4
Aj Txik Tqꞌumaꞌ Jesus Tumelil Titzaꞌ Nkꞌulun Mandad Dios
1 Bwen, junky qꞌij junkyꞌel te Jesus exik txnaqꞌtzaꞌ kye xjal stziꞌ te Galiley Aꞌ bꞌix kye xjal ebꞌajponoj chaꞌoyon tiꞌj. Komo tzi atqet tuq jun bark, te Jesus ojax ten tuj te bark tzan tel laqꞌchet chꞌin kyiꞌj bꞌix ikxji atqet tuq te Jesus tuj te bark tuj aꞌ bꞌix kye xjal atebꞌajqet tuq tlobꞌen aꞌ.* 2 Tetz nxik tuq txnaqꞌtzaꞌ tiꞌchq kye xjal tukyꞌi yekꞌbꞌil bꞌix oxik tqꞌumaꞌ ja yekꞌbꞌil ntzani: 3 “Instzaj echaꞌoꞌ ja ntzani: Jun xjal owex kyitol tawal. 4 Junjun ijaj eqet tzꞌaqik tuj bꞌey bꞌix etzaj kye pichꞌ, oxik kywan te ijaj. 5 Junjunky ijaj oqet tzꞌaqik txol abꞌj, kꞌonin tuq xtxꞌotxꞌal bꞌix te ijajji ojakul luwew tzan tpaj nyaꞌtx tuq nim xtxꞌotxꞌal, 6 per ya ma jakul te qꞌij, okyaqan te qꞌij bꞌix ojaw tzꞌumjik bꞌix komo nyaꞌtx tuq nim tlokꞌ, ojaw kyꞌixwik. 7 Bꞌix junjunky ijaj oqet tzꞌaqik aj jaꞌ at tuq kyꞌiꞌx tbꞌay bꞌix te kyꞌiꞌx ojakul junx tukyꞌi te awalj bꞌix yatzun te awalj owok skyꞌilan toq bꞌix kꞌontiꞌl otswaj twitz. 8 Yatzun kye junjunky ijaj oqet tzꞌaqik aj jaꞌ at tbꞌanil txꞌoꞌtxꞌ bꞌix ojakul, otzaj bꞌan galan bꞌix otswaj galan twitz. Junjun otswaj lajuj tuj kawnaq (30) bꞌix junjunky otswaj oxqal (60) bꞌix junjunky otswaj oqal (100).” 9 Bꞌix nxik tuq tqꞌumaꞌ ikxjani: “Abꞌl aj atok txkyin, intok tsiꞌ twiꞌ tiꞌj aj nxik nqꞌumaꞌni.”
10 Ntons aj kyajlen kyaqil kye xjal, te Jesus okajxten kyukyꞌi junjun xjal kyukyꞌi kye kykabꞌlajujil txnaqꞌatz. Oxik kyqaniꞌ tukyꞌiꞌl tidiꞌ telponx te yekꞌbꞌil aj ma tqꞌumaj. 11 Ntons tetz oxik tqꞌumaꞌ ikxjani: “Ajnaꞌl maꞌtx xik yekꞌuꞌ etetz tzan tel enikyꞌ te aj kꞌontiꞌl nꞌel kynikyꞌ txqꞌanky tiꞌj te tumeꞌl titzaꞌ tzan kykaj kye xjal tuj tqꞌabꞌ Qtata Dios. Per yatzun kye aj kꞌontiꞌl nkyokslaꞌ, cha nꞌok kchaꞌoꞌ kye yekꞌbꞌil. 12 Ikxji “kꞌontiꞌl nꞌel kynikyꞌ te aj nꞌok kyen bꞌix kꞌontiꞌl nꞌox tuj kywiꞌ te aj nꞌok kchaꞌoꞌ, ikxji nlay jaw kkyꞌixpuꞌ kynabꞌlin bꞌix nlay najslet kchoj.”* 13 Yatzun etetz, ¿kꞌontiꞌl nꞌel enikyꞌ tiꞌj ja yekꞌbꞌilni? Ntons ¿titzaꞌ owelal enikyꞌ kyaqil kye txqꞌanky yekꞌbꞌil aj oxeꞌl nqꞌumaꞌ?
14 Ntons te xjal aj nkyiton te ijaj telponx tetz iktzaꞌ jun xjal npakbꞌan Tyol Dios. 15 Ateꞌ xjal iktzaꞌ te ijaj aj oqet tuj bꞌey. Kyetz cha nꞌok kchaꞌoꞌ te Tyol Dios, yaji nꞌul naj te Satanas, nꞌel tin te aj ojetq tzꞌok kchaꞌoꞌ. 16 Ntons ax ateꞌ xjal iktzaꞌ te ijaj aj oqet txol abꞌj. Kyetz chaꞌoj tok kchaꞌoꞌ te Tyol Dios, nkyechalaj naj tiꞌj bꞌix nkykꞌamoꞌ tukyꞌi jun tkꞌuꞌjlal. 17 Per komo te Tyol Dios kꞌontiꞌl nlokꞌan tuj kyanim, astilji cha jun rat nkyipaꞌ tzan tpaj chaꞌoj tok jun nyaꞌtx galan kyiꞌj, qatzun nkyeꞌok xmayiꞌ tzan tpaj txiklen kyokslaꞌ te Tyol Dios, yaji nkaj naj kykolaꞌ. 18 Ntons, ax ateꞌ xjal iktzaꞌ te ijaj aj oqet txol kyꞌiꞌx. Kyetz nꞌok kchaꞌoꞌ te Tyol Dios 19 per yaji cha kybꞌisunqet tiꞌj kyaqil tzani twitz txꞌoꞌtxꞌ, cha nkyechalaj tiꞌj te kyqꞌinomal, bꞌix nꞌel kyqꞌajabꞌ tiꞌj tiꞌchq; bꞌix kyaqil ntzani npon tnajsaꞌ te Tyol Dios tuj kyanim bꞌix kꞌontiꞌl nwitzan. 20 Ntons, per ax ateꞌ xjal iktzaꞌ te ijaj aj oqet tuj galan txꞌoꞌtxꞌ. Kyetz chaꞌoj tok kchaꞌoꞌ te Tyol Dios, nkykꞌamoꞌ bꞌix yaji te Tyol Dios nwitzan galan tuj kyanim iktzaꞌ te ijaj aj otswaj lajuj tuj kawnaq (30) bꞌix junky otswaj oxqal (60) bꞌix junky otswaj oqal (100).”
Aj Txik Tqꞌumaꞌ Jesus Kꞌontiꞌl Jun Tidiꞌ Bꞌaꞌn Tzan Tkaj Ewj
21 Yaji oxik tqꞌumaꞌ tetz kyetz ikxjani: “¿Ntzaj qin petzun jun kandil tuj qjay tzan tox qsiꞌ tjaqꞌ jun almun qatzun tjaqꞌ jun watubꞌjji? ¡Kꞌontiꞌl! Njaw qsiꞌ jawnaq te kandil tzan tqꞌanalin.* 22 Ikxji ebꞌajil kyaqil bꞌix nlay bꞌantik tkaj jun tidiꞌ ewj.* 23 Qa at exkyin, intok esiꞌ waq ewiꞌ tiꞌj aj nqꞌumaꞌni.”
24 Ntons, yaji tetz oxik tqꞌumaꞌ kyetz ikxjani: “Intok esiꞌ ewiꞌ tiꞌj te aj nꞌok echan. Komo iktzaꞌ nꞌok esiꞌ ewiꞌ tiꞌj Tyol Dios ax ikxji otzajel tsiꞌ te Qtata Dios etetz* bꞌix mas nim otzajel tsiꞌ tetz te enabꞌl tzan tel enikyꞌ mas. 25 Qa te Qtata Dios oje xik tsiꞌ etetz tzan tel enikyꞌ tiꞌj Tyol, ntons yaji otzajel tsiꞌ mas tzan tel enikyꞌ mas. Per qa kꞌontiꞌl nꞌel enikyꞌ byenech Tyol Dios tzan tpaj kꞌontiꞌl nꞌok esiꞌ ewiꞌ tiꞌj, yaji owelal in aj chꞌin aj nꞌel enikyꞌ tuq tbꞌayaꞌ.”a
Aj Txik Tqꞌumaꞌ Jesus Te Yekꞌbꞌil Tiꞌj Titzaꞌ Nkyꞌibꞌ Jun Awalj
26 Ntons, yaji oxik tqꞌumaꞌ [junky yekꞌbꞌil] kyetz ikxjani: “Ntons, kyiꞌj kye xjal aj nkyekaj tuj tqꞌabꞌ Qtata Dios, te nini iktzaꞌ te ijaj chaꞌoj tkaj tkyitoꞌ jun xjal. 27 Te xjal qa nwitan qatzun itzꞌojji, chijqꞌij qa qonikꞌanji, te ijaj ojakulel kixiꞌ bꞌix okyꞌibꞌel. Per te xjal kꞌontiꞌl tebꞌen titzaꞌ okyꞌibꞌel. 28 Te txꞌoꞌtxꞌ a te nkyꞌibꞌsan te awalj. Tbꞌay njakul, yaji opoyon tkyꞌibꞌlen, yaji okanetel twitz. 29 Chaꞌoj tkyꞌixwik te twitz, te xjal ojawel tkꞌupuꞌ tzan tpaj ojetq pon tyemp tzan tjaw kꞌupet.”
Aj Txik Tqꞌumaꞌ Jesus Te Yekꞌbꞌil Tiꞌj Te Tzeꞌ Mostas
30 Yaji oxik tqꞌumaꞌ tetz kyetz junky yekꞌbꞌil ikxjani: “¿Tidiꞌ qukyꞌiꞌl bꞌaꞌn tzan tqet qparejsaꞌ titzaꞌ nkꞌulun mandad te Qtata Dios tzani twitz txꞌoꞌtxꞌ? ¿Alkyetz yekꞌbꞌil bꞌaꞌn-wit tzan token tzan txik jqꞌumaꞌ tumeꞌl tiꞌj? 31 Ntons, titzaꞌ nkꞌulun mandad te Qtata Dios tzani twitz txꞌoꞌtxꞌ iktzaꞌ nkyꞌik tiꞌj jun tbꞌaqꞌ mostas oj tqex awaꞌ.b Komo te tbꞌaqꞌ mostas mas nekit twitz kyaqil tbꞌaqꞌ txqꞌanky awalj 32 per chaꞌoj tqex awet, nkyꞌibꞌ bꞌix nkyꞌibꞌ jun nim tzeꞌ mas nim twitz kyaqil awalj. Nim tqꞌabꞌ npon bꞌix kye pichꞌ njax kykꞌuluꞌ kyqꞌuꞌ twiꞌ.”
Tidiꞌ Tuq Kyoken Kye Yekꞌbꞌil
33 Ntons tukyꞌi kyꞌilaꞌj yekꞌbꞌil ikxjani te Jesus nxik tuq txnaqꞌtzaꞌ Tyol Dios kye xjal per aꞌox aj janikꞌpon tuq bꞌaꞌn tzan tkaj tuq kyitzaꞌ. 34 Kyaqil-el chaꞌoj tyolin kyukyꞌiꞌl, nxik tuq txnaqꞌtzaꞌ tukyꞌi yekꞌbꞌil bꞌix yaji xhchukel tetz kyukyꞌi txnaqꞌatz nxik tqꞌumaꞌ xtxolil tidiꞌ tuq telponx kyaqil aj ojetq xik tqꞌumaꞌ.
Aj Tlumet Te Kyaqꞌiqꞌ Tzan Jesus
35 Ntons yaji ikjaꞌn tuq qxmutxꞌeꞌ, te Jesus oxik tqꞌumaꞌ kye aꞌeꞌ txnaqꞌatz ikxjani: “Qwaꞌqchaq junxlaꞌ ja aꞌni.” 36 Ntons ekaj kykawiꞌ kye xjal bꞌix kye txnaqꞌatz cha oxik kyin-oq bꞌix ax txqꞌanky bark ajuneꞌ tuq kyukyꞌiꞌl.
37 Yaji otzaj jun nim kyaqꞌiqꞌ bꞌan jwert bꞌix te aꞌ nꞌox tuq pulan tuj te bark bꞌix ikxji te bark ikjaꞌn tuq tnoj tukyꞌi aꞌ. 38 Yatzun te Jesus tetz nwitan tuq tiꞌjx te bark tajsik jun tqꞌuxwiꞌ bꞌix kye txnaqꞌatz oxik kykꞌasuꞌ. “¡Xnaqꞌtzon! ¿Tiꞌtzun, yatz kꞌontiꞌl nchbꞌisun chꞌinky qxik mulan?” 39 Ntons yaji te Jesus ojaw waꞌlet bꞌix oxik tmiyoꞌ te kyaqꞌiqꞌ tukyꞌi aꞌ ikxjani: “Se elumet.” Ntons te kyaqꞌik owaꞌlet bꞌix olumet kyaqil. 40 Yaji te Jesus oxik tqꞌumaꞌ kyetz ikxjani: “¿Tistil bꞌan nkxobꞌ? ¿Tiꞌtzun, tzunx minaꞌx tok witꞌlet ekꞌuꞌj wiꞌj?” 41 Komo kyetz ojetq tuq kyebꞌajxobꞌ tzan tpaj aj ojetq tuq kyꞌik bꞌix eꞌokten yoliyon kyibꞌkyibꞌx ikxjani: “¿Tiꞌ xjal-elel ntzani? ¡Tetz nkꞌulun mandad tzan tlumet te kyaqꞌiqꞌ tukyꞌi aꞌ bꞌix nqet okslaꞌ!”