Chaw, Chep bꞌix Juds,a Simon bꞌix tetz aꞌeꞌ tanabꞌ aj najlikeꞌ qxol tzani.” Ikxji owel ikꞌoꞌ Jesus tzan kye txjalil. 4 Ntons te Jesus oxik tqꞌumaꞌ kyetz ikxjani: “Kye xjal nqet kyjiqꞌbꞌaꞌ jun aj yolil tyol Dios. Per qa tetz jun aj kxjalilx, kꞌontiꞌl nqet kyjiqꞌbꞌaꞌ; ni kye txjalil ni kye aj tuj tjay kꞌontiꞌl nqet kyjiqꞌbꞌaꞌ.”* 5 Ntons astilji kꞌontiꞌl oqet tkꞌuluꞌ tzi kyꞌilaꞌj yekꞌbꞌil tukyꞌi tajwalil Qtata Dios. Cha junjun yabꞌ oqet tsiꞌ tqꞌabꞌ kyajsik bꞌix ebꞌajbꞌantik. 6 Tetz bꞌan nlabꞌan tuq kyiꞌj kye txjalil bꞌix kyiꞌj kye aj tuj tjay tzan tpaj kꞌontiꞌl tuq nkyokslaꞌ. Yaji oxik Jesus tuj txqꞌanky amaqꞌ pakbꞌal Tyol Dios.
Aj Kxik Tlajoꞌ Jesus Kye Txnaqꞌatz Pakbꞌal Tyol Dios
7 Bwen, yaji te Jesus etzaj tukꞌleꞌ kye kykabꞌlajujil tkyꞌixel bꞌix exik tlajoꞌ [pakbꞌal Tyol Dios] jaꞌchq kakabꞌ-eleꞌ kybꞌet bꞌix oxik tsiꞌ kyajwalil tzan tjatz kyin malspirit tuj kyanim xjal.* 8 Oxik tqꞌumaꞌ tzan kꞌon txik kyin ni jun tidiꞌ tuj kybꞌey sinoke aꞌox chꞌi ktzeꞌ. Oxik tqꞌumaꞌ tzan kꞌon txik kyin ni kyweꞌ ni kybꞌeꞌeq ni kytumin* 9 bꞌix tzan tok ksiꞌkix te kxajabꞌ per kꞌontiꞌl tzan txik kyin junky moj kyqꞌanaq. 10 Ax oxik tqꞌumaꞌ ikxjani: “Chaꞌoj etox tuj jun jay, ax tzi okxteyon max chaꞌoj exik tuj junky luwar. 11 Qa tuj jun luwar nlay kxkꞌamjik kyitzaꞌ, qatzun nlay kyepon chaꞌoyon etiꞌj, ntons yaji okxꞌelax tzi. Bꞌix chaꞌoj etex tziji, owelal epojkꞌaꞌ tiꞌj exajabꞌ kywitz* tzan tok kyen, nyaꞌtx galan nkykꞌuluꞌ.”b
12 Ntons ebꞌajꞌex tzi bꞌix jaꞌchq oxik kypakbꞌaꞌ kye xjal tzan tjaw kkyꞌixpuꞌ kynabꞌlin. 13 Ax ejatz kyin malspirit tuj kyanim kyꞌilaꞌj xjal, bꞌix ax oqet ksiꞌ chꞌimusit aseyt tuj kywiꞌ kyꞌilaꞌj yabꞌ iktzaꞌ techaꞌl, bꞌix yatzun kye yabꞌ ebꞌantik kyitzaꞌ.*
Aj Tbꞌisun Te Eródes Qa Te Jesus A Tuq Te Waꞌnch Aj Swal Aꞌ Aj Ojetq Tuq Jaw Anqꞌin
14 Bwen, yaji te gobernadorc Eródes owok xhchaꞌoꞌ tiꞌj Jesus tzan tpaj jaꞌchq tuq ojetq tzꞌel tpakbꞌalil tiꞌj bꞌix kye xjal nkyqꞌumaꞌ tuq ikxjani: “Te Waꞌnch Aj Swal Aꞌ oje jaw anqꞌin junkyꞌel. Astilji tidiꞌchq galan aj nqolabꞌan tiꞌj nbꞌantik tukyꞌi nim tajwalil.” 15 Bꞌix txqꞌanky xjal nkyqꞌumaꞌ tuq: “Te ja xjalni tetz aji Eliys, aj tlajen Dios oqtxiꞌ.” Bꞌix txqꞌanky nkyyoliꞌ tuq: “Tetzniꞌn jun aj yolil tyol Dios iktzaꞌ kye aj yolil tyol Dios oqtxiꞌ.”* 16 Te Eródes, aj tok xhchaꞌoꞌ aj nkyyoliꞌ kye xjal, tetz otqꞌumaj ikxjani: “Te ntzani Waꞌnch aj oxik nkꞌuluꞌ mandad tzan tel in twiꞌ bꞌix ajnaꞌl maꞌtx jaw anqꞌin junkyꞌel.”
17 Bwen komo ikxjani okyꞌik tiꞌj te Waꞌnch. Oqtxiꞌxiꞌ tuq te Eródes oxik tkꞌuluꞌ mandad tzan tkaj siꞌ te Waꞌnch pres kꞌaloꞌ tukyꞌi kaden tzan tpaj Erodías. Te Erodías txuꞌjel tuq Lip aj terman Eródes, bꞌix te Eródes owel tin tuj tkwent te Lip. 18 Te Waꞌnch ojetq tuq xik tqꞌumaꞌ te Eródes ikxjani: “Xjan tzan tjaw axujelaꞌ awixnaꞌ.”* 19 Ntons te Erodías nꞌok tuq tqꞌojiꞌ te Waꞌnch bꞌix tgan tuq tzan tqet tkansaꞌ, per kꞌontiꞌl tuq nbꞌantik titzaꞌ 20 tzan tpaj te Eródes nkolon tuq tiꞌj te Waꞌnch tzan tpaj tetz tuj tnabꞌl tuq, te Waꞌnch nbꞌet tuq tuj tumeꞌl bꞌix tetz jun xjal aj pawaꞌ te Qtata Dios; chaꞌoj tok xhchaꞌoꞌ tyol Waꞌnch, te Eródes nbꞌisun, kꞌontiꞌl tebꞌen tidiꞌ bꞌaꞌn tzan tkꞌulun, per nchalaj tuq tzan tok xhchaꞌoꞌ tyol Waꞌnch.
21 Yaji opon jun qꞌij aj bꞌaꞌn tuq tzan tjatz tqꞌoj te Erodías tiꞌj te Waꞌnch. Te Eródes oqet tqꞌijlaꞌ jun qꞌij tjakonlen taqꞌbꞌi bꞌix oqet tsiꞌ jun kyweꞌ kye tmulon bꞌix kye tkoronel bꞌix ax kye kyaqil xjal aj at tuq kyajwalil tuj tkwentil Galiley [aj jaꞌ tetz nkꞌulun mandad]. 22 Yaji opon tzi jun qꞌopoj tal Erodías. Owox aj jaꞌ nkyeqꞌijlan bꞌix owex bꞌixon kywitz. Te Eródes kyukyꞌi kye xjal owel kyganiꞌ te qꞌopoj. Oxik tqꞌumaꞌ te Eródes te qꞌopoj ikxjani: “Tzaj aqaniꞌ wetz tidiꞌ agan bꞌix wetz oxeꞌl nsiꞌ yatz.” 23 Bꞌix oxik tsiꞌ tjurament ikxjani: “Dispwest atin tzan txik nsiꞌ tidiꞌ aj otzajel aqaniꞌ wetz, qa agan lamitan te kyaqil te amaqꞌ aj jaꞌ nkyinkꞌulun mandad.” 24 Ntons te qꞌopoj owetz tzi bꞌix oxik tqꞌumaꞌ te tnan: “¿Nan, tidiꞌ oxeꞌl nqaniꞌ?” “Qanix twiꞌ Waꞌnch Aj Swal Aꞌ” kyi te tnan. 25 Ntons te qꞌopoj owox naj kare tukyꞌi te Eródes bꞌix oxik tqꞌumaꞌ: “Wetz ngan tzan stzaj asiꞌ naj tuj jun laq twiꞌ Waꞌnch Aj Swal Aꞌ [tzan tok qeꞌeꞌ qa maꞌtx kamik].”d 26 Yaji te Eródes oje bꞌisun. Komo ojetq tuq xik tsiꞌ tjurament bꞌix ojetq tuq tzꞌok chaꞌoꞌ tzan kye xjal, astilji kꞌontiꞌl oqet txkꞌayiꞌ. 27 Ntons oxik naj tlajoꞌ jun soldad kansal te Waꞌnch tzan stzaj in twiꞌ. Te soldad owox tuj te pres bꞌix owel xtxꞌemuꞌ, 28 otzaj tin tuj jun laq, oxik tqꞌapoꞌ tukyꞌi te qꞌopoj bꞌix te qꞌopoj oxik tqꞌapoꞌ te tnan. 29 Ntons ya ma tzꞌok kchaꞌoꞌ kye txnaqꞌatz te Waꞌnch, kyetz ebꞌajxik bꞌix ojaw kyin te txlimal bꞌix owox kymuquꞌ.
[Ntons ikxji okyꞌik tiꞌj te Waꞌnch Aj Swal Aꞌ bꞌix astilji te Eródes, aj tok xhchaꞌoꞌ kye xjal nkyeyolin tiꞌj Jesus, oxobꞌ bꞌix oje bꞌisun. Tetz tuj tnabꞌl, te Jesus a te Waꞌnch Aj Swal Aꞌ ojetq jaw anqꞌin junkyꞌelky bꞌix astilji nim tuq tajwalil tzan tkꞌulun milagr.]
Aj Kxik Tkꞌaꞌchaꞌ Jesus Jwebꞌ Mil Xjal
30 Ntons, yatzun kye tkyꞌixel Jesus, aj toklen kchimoꞌ kyibꞌ junkyꞌelky tukyꞌiꞌl, oxik kyqꞌumaꞌ kyetz tetz kyaqil aj ojetq tuq qet kykꞌuluꞌ bꞌix ax aj ojetq tuq xik kxnaqꞌtzaꞌ. 31 Yaji te Jesus oxik tqꞌumaꞌ kyetz ikxjani: “Peꞌetzaj waq wukyꞌiꞌl. Qwaꞌq tuj jun luwar aj jaꞌ kꞌontiꞌl najayon tzan qojlan chꞌin.” Otqꞌumaj ikxji tzan tpaj kyꞌilaꞌj tuq kye xjal nkyepon kyukyꞌiꞌl bꞌix kꞌontiꞌl tuq nkanon tzan kywaꞌan tzan kypaj kye xjal.* 32 Ntons exik kchukel tuj jun bark max tuj jun luwar aj jaꞌ kꞌontiꞌl najayon.
33 Per ya ma xik kyen kye xjal aj ikjaꞌn tuq kyex, owel kynikyꞌ jaꞌ tuq ikjaꞌn kxik, bꞌix ebꞌajxik kyoqwen tukyꞌi kyoq bꞌix ebꞌajpon tbꞌay kywitz kyetz. Kyꞌilaꞌj tuq xjal tzajnaqeꞌ jaꞌchq amaqꞌ qaynin tzi bꞌix ebꞌajtbꞌayaj iyol tetz. 34 Yaji, aj tpon te Jesus kyukyꞌi kye tukyꞌiꞌl, oxik kyen kye xjal nkyebꞌajlabꞌtik tuq. Te Jesus owok loꞌet tkꞌuꞌj kyiꞌj tzan tpaj kye xjal iktzaꞌ tuq karner aj kꞌontiꞌl pastoriyon kyiꞌj te kꞌulul kwent te kyetz.* Ntons yaji oxik txnaqꞌtzaꞌ tidiꞌchq kxol.
35 Yaji ojetq tuq qoꞌok qaleꞌky, etzaj kye [kykabꞌlajujil] txnaqꞌatz, oxik kyqꞌumaꞌ tetz ikxjani: “Qaleꞌky bꞌix kꞌontiꞌl jay tzani. 36 Mejor inkxik alajoꞌ kye xjal loqꞌol kyweꞌ kyuj kye aldey bꞌix kye txqꞌanky luwar qaynin.”* 37 Yaji tetz oxik tqꞌumaꞌ kyetz ikxjani: “Mejor aꞌix etetz intxik esiꞌ kyweꞌ” kyi te Jesus. “Per tetzniꞌn a tgan kabꞌeꞌ oqal (200) qꞌij twiꞌ tkꞌuꞌj jun xjale te loqꞌbꞌil te tetz. ¿Bꞌanꞌax petzun awitzaꞌ qa agan tzan stzaj qloqꞌoꞌ aleꞌji?” 38 Te Jesus oxik xhchaꞌoꞌ kyetz ikxjani: “¿Jatebꞌ wabꞌj eqꞌiꞌ etitzaꞌ? Sek exikchaq eꞌel tetz.” Ntons yatzun ma qet kyajlaꞌ, oxik kyqꞌumaꞌ te Jesus ikxjani: “Ateꞌ jwebꞌ wabꞌj tukyꞌi kabꞌeꞌ kyiy.” 39 Ntons yaji te Jesus oxik tqꞌumaꞌ tzan kyqet witꞌlet kye xjal bꞌuchꞌujiꞌchaq ax tzi tuj xpatzpan. 40 Eqet witꞌlet txqꞌan bꞌuchꞌuj te oqal (100) bꞌix txqꞌanky bꞌuchꞌuj lajuj tuj oxqal (50). 41 Yaji te Jesus okyꞌik tkꞌamoꞌ kye jwebꞌ wabꞌj kyukyꞌi kye kabꞌeꞌ kyiy, bꞌix ojax ten jawnaq twitz kaꞌj bꞌix oxik tsiꞌ pixon te Qtata Dios. Yaji owaqꞌik tzan kyqet tpedasiꞌ kye wabꞌj bꞌix oxik tqꞌapoꞌ kye txnaqꞌatz, tzan txik ksipaꞌ kxol kye xjal. Yaji ax ikxji otkꞌuluj kyukyꞌi kye kabꞌeꞌ kyiy. 42 Kyaqil kye xjal ebꞌajwaꞌan bꞌix ebꞌajnoj byenech. 43 Yaji, yatzun ma mankun kywaꞌan kye xjal, kye txnaqꞌatz ojaw kchimoꞌ aj ojetq tsobrin bꞌix kabal enoj kabꞌlajuj chiꞌl te aj osobrin. 44 Ntons kye aj ebꞌajwaꞌan, jwebꞌ mil (5000) ichan tuq.
Aj Txik Bꞌet Jesus Tajsik Aꞌ
45 Ntons yaji te Jesus exik tlajoꞌ kye txnaqꞌatz tzan kyjax tuj te bark bꞌix tzan kxik tbꞌayon twitz tuj amaqꞌ Betsayd. Bꞌix te Jesus okajxten tzan kykaj tkawiꞌ kye xjal. 46 Yatzun kykajlen tkawiꞌ, tetz xhchukel oxik xnaqꞌtzon twiꞌ jun witz.
47 Yatzun ma qoyupan, kye txnaqꞌatz nkyebꞌet tuq tuj bark ninkꞌajchaq te aꞌ bꞌix te Jesus tzunx tuq atqet xhchukel twiꞌ te witz. 48 Tetz oxik kaꞌyin kyiꞌj, ojetq kyesiktik kꞌontiꞌl tuq nbꞌantik tzan kytbꞌayaj tzan tpaj te kyaqꞌiqꞌ jwert tuq ntzaj kywitz. Yaji, chꞌinky tuq qxhkꞌateꞌ, te Jesus oxik bꞌet aj jaꞌ tuq akyeqet bꞌix nbꞌet tuq tajsik te aꞌ naqe cha derech tuq okyꞌik kyiꞌj. 49 Aj txik kyeꞌeꞌ te Jesus nbꞌet tuq tajsik aꞌ, ebꞌajjaw wayun, kyetz tuj kynabꞌl tuq qa jun tanim xjal, astilji ebꞌajxobꞌ. 50 Kkyaqil oxik kyeꞌeꞌ bꞌix bꞌan nkyexobꞌ tuq. Yaji te Jesus oxik tqꞌumaꞌ kyetz ikxjani: “Kꞌon kxobꞌ. ¡Nimsaj waq ekꞌuꞌj! Aꞌin wetz akyinqet tzani.” 51 Ntons yaji ojax tuj te bark kyukyꞌiꞌl bꞌix te kyaqꞌiqꞌ olumet. Yatzun kyetz oje kyelabꞌan. 52 Kyetz ojetq tuq tzꞌok kyeꞌeꞌ tidiꞌ otkꞌuluj Jesus tiꞌj te wabꞌj per kꞌontiꞌl owel kynikyꞌ tidiꞌ tuq telponx tzan ktzꞌakal.
Aj Kyqet Tqꞌanaꞌ Jesus Kyꞌilaꞌj Yabꞌ Tuj Jenesaret
53 Ntons ya ma kyepon tuj amaqꞌ Jenesaret tuj junky palaj te aꞌ, okaj kykꞌaloꞌ te bark tiꞌj jun toqtzal. 54 Bꞌix aj man tuq nkyeqetz tuj te bark, kye xjal tzi owel kynikyꞌ naj luwew qa a tuq te Jesus. 55 Exik naj kare jaꞌchq bꞌix eꞌaqꞌik tzan ktzaj kyin kye yabꞌ twitz kywatbꞌil tzan kypon kyin twitz Jesus. 56 Te Jesus okyꞌik jaꞌchq kyuj kye aldey bꞌix amaqꞌ bꞌix ax tuj kꞌul. Yatzun kye xjal nponkix tuq kyeqꞌiꞌ kye yabꞌ aj jaꞌ tuq nkyeplasin bꞌix nqet tuq kywitz twitz Jesus tzan stzoqpin tzan tok kymakoꞌ tansiker aꞌox xtxaꞌm tqꞌanaq. Yaji kyaqil kye aj eꞌok makon tetz ebꞌajbꞌantik.