27
Aj Txik Qꞌapoꞌ Jesus Tuj Tqꞌabꞌ Te Pilat
1 Ya ma qojaw saqxikan, kkyaqil kye pal aj nim kyajwalil bꞌix kye tijxjal aj nim kyajwalil kxol kye tijajil Israel, kyetz owok kchimoꞌ kyibꞌ tzan tqet kybꞌisuꞌ titzaꞌ tzan tqet kansaꞌ te Jesus. 2 Oxik kykꞌaloꞌ bꞌix oxik kyqꞌapoꞌ tuj tqꞌabꞌ te Pilat aj kꞌulul mandad.
Aj Tkamik Te Judas Iskaryot
3 Ntons, yatzun te Juds aj ojaw meltzꞌjik tiꞌj Jesus, ya ma tzꞌok ten ojetq tuq xik kyqꞌumaꞌ tzan tkamik te Jesus, yaji otzaj tnaꞌonky tetz bꞌix owaj tswaꞌ junkyꞌel te lajuj tuj kawnaq (30) tmin xtxꞌotxꞌal plat kyukyꞌi kye pal aj nim kyajwalil bꞌix kye tijxjal. 4 Oxik tqꞌumaꞌ kyetz ikxjani: “Wetz maꞌtx kyinjoyon choj, maꞌtx xik nqꞌapoꞌ tzan tqet kansaꞌ jun xjal aj kꞌontiꞌl tpaj.” Per yaji kyetz owaj ktzaqꞌbꞌeꞌ ikxjani: “¿Qetza tidiꞌ qoklen? ¡Te nini aꞌichx maꞌ chqet bꞌisun tetz!” 5 Ntons te Juds oxik tslabꞌuꞌ te tmin tuj te Nin Jay Nabꞌil Qtata Dios,* bꞌix yaji owex tzi, oxik bꞌix ojaw tyobꞌaꞌ tibꞌ. 6 Yaji kye pal aj nim kyajwalil ojaw kchimoꞌ te tmin bꞌix okyqꞌumaj ikjani: “Xjan qa oqtex qsiꞌ ja tminni tuj te tqatel tmin te Nin Jay Nabꞌil Qtata Dios tzan tpaj ja ntzani twiꞌ tkamlen jun xjal.” 7 Ntons ya ma qet kybꞌisuꞌ tiꞌj, owoken kyitzaꞌ tzan tqet kyloqꞌoꞌ jun txꞌoꞌtxꞌ aj tbꞌi “Te Xtxꞌoꞌotxꞌ te Tzꞌaqol,” tzan tuq token te txꞌoꞌtxꞌ te jun luwar aj jaꞌ tzan kyqex muquꞌ kye aj laqꞌchik xjal aj okyekamel tzi. 8 Astilji te aj txꞌoꞌtxꞌji tzunx ajnaꞌl tbꞌi “Te Txꞌoꞌtxꞌ Telel Kyikꞌ.”* 9 Ikxji oponkix iktzaꞌx otqꞌumaj te Jeremiy aj yolil tyol Dios oqtxiꞌ: “Ojaw ktzyuꞌ te lajuj tuj kawnaq (30) tmin xtxꞌotxꞌal plat, te twibꞌen te aj ojetq tuq tzꞌok ksiꞌ kye aj tijajil Israel. 10 Tukyꞌi aj tminji okaj kyloqꞌoꞌ te txꞌoꞌtxꞌ aj tbꞌi Te Xtxꞌoꞌotxꞌ te Tzꞌaqol, iktzaꞌx otzaj tkꞌuluꞌ mandad te Qajawil te wetz.”*
Aj Tpon In Jesus Twitz Te Pilat
11 Ntons te Jesus atqet tuq twitz te kꞌulul mandad bꞌix te kꞌulul mandad oxik xhchaꞌoꞌ tetz ikxjani: “¿Aꞌich peꞌ yatz te Twitzaleꞌ Kꞌulul Mandad kyiꞌj kye aj tijajil Israel?” Yaji oxik tqꞌumaꞌ te Jesus ikxjani: “Ikxji iktzaꞌx maꞌtx tzaj aqꞌumaꞌni.” 12 Ntons kye pal aj nim kyajwalil bꞌix kye tijxjal nxik tuq kyqꞌumaꞌ til te Jesus, per tetz kꞌontiꞌl tuq tidiꞌ ntqꞌumaꞌ. 13 Astilji te Pilat oxik xhchaꞌoꞌ tetz ikxjani: “¿Tiꞌtzun, kꞌontiꞌl nꞌachaꞌoꞌ aj ntzaj kyqꞌumaꞌ awiꞌj yatzni?” 14 Per te Jesus kꞌontiꞌl owaj stzaqꞌbꞌeꞌ chꞌinwt, astilji te kꞌulul mandad tetz oje labꞌan.
15 Ntons, tuj te ninqꞌij, te kꞌulul mandad naqꞌik tuq tzan txik stzoqpiꞌ jun aj pres, aj kygan tuq kye xjal. 16 Ntons at tuq jun aj pres bꞌan chaꞌoꞌ tuq tiꞌj tzan xjal, tbꞌi Barabas. 17 Aj chimoꞌ tuq kyibꞌ tzi, te Pilat oxik xhchaꞌoꞌ kyetz ikxjani: “¿Abꞌl egan etetz tzan txik ntzoqpiꞌ? ¿Egan peꞌ tzan txik ntzoqpiꞌ te Barabas qatzun te Jesus aj nꞌeqꞌumaꞌ te Koloyon Aj Qꞌumankaj Oqtxiꞌji?” 18 [Oxik tqꞌumaꞌ ikxjani] tzan tpaj ojetq tuq tzꞌel tnikyꞌ, oxik qꞌapoꞌ tuj tqꞌabꞌ tzan tpaj cha nkyeꞌekꞌawin tuq tiꞌj.* 19 Aj man tuq witꞌliqet te Pilat tuj tdespach. Te txuꞌjel oxik tlajoꞌ jun qꞌumaltetz tukyꞌiꞌl ikxjani: “Kꞌon tzꞌox asamoꞌ awibꞌ tukyꞌi ja xjalni, tetz kꞌontiꞌl til, bꞌix nim nkyinbꞌisun tzan tpaj jun nwitzikꞌ tiꞌj tetz maꞌin qonikꞌan.” 20 Per kye pal aj nim kyajwalil bꞌix kye tijxjal aj nim kyajwalil, kyetz oxik kykubꞌsaꞌ kykꞌuꞌj kye xjal tzan txik kyqaniꞌ tukyꞌi te kꞌulul mandad tzan txik stzoqpiꞌ tuq te Barabas bꞌix tzan tqet kansaꞌ tuq te Jesus. 21 Yaji te kꞌulul mandad oxik xhchaꞌoꞌ junkyꞌel kyetz ikxjani: “¿Abꞌl jun te kyetz egan tzan txik ntzoqpiꞌ?” Yaji kyetz owaj ktzaqꞌbꞌeꞌ: “¡Te Barabas!” kyekyi. 22 Yaji te Pilat oxik xhchaꞌoꞌ kyetz ikxjani: “¿Tidiꞌ nkꞌuluꞌtz tukyꞌi te Jesus aj nꞌok qꞌumaꞌ te Koloyon Aj Qꞌumankaj Oqtxiꞌ?” Yaji kkyaqil owajtz ktzaqꞌbꞌeꞌ ikxjani: “¡Intqet klablet tiꞌj krus!” 23 Yaji te Pilat oxik tqꞌumaꞌ kyetz ikxjani: “¿Tidiꞌ te nyaꞌtx galan aj maꞌtx tkꞌuluj?” Per kkyaqil kyetz ebꞌajjaw sikyꞌin junkyꞌel kongan ikxjani: “¡Intqet klablet tiꞌj krus!” 24 Ya ma tzꞌok ten te Pilat, kꞌontiꞌl tuq nꞌok ksiꞌ kywiꞌ tiꞌj, sinoke cha mas tuq nkyejaw labꞌun, ntons tetz owel xtxꞌajoꞌ tqꞌabꞌ kywitz kkyaqil aj telponx kꞌontiꞌl tuq tetz tpaj, bꞌix oxik tqꞌumaꞌ ikxjani: “Wetz kꞌontiꞌl webꞌen qa ma kamik ja xjal ntzani aj kꞌontiꞌl tpaj. Aꞌix etetz eꞌel tetz.” 25 Kkyaqil kye xjal owaj ktzaqꞌbꞌeꞌ ikxjani: “Qetza bꞌix kye jkꞌwaꞌalna aꞌoꞌna eꞌel tetz qa ma kamik.” 26 Ntons te Pilat okaj stzoqpiꞌ te Barabas bꞌix ya ma qet jubꞌchaꞌ te Jesus, oxik tqꞌapoꞌ [tuj kyqꞌabꞌ kye soldad] tzan tuq tqet kyklabiꞌ twitz krus.
27 Ntons kye soldad aj nkyeꞌaqꞌunan tuq te kꞌulul mandad oxik kyin te Jesus tuj kyjayx bꞌix kyukyꞌi kyaqil kye txqꞌanky soldad owok kchimoꞌ kyibꞌ tiꞌj. 28 Owel kyin te tqꞌanaq bꞌix owok ksiꞌ junky tqꞌanaq xluj bꞌix kyaq tebꞌl [iktzaꞌ tqꞌanaq jun twitzaleꞌ kꞌulul mandad] 29 bꞌix ojax ksiꞌ tuj twiꞌ jun koron xpatxꞌiꞌ pur kyꞌiꞌx tuq bꞌix oxik ksiꞌ jun tzeꞌ suꞌan tuj tbꞌanqꞌabꞌ. Yaji ebꞌajqet mejlet twitz, nkyexmayin tuq tiꞌj, oxik tqꞌumaꞌ ikxjani: “¡Jeꞌky tat, yatz te Twitzaleꞌ Kꞌulul Mandad kxol kye aj Tijajil Israel!” 30 Bꞌix ax nꞌok tuq ktzubꞌaꞌ tiꞌj bꞌix tukyꞌixkix te tzeꞌ nꞌok tuq kymajuꞌ tiꞌj twiꞌ. 31 Ya ma tzꞌok kxmayiꞌ ikxji, owel kyin te tqꞌanaq kyaq tebꞌl, bꞌix owok ksiꞌ te tqꞌanaqx bꞌix oxik kyeqꞌiꞌ tzan tuq tqet kyklabiꞌ twitz krus.
Aj Tqet Klabiꞌ Te Jesus Twitz Krus
32 Aj ikjaꞌn tuq kxik, owok kykꞌulbꞌaꞌ jun xjal tbꞌi Simon, aj Siren tuq, bꞌix oxik kyin alajwers tzan txik tiqaꞌ tuq tkurus te Jesus.
33 Ntons, ebꞌajpon tuj jun luwar aj tbꞌi Gólgota, aj tbꞌi telponx iktzaꞌ “Te Tbꞌaqil Twiꞌ Xjal.” 34 Yaji oxik ksiꞌ te Jesus jun tukꞌaꞌ taꞌal ub samoꞌ tuq tukyꞌi jun kꞌul yel tbꞌi, per te Jesus ya ma xik tnikyꞌbꞌeꞌ, ya kꞌontiꞌl oxik tukꞌaꞌ.
35 Ya ma tzꞌok kyklabiꞌ twitz krus, kye soldad oqet ksaqchbꞌilaꞌ loteriy tiꞌj tqꞌanaq aber abꞌl tuq oxeꞌl eqꞌin tetz.* 36 Yaji ebꞌajqet witꞌlet tzi tzan tqet tuq kxbꞌuqiꞌ. 37 Bꞌix jawnaq tuj twiꞌ owok ksiꞌ jun yol aj nyolin tistil tuq ojetq tzꞌok klabiꞌ, nyolin tuq ikxjani: Aj ntzani te Jesus te twitzaleꞌ kꞌulul mandad kxol kye aj tijajil Israel. 38 Bꞌix ax tukyꞌiꞌl tetz eꞌok klabiꞌ twitz krus kabꞌeꞌ eleqꞌ, jun owok klabiꞌ tiꞌj jun krus tuj tbꞌanqꞌabꞌ bꞌix junky tiꞌj junky krus tuj tsurt.
39 Kye xjal aj nkyekyꞌik tuq tzi nkyeyolin tuq nyaꞌtx galan tiꞌj, njaw tuq kyyakꞌuꞌ kywiꞌ* 40 bꞌix nxik tuq kyqꞌumaꞌ ikxjani: “Yatz oxik aqꞌumaꞌ bꞌaꞌn tzan tqet axituꞌ te Nin Jay Nabꞌil Qtata Dios bꞌix yaji tzan tjaw akꞌuluꞌ junkyꞌel tuj toxiꞌn qꞌij,* ajnaꞌl pakolonx awibꞌx najji. ¡Qa yatz aꞌich Tkꞌwaꞌal Dios,* paqetz tiꞌj te krus najji!” 41 Bꞌix ax tuq kye aj pal aj nim kyajwalil bꞌix kye xnaqꞌtzal Kawbꞌil bꞌix kye tijxjal kxol kye aj tijajil Israel, kyetz nkyqꞌumaꞌ tuq ikxjani: 42 “Tetz okolon kyiꞌj txqꞌanky per tiꞌjx tetz kꞌontiꞌl nbꞌantik tzan tkolon. [Qa bꞌanꞌax] tetz te twitzaleꞌ kꞌulul mandad qiꞌj qetz aj tijajil Israel aꞌoꞌ, ntons intqetznajji bꞌix ikxji oqoꞌokslayon tiꞌj. 43 Tetz witꞌlik tkꞌuꞌj tiꞌj Qtata Dios, ntons intkolonnajji te Qtata Dios tiꞌj, qa bꞌanꞌax te Qtat nqet tganiꞌ tetz. ¿Kꞌontiꞌl petzun otzaj tqꞌumaꞌ qa tetz aji te Tkꞌwaꞌal Dios?”* 44 Bꞌix ax tuq kye eleqꞌ aj klabimeꞌ tuq tzi tukyꞌiꞌl, kyetz nkyeꞌilin tuq tiꞌj.
45 Ntons, atx aj man tuq chijqꞌij atoꞌ max aj ojetq qopon te toxiꞌ or te qaleꞌ, kyaqil te twitz txꞌoꞌtxꞌ owok bꞌan qlolj. 46 Bꞌeyx tuj aj orji te Jesus ojaw sikyꞌin kongan ikxjani: “Eli, Eli ¿lama sabaktani?” Te nini telponx “Tata Dios, Tata Dios, ¿tistil maꞌtx kyinkaj akolaꞌ?”* 47 Junjun kye aj akyeqet tuq tzi oxik kchaꞌoꞌ te aj oxik tqꞌumaꞌ bꞌix okyyolij ikxjani: “Tetz nqꞌolbꞌen tiꞌj Eliys aj tlajen Dios oqtxiꞌ.” 48 Yaji jun te kyetz oxik naj oqelan joyol jun esponj, bꞌix oqex tmuꞌuꞌ tuj minagr bꞌix oqet tkꞌaloꞌ twiꞌ jun suꞌan bꞌix owok tlaqꞌbꞌaꞌ tuj stziꞌ te Jesus tzan tuq txik stzꞌubꞌaꞌ.* 49 Per kye junjunky okyqꞌumaj ikxjani: “Qaltetzchaq, aber qa tzul te Eliys koloyon tiꞌj.”
50 Yaji te Jesus ojaw sikyꞌin junkyꞌel kongan bꞌix yaji okamik.* 51 Tuj aj ratji te nim mant [pawbꞌil]* tuj te Nin Jay Nabꞌil Qtata Dios oqet laqik ninkꞌajchaq, otzaj max twiꞌ max twitz txꞌoꞌtxꞌ, 52 bꞌix okyꞌik jun kabꞌjunabꞌ bꞌix kye nim abꞌj ebꞌajqet kabꞌin bꞌix kye pantyon ejaqet, bꞌix kyꞌilaꞌj qermana aj ojetq tuq kyekamik ebꞌajjaw anqꞌin junkyꞌel. 53 Ebꞌajꞌetz tuj kypantyon bꞌix ya ma jaw anqꞌin te Jesus [tuj toxiꞌ qꞌij], kyetz ebꞌajꞌox tuj te [Jerusalen], aj amaqꞌ aj pawaꞌ te Qtata Dios, bꞌix tzi eꞌok eꞌeꞌ tzan kyꞌilaꞌj xjal. 54 Bꞌix yatzun te kꞌulul mandad kye soldad bꞌix kyaqil kye soldad aj akyeqet tuq tzi nkyexbꞌuqin tuq te Jesus, kyetz ya ma xik kyen te kabꞌjunabꞌ bꞌix kyaqil aj nkyꞌik tuq, kyetz ebꞌajxobꞌ nim bꞌix okyqꞌumaj ikxjani: “¡Bꞌanꞌax te ja ichanni, tetz aji tuq Tkꞌwaꞌal Dios!” 55 Ntons, akyeqet tuq tzi laqꞌchik chꞌin kyꞌilaꞌj xuj nxik tuq kykaꞌyiꞌ, kyetz ojetq tuq kyetzaj lapet tiꞌj Jesus max Galiley tzan kyonen tukyꞌiꞌl.* 56 Kxol kyetz atqet tuq te Liy aj Magdála, ax te Liy aj tnan te Jacobob bꞌix te Chep, bꞌix ax atqet tuq tzi te tnan kye tkꞌajol Sebedey.*
Aj Tox Muquꞌ Te Jesus
57 Ntons, ya aj chꞌinky tuq jqet yupan, opon jun qꞌinon xjal aj Arimatey, Chep tbꞌi, bꞌix ax tetz ojetq tuq tzꞌokslan tiꞌj Jesus. 58 Te Chep oxwaꞌq tukyꞌi Pilat bꞌix oxik tqaniꞌ permis tzan tuq tox tmuquꞌ te Jesus. Ntons te Pilat oxik tkꞌuluꞌ mandad tzan tuq txik qꞌapoꞌ tetz. 59 Ntons te Chep oqetz tin te txlimal bꞌix owox tbꞌatzꞌoꞌ tuj jun sabl bꞌan saq, 60 bꞌix owox tsiꞌ tuj jun muqbꞌil anim aj man akꞌaꞌj tuq tuj jun peky tujx xtxꞌoꞌotxꞌ. Yaji okaj xtxayiꞌ stziꞌ te jul tukyꞌi jun ma chman abꞌj bꞌix owaj. 61 Bꞌix te Liy aj Magdála bꞌix te junky Liy witꞌlikeꞌ tuq twitz te jul.
62 Yaji tuj junky iwitq, tuj te qꞌij ojlaꞌmj, kye pal aj nim kyajwalil bꞌix kye aj bꞌuchꞌuj Parisey, kyetz owok kchimoꞌ kyibꞌ tukyꞌi Pilat, 63 bꞌix oxik kyqꞌumaꞌ tetz ikxjani: “Tat, qetza ma tzaj qnaꞌoꞌna, aj tzunx tuq itzꞌoj te aj ma sqꞌoꞌl, tetz oxik tqꞌumaꞌ oj tkyꞌik tuq oxe qꞌij tkamlen, ojawel tuq anqꞌin junkyꞌel.* 64 Astilji intxik akꞌuluꞌ mandad tzan tqet xbꞌuqiꞌ te muqbꞌil anim max oj tkyꞌik te oxe qꞌij. Kebal kypon kye txnaqꞌatz chukaqꞌbꞌil elqꞌal txlimal bꞌix ikxji oxeꞌl kyqꞌumaꞌ kyukyꞌi kye xjal maꞌtx jaw anqꞌin. Ikxji te aj mentirji mas-tal bꞌan nim twitz te tbꞌay.” 65 Ntons te Pilat oxik tqꞌumaꞌ kyetz ikxjani: “Intxik etin txqꞌan soldad. Pex waq, intqet kxbꞌuqiꞌ te muqbꞌil anim bꞌan byenech.” 66 Ntons kyetz ebꞌajxik bꞌix oqet kykꞌuluꞌ byenech te abꞌj stziꞌ te jul tlamelul te muqbꞌil anim bꞌix owok ksiꞌ jun techaꞌl tiꞌjc bꞌix ekaj ksiꞌ tzi kye soldad xbꞌuqil tetz.