13
Titzaꞌ Owaj Stzaqꞌbꞌeꞌ Jesus Te Aj Otzaj Kchaꞌoꞌ Kye Xjal Tiꞌj Te Nyaꞌtx Galan Aj Nkyꞌik
1 Ntons, tuj aj tyempji ebꞌajpon txqꞌan xjal tukyꞌi Jesus, bꞌix oxik kyqꞌumaꞌ tetz tiꞌj te Pilat aj txik tkꞌuluꞌ mandad tzan kyqet tkansaꞌ txqꞌan xjal aj Galiley bꞌix te kchikyꞌel oxik samoꞌ tukyꞌi kchikyꞌel kye kyaloꞌ aj nxik tuq kyqꞌapoꞌ te jun present. 2 Ntons te Jesus oxik tqꞌumaꞌ kyetz ikxjani: “¿Titzaꞌ etetz tuj enabꞌl, te aj okyꞌik kyiꞌj kye aj xjalji, okyꞌik tzan tpaj kyetz mas chimol choj-eꞌ kywitz kye txqꞌanky xjal tuj kyamaqꞌ? 3 Wetz oxeꞌl nqꞌumaꞌ etetz, nyaꞌtx. Bꞌix yatzun etetz, qa nlay jaw ekyꞌixpuꞌ enabꞌlin bꞌix nlay kxꞌokslan tiꞌj Qtata Dios, ax etetz okxkamel ikxji. 4 ¿Qatzun etetz tuj enabꞌl, kye aj wajxaqlajuj xjal aj ebꞌajkamik aj tqet tzꞌaqik te jay nim twaꞌlkal kyajsik aj atqet tuq tuj Siloé, qa kyetz mas chimol choj-eꞌ kywitz kye txqꞌanky xjal aj nkyenajan tuq tuj Jerusalen? 5 Wetz oxeꞌl nqꞌumaꞌ etetz, nyaꞌtx. Bꞌix yatzun etetz qa nlay jaw ekyꞌixpuꞌ enabꞌlin ax etetz okxkamel ikxji.”
Te Yekꞌbꞌil Tiꞌj Te Igos Aj Kꞌontiꞌl Twitz
6 Yaji te Jesus oxik tqꞌumaꞌ kyetz ja yekꞌbꞌil ntzani: “Jun xjal awaꞌ tuq titzaꞌ jun wiꞌ igos tuj xtxꞌoꞌotxꞌ bꞌix oxwaꞌq eꞌel tetz qa at tuq twitz te wiꞌ igos per kꞌontiꞌl tuq nijunwt. 7 Ntons tetz oxik tqꞌumaꞌ te taqꞌunon aj nkꞌulun kwent tuq te awalj: “Tzaj achaꞌoꞌ, oxe aqꞌbꞌixiꞌ nkyinꞌul aqꞌbꞌiaꞌ tuj ja awaljni joyol qa at twitz per kꞌontiꞌl, ni jun-el oje tzꞌoknoj witzaꞌ. Ntons intjaw atxꞌemuꞌ chꞌin. ¿Tistil atqet cha perjoder?” 8 Per te aj nkꞌulun kwent tuq te awalj owaj stzaqꞌbꞌeꞌ ikxjani: “Tat, qaltetz. Insten junky aqꞌbꞌichaq, ojawel nqꞌuꞌuꞌ txeꞌ bꞌix oqtex nsiꞌ chꞌin tabonil. 9 Qanq ikxji qanq okajel twitz, qa nlay ntons ojawel txꞌemlet.””
Aj Tqet Tqꞌanaꞌ Jesus Jun Xuj Tuj Qꞌij Ojlaꞌmj
10 Ntons, jun qꞌij ojlaꞌmj te Jesus owox tuj jun jay nabꞌil Dios bꞌix owokten xnaqꞌtzal kye xjal. 11 Bꞌix atqet tuq tzi jun xuj yabꞌ tuq, bꞌix wajxaqlajuj aqꞌbꞌixiꞌ tuq tqetlen yabꞌtik. Jun malspirit ojetq tuq tkꞌuluj tzan tqet txokiꞌ tiꞌj talq bꞌix kꞌontiꞌl tuq nbꞌantik tzan tkaj rekt tzeltiꞌj. 12 Bꞌix te Jesus, ya ma xik teꞌeꞌ, otzaj tukꞌleꞌ bꞌix oxik tqꞌumaꞌ tetz ikxjani: “Xuj, ajnaꞌl yatz maꞌtx chkolpjik tiꞌj te ayabꞌil.” 13 Ntons te Jesus oqet tsiꞌ tqꞌabꞌ tajsik, bꞌix bꞌeyxnajji te xuj okaj rekt tzeltiꞌj bꞌix oqet tjiqꞌbꞌaꞌ Qtata Dios.
14 Per te kꞌulul mandad tuj te jay nabꞌil Dios ojaw qꞌojlik nim tzan tpaj te Jesus oqet tqꞌanaꞌ te xuj tuj aj qꞌijji, komo jun qꞌij ojlaꞌmj tuq, bꞌix oxik tqꞌumaꞌ kyukyꞌi kye xjal ikxjani: “Ateꞌ waqaq qꞌij tzan qaqꞌunan bꞌix peꞌetul tuj aj qꞌijji tzan eqet qꞌanaꞌ bꞌix nyaꞌtx tuj te qꞌij ojlaꞌmj.”* 15 Ntons te Jesus oxik tqꞌumaꞌ tetz ikxjani: “¡Xmeletzꞌ kaꞌr! ¿Tiꞌtzun, kꞌontiꞌl nkyeꞌel epujuꞌ kye ewakaxh qatzun kye ekwayji tuj jun qꞌij ojlaꞌmj tzan kxik eteqꞌiꞌ ukꞌal aꞌ? 16 Yatzun ja xujni, tetz jun tijajil Abran bꞌix tzyuꞌ tuq tzan te Satanas atx wajxaqlajuj aqꞌbꞌixiꞌ. ¿Tiꞌtzun nyaꞌtx petzun galan tuq tzan tkolpjik tuj jun qꞌij ojlaꞌmj?” 17 Ya ma xik tyoliꞌ te Jesus kyaqil ntzani, kye aꞌeꞌ tajqꞌoj eqet kyꞌixwik, per kyaqil kye xjal nkyechalaj tuq tzan tpaj tidiꞌchq nqet tkꞌuluꞌ tuq tukyꞌi nim tajwalil Qtata Dios.
Te Yekꞌbꞌil Tiꞌj Te Tzeꞌ Mostas
18 Yaji te Jesus ax oxik tqꞌumaꞌ ikxjani: “¿Tidiꞌ qukyꞌiꞌl parej te tumeꞌl titzaꞌ nkyekaj kye xjal tuj tqꞌabꞌ Qtata Dios? ¿Tidiꞌ qukyꞌiꞌl bꞌaꞌn tzan tqet nparejsaꞌ? 19 Te nini iktzaꞌ jun tbꞌaqꞌ mostas aj nqex tawaꞌ jun xjal tuj xtxꞌoꞌotxꞌ, nkyꞌibꞌ, nꞌok jun tzeꞌ, bꞌix kye pichꞌ njax kykꞌuluꞌ kyqꞌuꞌ twiꞌ.”
Te Yekꞌbꞌil Tiꞌj Te Malsbꞌil Qꞌotj
20 Yaji te Jesus oxik tqꞌumaꞌ junkyꞌelky ikxjani: “¿Tidiꞌ qukyꞌiꞌl parej te tumeꞌl titzaꞌ nkyekaj kye xjal tuj tqꞌabꞌ Qtata Dios? 21 Te nini iktzaꞌ te malsbꞌil aj nqex tsiꞌ jun xuj tuj oxe malon arin tzan tmal te qꞌotj kyaqil.”
Oj Qokslan Tiꞌj Jesus, Nini Iktzaꞌ Nqoꞌox Tuj Jun Lamel Nekit
22 Ntons, aj ikjaꞌn tuq txik te Jesus tuj Jerusalen, nkyexik txnaqꞌtzaꞌ tuq kye xjal kyuj kye amaqꞌ bꞌix aldey aj jaꞌ tuq nkyꞌik. 23 Tzaj jun xjal, oxik xhchaꞌoꞌ tetz ikxjani: “¿Tat, bꞌanꞌax petzun qa nyaꞌtx kyꞌilaꞌj xjal okyekoletel?” Yaji te Jesus oxik tqꞌumaꞌ ikxjani: 24 “Intok esiꞌ waq ekꞌuꞌj tzan etox tuj te lamel aj nekit. Wetz oxeꞌl nqꞌumaꞌ etetz, kyꞌilaꞌj xjal owelal kyqꞌajabꞌ tzan kyox, per nlay bꞌantik tzan kyox. 25 Oj tkaj tlamoꞌ te tajaw jay te lamel, qa etetz okxkajel jwer, okxꞌokex qꞌolbꞌen bꞌix oxeꞌl-al eqꞌumaꞌ ikxjani: “Tat, intox ajaqoꞌ chꞌin te jay.” Per owelatz tqꞌumaꞌ etetz ikxjani: “Wetz kꞌontiꞌl wotzqiꞌ abꞌl aꞌix.”a 26 Yaji okxꞌaqꞌel etetz tzan txik eqꞌumaꞌ: “Qetza owaꞌana junx awukyꞌiꞌl bꞌix yatz otzaj axnaqꞌtzaꞌna aꞌoꞌ tuj qamaqꞌ.” 27 Per yaji tetz oxeꞌl tqꞌumaꞌ ikxjani: “Wetz maꞌtx xik nqꞌumaꞌ etetz, kꞌontiꞌl wotzqimix. Intel epawaꞌ etibꞌ wiꞌj kyaqil etetz aj aꞌix kꞌulul nyaꞌtx galan.”* 28 Tzi [junjun] te etetz okxꞌoqꞌel bꞌix ma qitxꞌitxꞌin txeꞌ eteꞌ* oj txik eteꞌeꞌ te Abran bꞌix Isak bꞌix Jacob* bꞌix kyaqil kye aj yolil tyol Dios akyeqet tuj tqꞌabꞌ Qtata Dios bꞌix etetz kꞌontiꞌl. 29 Okyeꞌulel xjal aj tzajnaqeꞌ jaꞌchq twitz txꞌoꞌtxꞌ kyaqil,b bꞌix okyeqtel witꞌlet waꞌil tiꞌj mes tukyꞌi Qtata Dios kyukyꞌi kyaqil kye txqꞌanky aj akyeqet tukyꞌiꞌl tuj kaꞌj. 30 Ntons ateꞌ kye aj xtxaꞌmpon okyeꞌokel tbꞌay, yatzun kye aj tbꞌay okyeꞌokel xtxaꞌmpon.”*
Aj Toqꞌ Jesus Tzan Tpaj Aꞌeꞌ Aj Amaqꞌ Jerusalen
31 Ntons aj orji, ax ebꞌajpon junjun aj bꞌuchꞌuj Parisey bꞌix oxik kyqꞌumaꞌ te Jesus ikxjani: “Pax, pawex tuj ja amaqꞌni tzan tpaj te Eródes tgan tzan aqet tkansaꞌ.” 32 Ntons tetz oxik tqꞌumaꞌ ikxjani: “Pex waq tukyꞌiꞌl bꞌix intxik eqꞌumaꞌ ikxjani tukyꞌi te aj ma xhiꞌwl titzaꞌni: “Tzaj awen, ajnaꞌl bꞌix nchiꞌj nkyejatz win malspirit tuj kyanim xjal bꞌix nkyeqet nqꞌanaꞌ kye yabꞌ bꞌix tuj toxiꞌn qꞌij omankuyon waqꞌun.” 33 Per presis tzan nxik tuj nbꞌey ajnaꞌl bꞌix nchiꞌj bꞌix kabꞌj tzan tpaj nlay bꞌantik tzan tkamik jun aj yolil tyol Dios qa nyaꞌtx tuj Jerusalen. 34 ¡Last etetz aj Jerusalen aꞌix! Etetz cha nkyeqet ekansaꞌ kye tlajen Dios bꞌix nkyeꞌok exoꞌoꞌ tukyꞌi abꞌj kye xjal aj tmandader Dios. Wetz kyꞌilaꞌj-el ngan tuq tzan etok nchimoꞌ iktzaꞌ jun paqon nkyeꞌok xhchimoꞌ kye tal tjaqꞌ txikyꞌ, per etetz kꞌontiꞌl ebꞌanij. 35 Te ejay okajel ekolaꞌ bꞌix oxeꞌl nqꞌumaꞌ etetz ya nlay kyinꞌok eten max oj tpon te or oj txik eqꞌumaꞌ wiꞌj ikxjani: “¡Galanx-alo te aj tzul tukyꞌi tbꞌi te Qajawil!””*