7
Aj Txik Tqꞌumaꞌ Jesus Tidiꞌ Ntzꞌilan Qanim Tuj Twitz Qtata Dios
1 Jun qꞌij txqꞌan aj bꞌuchꞌuj Parisey kyukyꞌi txqꞌan aj xnaqꞌtzal Kawbꞌil tzajnaqeꞌ Jerusalen, owok kchimoꞌ kyibꞌ tukyꞌi Jesus. 2 Kyetz owok kyen junjun txnaqꞌatz Jesus nkyewaꞌan tuq bꞌix kꞌontiꞌl nqet kykꞌuluꞌ te kykostumbr kye tijxjal tzan tok kymuꞌuꞌ kyqꞌabꞌ minaꞌ kyokten waꞌil, iktzaꞌx eqꞌiꞌ kyitzaꞌ kye tijxjal. 3 Komo kye aj bꞌuchꞌuj Parisey bꞌix kyaqil kye aj tijajil Israel aj bꞌan eqꞌiꞌ kyitzaꞌ te kykostumbr te kyijajil oqtxiꞌ, kyetz kꞌontiꞌl nkyeꞌokten waꞌil qa minaꞌ tqet kykꞌuluꞌ te kykostumbr kye tijxjal. 4 Bꞌix ax chaꞌoj kymeltzꞌjik tuq tuj plas, kꞌontiꞌl nkyewaꞌan qa minaꞌ tuq txik kkyitoꞌ chꞌin aꞌ kyiꞌjx iktzaꞌ te kykostumbr. Ax at tuq tiꞌchq txqꞌanky kostumbr eqꞌiꞌ kyitzaꞌ, iktzaꞌ tiꞌj txꞌajbꞌil kybas bꞌix kyqꞌawubꞌ bꞌix kyaqil kyokensbꞌil kꞌuxbꞌil.a 5 Ntons astilji kye aj bꞌuchꞌuj Parisey bꞌix kye xnaqꞌtzal Kawbꞌil oxik kyqaniꞌ te Jesus: “¿Tistil kye axnaqꞌatz kꞌontiꞌl eqꞌiꞌ kyitzaꞌ te kykostumbr qijajil oqtxiꞌ, komo nkyeꞌokten waꞌil bꞌix minaꞌ tel ktxꞌajoꞌ kyqꞌabꞌ iktzaꞌx te kostumbr?”
6 Ntons te Jesus oxik tqꞌumaꞌ kyetz ikxjani: “Bꞌanꞌax iktzaꞌx otqꞌumaj te Chay aj yolil tyol Dios oqtxiꞌ aj tqet stzꞌibꞌaꞌ ikxjani etiꞌj etetz aj xmeletzꞌ aꞌix: “Ja xjalni nkyinqet kxjaniꞌ cha aꞌox tukyꞌi kyyol, per nyaꞌtx bꞌanꞌax kyitzaꞌ, bꞌix te kyanim laqꞌchik at wiꞌj tzan tpaj kꞌontiꞌl atok kykꞌuꞌj wiꞌj. 7 Chagan nkyintzaj kynaꞌoꞌ. Kyetz nxik kxnaqꞌtzaꞌ aj cha tuj kywiꞌx kyetz nꞌetz kyin.”* 8 Ntons nkaj ekolaꞌ te aj okaj tqꞌumaꞌ Qtata Dios bꞌix cha nꞌok esiꞌ ekꞌuꞌj tiꞌj kykostumbr kye oqtxiꞌ xjal.” 9 Bꞌix ax nxik tuq tqꞌumaꞌ kyetz ikxjani: “Kewen etetz nkaj esiꞌ te aj okaj tqꞌumaꞌ Dios bꞌix cha nxik eteqꞌiꞌ kykostumbr kye oqtxiꞌ xjal. 10 Komo te Qtata Dios okaj tqꞌumaꞌ te Moisés tzan kyqet qlimaꞌ te qtat tukyꞌi qnan,* bꞌix abꞌl aj okajel tqanbꞌeꞌ jun nyaꞌtx galan tiꞌj stat bꞌix tnan, okaj qꞌumaꞌ tzan tqet kanslet.* 11 Per etetz nꞌeqꞌumaꞌ, jun xjal bꞌaꞌn tzan txik tqꞌumaꞌ te stat tukyꞌi tnan: “Te ja ntzani korban, aj telponx pawankaj te Dios te aj maꞌ tuq tzꞌoken te onbꞌil te etetz.” 12 Ntons oj txik tqꞌumaꞌ ikxnini, ikxji aꞌixk etetz kꞌontiꞌl nꞌetzoqpiꞌ tzan tonen tukyꞌi stat bꞌix tukyꞌi tnan. 13 Ikxji nꞌel etikꞌoꞌ te aj okaj tqꞌumaꞌ te Qtata Dios tzan tpaj te ekostumbr, bꞌix tiꞌchq txqꞌanky aj nꞌekꞌuluꞌ ikxji.”
14 Ntons, yaji etzaj tukꞌleꞌ kyaqil kye xjal aj akyeqet tuq tzi bꞌix oxik tqꞌumaꞌ kyetz ikxjani: “Kyintzaj echaꞌoꞌ waq ekyaqil, bꞌix intox tuj ewiꞌ aj oxeꞌl nqꞌumaꞌ etetzni. 15 Kꞌontiꞌl jun tidiꞌ aj nqex tuj jkꞌuꞌj ntzꞌilan tiꞌj qanim tuj twitz Qtata Dios, sinoke te [nyaꞌtx galan aj] njatz tuj qanim a te ntzꞌilan tiꞌj qanim tuj twitz Qtata Dios. 16 Ntons qa at exkyin, intok esiꞌ ewiꞌ tiꞌj aj nxik nqꞌumaꞌni.”
17 Ntons yaji te Jesus kyukyꞌi txnaqꞌatz ekaj ksiꞌ kye xjal bꞌix eꞌox tuj jun jay. Kye txnaqꞌatz oxik kyqaniꞌ tetz tidiꞌ tuq telponx te aj ojetq tuq xik tqꞌumaꞌ kye xjal. 18 Ntons tetz oxik tqꞌumaꞌ kyetz ikxjani: “¿Tiꞌtzun, ax etetz kꞌontiꞌl nꞌel enikyꞌ tiꞌj te nini? ¿Kꞌontiꞌl nꞌel enikyꞌ, kyaqil aj nqex tuj jkꞌuꞌj kꞌontiꞌl ntzꞌilan tiꞌj qanim tuj twitz Qtata Dios? 19 Komo [te aj nxik qwaꞌaꞌ] kꞌontiꞌl npon tuj qanim sinoke aꞌox tuj jkꞌuꞌj bꞌix yaji nꞌex jkꞌuꞌjaꞌky.” Ikxji te Jesus oxik tqꞌumaꞌ, kyaqil aj nxik qwan kꞌontiꞌl ntzꞌilan tiꞌj te qanim tuj twitz Qtata Dios. 20 Ax oxik tqꞌumaꞌ ikxjani: “Te aj njatz tuj tanim jun xjal a te aj ntzꞌilan tiꞌj tanim tuj twitz Qtata Dios. 21 Komo tuj kyanim kye xjal, njatz kyaqil aj nyaꞌtx galan nqet kximaꞌ, bꞌix qa xjal solter oj kykꞌajajin, qatzun xjal oj kyelqꞌan, qatzun oj kykansan, 22 qatzun xjal aj junbꞌeꞌ kyibꞌ oj kykꞌajajin, qatzun oj tel kyqꞌajabꞌ tiꞌj tiꞌchq te junky, qatzun oj tqet kykꞌuluꞌ tzanjelal tiꞌchq nyaꞌtx galan, qatzun oj tqet kymoyiꞌ xjal, qatzun oj tqet kybꞌisuꞌ yol xhchꞌajyol tzan kypakꞌachul, qatzun oj kyekꞌawin tiꞌj junky, qatzun oj kchimon yol nkyeyolin nyaꞌtx galan tiꞌj junky, qatzun oj kynaꞌon qa kyetz aꞌeꞌji tbꞌay kywitz kyaqil, qatzun qa kꞌontiꞌl nqet kybꞌisuꞌ tumeꞌl titzaꞌ tzan kyanqꞌin. 23 Kyaqil ntzani njatz tuj kyanim kye xjal bꞌix a te aj ntzꞌilan tiꞌj kyanim tuj twitz Qtata Dios.”
Aj Tjatz Tin Jesus Jun Malspirit Tuj Tanim Jun Tal Xuj
24 Ntons yaji te Jesus owex tzi bꞌix opon tuj xtxꞌoꞌotxꞌ junky amaqꞌ Tir tbꞌi.b Tzi owox tuj jun jay bꞌix kꞌon tgan tuq tzan tok chaꞌoꞌ tzan nijunwt, per kꞌontiꞌl obꞌantik tewan. 25 At tuq jun xuj tzi bꞌix at tuq jun tal, tal xuj, te tal atqex tuq jun malspirit tuj tanim. Ntons te alon owok xhchaꞌoꞌ qa te Jesus ojetq tuq pon tzi, yaji opon twitz Jesus bꞌix oqet mejlet twitz. 26 Te alon, tetz jun aj nyaꞌtx tijajil Israel bꞌix tzajnaq tuq tuj te amaqꞌ Siropenesy. Ntons oqet twitz twitz te Jesus tzan tjatz tin te malspirit tuj tanim te tal. 27 Te Jesus oxik tqꞌumaꞌ tetz ikxjani: “A tgan tzan txik qnaꞌoꞌ tbꞌay kye tkꞌwaꞌal amaqꞌ, komo [tuj jun jay] nyaꞌtx galan tzan tel qin kyweꞌ kye kꞌwaꞌl bꞌix tzan txik qsiꞌ kye txꞌyaꞌn.” 28 “Yeꞌ tat” kyi te alon. “Per kye txꞌyaꞌn ax nxik kywaꞌaꞌ aj tpukꞌuꞌl kyweꞌ kꞌwaꞌl aj nqet tzꞌaqik tjaqꞌ mes.” 29 Ntons yaji te Jesus oxik tqꞌumaꞌ tetz ikxjaꞌn: “Tzan tpaj aj nꞌaqꞌumaꞌni, bꞌaꞌn tzan awaj ajay kontent tzan tpaj te malspirit maꞌtx jatz tuj tanim te awal.” 30 Yaji te xuj owaj tjay bꞌix aj tpon, te tal nwitan tuq galan tuj twatubꞌ bꞌix te malspirit ojetq tuq jatz tuj tanim.
Aj Tqet Tqꞌanaꞌ Jesus Jun Xjal Xkꞌabꞌ Tuq Bꞌix Tzꞌak
31 Ntons te Jesus owex tuj tkwentil te amaqꞌ Tirni bꞌix okyꞌik tuj te amaqꞌ Sidon bꞌix yaji opon stziꞌ te Galiley Aꞌ tuj tkwentil Dekapl.* 32 Aj tpon tzi, kye xjal opon kyin twitz Jesus jun xjal xkꞌabꞌ tuq bꞌix tzꞌak. Kyetz oqet kywitz twitz Jesus tzan tqet tsiꞌ tqꞌabꞌ tajsik tzan tbꞌantik. 33 Ntons te Jesus owel tlaqꞌbꞌaꞌ te xjal kyiꞌj kye txqꞌanky bꞌix owox tsiꞌ twiꞌ tqꞌabꞌ tuj txkyin te xjal bꞌix owok tmuꞌuꞌ twiꞌ tqꞌabꞌ tukyꞌi taꞌl stziꞌ bꞌix owok tmakoꞌ twiꞌ taqꞌ te xjal. 34 Yaji ojax ten twitz kaꞌj, ojatz tbꞌis bꞌix oxik tqꞌumaꞌ ikxjani: “Efata.” (Aj niꞌn tuj kyyol tuq kyetz bꞌix telponx iktzaꞌ “Pajaqet.”)
35 Aꞌilnajji ojaqet txkyin te xjal bꞌix ax obꞌantik te taqꞌ bꞌix owaqꞌik tzan tyolin galan. 36 Te Jesus oxik tqꞌumaꞌ kyukyꞌi kye xjal tzan kꞌon tuq txik kyqꞌumaꞌ te nijunwt tidiꞌ aj ojetq kyꞌik. Per kye xjal cha masky tuq nxik kypakbꞌaꞌ tuq jaꞌchq.* 37 Kye xjal bꞌan nkyelabꞌan tuq [bꞌix nkyechalaj tuq], nxik tuq kyqꞌumaꞌ ikxjani: “Kyaqil maꞌtx tkꞌuluj galan, kye xkꞌabꞌ nkyebꞌantik bꞌix kye men nbꞌantik kyyolin titzaꞌ.”