24
Aj Tjaw Anqꞌin Te Jesus
1 Yaji tuj junky iwitq tbꞌay qꞌij te saman, bꞌan qꞌeqombwen kyetz ebꞌajxik aj jaꞌ owox muquꞌ te Jesus bꞌix oxik kyin te tkꞌokꞌjal aj ojetq tuq qet kykꞌuluꞌ. 2 Otzaj kykambꞌaꞌ te abꞌj ojetq tuq tzꞌel in twitz te jul muqbꞌil anim, 3 per ya ma kyeꞌox tuj te jul kꞌontiꞌl otzaj kykambꞌaꞌ te txlimal te Jesus aj Qajawil bꞌix ojetq tuq kyetzajbꞌaj, kꞌontiꞌl tuq nꞌel kynikyꞌ tidiꞌ ojetq kyꞌik. 4 Yaji derepent kyjaw kanet kabꞌeꞌ xjal akyeqet tuq kykꞌatzaj, atok tuq kyqꞌanaq bꞌan xhqitzꞌun. 5 Yaji kyetz bꞌan xobꞌnaqeꞌ tuq, bꞌix ebꞌajqet mejlet tukyꞌi tajsik kywitz max twitz txꞌoꞌtxꞌ, per kye kabꞌeꞌ xjal oxik kyqꞌumaꞌ kyetz ikxjani: “¿Tistil etetz nꞌejoyoꞌ tuj jun muqbꞌil anim te aj itzꞌoj? 6 Tetz kꞌontiꞌl atqet tzani, tetz maꞌtx jaw anqꞌin. Instzaj enaꞌoꞌ aj oxik tqꞌumaꞌ etetz aj tzunx tuq atqet tuj Galiley, 7 “Te Ichan Aj Tkꞌwaꞌal Dios presiskix tuq tzan txik qꞌapoꞌ tuj kyqꞌabꞌ kye xjal chimol choj, bꞌix tzan tqet klabiꞌ twitz krus, per tuj toxiꞌn qꞌij ojawelkix anqꞌin.””*
8 Ntons kye xuj otzaj tiktzꞌan tuj kyanim te tyol Jesus aj ojetq tuq xik tqꞌumaꞌ kyetz. 9 Yaji ya ma kyemeltzꞌjik, oxik kyqꞌumaꞌ kyaqil ntzani kye kyjunlajujil tkyꞌixel Jesus, bꞌix kye txqꞌanky aj ajuneꞌ tuq kyukyꞌiꞌl. 10 Kye aj oxik in te tpakbꞌalil kyukyꞌi kye tkyꞌixel Jesus, aꞌeꞌ kye Liy aj Magdála bꞌix Xhwan, bꞌix Liy tnan Jacoboa bꞌix kye txqꞌanky xuj kyukyꞌiꞌl, 11 per tuj kynabꞌl kye tkyꞌixel Jesus bꞌix kye txqꞌanky aj ajuneꞌ tuq kyukyꞌiꞌl, kyetz tuj kynabꞌl cha lokeꞌ tuq bꞌix kꞌontiꞌl tuq nkyokslaꞌ aj nxik kyqꞌumaꞌ.
12 Yaji te Xhpeꞌy oxik oqelan tuj te muqbꞌil anim, bꞌix ya ma tzꞌox ten tuj te jul, kꞌontiꞌl oxik ten tidiꞌ sinoke aꞌox tuq kye xqꞌapj aj owok bꞌatzꞌoꞌ tiꞌj Jesus. Yaji omeltzꞌjik aj jaꞌ tuq ateꞌ kye txqꞌanky bꞌix kꞌontiꞌl owel stziꞌ tzan tpaj kyaqil aj ojetq tuq kyꞌik.
Aj Tjaw Kanet Jesus
13 Axkix aj qꞌijji kabꞌeꞌ kye txnaqꞌatz ikjaꞌn tuq kxik tuj [aldey] Emaus nkaj tuq qanq kabꞌlajuj kilómetrb tiꞌj Jerusalen. 14 Kyetz nkyeyolin tuq tiꞌj kyaqil aj ojetq tuq kyꞌik. 15 Aj man tuq nkyeyolin bꞌix tidiꞌchq tuq ntzaj kynaꞌoꞌ, te Jesus owok laqꞌchet kykꞌatzaj bꞌix oxik junchꞌin kyukyꞌiꞌl. 16 Anke kyetz nꞌok tuq kyeꞌeꞌ, per kꞌontiꞌl obꞌantik tel kynikyꞌ abꞌl tuq tetz.
17 Yaji te Jesus oxik xhchaꞌoꞌ kyetz ikxjani: “¿Tidiꞌ nꞌeyoliꞌ etetz?” Ntons ebꞌajqet waꞌlet bꞌix bꞌan bꞌis tuq kywitz. 18 Yaji jun te kyetz aj tbꞌi Kliops oxik tqꞌumaꞌ ikxjani: “¿Tiꞌtzun kxol kyaqil kye aj kxbꞌakꞌon tuj Jerusalen, aꞌox yatz aꞌich minaꞌ tok achaꞌoꞌ aj okyꞌik ja samanni?” 19 Yaji tetz oxik xhchaꞌoꞌ kyetz: “¿Tidiꞌ okyꞌik?” Yaji kyetz oxik kyqꞌumaꞌ ikxjani: “Aj okyꞌik tiꞌj te Jesus aj Nasaret, tetz jun aj yolil tyol Dios tuq, at tuq nim tajwalil tzan tkꞌulun tidiꞌchq bꞌix kyaqil te tyol bꞌan galan tuq tuj twitz Qtata Dios bꞌix ax tuj kywitz kye xjal. 20 Bꞌix kye pal aj nim kyajwalil bꞌix kye tijxjal kꞌulul mandad qxol, kyetz oxik kyqꞌapoꞌ [tuj tqꞌabꞌ te gobernador] tzan txik qꞌumaꞌ tzan tkamik bꞌix tzan tqet klabiꞌ twitz krus. 21 Qetza loꞌik tuq jkꞌuꞌj tetz aji tuq te aj okolpiyon kye qxjalil aj tijajil Israel. Bꞌix kabꞌeje okyꞌik kyaqil nini. 22 Bꞌix yaji junjun xuj aj akyeqet qukyꞌila ma qoꞌok kxobꞌsaꞌna. Kyetz ma kyexwaꞌtz bꞌan qꞌeqombwen tuj te muqbꞌil anim, 23 kꞌontiꞌl ma tzaj kykꞌulbꞌaꞌ te txlimal, ntons ma kyemeltzꞌjik bꞌix ma kyqꞌumaj ma tzꞌok kyeꞌeꞌ txqꞌan ángel aj ma kyqꞌumaj qa tetz itzꞌoj. 24 Bꞌix junjunky qukyꞌila ma kyexwaꞌtz tuj te muqbꞌil anim bꞌix ma tzaj kykꞌulbꞌaꞌ iktzaꞌx kye xuj ma kyqꞌumaj, per kꞌontiꞌl ma tzꞌok kyen te Jesus.”
25 Ntons, yaji tetz oxik tqꞌumaꞌ kyetz ikxjani: “¡Etetz bꞌan kꞌontiꞌl nꞌox tuj ewiꞌ, bꞌix pen nꞌetokslaꞌ te aj okyqꞌumaj kye aj yolil tyol Dios oqtxiꞌ! 26 ¿Nyaꞌtx petzun presis tuq tzan tkyꞌik kyaqil nini tiꞌj te Koloyon Aj Qꞌumankaj Oqtxiꞌ bꞌix tzan tox tuj kaꞌj tzan tqet jiqꞌbꞌaꞌ txini?” 27 Yaji tetz nꞌaqꞌik tuq tukyꞌi stzꞌibꞌen Moisés, bꞌix yaji kyukyꞌi ktzꞌibꞌen kye txqꞌanky aj yolil tyol Dios oqtxiꞌ, nxik tuq tqꞌumaꞌ xtxolil te Tuꞌjal Dios aj jaꞌ tuq nyolin tiꞌjx tetz.
28 Ya ma kyepon tuj te aldey aj jaꞌ tuq ikjaꞌn kxik, te Jesus oqet tkꞌuluꞌ iktzeꞌxtzun tetz ikjaꞌn tuq txik mas laqꞌchik. 29 Per kyetz oqet kywitz twitz tzan tkaj tuq kyukyꞌiꞌl, oxik kyqꞌumaꞌ ikxjani: “Pakaj qukyꞌila. Bꞌan qaleꞌky ajnaꞌl tzan axik tuj abꞌey. Chꞌinky qyupan.” Ntons te Jesus okaj kyukyꞌiꞌl. 30 Ntons ya ma kyeqet witꞌlet tiꞌj mes waꞌil, te Jesus ojaw stzyuꞌ te jun wabꞌj tuj tqꞌabꞌ bꞌix ya ma xik tsiꞌ pixon te Dios, oqet tpedasiꞌ bꞌix oxik tsiꞌ kyetz. 31 Bꞌeyxnajji kyetz owel kynikyꞌ, aji tuq te Jesus, per tetz luwew oqet naj. 32 Bꞌix nkyyoliꞌ tuq kyibꞌkyibꞌx ikxjani: “¿Kꞌontiꞌl petzun bꞌan nqochalaj tuq tuj qanim aj stzaj tqꞌumaꞌ xtxolil tiꞌj te Tuꞌjal Dios?”
33 Yaji kyetz bꞌeyxnajji ebꞌajmeltzꞌjik tuj Jerusalen, aj jaꞌ otzaj kykambꞌaꞌ chimoꞌ tuq kyibꞌ kye kyjunlajujil kye tkyꞌixel Jesus bꞌix txqꞌanky aj kyukyꞌiꞌl tuq, 34 bꞌix nkyeyolin tuq ikxjani: “Bꞌanꞌax te Qajawil maꞌtx jaw anqꞌin bꞌix maꞌtx jaw kanet twitz Simon.”
35 Ntons kyetz kykabꞌil oxik kyqꞌumaꞌ kyaqil aj ojetq tuq kyꞌik kyiꞌj tuj bꞌey bꞌix titzaꞌ owel kynikyꞌ tiꞌj Jesus aj tqet tpedasiꞌ te wabꞌj.
Aj Tjaw Kanet Jesus Kxol Txnaqꞌatz
36 Man tuq nkyeyolin tiꞌj kyaqil ntzani, aj tjaw kanet te Jesus kxol bꞌix oqet ten ninkꞌajchaq kxol bꞌix exik tlimaꞌ ikxjani: “Tzꞌokxwit jun chewsbꞌil tuj etanim.” 37 Yaji kyetz etzajbꞌaj bꞌix ebꞌajxobꞌ nim. Kyetz tuj kynabꞌl tuq qa nxik kyen tuq jun tanim xjal. 38 Per yaji te Jesus oxik tqꞌumaꞌ kyetz ikxjani: “¿Tistil etetz nkxobꞌ? Bꞌix ¿tistil nnaꞌnon etanim? 39 Instzaj eten kye nqꞌabꞌ bꞌix kye woq. ¡Aꞌinxkix wetz! Kyinꞌok eten, kyinꞌok emakoꞌ peꞌ. Jun tanim xjal kꞌontiꞌl xhchiꞌjel bꞌix kꞌontiꞌl tbꞌaqil iktzaꞌ wetz nchiꞌjel aj nꞌok etenni.” 40 Ya ma xik tqꞌumaꞌ ikxji oxik tyekꞌuꞌ kyetz kye tqꞌabꞌ bꞌix kye toq. 41 Bꞌix komo kyetz kꞌontiꞌl tuq nbꞌantik tzan kyokslan, bꞌan nkyechalaj tuq bꞌix bꞌan nkyelabꞌan tuq, ntons te Jesus oxik tqꞌumaꞌ kyetz ikxjani: “¿At wabꞌj tzan nwaꞌan chꞌin?” 42 Ntons oxik ksiꞌ tetz jun pedas xhchiꞌ kyiy txꞌamsaꞌ tuq tuj txanqꞌaꞌl. 43 Yaji tetz okyꞌik tkꞌamoꞌ bꞌix oxik twaꞌaꞌ kywitz kyaqil.
Aj Kykaj Tkawiꞌ Jesus Kye Txnaqꞌatz
44 Yaji oxik tqꞌumaꞌ kyetz ikxjani: “Aj maꞌtx kyꞌik wiꞌjni, iktzaꞌxkix aj oxik nqꞌumaꞌ etetz aj tzunx tuq akyinqet etukyꞌiꞌl, presiskix tuq tzan tkyꞌik kyaqil iktzaꞌxkix tzꞌibꞌankaj wiꞌj tuj te Kawbꞌil aj oqet tzꞌibꞌaꞌ tzan Moisés, bꞌix kyuj kye ktzꞌibꞌen kye aj yolil tyol Qtata Dios oqtxiꞌ bꞌix kyuj Kye Salmo.”
45 Ntons, yaji otkꞌuluj tzan tel kynikyꞌ titzaꞌ tuq nyolin te Tuꞌjal Dios, 46 oxik tqꞌumaꞌ kyetz ikxjani: “Tzꞌibꞌankaj* [wiꞌj wetz] te Koloyon Aj Qꞌumankaj Oqtxiꞌ, presiskix tuq tzan tok wen twitz xhchoꞌnal, bꞌix tuj toxiꞌn qꞌij tzan njaw anqꞌinky kxol kye kamnaq, 47 bꞌix kye aj nkyeꞌokslan wiꞌj oxeꞌl kypakbꞌaꞌ tuj kyaqil Jerusalen bꞌix yaji tuj kyaqil amaqꞌ twitz txꞌoꞌtxꞌ tzan tjaw kkyꞌixpuꞌ kye xjal titzaꞌ kynabꞌlin bꞌix tzan tqet najsaꞌ kyaqil te kchoj. 48 Etetz maꞌtx tzꞌok eteꞌeꞌ kyaqil aj maꞌtx kyꞌikni. 49 Bꞌix wetz otzajel nlajoꞌ etukyꞌiꞌl te aj okaj tsiꞌ tyol te Ntat tiꞌj. Per etetz peꞌeqeten ax tzani tuj te amaqꞌ Jerusalen max oj stzaj siꞌ te etajwalil aj tzajnaq tuj kaꞌj.”*
Aj Tjaw In Jesus Tuj Kaꞌj
50 Yaji te Jesus eꞌex tin tzi, ebꞌajxik teqꞌiꞌ qaynin tiꞌj te amaqꞌ Betany, bꞌix yaji ojaw teqꞌiꞌ tqꞌabꞌ tzan kyqet tkyꞌiwlaꞌ. 51 Bꞌix aj man tuq nkyeqet tkyꞌiwlaꞌ, tetz ojaw eqꞌiꞌ twitz kaꞌj. 52 Ntons kyetz ya ma mankun kynaꞌon tetz, ebꞌajmeltzꞌjikky tuj Jerusalen, bꞌan nkyechalaj tuq. 53 Kyetz bꞌajqꞌij akyeqet tuq tuj te Nin Jay Nabꞌil Qtata Dios, aj jaꞌ tuq nkyenaꞌon te Qtata Dios.