8
Aj Kxik Tkꞌaꞌchaꞌ Jesus Kaje Mil Xjal
1 Bwen, tuj aj tyempji a jun xjal tuq chimoꞌ kyibꞌ junkyꞌel tukyꞌi te Jesus, bꞌix komo kꞌontiꞌl tuq kyweꞌ, te Jesus etzaj tukꞌleꞌ kye txnaqꞌatz, oxik tqꞌumaꞌ kyetz ikxjani: 2 “Wetz nloꞌet nkꞌuꞌj kyiꞌj ja xjalni tzan tpaj oxe qꞌijxiꞌ kyqetlenten tzani wukyꞌiꞌl bꞌix ajnaꞌl kꞌontiꞌl kyweꞌ. 3 Qa okyeꞌajel nlajoꞌ minaꞌ tuq kywaꞌan, okyekajel numan tuj kybꞌey, komo ateꞌ junjun tzajnaqeꞌ laqꞌchik.” 4 Yaji kye txnaqꞌatz oxik kyqꞌumaꞌ ikxjani: “¿Jaꞌ otzajel qin kyweꞌ ja xjalni bꞌix nijunwt najayon tzani?” 5 Yaji tetz oxik xhchaꞌoꞌ kyetz ikxjani: “¿Jatebꞌ wabꞌj eqꞌiꞌ etitzaꞌ?” “Cha wuq wabꞌj at” kyekyi.
6 Ntons yaji te Jesus oxik tkꞌuluꞌ mandad tzan kyqet witꞌlet kye xjal twitz txꞌoꞌtxꞌ. Yaji okyꞌik tkꞌamoꞌ kye wuq wabꞌj, bꞌix oxik tsiꞌ pixon te Qtata Dios. Yaji oqet tpawaꞌ te wabꞌj bꞌix oxik tsiꞌ kye txnaqꞌatz bꞌix yatzun kyetz oxik ksipaꞌ kye xjal. 7 Ax ateꞌ tuq kabꞌeꞌ kyiy nekit eqꞌiꞌ tuq kyitzaꞌ, bꞌix te Jesus, ya ma xik tsiꞌ pixon te Dios tiꞌj kyweꞌ, oxik tqꞌumaꞌ kye txnaqꞌatz tzan txik ksipaꞌ kxol kye xjal. 8 Kyaqil kye xjal ebꞌajwaꞌan bꞌix ebꞌajnoj byenech bꞌix yatzun tmankunlen kywaꞌan, ojaw kchimoꞌ te aj osobrin bꞌix kabal enoj wuq chiꞌl aj osobrin. 9 Kye aj ebꞌajwaꞌan kaj mil (4000) tuq kybꞌet tzan kyaqil.* Yaji te Jesus ebꞌajkaj tkawiꞌ kye xjal, 10 bꞌix yaji ojax tuj jun bark kyukyꞌi txnaqꞌatz bꞌix exik tuj junky luwar, Dalmanut tbꞌi.
Aj Txik Kyqaniꞌ Kye Bꞌuchꞌuj Parisey Tzan Tqet Tkꞌuluꞌ Te Jesus Jun Tidiꞌ Tukyꞌi Nim Tajwalil
11 Ntons [aj kypon Dalmanut], epon txqꞌan xjal aj bꞌuchꞌuj Parisey tukyꞌi Jesus bꞌix nkyewululun tuq tukyꞌiꞌl. Kyetz kygan tuq tzan tqet tkꞌuluꞌ jun labꞌal kywitz tzan tqet tyekꞌuꞌ qa bꞌanꞌax tuq [tlajen Dios].* 12 Te Jesus ojatz tbꞌis bꞌix oxik tqꞌumaꞌ: “¿Tistil kye ja xjal ntzani nkyeqanin jun labꞌal?* Oxeꞌl nqꞌumaꞌ etetz te bꞌanꞌax, nlay qet nkꞌuluꞌ jun labꞌal kywitz iktzaꞌ kyetz kygan.” 13 Ntons tetz kyukyꞌi tukyꞌiꞌl owel kypawaꞌ kyibꞌ kyiꞌj, bꞌix eꞌox tuj te bark bꞌix eꞌex tzi tzan kyjunxlaꞌin te aꞌ.
Aj Txik Tqꞌumaꞌ Jesus Kye Txnaqꞌatz Tzan Tok Ksiꞌ Kynabꞌl Kyiꞌj Kye Aj Bꞌuchꞌuj Parisey
14 Ntons, aj kxik [tuj te bark] kꞌontiꞌl oxik kynaꞌoꞌ kyweꞌ, cha jun wabꞌj eqꞌiꞌ tuq kyitzaꞌ. 15 Ntons te Jesus oxik tqꞌumaꞌ kyetz ikxjani: “Intok esiꞌ waq enabꞌl kyiꞌj kye aj bꞌuchꞌuj Parisey bꞌix ax tiꞌj te Eródes tzan tpaj kyetz iktzaꞌ malsbꞌil pan.”a 16 Ntons kye txnaqꞌatz eꞌaqꞌik kyyolin kyibꞌkyibꞌx ikxjani: “[Ntzaj tqꞌumaꞌ ikxji] tzan tpaj kꞌontiꞌl ma tzaj qin wabꞌj.” 17 Te Jesus owel tnikyꞌ tiꞌ tuq nkyyoliꞌ, astilji oxik tqꞌumaꞌ kyetz ikxjani: “¿Tistil nkxbꞌisun qa kꞌontiꞌl eqꞌiꞌ qweꞌ? ¿Tiꞌtzun, minaꞌx tel enikyꞌ? Ajun etzꞌakal, ni kꞌontiꞌl nꞌox tuj ewiꞌ. 18 Etetz at ewitz per kꞌontiꞌl nꞌel enikyꞌ te aj nxik eten, ax at exkyin per kꞌontiꞌl nꞌox tuj ewiꞌ te aj nꞌok echaꞌoꞌ.* ¿Tiꞌtzun, kꞌontiꞌl naꞌik etitzaꞌ 19 aj txik nsipaꞌ te jwebꞌ wabꞌj kxol jwebꞌ mil (5000) xjal? ¿Jatebꞌ chiꞌl ojaw echimoꞌ te aj osobrin?” Ntons kyetz oxik kyqꞌumaꞌ: “Kabꞌlajuj chiꞌl.” 20 “Bꞌix aj txik nsipaꞌ te wuq wabꞌj kye kaj mil (4000) xjal, ¿jatebꞌ chiꞌl ojaw echimoꞌ te aj osobrin?” Ntons oxik kyqꞌumaꞌ: “Wuq chiꞌl.” 21 “¿Bꞌix ikxji tzunx kꞌontiꞌl nꞌel enikyꞌ?”
Aj Tqet Tqꞌanaꞌ Jesus Jun Moy
22 Ntons yaji te Jesus kyukyꞌi kye tukyꞌiꞌl ebꞌajpon tuj amaqꞌ Betsayd bꞌix txqꞌan xjal otzaj kyin jun moy tukyꞌiꞌl bꞌix oqet kywitz twitz tzan tuq tok tmakoꞌ te moy tzan tbꞌantik. 23 Yatzun te Jesus oxik tjochoꞌ te moy bꞌix oxik teqꞌiꞌ xtxaꞌm amaqꞌ; bꞌix owok stzubꞌaꞌ tiꞌj tbꞌaqꞌ twitz te moy bꞌix oqet tsiꞌ tqꞌabꞌ tajsik bꞌix oxik tqaniꞌ tetz ikxjani: “¿Nbꞌantik akaꞌyin chꞌin?” 24 Yatzun te moy oxik tqꞌumaꞌ ikxjani: “Nkyeweꞌeꞌ kye xjal nkyebꞌet per nkyexik wen naqe tzeꞌ.” 25 Ntons yaji te Jesus owok tmakoꞌ kye tbꞌaqꞌ twitz junkyꞌelky bꞌix yaji te moy ojaw tkaꞌyiꞌ bꞌix obꞌantik tkaꞌyin galan kyaqil. 26 Ntons te Jesus owaj tlajoꞌ te xjal tjay bꞌix oxik tqꞌumaꞌ tetz ikxjani: “Kꞌon xhchꞌox tuj amaqꞌ.”*
Aj Txik Tqꞌumaꞌ Te Xhpeꞌy Te Jesus A Tuq Tetz Te Koloyon Aj Qꞌumankaj Oqtxiꞌ
27 Ntons, yaji te Jesus kyukyꞌi txnaqꞌatz eꞌex tuj Betsayd bꞌix ebꞌajxik tuj amaqꞌ Sesarey tuj tkwentil Filipos, bꞌix man tuq nkyebꞌet tuj bꞌey, te Jesus oxik tqaniꞌ kyetz ikxjani: “¿Tidiꞌ nkyyoliꞌ kye xjal wiꞌj? ¿Abꞌlin wetz aꞌin tuj kynabꞌl?” 28 Yaji oxik kyqꞌumaꞌ kyetz tetz ikxjani: “Ateꞌ junjun nkyqꞌumaꞌ yatz aꞌich Waꞌnch Aj Swal Aꞌ, bꞌix junjunky nkyqꞌumaꞌ yatz aꞌich Eliys, bꞌix ateꞌ junjunky nkyqꞌumaꞌ yatz aꞌich jun aj yolil tyol Dios.”* 29 Ntons oxik xhchaꞌoꞌ kyetz ikxjani: “Bꞌix etetz, ¿abꞌl wetz aꞌin tuj enabꞌl?” Yaji oxik tzaqꞌbꞌik te Xhpeꞌy, oxik tqꞌumaꞌ ikxjani: “Yatz aꞌich te Koloyon Aj Qꞌumankaj Oqtxiꞌ.”* 30 Ntons te Jesus oxik tqꞌumaꞌ kyetz ikxjani: “Kꞌon xik eqꞌumaꞌ te nijunwt.”*
Aj Tyolin Jesus Tiꞌj Tkamiky
31 Ntons yaji owaqꞌik txnaqꞌtzan kxol kye txnaqꞌatz, qa tetz te Ichan Aj Tkꞌwaꞌal Dios maꞌkix tuq tzꞌok ten twitz te xhchoꞌnal, bꞌix maꞌkix tuq tzꞌel ikꞌoꞌ tzan kye pal aj nim kyajwalil bꞌix tzan kye xnaqꞌtzal Kawbꞌil kyukyꞌi kyaqil kye txqꞌanky kywitzaleꞌ aj nim kyajwalil kxol tijajil Israel. Ax oxik tqꞌumaꞌ qa oxeꞌlkix qꞌumaꞌ tzan tqet kansaꞌ bꞌix tuj toxiꞌn qꞌij tqelen kansaꞌ ojawel anqꞌin. 32 Ntons ikxji tetz oxik tyoliꞌ tumeꞌl titzaꞌ okyꞌel tuq tiꞌj. Yaji te Xhpeꞌy owel tlaqꞌbꞌaꞌ Jesus kyiꞌj kye txqꞌanky bꞌix owaqꞌik tilin tiꞌj tzan tpaj aj ntyoliꞌ tuq. 33 Yaji te Jesus owajtz meltzꞌjik bꞌix exik ten kye txqꞌanky txnaqꞌatz, bꞌix owaqꞌik tzan tilin tiꞌj Xhpeꞌy ikxjani: “¡Intel apawaꞌ awibꞌ wiꞌj yatz aj cha nxik asamoꞌ awibꞌ tukyꞌi Satanas. Yatz nyaꞌtx agan iktzaꞌ te Dios tgan sinoke yatz cha agan iktzaꞌ kye xjal!”
34 Ntons yaji te Jesus etzaj tukꞌleꞌ kye txnaqꞌatz bꞌix kye xjal bꞌix oxik tqꞌumaꞌ kyetz ikxjani: “Abꞌl aj tgan tzan tok lapet wiꞌj, ntons a tgan tzan tkaj tkolaꞌ te aj cha nꞌel tganiꞌ, a tgan [tzan sten dispwest tzan tok ten twitz] tkamiky [tzan npaj wetz],b bꞌix intok lapet wiꞌj. 35 Komo abꞌl aj cha njoyon tumeꞌl tzan tkolon tibꞌx tzan tanqꞌin, opoyonajkixiꞌ; yatzun te aj okamel tzan tpaj tokslbꞌen wiꞌj bꞌix tiꞌj te tpakbꞌalil galan titzaꞌ te Qtata Dios nkolon qiꞌj, tetz otkambꞌaꞌtz jun tanqꞌin.* 36 ¿Tidiꞌ token qa jun xjal otkambꞌaꞌtz kyaqil aj at tzani twitz txꞌoꞌtxꞌ per oj tkamik opoyonaj te tanim? [¡Chagan!] 37 ¿Bꞌix tidiꞌ bꞌaꞌn tzan txik tsiꞌ jun xjal tzan tkolet te tanim? [¡Chꞌinwt!] 38 Abꞌl aj okyꞌixwel wiꞌj bꞌix tiꞌj npakbꞌalil kywitz ja xjal chimol chojni aj oje kyinkaj kykolaꞌni tzan kyjoyon junky dios, ax [wetz] te Ichan Aj Tkꞌwaꞌal Dios [aꞌin] okyinkyꞌixwel tiꞌj tetz twitz Ntat bꞌix kywitz kye ángel chaꞌoj wul junkyꞌelky. Komo chaꞌoj wul, kyinꞌul tukyꞌi nim wajwalil aj otzajel tsiꞌ Ntat bꞌix kyinꞌul kyukyꞌi kye ángel aj pawameꞌ te Ntat.”