13
Te Yekꞌbꞌil Tiꞌj Te Ijaj Aj Eqet Tzꞌaqik Tuj Kaje Part Txꞌoꞌtxꞌ
1 Ntons tuj aj qꞌijji te Jesus owex tuj te jay bꞌix oxwaꞌq witꞌletel qaynin stziꞌ te aꞌ. 2 Bꞌix yaji, komo owok kchimoꞌ kyibꞌ kyꞌilaꞌj xjal, ntons ojax tuj jun bark stziꞌ te aꞌ bꞌix oqet witꞌlet tzi bꞌix kye xjal nkyechaꞌon tuq tiꞌj.* 3 Ntons tetz nim nyolin tuq kyukyꞌi kye xjal pur tuq tukyꞌi yekꞌbꞌil. Oxik tqꞌumaꞌ ikxjani: “Jun xjal owex awal [triw]. 4 Bꞌix man tuq nkyiton, junjun ijaj oqet tuj bꞌey, yaji ebꞌajpon kye pichꞌ, oxik kywaꞌaꞌ. 5 Bꞌix junjunky ijaj oqet txol abꞌj aj jaꞌ kꞌontiꞌl tuq nim xtxꞌotxꞌal, te ijaj ojakul luwew tzan tpaj kꞌontiꞌl tuq nim xtxꞌotxꞌal, 6 per ya ma jakul te qꞌij, ojaw tzꞌumjik, komo kꞌontiꞌl tuq nim tlokꞌil, astilji ojaw kyꞌixwik. 7 Bꞌix txqꞌanky ijaj oqet txol kyꞌiꞌx, bꞌix te kyꞌiꞌx okyꞌibꞌ luwew bꞌix te awalj ojaw skyꞌilan toq. 8 Per te txqꞌanky ijaj oqet tuj tbꞌanil txꞌoꞌtxꞌ bꞌix otswaj twitz bꞌan tbꞌanil; junjun ijaj otswaj oqal (100) bꞌix junjunky oxqal (60) bꞌix junjunky lajuj tuj kawnaq (30). 9 Kye aj atok kxkyin, intok ksiꞌ kywiꞌ tiꞌj ntzani.”
Aj Txik Tqꞌumaꞌ Jesus Tistil Nkyeꞌoken Kye Yekꞌbꞌil
10 Ntons kye txnaqꞌatz ebꞌajꞌok laqꞌchet tiꞌj bꞌix oxik kchaꞌoꞌ tetz ikxjani: “¿Tistil nchyolin kyukyꞌi kye xjal tukyꞌi yekꞌbꞌil?” 11 Yaji te Jesus owaj stzaqꞌbꞌeꞌ ikxjani: “Ajnaꞌl maꞌtx xik yekꞌuꞌ etetz tzan tel enikyꞌ te aj kꞌontiꞌl nꞌel kynikyꞌ txqꞌanky tiꞌj te tumeꞌl titzaꞌ tzan kykaj kye xjal tuj tqꞌabꞌ te Qtat aj nnajan tuj kaꞌj. Per yatzun kye txqꞌanky, kꞌontiꞌl nxik yekꞌuꞌ kyetz. 12 Astilji abꞌl te aj nꞌox tuj twiꞌ, yaji oxeꞌl siꞌ mas tnabꞌl bꞌix ikxji owelal tnikyꞌ mas, per te aj kꞌontiꞌl nꞌox tuj twiꞌ, yaji owelal in te aj chꞌin aj oje tzꞌel tnikyꞌ tiꞌj.a 13 Astilji wetz nkyinyolin kyukyꞌiꞌl cha aꞌox tukyꞌi yekꞌbꞌil tzan tpaj kyetz nkyekaꞌyin per kꞌontiꞌl nkyen, nkyechaꞌon per kꞌontiꞌl nꞌox tuj kywiꞌ. 14 Ikxji kyukyꞌiꞌl kyetz, nponkix tyol te Chay aj tlajen Dios oqtxiꞌ, aj txik tqꞌumaꞌ ikxjani: “Etetz nꞌok echaꞌoꞌ bꞌix kꞌontiꞌl nꞌox tuj ewiꞌ; bꞌix nꞌok eten tukyꞌi ewitz per kꞌontiꞌl nꞌel enikyꞌ tiꞌj. 15 Ikxji tzan tpaj te kyanim kye ja xjalni kꞌontiꞌl ntnaꞌoꞌ chꞌinwt, bꞌix pen nbꞌantik kchaꞌon tukyꞌi kxkyin, bꞌix bꞌan txayiꞌ te kywitz tzan kꞌon kykaꞌyin; ikxji kꞌontiꞌl nbꞌantik kyen bꞌix kꞌontiꞌl nbꞌantik kchaꞌon, bꞌix kꞌontiꞌl nbꞌantik tzan tel kynikyꞌ tuj kyanim, bꞌix kꞌontiꞌl nbꞌantik tzan tjaw kkyꞌixpuꞌ kynabꞌlin tzan kyqet nqꞌanaꞌ.”* 16 Yatzun etetz ajnaꞌl galanx-alo tzan tpaj tukyꞌi ewitz bꞌaꞌn tzan ekaꞌyin, bꞌix tukyꞌi exkyin bꞌaꞌn tzan echaꞌon. 17 Wetz oxeꞌl nqꞌumaꞌ bꞌanꞌax etetz, kyꞌilaꞌj kye aj yolil tyol Qtata Dios bꞌix kyꞌilaꞌj xjal aj bꞌan galan-eꞌ tuq tuj twitz Qtata Dios, kyetz kygan tuq tzan tok kyen te aj nꞌok eten etetz ajnaꞌl, per kyetz kꞌontiꞌl owok kyen; kygan tuq tzan tok kchaꞌoꞌ aj nꞌok echaꞌoꞌ etetz ajnaꞌl, per kꞌontiꞌl owok kchaꞌoꞌ.”*
Aj Txik Tqꞌumaꞌ Jesus Xtxolil Te Yekꞌbꞌil Tiꞌj Te Ijaj Aj Eqet Tzꞌaqik Tuj Kaje Part Txꞌoꞌtxꞌ
18 “Ntons instzaj echaꞌoꞌ [tidiꞌ telponx] te yekꞌbꞌil tiꞌj te jun awal [triw]. 19 Jun xjal oj tok xhchaꞌoꞌ te tpakbꞌalil titzaꞌ tzan tkaj tuj tqꞌabꞌ Qtata Dios bꞌix kꞌontiꞌl nꞌox tuj twiꞌ, yaji nꞌul te Tajaw Choj, npon tnajsaꞌ tuj tanim te xjal te tpakbꞌalil aj ojetq tzꞌok xhchaꞌoꞌ. Te ntzani iktzaꞌ te ijaj aj oqet tuj bꞌey. 20 Yatzun te aj oqet txol abꞌj, te nini iktzaꞌ jun xjal oj tok xhchaꞌoꞌ te tpakbꞌalil bꞌix bꞌan nchalaj tzan tkꞌamon tetz, 21 per tzan tpaj nyaꞌtx nim tlokꞌ, kꞌontiꞌl ntipaꞌ oj tok ten twitz xhchoꞌnal bꞌix tidiꞌchq nyaꞌtx galan aj nꞌok tiꞌj tzan tpaj tokslbꞌen, ntons nkaj tsiꞌ tzan tokslan. 22 Yatzun te ijaj aj oqet txol kyꞌiꞌx, telponx tiꞌj jun xjal aj nꞌok xhchaꞌoꞌ te tpakbꞌalil, per tzan tpaj bꞌan nbꞌisun tiꞌj tidiꞌchq aj tzani twitz txꞌoꞌtxꞌ, bꞌix tzan tpaj nqet eqꞌiꞌ tzan tqꞌinomal, ntons tzan tpaj kyaqil nini npon tnajsaꞌ te aj oje tzꞌok xhchaꞌoꞌ tiꞌj te tpakbꞌalil bꞌix kꞌontiꞌl nꞌel galan tukyꞌiꞌl. 23 Per yatzun te ijaj aj oqet tuj tbꞌanil txꞌoꞌtxꞌ, telponx tiꞌj jun xjal aj nchaꞌon te tpakbꞌalil bꞌix nꞌox tuj twiꞌ bꞌix nꞌel galan tukyꞌiꞌl. Jun xjal ikxji iktzaꞌ te twitz triw aj otswaj oqal (100) tiꞌj jun tbꞌaqꞌ bꞌix junjunky iktzaꞌ te aj otswaj oxqal (60) bꞌix junjunky iktzaꞌ te aj otswaj lajuj tuj kawnaq (30).”
Te Yekꞌbꞌil Tiꞌj Te Kꞌul Nyaꞌtx Galan Tuj Te Triw
24 Te Jesus oxik tqꞌumaꞌ kyetz junky yekꞌbꞌil ntzani: “Te tumeꞌl titzaꞌ te Qtat aj nnajan tuj kaꞌj nkyeꞌok xhchimoꞌ xjal tzan kykaj tuj tqꞌabꞌ, te nini iktzaꞌ jun xjal aj oqex tawaꞌ tuj xtxꞌoꞌotxꞌ jun ijaj triw bꞌan galan. 25 Per man tuq nkyewitan kye aqꞌunon, opon jun tajqꞌoj te tajaw bꞌix oqex tawaꞌ jun kꞌul nyaꞌtx galan txol te triw bꞌix yaji oxik. 26 Ya ma kyꞌibꞌ te triw bꞌix owaqꞌik tzan tel kanet te twitz owel kynikyꞌ tiꞌj te kꞌul aj nyaꞌtx galan. 27 Ntons kyetzaj kye tmos, ebꞌajxwaꞌq tukyꞌi te tajawil bꞌix oxik kyqꞌumaꞌ tetz ikxjani: “Tat, ¿nyaꞌtx petzun galan tuq te ijaj aj oqex awet tuj atxꞌoꞌotxꞌ? ¿Jaꞌ otzaj te kꞌul aj nyaꞌtx galan?”
28 Yaji te tajaw oxik tqꞌumaꞌ kyetz ikxjani: “Jun wajqꞌoj okꞌulun te nini.” Ntons kye tmos oxik kchaꞌoꞌ ikxjani: “¿Agan tzan qxikna txꞌoqol te kꞌul aj nyaꞌtx galan?” 29 Per te tajaw oxik tqꞌumaꞌ ikxjani: “Kꞌon, tzan tpaj oj tjatz etxꞌoqoꞌ te kꞌul aj nyaꞌtx galan, kebal tjatz etxꞌoqoꞌ te triw. 30 Mejor tzan kkyꞌibꞌ junx tukyꞌi te triw max oj tjaw te triw, okyexeꞌl nlajoꞌ kye aj ojawel in te triw tzan tel kypawaꞌ tbꞌay te kꞌul aj nyaꞌtx galan bꞌix tzan tok kymanojiꞌ bꞌix tzan tok ksiꞌ tqꞌaqꞌbꞌel bꞌix yatzun te triw tzan tqex kykꞌuꞌuꞌ tuj te nkajon.””
Te Yekꞌbꞌil Tiꞌj Te Tbꞌaqꞌ Mostas
31 Te Jesus ax oxik tqꞌumaꞌ kyetz junky yekꞌbꞌil ntzani: “Kye xjal aj nkyekaj tuj tqꞌabꞌ te Qtat aj nnajan tuj kaꞌj, kyetz iktzaꞌ jun tbꞌaqꞌ mostas aj nqex tawaꞌ jun xjal tuj xtxꞌoꞌotxꞌ. 32 Aj ijajji a te mas bꞌan chꞌi nekit kywitz txqꞌanky ijaj [aj nqoꞌawan], per oj tkyꞌibꞌ a te awalj mas nim kywitz txqꞌanky awalj tuj jun peꞌon, npon iktzaꞌ jun tzeꞌ bꞌix kye pichꞌ aj nkyelipan twitz kaꞌj nkyekꞌulun kyqꞌuꞌ twiꞌ.”
Te Yekꞌbꞌil Tiꞌj Te Malsbꞌil
33 Ntons ax oxik tqꞌumaꞌ junky yekꞌbꞌil ntzani: “Te aj nkyꞌik kyukyꞌi kye aj akyeqet tuj tqꞌabꞌ te Qtata Dios aj nnajan tuj kaꞌj, te nini iktzaꞌ te malsbꞌil aj nqex tsamoꞌ jun xuj tuj oxe malon arin, nxik samet kyaqil tzan tmal te qꞌotj.”
34 Ntons te Jesus nkyexik txnaqꞌtzaꞌ tuq kye xjal pur tuq tukyꞌi yekꞌbꞌil, bꞌix kꞌontiꞌl tuq nkyexik txnaqꞌtzaꞌ qa nyaꞌtx tukyꞌi yekꞌbꞌil. 35 Te ntzani okyꞌik tzan tuq tponkix tyol te aj yolil tyol Dios oqtxiꞌ: “Wetz okyinyoliyon kxol pur tukyꞌi yekꞌbꞌil, bꞌix oxeꞌl nyoliꞌ kyukyꞌiꞌl tidiꞌchq aj nijunwt chaꞌol tetz, atx aj tqet tkꞌuluꞌ te Qtata Dios te twitz txꞌoꞌtxꞌ.”*
Aj Txik Tqꞌumaꞌ Jesus Tidiꞌ Telponx Te Yekꞌbꞌil Tiꞌj Te Kꞌul Aj Nyaꞌtx Galan
36 Ntons te Jesus ekaj tkawiꞌ kye xjal bꞌix owox tuj te jay. Yaji kye txnaqꞌatz ebꞌajꞌok laqꞌchet tiꞌj, bꞌix oxik kyqꞌumaꞌ tetz ikxjani: “Instzaj aqꞌumaꞌ chꞌin xtxolil tidiꞌ telponx te yekꞌbꞌil tiꞌj te kꞌul aj nyaꞌtx galan.” 37 Ntons te Jesus owaj stzaqꞌbꞌeꞌ kyetz ikxjani: “Te aj nqex awan te ijaj aj bꞌan galan, aꞌin wetz te Ichan Aj Tkꞌwaꞌal Dios, 38 bꞌix te txꞌoꞌtxꞌ aj jaꞌ nkyinꞌawan telponx tiꞌj te twitz txꞌoꞌtxꞌ kyaqil. Te ijaj galan telponx kye aj kolomeꞌ tuj tqꞌabꞌ Qtata Dios, bꞌix te kꞌul aj nyaꞌtx galan telponx kye aj akyeqet tuj tqꞌabꞌ te Tajaw Choj. 39 Te tajqꞌoj te tajaw txꞌoꞌtxꞌ aj oqex awan te kꞌul aj nyaꞌtx galan, a te Tajaw Choj. Oj tjaw twitz te awalj telponx tiꞌj te jwisy, bꞌix kye aqꞌunon iqal twitz te awalj aꞌeꞌ kye ángel. 40 Iktzaꞌx te kꞌul nyaꞌtx galan njaw chimoꞌ bꞌix nꞌox xoꞌoꞌ tuj qꞌaqꞌ tzan tqet kyꞌeꞌsaꞌ, ntons oj tul te jwisy ax ikxji okyꞌel [kyiꞌj kye xjal aj kꞌontiꞌl nkyeꞌokslan]. 41 [Tuj aj qꞌijji wetz] te Ichan Aj Tkꞌwaꞌal Dios [aꞌin] okyetzajel nlajoꞌ kye ángel tzan tetz kyin kxol kye aj bꞌanꞌax kolomeꞌ tuj tqꞌabꞌ Qtata Dios, kyaqil kye aj cha nkyekꞌulun tzan kyqet tzꞌaqik kye txqꞌanky bꞌix kye aj cha kykꞌulunqet pur nyaꞌtx galan. 42 Okyexeꞌl xoꞌoꞌ tuj [te chman qꞌaqꞌ aj iktzaꞌ] jun nim jorn aj bꞌan nbranun aj jaꞌ ma kyeꞌoqꞌ bꞌix ma qitxꞌitxꞌin txeꞌ kyeꞌ.b 43 Bꞌix yatzun kye aj nkyekꞌulun iktzaꞌx te Qtata Dios tgan, kyetz tuj kaꞌj tukyꞌi Qtata Dios ma kyetxaqtxon tukyꞌi nim kxhqitzꞌunal iktzaꞌ te qꞌij ntxaqtxon tukyꞌi xhchqitzꞌunal.* Kye aj atok kxkyin, intok ksiꞌ kywiꞌ tiꞌj ntzani.”
Te Yekꞌbꞌil Tiꞌj Te Qꞌinomal
44 “Ntons tzan kykaj kye xjal tuj tqꞌabꞌ te Qtat aj nnajan tuj kaꞌj, te nini iktzaꞌ jun qꞌinomal ewaꞌ tjaqꞌ te txꞌoꞌtxꞌ, bꞌix yaji jun xjal nꞌoknoj titzaꞌ per oqtex tewaꞌ junkyꞌel tzix; ntons komo tetz bꞌan nchalaj tiꞌj, yaji oxeꞌl tkꞌayiꞌ kyaqil tidiꞌ tetz tzan tkaj tloqꞌoꞌ te txꞌoꞌtxꞌ.”
Te Yekꞌbꞌil Tiꞌj Te Jun Tal Abꞌj Bꞌan Tbꞌanil
45 “Bꞌix tzan kykaj kye xjal tuj tqꞌabꞌ te Qtat aj nnajan tuj kaꞌj, te nini ax iktzaꞌ jun xkꞌaꞌmon njoyon jun tal abꞌj bꞌan tbꞌanil.c 46 Oj toknoj titzaꞌ jun aj bꞌan nim tbalor, ntons otzajel tetz, oxeꞌl tkꞌayiꞌ kyaqil tidiꞌ tetz, bꞌix otloqꞌoꞌtz te aj tal abꞌjni.”
Te Yekꞌbꞌil Tiꞌj Te Pa
47 “Bꞌix tzan kykaj kye xjal tuj tqꞌabꞌ te Qtat aj nnajan tuj kaꞌj, te nini ax iktzaꞌ oj tqex xoꞌoꞌ jun pa tuj te nim aꞌ bꞌix nkyejatz teqꞌiꞌ kyaqil txakl kyiy. 48 Oj tnoj te pa, kye chimol kyiy nꞌetz kyin stziꞌ te aꞌ, bꞌix nkyeqet witꞌlet tzan tjatz kyjoyoꞌ kye galan tuj jun chiꞌl, bꞌix kye aj nyaꞌtx galan owelax kxoꞌoꞌ. 49 Ax ikxji okyꞌel oj tul te jwisy; kye ángel okyeꞌelax tzan kyel kypawaꞌ kye xjal aj nyaꞌtx galan-eꞌ kyiꞌj kye aj galan. 50 Okyexeꞌl xoꞌoꞌ tuj [te chman qꞌaqꞌ aj iktzaꞌ] jun nim jorn aj bꞌan nbranun aj jaꞌ ma kyeꞌoqꞌ bꞌix ma qitxꞌitxꞌin txeꞌ kyeꞌ.”
51 Yaji te Jesus oxik xhchaꞌoꞌ ikxjani: “¿Nꞌox peꞌ tuj ewiꞌ kyaqil ntzani?” “Tzun tat” kyekyi kyetz. 52 Ntons te Jesus oxik tqꞌumaꞌ kyetz ikxjani: “Astilji, jun xnaqꞌtzal Kawbꞌil aj oje tzꞌokslan tiꞌj te tumeꞌl titzaꞌ tzan kykaj kye xjal tuj tqꞌabꞌ te Qtat aj nnajan tuj kaꞌj, tetz parej iktzaꞌ jun tajaw jay aj njatz tin tuj tkꞌubꞌl tidiꞌchq bꞌan tbꞌanil akꞌaꞌj bꞌix aj qꞌanq.”
Aj Tel Ikꞌoꞌ Jesus Tzan Kye Txjalilx
53 Ntons, ya ma xikbꞌaj tqꞌumaꞌ te Jesus kyiꞌj kye ja yekꞌbꞌilni, owex tuj te aj luwarji. 54 Ya ma pon tuj tamaqꞌ, oxik txnaqꞌtzaꞌ kye xjal tuj te jay nabꞌil Dios tzi. Kye xjal bꞌan nkyelabꞌan tuq tiꞌj, bꞌix nkyqꞌumaꞌ tuq ikxjani: “¿Jaꞌ otzaj txnaqꞌtzaꞌ te ja xjal kyaqil aj tebꞌenni? ¿Titzaꞌ nbꞌantik tidiꞌchq yekꞌbꞌil titzaꞌ tukyꞌi tajwalil Dios? 55 ¿Nyaꞌtx petzun aj ntzani tkꞌajol te kalpinter? ¿Nyaꞌtx petzun te tnan Liy tbꞌi, bꞌix kye titzꞌin aꞌeꞌ Chaw,d Chep, Simon bꞌix te Juds? 56 ¿Kꞌontiꞌl petzun nkyenajan kye titzꞌin xuj tzani qxol? ¿Jaꞌ ntzaj txkonoliꞌ kyaqil ntzani?”
57 Astilji owel kyikꞌoꞌ, per yaji te Jesus oxik tqꞌumaꞌ kyetz ikxjani: “Tuj junky luwar jun aj yolil tyol Dios nqet jiqꞌbꞌaꞌ, yatzun tuj tamaqꞌx qa tuj tjayxji, kꞌontiꞌl nqet jiqꞌbꞌaꞌ.”*
58 Ntons tzi kꞌontiꞌl oqet tkꞌuluꞌ kyꞌilaꞌj milagr tukyꞌi nim tajwalil Qtata Dios tzan tpaj kye aj xjalji kꞌontiꞌl tuq nkyeꞌokslan tiꞌj.