28
Aj Tjaw Anqꞌin Te Jesus
1 Ya ma kyꞌik te qꞌij ojlaꞌmj, aj ikjaꞌn tuq stzaj txekaꞌj tuj te tbꞌay qꞌij tuj aj samanji, te Liy aj Magdála bꞌix te junky Liy ebꞌajxik eꞌel te muqbꞌil anim. 2 Yaji derepent otzaj jun kabꞌjunabꞌ bꞌan jwert tzan tpaj jun ángel aj lajoꞌ tzan Qajawil oqetz tuj kaꞌj bꞌix owok laqꞌchet tiꞌj te muqbꞌil anim bꞌix owel tpelqꞌuꞌ te abꞌj stziꞌ bꞌix oqet witꞌlet tajsik te abꞌj. 3 Te ángel [bꞌan ntxaqtxon tuq] iktzaꞌ jun xhlikyꞌlikaꞌj bꞌix te tqꞌanaq bꞌan saq tuq iktzaꞌ te saqsbꞌaqon. 4 Ya ma xik kyeꞌeꞌ kye soldad te ángel, kyetz oje kyeluꞌlun tzan kxobꞌal, bꞌeyx owaj eqꞌiꞌ kynabꞌl.a 5 Yaji te ángel oxik tqꞌumaꞌ kyukyꞌiꞌl kye xuj ikxjani: “Kꞌon kxobꞌ. Wetz webꞌen etetz nkxjoyon tiꞌj Jesus aj owok klabiꞌ twitz krus. 6 Tetz kꞌontiꞌl atqet tzani sinoke maꞌtx jaw anqꞌin iktzaꞌx otqꞌumaj. Qalan waq eꞌel tetz aj jaꞌ oqet siꞌ. 7 Pex waq kare, bꞌix intxik eqꞌumaꞌ kye txnaqꞌatz ikxjani: “Maꞌtx jaw anqꞌin bꞌix opoyon tuj Galiley tbꞌay ewitz etetz, bꞌix tzi owokel eten.” Tzaj eten, maꞌtx xik nqꞌumaꞌ etetz.” 8 Ntons, kye xuj bꞌeyxnajji ebꞌajꞌex kare tzi, per tukyꞌi kxobꞌal bꞌix nkyechalaj tuq, bꞌix ebꞌajxik oqelan qꞌumal te tpakbꞌalil kyukyꞌi kye txnaqꞌatz. 9 Derepent tjaw kanet te Jesus kywitz bꞌix exik tlimaꞌ. “¡Jeꞌky!” Bꞌix kyetz ebꞌajꞌok laqꞌchet tiꞌj bꞌix eqet mejlet twitz max txetoq, otzaj kcheleꞌ kye toq bꞌix enaꞌon tetz. 10 Yaji tetz oxik tqꞌumaꞌ kyetz ikxjani: “Kꞌon kxobꞌ. Pex waq qꞌumal kyukyꞌi kye werman tzan kypon tuj Galiley bꞌix tzi okyinꞌokel kyen.”
Tidiꞌ Oxik Kyqꞌumaꞌ Kye Soldad
11 Ntons aj man tuq ikjaꞌn kyaj kye xuj, junjun soldad aj nkyexbꞌuqin tuq ebꞌajxik tuj te amaqꞌ bꞌix oxik kyqꞌumaꞌ kyukyꞌi kye pal aj nim kyajwalil kyaqil aj ojetq tuq kyꞌik. 12 Ntons kye pal aj nim kyajwalil ebꞌajxwaꞌq yoliyon kyukyꞌi kye tijxjal aj nim kyajwalil tzan tuq kykawlan kyukyꞌiꞌl. Yaji oxik ksiꞌ nim tmin kyukyꞌi kye soldad 13 bꞌix oxik kyqꞌumaꞌ kyetz ikxjani: “Etetz intxik eqꞌumaꞌ ikxjani: “Qonikꞌan aj man tuq nqowitan, kye txnaqꞌatz ebꞌajpon bꞌix oxik kyelqꞌaꞌ te txlimal.” 14 Bꞌix qa te kꞌulul mandad owokel xhchaꞌoꞌ tiꞌj kyaqil ntzani, qetza oqoyoliyona tukyꞌiꞌl bꞌix kꞌontiꞌl tidiꞌ okyꞌel etetz etiꞌj.” 15 Ntons kye soldad okyꞌik kykꞌamoꞌ te tmin bꞌix oqet kykꞌuluꞌ iktzaꞌx aj ojetq tuq xik qꞌumaꞌ kyetz. Bꞌix tzunx ajnaꞌl ikxji nqꞌumjik kxol kye aj tijajil Israel.
Aj Okaj Tqꞌumaꞌ Jesus Tzan Qpakbꞌan Tyol Kxol Kyaqil Xjal
16 Ntons kye kyjunlajujil txnaqꞌatz te Jesus ebꞌajxik Galiley twiꞌ te witz aj ojetq tuq xik tqꞌumaꞌ te Jesus kyetz. 17 Bꞌix ya ma tzꞌok kyen te Jesus, kyetz enaꞌon tetz, per junjun nnaꞌnon tuq kyanim. 18 Ntons te Jesus owok laqꞌchet kyiꞌj bꞌix oxik tqꞌumaꞌ kyetz ikxjani: “[Te Qtata Dios] oje tzaj tsiꞌ wajwalil tiꞌj kyaqil aj at tuj kaꞌj bꞌix tiꞌj kyaqil aj at twitz txꞌoꞌtxꞌ. 19 Astilji pex waq kxol kyaqil kyijajil xjal twitz txꞌoꞌtxꞌ, bꞌix inkxik exnaqꞌtzaꞌ tzan kyokslan wiꞌj; bꞌix intjaw esiꞌ aꞌ kywiꞌ tukyꞌi tbꞌi te Qtat bꞌix tukyꞌi nbꞌi [wetz aj] Tkꞌwaꞌal [aꞌin] bꞌix tukyꞌi tbꞌi te Txew,* 20 bꞌix inkxik exnaqꞌtzaꞌ tzan tqet kyokslaꞌ kyaqil aj maꞌtx xik nqꞌumaꞌ etetzni. Bꞌix wetz okyinqtelten etukyꞌiꞌl kyaqil qꞌij maxkix oj tul te jwisy.”