Te Tpakbꞌalil Galan Tiꞌj Te Qajaw Jesukrist Aj Oqet Stzꞌibꞌaꞌ Waꞌnch
1
Te Jesukrist Atqet Tuq Atx Aj Bꞌan Oqtxiꞌ Minaꞌ Tuq Tqet Kꞌuluꞌ Kyaqil Aj Nxik Qen
1 Bwen, aj tqet kꞌuluꞌ kyaqil aj nxik qen, Te Aj Swal Tpakbꞌalil [tiꞌj te Qtata Dios] atqetkix tuq, bꞌix tetz atqet tuq tukyꞌi [Qtata] Dios bꞌix tetz Dioskix tuq. 2 Ntons aj tqet kꞌuluꞌ kyaqil, tetz atqetkix tuq tukyꞌi Qtata Dios. 3 Aji tetz oqet kꞌulun kyaqil aj at, kꞌontiꞌl jun tidiꞌ aj nyaꞌtx-wit aji oqet kꞌulun.* 4 A tetz ntzaj sin kyanqꞌin kye xjal bꞌix te nini jun chkꞌatunal tuj kywitz. 5 Te chkꞌatunal npon tnajsaꞌ te qlolj, per te qlolj nlay bꞌantik tzan tpon tnajsaꞌ te chkꞌatunal.
6 Ntons at tuq jun xjal Waꞌnch tbꞌi aj otzaj lajoꞌ tzan Qtata Dios* 7 tzan tyolin aj tebꞌenky tuq tiꞌj te aj ntzaj swan te chkꞌatunal tuj kywitz kye xjal, ikxji tzan txik kyokslaꞌ kyaqil xjal. 8 Te Waꞌnch nyaꞌtx tuq aji tetz aj ntzaj swan te chkꞌatunal tuj qwitz, sinoke lajoꞌ tuq tzan tyolin aj tebꞌenky tuq tiꞌj te aj nswan chkꞌatunal tuj qwitz.
9 Te aj nswan chkꞌatunal bꞌan bꞌanꞌax, tetz owul tzani twitz txꞌoꞌtxꞌ bꞌix nswan chkꞌatunal kye kyaqil xjal. 10 Atqetkix tuq kxol kye xjal, bꞌix anke aji tetz oqet kꞌulun te twitz txꞌoꞌtxꞌ kyaqil, per kye xjal kꞌontiꞌl owel kynikyꞌ tiꞌj abꞌl tuq tetz. 11 Tetz owul kxol txjalil per kꞌontiꞌl oqet kykꞌamoꞌ, [kꞌontiꞌl oxik kyokslaꞌ]. 12 Per kyaqil kye aj ekꞌamon tetz, kye aj eꞌokslan tiꞌj, tetz otzaj tsiꞌ jun kyoklen tzan kyok tkꞌwaꞌal Qtata Dios. 13 Kyetz aꞌeꞌ tkꞌwaꞌal Qtata Dios, nyaꞌtx tzan tpaj nkyeꞌitzꞌjik iktzaꞌx-wit nkyeꞌitzꞌjik kye xjal, bꞌix nyaꞌtx tzan tpaj aj nꞌel kyganiꞌ-wit te kytat, sinoke axk te Qtata Dios otkꞌuluj tzan kyitzꞌjik junkyꞌel tuj kyanim.
14 Te Swal Tpakbꞌalil [Qtata Dios] owok xjal bꞌix onajan qxol, bꞌix oje tzꞌok qen tajwalil, bꞌix tetz tajwalil telponx aꞌox tetz te Tkꞌwaꞌal Stat, bꞌix bꞌan tbꞌanil tuq nabꞌlin bꞌix bꞌanꞌax jun yolin.* 15 Te Waꞌnch nyolin tuq tiꞌj te aj tebꞌenky tuq, oxik tpakbꞌaꞌ ikxjani: “Aj ntzani te xjal aj nkyinyolin tuq tiꞌj aj txik nqꞌumaꞌ, “Te aj tzul mas yaj nwitz wetz, tetz mas nim tajwalil nwitz tzan tpaj tetz atqetkix tuq tbꞌay nwitz wetz.”” 16 Bꞌix tetz ntzaj tsiꞌ qetz jun nim bꞌan galan nyaꞌtx tzan tpaj-wit tbꞌanil aꞌoꞌ sinoke cha jkotz, bꞌix yaji ntzaj tsiꞌ masky. 17 Te Qtata Dios otzaj tsiꞌ te Tkawbꞌil qetz tzan te Moisés, per kyaqil te aj bꞌan galan aj cha jkotz bꞌix te tumeꞌl bꞌanꞌax, tetz otzaj tsiꞌ qetz tzan tpaj te Jesukrist. 18 Nijunwt abꞌl oje tzꞌok en te Qtata Dios, aꞌox te tkꞌwaꞌal aj cha jun tuq bꞌix atqet junchꞌin tukyꞌi Stat, a tetz oje tzaj yekꞌun te Qtata Dios qetz.
Aj Txik Tqꞌumaꞌ Te Waꞌnch Abꞌl Tuq Te Jesukrist
19 Ntons, ikxjani oxik tqꞌumaꞌ te Waꞌnch aj kypon tukyꞌiꞌl txqꞌan pal bꞌix txqꞌan aj bꞌuchꞌuj Lewi lajomeꞌ tzan kye txqꞌanky kꞌulul mandad kxol kye xjal aj tijajil Israel tuj amaqꞌ Jerusalen, bꞌix oxik kyqaniꞌ te Waꞌnch ikxjani: “¿Abꞌl aꞌich?” 20 Yaji tetz owaj stzaqꞌbꞌeꞌ bꞌanꞌax bꞌix kꞌontiꞌl oqet tewaꞌ: “Wetz nyaꞌtx aꞌin te Koloyon Aj Qꞌumankaj Oqtxiꞌ.”a 21 Yaji oxik kchaꞌoꞌ junkyꞌel tetz: “¿Abꞌl yatz aꞌichji? ¿Aꞌich peꞌ yatz Eliys aj yolil tyol Dios oqtxiꞌ?”* Yaji te Waꞌnch owaj stzaqꞌbꞌeꞌ: “Nyaꞌtx aꞌin.” Yaji kyetz oxik kchaꞌoꞌky: “¿Ntons yatz aꞌich te junky aj yolil tyol Dios aj oꞌkix owulel?”* Ntons te Waꞌnch owaj stzaqꞌbꞌeꞌ junkyꞌel: “Nyaꞌtx.” 22 Ntons kyetz oxik kyqꞌumaꞌ junkyꞌel tetz: “¿Abꞌl yatz aꞌichji? Qetza presis tzan txik jqꞌumaꞌ abꞌl yatz aꞌich kyukyꞌi kye aj ma kyetzaj lajon qetza. ¿Tidiꞌ yatz otzajel aqꞌumaꞌ awiꞌjx yatz?” 23 Te Waꞌnch owaj stzaqꞌbꞌeꞌ kyetz: “Wetz aꞌin te jun aj npakbꞌan tuj te kyꞌixkꞌoj txꞌoꞌtxꞌ aj jaꞌ kꞌontiꞌl najayon, iktzaꞌ otqꞌumaj te Chay aj yolil tyol Dios oqtxiꞌ, “Intqet ekꞌuluꞌ etibꞌ tzan tpaj tzul te Qajawil, intjaw ekyꞌixpuꞌ enabꞌlin tzan etiyon tiꞌj te Qajawil.””*
24 Yatzun kye aj exik lajoꞌ yoliyon tukyꞌi Waꞌnch, kyetz aj te bꞌuchꞌuj Parisey, 25 bꞌix oxik kchaꞌoꞌky te Waꞌnch ikxjani: “Qa yatz nyaꞌtx aꞌich te Koloyon Aj Qꞌumankaj Oqtxiꞌ bꞌix qa nyaꞌtx aꞌich te Eliys bꞌix qa nyaꞌtx aꞌich te junky aj yolil tyol Dios, ¿tistil njaw asiꞌ aꞌ kywiꞌ xjal?” 26 Ntons te Waꞌnch owaj stzaqꞌbꞌeꞌ kyetz: “Wetz njaw nsiꞌ aꞌ kywiꞌ xjal cha aꞌox tukyꞌi aꞌ, per exol etetz at jun aj kꞌontiꞌl etotzqiꞌ, 27 bꞌix tzul mas yaj nwitz, bꞌix wetz twitz tetz kꞌontiꞌl npon wajwalil ni iktzaꞌ jun taqꞌunon aj nꞌel tkotpiꞌ twitz txajabꞌ.” 28 Ntons, te ntzani okyꞌik tuj Betany, junxlaꞌ te Jordan Aꞌ aj jaꞌ tuq te Waꞌnch njaw tsiꞌ aꞌ kywiꞌ xjal.
Te Jesus Otzaj Lajoꞌ Tzan Qtata Dios Koloyon Qiꞌj Tiꞌj Te Qchoj
29 Tuj junky iwitq te Waꞌnch oxik ten te Jesus ikjaꞌn tuq tpon laqꞌchet tkꞌatzaj, oxik tqꞌumaꞌ ikxjani: “Intxik eten, aj ntzani te aj otzaj tsiꞌ Qtata Dios tzan tel tin kchoj kyaqil xjal. 30 Tiꞌj tuq tetz nkyinyolin aj txik nqꞌumaꞌ, mas yaj nwitz tzul jun aj mas nim tajwalil nwitz tzan tpaj tetz atqetkix tuq tbꞌay nwitz wetz. 31 Tbꞌay kꞌontiꞌl tuq webꞌen abꞌl tetz, per njaw nsiꞌ aꞌ kywiꞌ kye aj tijajil Israel tzan kyten list oj tok kyen abꞌl tetz.” 32 Te Waꞌnch ax oxik tqꞌumaꞌ ikxjani: “Wetz oxik wen te Txew Dios aj tqetz tuj kaꞌj iktzaꞌ jun palom ikjaꞌn tqetz bꞌix oqet tajsik bꞌix okajten tukyꞌiꞌl. 33 Wetz kꞌontiꞌl tuq webꞌen qa aji tetz, per te Qtata Dios* aj otzaj lajon wetz tzan tjaw nsiꞌ aꞌ kywiꞌ xjal, tetz otzaj tqꞌumaꞌ wetz ikxjani: “Abꞌl te aj oxeꞌl awen te Txew Dios ikjaꞌn tqetz tajsik bꞌix okajel tukyꞌiꞌl, a tetz te oxeꞌl sin Txew Dios tuj kyanim kye xjal.” 34 Wetz oje tzꞌok wen, astilji bꞌaꞌn tzan nyolin aji te Tkꞌwaꞌal Dios.”
Aj Kyel Tjoyoꞌ Jesus Kye Tbꞌay Txnaqꞌatz
35 Tuj junky iwitq te Waꞌnch atqet tuq tzi junkyꞌel tukyꞌi kabꞌeꞌ txnaqꞌatz. 36 Ya ma xik ten te Waꞌnch aj tkyꞌik te Jesus, oxik tqꞌumaꞌ ikxjani: “Intxik eten te aj lajomaj tzan Qtata Dios [iktzaꞌ] te tal moch [chojbꞌil te qchoj].” 37 Yatzun kye kabꞌeꞌ txnaqꞌatz Waꞌnch oxik kchaꞌoꞌ aj txik tqꞌumaꞌ te Waꞌnch, bꞌix eꞌok lapet tiꞌj Jesus. 38 Te Jesus owajtz meltzꞌjik, ya ma tzꞌok ten lapikeꞌ tuq tiꞌj, oxik tqꞌumaꞌ kyetz ikxjani: “¿Tidiꞌ nꞌejoyoꞌ?” Kyetz oxik kyqꞌumaꞌ: “Xnaqꞌtzon, ¿jaꞌ yatz nchnajan?” 39 Te Jesus oxik tqꞌumaꞌ: “Qwaꞌq eꞌel tetz.” Ntons exwaꞌq, bꞌix owok kyen jaꞌ tuq nnajan, bꞌix komo ya ojetq tuq qoꞌok tkajiꞌ or te qaleꞌb ntons kyetz ekajten tzi max aj qyupan. 40 Jun te kyetz aj oxik lapet tiꞌj Jesus bꞌix ojetq tuq tzꞌok xhchaꞌoꞌ aj ntqꞌumaꞌ tuq te Waꞌnch, tetz Lexh tuq tbꞌi, aj terman Simon Xhpeꞌy.* 41 Yaji te Lexh oxwaꞌq joyol te terman, aj Xhpeꞌy, bꞌix oxik tqꞌumaꞌ ikxjani: “Maꞌtx tzꞌok qen te Koloyon Aj Qꞌumankaj Tuq Oqtxiꞌ.” (Oj qyolin “Koloyon Aj Qꞌumankaj Tuq Oqtxiꞌ,” te nini telponx iktzaꞌ “Krist.”) 42 Yaji te Lexh oxik tin najji te terman aj jaꞌ tuq atqet te Jesus. Ya ma xik ten te Jesus, oxik tqꞌumaꞌ ikxjani: “Yatz aꞌich Simon tkꞌajol Waꞌnch, per ajnaꞌl owokel qꞌumlet abꞌi Kefas.”c (Aj tbꞌi Kefas telponx “Xhpeꞌy.”)
43 Ntons, tuj junky iwitq te Jesus oqet tbꞌisuꞌ tzan txik tuj tkwentil Galiley, bꞌix owoknoj te Lip twitz bꞌix oxik tqꞌumaꞌ tetz ikxjani: “Pawok lapet wiꞌj.” 44 Te ja Lipni, tetz aj Betsayd aj jaꞌ tzajnaqeꞌ te Lexh tukyꞌi Xhpeꞌy. 45 Tzaj te Lip, oxwaꞌq joyol te Nat bꞌix oxik tqꞌumaꞌ ikxjani: “Maꞌtx tzꞌoknoj qitzaꞌ te aj tzꞌibꞌankaj tiꞌj tzan Moisés tuj te Kawbꞌil, bꞌix ax aj oqet tzꞌibꞌaꞌ tiꞌj tzan kye aj yolil tyol Dios oqtxiꞌ. A te Jesus aj tkꞌajol Chep aj Nasaret.” 46 Oxik tqꞌumaꞌ te Nat: “¿At petzun jun tidiꞌ galan tuj Nasaret?” Yaji te Lip owaj stzaqꞌbꞌeꞌ: “Qalan eꞌel tetz qa nyaꞌtx bꞌanꞌax.” 47 Ya ma xik ten te Jesus ikjaꞌn tuq stzaj laqꞌchet te Nat tiꞌj, oxik tqꞌumaꞌ ikxjani: “Intxik eten, tzul jun aj tijajil Israel bꞌan bꞌanꞌax aj jun yolin.” 48 Te Nat oxik xhchaꞌoꞌ tetz: “¿Titzaꞌ awotzqiꞌ aꞌin?” Te Jesus owaj stzaqꞌbꞌeꞌ: “Wetz otxik wen tjaqꞌ te wiꞌ igos aj minaꞌ tuq atzaj ukꞌleꞌ tzan Lip.” 49 Te Nat owaj stzaqꞌbꞌeꞌ: “Xnaqꞌtzon, yatz aꞌich Tkꞌwaꞌal Dios, yatz aꞌich te twitzaleꞌ kꞌulul mandad te qamaqꞌ Israel.”* 50 Te Jesus owaj stzaqꞌbꞌeꞌ: “¿Nkyinxik awokslaꞌ tzan tpaj ma xik nqꞌumaꞌ yatz qa ma xhchꞌok wen tjaqꞌ te wiꞌ igos? Per owokel awen txqꞌanky tidiꞌchq aj mas tbꞌanil twitz te ntzani.” 51 Ax oxik tqꞌumaꞌ ikxjani: “Wetz oxeꞌl nqꞌumaꞌ yatz bꞌan bꞌanꞌax, oxeꞌl eten te kaꞌj jaqoꞌ, okyexeꞌl eten kye ángel ikjaꞌn kyjax bꞌix ikjaꞌn kyqetz tajsik te Ichan Aj Tkꞌwaꞌal Dios.”*