14
Aj Tbꞌisun Te Eródes Qa Te Jesus A Tuq Te Waꞌnch Aj Swal Aꞌ Ojetq Tuq Jaw Anqꞌin
1 Ntons tuj aj tyempji te Eródes aj nkꞌulun mandad tuq [tuj Galiley], ya ma tzꞌok xhchaꞌoꞌ tiꞌj te Jesus, 2 tetz oxik tqꞌumaꞌ kye tmos ikxjani: “A tetz te Waꞌnch Aj Swal Aꞌ, maꞌtx jaw anqꞌin kxol kye kamnaq; astilji bꞌaꞌn tzan tkꞌulun tidiꞌchq yekꞌbꞌil aj nqolabꞌan tiꞌj.”
3 Komo te Eródes jun-el, tetz oqex tsiꞌ Waꞌnch pres bꞌix oqet tkꞌaloꞌ. Oqet tkꞌuluꞌ ikxji tzan tpaj te Erodías txuꞌjel Lip aj termankix Eródes. 4 Komo te Waꞌnch nxik tuq tqꞌumaꞌ te Eródes ikxjani: “Xjan tzan tjaw axujelaꞌ awixnaꞌ.”* 5 Anke te Eródes tgan tuq tzan tqet tkansaꞌ te Waꞌnch, kꞌontiꞌl tuq nbꞌantik tzan tpaj tetz nxobꞌ tuq kywitz kye xjal, komo tuj kynabꞌl kye xjal te Waꞌnch jun aj yolil tyol Dios. 6 Per ya ma jakon taqꞌbꞌi te Eródes, bꞌix nkyeqꞌijlan tuq, ntons te qꞌopoj tal te Erodías obꞌixan kywitz kye xjal bꞌix owel galan tuj twitz te Eródes. 7 Ntons te Eródes oxik tsiꞌ tjurament tzan txik tsiꞌ tetz tidiꞌchq aj otqaniꞌtz tuq te qꞌopoj. 8 Yaji te qꞌopoj tzan tpaj tmandad tnan, oxik tqꞌumaꞌ ikxjani: “Instzaj asiꞌ tuj jun laq twiꞌ te Waꞌnch Aj Swal Aꞌ.” 9 Ntons te kꞌulul mandad oje bꞌisun, per tzan tpaj ojetq tuq xik tsiꞌ tjurament bꞌix tzan tpaj kye xjal ojetq kchaꞌoj aj txik tqꞌumaꞌ, ntons oxik tkꞌuluꞌ mandad tzan txik siꞌ twiꞌ te Waꞌnch tuj jun laq. 10 Oxik tkꞌuluꞌ mandad tzan tel in twiꞌ te Waꞌnch tuj pres. 11 Ntons twiꞌ te Waꞌnch oxik in tuj jun laq bꞌix oxik siꞌ tukyꞌi te qꞌopoj bꞌix tetz oxik tsiꞌ te tnan. 12 Ntons ebꞌajpon kye txnaqꞌatz, ojaw kyin te tlimal bꞌix oqex kymuquꞌ. Yaji ebꞌajxwaꞌq qꞌumal tukyꞌi Jesus.
Aj Kxik Tkꞌaꞌchaꞌ Jesus Jwebꞌ Mil Xjal
13 Ya ma tzꞌok xhchaꞌoꞌ te Jesus ikxji, tetz owex tuj aj luwarji, oxik xhchukel tuj jun bark tzan tpon tuj jun luwar aj jaꞌ kꞌontiꞌl najayon. Ya ma tzꞌok kchaꞌoꞌ kye xjal, ebꞌajꞌetz tuj kyamaqꞌ bꞌix ebꞌajtbꞌayaj twitz tukyꞌi kyoq.* 14 Ya ma qetz te Jesus tuj te bark, ebꞌajxik ten kye xjal ojetq tuq tzꞌok kymontoniꞌ kyibꞌ bꞌix owok loꞌet tkꞌuꞌj kyiꞌj bꞌix eqet tqꞌanaꞌ kye yabꞌ aj ateꞌ tuq kxol.
15 Ntons ikjaꞌn tuq jqet yupan, kye txnaqꞌatz ebꞌajꞌok laqꞌchet tkꞌatzaj bꞌix oxik kyqꞌumaꞌ tetz ikxjani: “Tzani jun luwar aj jaꞌ kꞌontiꞌl najayon bꞌix ya qaleꞌky. Inkxik akawiꞌ kye xjal tzan kxik tuj junjun aldey tzan stzaj kyloqꞌoꞌ chꞌin kyweꞌ.”* 16 Per te Jesus oxik tqꞌumaꞌ kyetz ikxjani: “Nyaꞌtx presis tzan kyaj. Intxik esiꞌ etetz kyweꞌ.” 17 Ntons kyetz oxik kyqꞌumaꞌ ikxjani: “Per nyaꞌtx nim wabꞌj eqꞌiꞌ qitzaꞌna, aꞌox cha jwebꞌ wabꞌj bꞌix kabꞌeꞌ kyiy.” 18 Ntons tetz oxik tqꞌumaꞌ kyetz ikxjani: “Instzaj eteqꞌiꞌ tzani.” 19 Yaji tetz exik tkꞌuluꞌ mandad kye xjal tzan kyqet witꞌlet tuj kꞌul. Ejaw stzyuꞌ kye jwebꞌ wabꞌj bꞌix kabꞌeꞌ kyiy, bꞌix ojax ten twitz kaꞌj eqet tkyꞌiwlaꞌ bꞌix oxik tsiꞌ pixon te Qtata Dios. Ya ma kyeqet tkabꞌinsaꞌ, ebꞌajxik tsiꞌ kye txnaqꞌatz, bꞌix kyetz oxik ksiꞌ kye xjal. 20 Kyaqil kye xjal ebꞌajwaꞌan bꞌix ebꞌajnoj byenech, bꞌix ojaw kchimoꞌ kabꞌlajuj chiꞌl aj osobrin. 21 Bꞌix kye aj ebꞌajwaꞌan qanq jwebꞌ mil (5000) ichan tuq, bꞌix kꞌontiꞌl owok ksiꞌ kyajlal kye xuj bꞌix kye kꞌwaꞌl.
Aj Tbꞌet Jesus Tajsik Aꞌ
22 Ntons, ya ma kyꞌik kyaqil ntzani, te Jesus oxik tqꞌumaꞌ kye txnaqꞌatz tzan kyjax tuq tuj te bark bꞌix tzan kyjunxlaꞌin tuq te aꞌ tbꞌay twitz, bꞌix tetz okaj kawin kyukyꞌi kye xjal. 23 Ya ma kye kaj tkawiꞌ kye xjal, te Jesus ojax twiwitz xnaqꞌtzon xhchukel. Ya ma qoyupan atqet tuq xhchukel tzi. 24 Yatzun kye txnaqꞌatz, kyetz akyeqet tuq tuj te bark ojetq tuq kyenejelan nim ninkꞌajchaq te nim aꞌ bꞌix te aꞌ nꞌok tuq pulan tiꞌj te bark tzan tpaj te kyaqꞌiqꞌ ntzaj tuq kywitz. 25 Bꞌan qꞌeqombwen te Jesus oxik aj jaꞌ tuq akyeqet kyetz, bꞌix cha oxik bꞌet tajsik te aꞌ. 26 Ya ma xik kyen kye txnaqꞌatz nbꞌet tuq tajsik te aꞌ, kyetz ebꞌajxobꞌ bꞌix ebꞌajjaw wayun tzan kxobꞌal ikxjani: “¡Jun tanim xjal!” 27 Per te Jesus oxik tqꞌumaꞌ kyetz ikxjani: “¡Kꞌon kxobꞌ! ¡Nimsan waq ekꞌuꞌj! ¡Aꞌin wetz!” 28 Ntons tzaj te Xhpeꞌy, oxik tqꞌumaꞌ tetz ikxjani: “Tat, qa aꞌich yatz, ntons instzaj aqꞌumaꞌ tzan nxik bꞌet tajsik te aꞌ tzan npon aj jaꞌ atichqet.” 29 Yaji te Jesus oxik tqꞌumaꞌ ikxjani: “Qalan.” Ntons te Xhpeꞌy oqetz tuj te bark, bꞌix oxik bꞌet tajsik aꞌ tzan tpon aj jaꞌ tuq atqet te Jesus. 30 Per ya ma tzꞌok ten bꞌan jwert tuq te kyaqꞌiqꞌ, oxobꞌ bꞌix owaqꞌik tzan txik mulan tuj te aꞌ. Ojaw qawun kongan ikxjani: “Tat, ¡tzyuj chꞌin aꞌin!” 31 Bꞌeyxnajji te Jesus owel teqꞌiꞌ tqꞌabꞌ, oqet stzyuꞌ bꞌix oxik tqꞌumaꞌ ikxjani: “Yatz aj nyaꞌtx nim witꞌlik akꞌuꞌj wiꞌj, ¿tistil ma naꞌnon awanim?”
32 Ntons ya ma kyejax tuj te bark te kyaqꞌiqꞌ olumet. 33 Ntons etzaj kye aj akyejax tuq tuj te bark, eqet mejlet naꞌol tetz ikxjani: “¡Bꞌan bꞌanꞌax yatz aꞌich Tkꞌwaꞌal Dios!”
Aj Kyqet Tqꞌanaꞌ Jesus Kye Yabꞌ Aj Jenesaret
34 Ntons ya ma kyejunxlaꞌin junky palaj te aꞌ, ebꞌajpon tuj tkwentil Jenesaret. 35 Yaji kye xjal tzi owel kynikyꞌ tiꞌj te Jesus bꞌix te tpakbꞌalil owel jaꞌchq tuj aj luwarji. Kye xjal etzaj kyin tukyꞌiꞌl kyaqil kye aj yabꞌeꞌ tuq 36 bꞌix oqet kywitz twitz tzan tok kymakoꞌ tansiker aꞌox chꞌin xtxaꞌm tqꞌanaq. Bꞌix kyaqil kye aj owok kymakoꞌ ebꞌajbꞌantik.