15
Alkyetz Te Aj Ntzꞌilan Tuj Kyanim Kye Xjal Tuj Twitz Qtata Dios
1 Ntons ebꞌajpon tukyꞌi Jesus txqꞌan xjal tzajnaqeꞌ tuq tuj Jerusalen, junjun aj bꞌuchꞌuj xnaqꞌtzal Kawbꞌil bꞌix junjunky aj bꞌuchꞌuj Parisey, bꞌix kyetz oxik kyqꞌumaꞌ tetz ikxjani: 2 “¿Tistil kye axnaqꞌatz kꞌontiꞌl eqꞌiꞌ kyitzaꞌ te kostumbr aj eqꞌiꞌ tuq kyitzaꞌ kye qijajil oqtxiꞌ? Komo kꞌontiꞌl nqet kykꞌuluꞌ te kykostumbr kye tijxjal tzan tok kymuꞌuꞌ kyqꞌabꞌ minaꞌ kyokten waꞌil.”a
3 Ntons te Jesus oxik xhchaꞌoꞌ kyetz ikxjani: “¿Tistil etetz tzan tpaj jun ekostumbr etetzx, kꞌontiꞌl nqet etokslaꞌ aj oje kaj tqꞌumaꞌ Qtata Dios? 4 Komo te Qtata Dios okaj tqꞌumaꞌ [tuj Tuꞌjal] ikxjani: “Oqtel ejiqꞌbꞌaꞌ te etat bꞌix te enan.* Abꞌl te aj otzajel tqanbꞌeꞌ jun nyaꞌtx galan tajsik tnan qatzun statji, a tgan tzan tkamik.”* 5 Per etetz nxik eqꞌumaꞌ, jun xjal bꞌaꞌn tzan txik tqꞌumaꞌ te stat qatzun te tnanji ikxjani: “Wetz nlay bꞌantik tzan wonen awukyꞌiꞌl tzan tpaj kyaqil aj at tidiꞌ wetz oje xik nqꞌapoꞌ te Qtata Dios.” 6 Etetz tuj enabꞌl abꞌl aj nkꞌulun ikxji ntons nyaꞌtx presis tzan tonen tiꞌj stat qatzun tnanji. Ikxji etetz tzan tpaj te ekostumbr, kꞌontiꞌl nqet etokslaꞌ te tyol Qtata Dios aj tzꞌibꞌankaj.
7 ¡Xmeletzꞌ kaꞌr! Bꞌanꞌax aj txik tyoliꞌ te Chay tyol Dios oqtxiꞌ aj txik tqꞌumaꞌ ikxjani: 8 “Kye ja xjal ntzani nkyinqet kyjiqꞌbꞌaꞌ aꞌox tukyꞌi ktziꞌ, per tuj kyanim nyaꞌtx bꞌanꞌax kyitzaꞌ. 9 Chagan nkyintzaj kynaꞌoꞌ tzan tpaj nxik kxnaqꞌtzaꞌ iktzeꞌxtzun tqꞌumbꞌen Dios bꞌix cha kyqꞌumbꞌen xjal.””*
10 Ntons te Jesus ebꞌajtzaj tukꞌleꞌ kye xjal bꞌix oxik tqꞌumaꞌ ikxjani: “Instzaj echaꞌoꞌ bꞌix intox tuj ewiꞌ. 11 Te aj nꞌox tuj stziꞌ jun xjal, kꞌontiꞌl ntzꞌilan tuj tanim tuj twitz Qtata Dios, sinoke te aj nꞌetz tuj stziꞌ, a te aj ntzꞌilan tuj tanim.”
12 Ntons yaji ebꞌajꞌok laqꞌchet kye txnaqꞌatz tiꞌj bꞌix oxik kyqꞌumaꞌ tetz ikxjani: “¿Awebꞌen peꞌ qa kye aj bꞌuchꞌuj Parisey, kyetz ma kyejaw qꞌojlik aj xtxik aqꞌumaꞌ ayol ikxji?”
13 Tzaj te Jesus, oxik tqꞌumaꞌ kyetz ikxjani: “Kyaqil awalj aj nyaꞌtx awaꞌ tzan te Ntat aj atjax tuj kaꞌj, ojawetz txꞌoqet tukyꞌix tlokꞌ. 14 Ntons kꞌon kxbꞌisun [kyiꞌj aj xjal aj nkyejaw qꞌojlik wiꞌjni], komo kyetz cha moy-eꞌ bꞌix nxik kyjochoꞌ txqꞌanky moy. Bꞌix qa jun moy nxik tjochoꞌ junky moy, kykabꞌil okyexeꞌl tzꞌaqik tuj jul.”*
15 Yaji te Xhpeꞌy oxik tqꞌumaꞌ ikxjani: “Instzaj aqꞌumaꞌ chꞌin xtxolil qetza tidiꞌ telponx te yekꞌbꞌil.”
16 Ntons te Jesus oxik tqꞌumaꞌ ikxjani: “¿Tiꞌtzun, ax etetz kꞌontiꞌl nꞌel enikyꞌ? 17 ¿Tiꞌtzun, kꞌontiꞌl nꞌel enikyꞌ kyaqil aj nꞌox tuj qtziꞌ, yaji nxik tuj jkꞌuꞌj bꞌix yaji nꞌex jkꞌuꞌjaꞌky? 18 Per yatzun te aj nꞌetz tuj stziꞌ jun xjal, te nini ntzaj tuj tanim bꞌix ntzꞌilan tuj tanim tuj twitz Qtata Dios. 19 Komo tuj tanim jun xjal, tzi ntzaj kyaqil aj nyaꞌtx galan aj nqet tbꞌisuꞌ. Komo tzi nqet tbꞌisuꞌ tzan tkansan, bꞌix tzan tkꞌajajin, bꞌix kyaqil aj nyaꞌtx tumeꞌl nkꞌulun tukyꞌi jun xuj, bꞌix tuj tanim nqet tbꞌisuꞌ tzan telqꞌan, bꞌix tzi ntzaj kyaqil yol aj nyaꞌtx bꞌanꞌax nxik tqꞌumaꞌ, bꞌix kyaqil yol nyaꞌtx galan nxik tqꞌumaꞌ tiꞌj Dios. 20 Kyaqil ntzani a te aj ntzꞌilan tuj tanim jun xjal tuj twitz Qtata Dios. Oj qwaꞌan bꞌix qa kꞌontiꞌl [nqet jkꞌuluꞌ te kostumbr] tzan tok qmuꞌuꞌ jqꞌabꞌ, te nini kꞌontiꞌl ntzꞌilan te qanim tuj twitz Qtata Dios.”*
Titzaꞌ Owok Witꞌlet Tkꞌuꞌj Jun Xuj Aj Nyaꞌtx Tijajil Israel
21 Ntons, ya ma tzꞌetz te Jesus tzi, oxik tuj tkwentil Tir bꞌix Sidon. 22 Ntons jun xuj aj Canaánb nnajan tuq tuj aj luwarji, bꞌix tetz owok laqꞌchet tiꞌj Jesus bꞌix oxik tqꞌumaꞌ kongan ikxjani: “¡Tat, yatz aꞌich aj tijajil Dawid, intok loꞌet chꞌin akꞌuꞌj wiꞌj! Wetz wal atqex jun malspirit tuj tanim bꞌix bꞌan nkꞌulun nyaꞌtx galan tiꞌj.” 23 Te Jesus kꞌontiꞌl tidiꞌ otqꞌumaj. Ntons kye txnaqꞌatz ebꞌajꞌok laqꞌchet tiꞌj bꞌix oqet kywitz twitz, oxik kyqꞌumaꞌ ikxjani: “Intxik aqꞌumaꞌ te aj xujni tzan taj, tzan tpaj tetz lapik qiꞌj bꞌix nsikyꞌin.” 24 Yaji te Jesus oxik tqꞌumaꞌ ikxjani: “Wetz intzaj lajoꞌ joyol kye aj tijajil Israel aj oje kyexiknaj, [oje kaj kykolaꞌ te tumeꞌl] iktzaꞌ karner [aj cha oje kyexik tanan].” 25 Ntons te xuj owok laqꞌchet tiꞌj, oqet mejlet twitz bꞌix oxik tqꞌumaꞌ ikxjani: “Tat, onen chꞌin wiꞌj.” 26 Te Jesus oxik tqꞌumaꞌ tetz ikxjani: “Nyaꞌtx galan tzan tel qin kyweꞌ kye kꞌwaꞌl bꞌix tzan txik qsiꞌ kye qtxꞌyaꞌan.” 27 Yaji te xuj owaj stzaqꞌbꞌeꞌ ikxjani: “Yeꞌ Tat, per kye txꞌyaꞌn ax nkyewaꞌan te tpukꞌuꞌl aj nqet tzꞌaqik tjaqꞌ kymes kye kyajawil.” 28 Ntons te Jesus oxik tqꞌumaꞌ ikxjani: “Xuj, yatz bꞌan nim witꞌlik akꞌuꞌj wiꞌj. Intbꞌantik iktzaꞌ yatz agan.” Ntons, bꞌeyx aj orji te tal obꞌantik.
Aj Kxik Tkꞌaꞌchaꞌ Jesus Kaje Mil Xjal
29 Ntons, te Jesus owex tzi bꞌix opon stziꞌ te Galiley Aꞌ; yaji ojax twiꞌ jun witz bꞌix oqet witꞌlet tzi. 30 Kyꞌilaꞌj xjal owok kchimoꞌ kyibꞌ aj jaꞌ tuq atqet tetz bꞌix nkyepon kyin tuq tukyꞌiꞌl xjal kox, yajnaq, moy, men bꞌix kyꞌilaꞌj aj at tuq chuktky kyyabꞌil. Bꞌix eqet ksiꞌ kye yabꞌ txetoq te Jesus, bꞌix tetz ebꞌajqet tqꞌanaꞌ. 31 Kye xjal bꞌan nkyelabꞌan tuq oj tok kyeꞌeꞌ kye men nbꞌantik kyyolin, kye yajnaq nkyekaj galan, kye kox nbꞌantik tuq kybꞌet galan, kye moy nbꞌantik tuq kykaꞌyin. Bꞌix oqet kyjiqꞌbꞌaꞌ Qtata Dios tzan tpaj a tetz te aj ntzaj kynaꞌoꞌ kyetz aj tijajil Israel-eꞌ.
32 Te Jesus etzaj tukꞌleꞌ kye txnaqꞌatz bꞌix oxik tqꞌumaꞌ kyetz ikxjani: “Wetz nꞌok loꞌet nkꞌuꞌj kyiꞌj ja xjalni tzan tpaj oxe qꞌijxiꞌ kyqetlenten tzani bꞌix kꞌontiꞌl tidiꞌ bꞌaꞌn tzan txik kywaꞌaꞌ. Wetz kꞌon ngan tzan kyaj nlajoꞌ kyjay qa minaꞌ tuq kywaꞌan, kebal tzan kykaj numan tuj bꞌey.” 33 Ntons kye txnaqꞌatz oxik kyqꞌumaꞌ tetz ikxjani: “Per ¿titzaꞌ owokelnoj wabꞌj kye kyꞌilaꞌj xjal tuj jun luwar iktzaꞌ ntzani jaꞌ kꞌontiꞌl xjal nkyenajanni?” 34 Te Jesus oxik xhchaꞌoꞌ kyetz ikxjani: “¿Jatebꞌ wabꞌj eqꞌiꞌ etitzaꞌ?” “Cha wuq wabꞌj bꞌix txqꞌan kyiy” kyekyi kyetz. 35 Ntons te Jesus oxik tkꞌuluꞌ mandad tzan kyqet witꞌlet kye xjal twitz txꞌoꞌtxꞌ, 36 bꞌix yaji ojaw stzyuꞌ kye wuq wabꞌj bꞌix kye kyiy, bꞌix ya ma xik tsiꞌ pixon te Qtata Dios, oqet tpedasiꞌ bꞌix oxik tsiꞌ kye txnaqꞌatz bꞌix kyetz oxik ksipaꞌ kyukyꞌi kye xjal. 37 Kyaqil kye xjal ebꞌajwaꞌan bꞌix ebꞌajnoj bꞌan byenech bꞌix enoj wuq chiꞌl te aj osobrin.