23
Aj Tpon In Jesus Twitz Pilat Bꞌix Te Eródes
1 Ntons kkyaqil ebꞌajjaw waꞌlet bꞌix oxik kyin te Jesus twitz te Pilat. 2 Bꞌix oxik kyqꞌumaꞌ til ikxjani: “Ma tzaj jkambꞌaꞌna te ja xjalni cha nxik tkubꞌsaꞌ kykꞌuꞌj kye qxjalil tzan kyqꞌojin tiꞌj te tumeꞌl titzaꞌ nkxkꞌulun mandad tzani tuj qamaqꞌ. Tetz ntqꞌumaꞌ tzan kꞌon txik qchojoꞌ te chojenj te César, bꞌix ntqꞌumaꞌ tetz aji te Koloyon Aj Qꞌumankaj Oqtxiꞌ aj kꞌulul mandad.” 3 Ntons te Pilat oxik xhchaꞌoꞌ tetz ikxjani: “¿Aꞌich peꞌ yatz te kꞌulul mandad kxol kye aj tijajil Israel?” Ntons te Jesus oxik tqꞌumaꞌ: “Aꞌichx maꞌtx tzaj qꞌuman tetz.” 4 Ntons te Pilat oxik tqꞌumaꞌ kye pal aj nim kyajwalil ikxjani: “Wetz kꞌontiꞌl jun til nꞌel tuj nwitz te ja ichan ntzani.” 5 Per kyetz nxik tuq kyqꞌumaꞌ junkyꞌel ikxjani: “Tetz cha nkꞌulun tzan kyjaw labꞌun kye xjal, bꞌix nxik txnaqꞌtzaꞌ tidiꞌchq tuj kyaqil tkwentil Judey, komo owaqꞌik tuj Galiley bꞌix ax max tzani.” 6 Ya ma tzꞌok xhchaꞌoꞌ ikxji, te Pilat oxik xhchaꞌoꞌ qa tetz jun aj Galiley tuq. 7 Ya ma tzꞌok xhchaꞌoꞌ te Pilat qa tetz tzajnaq tzi aj jaꞌ tuq nkꞌulun mandad te Eródes, ntons oxik tsamaꞌ tukyꞌi te Eródes tzan tpaj tetz atqet tuq tuj Jerusalen tuj aj tyempji.
8 Ya ma xik ten te Eródes te Jesus, tetz oje chalaj tzan tpaj kyꞌilaꞌj qꞌijxiꞌ tuq tgan tzan tok totzqilaꞌ tzan tpaj ojetq tuq tzꞌok xhchaꞌoꞌ tidiꞌchq tiꞌj, bꞌix tetz tgan tuq tzan tok teꞌeꞌ oj tkꞌulun jun tidiꞌ aj okyelabꞌayon kye xjal tiꞌj. 9 Te Eródes oxik xhchaꞌoꞌ tidiꞌchq tetz per te Jesus kꞌontiꞌl owaj stzaqꞌbꞌeꞌ chꞌinwt. 10 Ax akyeqet tuq tzi kye pal aj nim kyajwalil, bꞌix kye xnaqꞌtzal Kawbꞌil, kyetz tukyꞌi kyqꞌoj nxik tuq kyqꞌumaꞌ til. 11 Per te Eródes bꞌix kye tmulon, ya ma tzꞌok kykꞌuluꞌ tidiꞌchq nyaꞌtx galan tiꞌj bꞌix ya ma tzꞌok kxmayiꞌ, yaji owok ksiꞌ jun tqꞌanaq te jun kꞌulul mandad cha te xmaybꞌil tetz. Yaji te Eródes oxik tsamaꞌ junkyꞌel tukyꞌi Pilat. 12 Tuj aj qꞌijji te Pilat bꞌix te Eródes eꞌok kyajyol kyibꞌ, komo tbꞌay nkyeqꞌojin tuq.
Aj Txik Qꞌumaꞌ Tzan Tqet Kansaꞌ Te Jesus
13 Ntons te Pilat eꞌok xhchimoꞌ kye pal aj nim kyajwalil bꞌix kyaqil kye txqꞌanky aj nim kyajwalil bꞌix kyaqil kye xjal. 14 Bꞌix oxik tqꞌumaꞌ kyetz ikxjani: “Etetz otzaj eteqꞌiꞌ te ja xjal tzani, nꞌeqꞌumaꞌ qa nkubꞌsan kykꞌuꞌj kye xjal tzan kyjaw labꞌun, per wetz maꞌtx xik nchaꞌoꞌ tidiꞌchq tetz ewitz etetz, bꞌix kꞌontiꞌl jun til nꞌoknoj witzaꞌ tiꞌj kyaqil aj ntzaj eqꞌumaꞌ etetzni. 15 Bꞌix ax te Eródes kꞌontiꞌl ma tzꞌoknoj jun til titzaꞌ, astilji maꞌtx stzaj tsamaꞌ junkyꞌel qukyꞌiꞌl. Maꞌtx tzꞌok qen kꞌontiꞌl tidiꞌ jun til aj presis-wit tzan tkamik tzan tpaj. 16 Oxeꞌl nsiꞌ jun xhchoꞌnal tiꞌj bꞌix yaji oxeꞌl ntzoqpiꞌ.”
17 Ntons komo tuj te ninqꞌij, aqꞌbꞌiaꞌ te Pilat presis tuq tzan txik stzoqpiꞌ jun aj pres.a 18 Per kyaqil kye xjal ebꞌajꞌaqꞌik tzan ksikyꞌin ikxjani: “Intqet akansaꞌ tetz bꞌix intxik atzoqpiꞌ te Barabas.” 19 (Te Barabas ojetq tuq qex siꞌ pres tzan tpaj nkꞌulun tuq tzan kyjaw labꞌun kye xjal tuj amaqꞌ bꞌix tzan tpaj okansan.) 20 Te Pilat tgan tuq tzan txik stzoqpiꞌ te Jesus, bꞌix oxik tqꞌumaꞌ junkyꞌel kyetz, 21 per kye xjal ebꞌajjaw sikyꞌin kongan ikxjani: “¡Intqet eklabiꞌ twitz krus! ¡Intqet eklabiꞌ twitz krus!” 22 Yaji toxmajjiꞌn-el te Pilat oxik tqꞌumaꞌ junkyꞌel kyetz ikxjani: “¿Tidiꞌ nyaꞌtx galan maꞌtx tkꞌuluj? Wetz kꞌontiꞌl nꞌoknoj witzaꞌ jun tidiꞌ til aj presis-wit tzan tkamik tzan tpaj. Oxeꞌl nsiꞌ jun xhchoꞌnal tiꞌj bꞌix yaji oxeꞌl ntzoqpiꞌ.” 23 Per kyetz bꞌan nkyesikyꞌin tuq, nxik tuq kyqꞌumaꞌ tzan tqet klabiꞌ twitz krus. Bꞌan nim nkyesikyꞌin tuq, bꞌix yaji oqetkix kꞌuluꞌ iktzaꞌ tuq kyetz kygan. 24 Te Pilat oqet tbꞌisuꞌ tzan tqet tkꞌuluꞌ iktzaꞌ tuq kyetz kygan. 25 Oxik stzoqpiꞌ te xjal aj kygan tuq kyetz aj atqex tuq pres tzan tpaj nkꞌulun tuq tzan kyjaw labꞌun kye xjal bꞌix tzan tpaj tkansbꞌen, bꞌix oqet tkꞌuluꞌ tukyꞌi Jesus iktzaꞌx tuq kyetz kygan.
Aj Tjaw Yobꞌaꞌ Te Jesus Twitz Krus
26 Bꞌix ya ma xik in te Jesus, at tuq jun xjal tzajnaq tuq tuj kꞌul, Simon tbꞌi, tetz aj Siren tuq, bꞌix oxik in alajwers tzan txik tiqaꞌ te krus twiꞌ tqꞌabꞌ, lapik tiꞌjx Jesus. 27 Kyꞌilaꞌj tuq xjal lapikeꞌ tiꞌj bꞌix ateꞌ tuq xuj lapikeꞌ, bꞌan nkyeꞌoqꞌ tuq nim bꞌix bꞌan nkyebꞌisun tuq tiꞌj. 28 Per yaji te Jesus oxik tqꞌumaꞌ kyetz ikxjani: “Etetz xuj aj Jerusalen, kꞌon kxꞌoqꞌ tzan npaj wetz, sinoke peꞌetoqꞌ etiꞌjx etetz bꞌix kyiꞌj kye etal. 29 Komo tzul jun qꞌij aj oxeꞌl eqꞌumaꞌ, “Galanx-alo kye aj machor aj kꞌontiꞌl ojaw kyiqaꞌ jun kyal, galanx-alo kye xuj aj kꞌontiꞌl ebꞌajꞌalan.” 30 Tuj aj tyempji kye xjal okyeꞌaqꞌel tzan txik kyyoliꞌ kye witz, “Peꞌeqet tilan qajsikna.” Bꞌix oxeꞌl kyqꞌumaꞌ kye twiꞌ witz, “Qoqet awewaꞌna.”* 31 Komo qa kye xjal kꞌontiꞌl nꞌok loꞌet kykꞌuꞌj [tzan tkyꞌik kxon] jun tzeꞌ man txaꞌx, ntons pyorx-alo oqtel kykꞌuluꞌ tukyꞌi jun tzeꞌ kyꞌixkꞌoj.”b
32 Ntons ax eqꞌimeꞌ tuq kyitzaꞌ kabꞌeꞌky xjal eleqꞌ-eꞌ tzan tuq kyqet kansaꞌ junx tukyꞌiꞌl. 33 Bꞌix ya ma kyepon tuj te luwar aj tbꞌi “Tbꞌaqil Twiꞌ Xjal,” owok kyklabiꞌ te Jesus twitz krus kyukyꞌi kye eleqꞌ, jun tuj tbꞌanqꞌabꞌ bꞌix junky tuj tsurt. 34 Bꞌix te Jesus nxik tuq tqꞌumaꞌ te Stat ikxjani: “Tat, intqet anajsaꞌ chꞌin kchoj tzan tpaj kꞌontiꞌl kyebꞌen te aj nqet kykꞌuluꞌni.” Ntons te tqꞌanaq oqet ksaqchbꞌilaꞌ loteriy tiꞌj tzan tqet kypawaꞌ kxol.*
35 Ntons kyaqil kye xjal waꞌlkeꞌ tuq nkyekaꞌyin bꞌix kye kꞌulul mandad nkyexmayin tuq tiꞌj, nxik tuq kyqꞌumaꞌ ikxjani: “Ebꞌajqet tkoloꞌ txqꞌanky xjal, ajnaꞌl intqet tkoloꞌchaq tetz tibꞌx, aber qa bꞌanꞌax aji tetz te Koloyon Aj Qꞌumankaj Oqtxiꞌ, aj joyomaj tzan Qtata Dios.” 36 Bꞌix kye soldad ax kyetz nkyexmayin tuq tiꞌj Jesus. Nkyeꞌok tuq laqꞌchet tiꞌj bꞌix nxik ksiꞌ tuq minagr tetz, 37 nxik tuq kyqꞌumaꞌ ikxjani: “Qa yatz aꞌich te Twitzaleꞌ Kꞌulul Mandad kyiꞌj kye aj tijajil Israel, intqet akoloꞌ awibꞌx.” 38 Bꞌix at tuq jun yol tzꞌibꞌaꞌ twiꞌ te krus, tajsik twiꞌ ikxjani: Aj ntzani te Twitzaleꞌ Kꞌulul Mandad kyiꞌj kye aj tijajil Israel.
39 Ntons jun te aj owok klabiꞌ xtxꞌuꞌk Jesus nyolin tuq nyaꞌtx galan tiꞌj ikxjani: “Qa yatz aꞌich te Koloyon Aj Qꞌumankaj Oqtxiꞌ, ntons intqet akoloꞌ awibꞌx bꞌix qoqet akoloꞌna.” 40 Per te junky oxik tmiyoꞌ, oxik tqꞌumaꞌ ikxjani: “¿Tiꞌtzun, kꞌontiꞌl ntxobꞌ twitz Dios anke nꞌok awen twitz ja xhchoꞌnalni? 41 Bꞌanꞌax, qetz nqajoꞌ tzan tok qen twitz ja xhchoꞌnalni te chojbꞌil kyaqil jkꞌulbꞌen, per te ja xjal ntzani, tetz kꞌontiꞌl tidiꞌ nyaꞌtx galan otkꞌuluj.” 42 Yaji oxik tqꞌumaꞌ tetz te Jesus ikxjani: “Jesus, kyintzaj anaꞌoꞌ chꞌin oj ajakon witꞌlet tuj awitꞌlel.” 43 Yaji te Jesus oxik tqꞌumaꞌ tetz ikxjani: “Wetz oxeꞌl nqꞌumaꞌ yatz te bꞌanꞌax, bꞌeyx ajnaꞌl ochtelten wukyꞌiꞌl tuj te luwar bꞌan tbꞌanil.”
Aj Tkamik Te Jesus
44 Ntons, atx aj man tuq chijqꞌij max aj qpon te toxiꞌ or te qaleꞌ, kyaqil te twitz txꞌoꞌtxꞌ oqet yupan. 45 Te qꞌij ya kꞌontiꞌl oqꞌanalin bꞌix te nim xqꞌapj pawbꞌil* tuj te Nin Jay Nabꞌil Qtata Dios oqet laqik ninkꞌajchaq. 46 Te Jesus ojaw sikyꞌin kongan, oxik tqꞌumaꞌ ikxjani: “Tat, tuj aqꞌabꞌ okajel nqꞌapoꞌ wanim.”* Ya ma xik tqꞌumaꞌ ikxjani, okamik.
47 Yaji te kꞌulul mandad kyiꞌj kye soldad, ya ma tzꞌok ten kyaqil aj ojetq kyꞌik, tetz oqet tjiqꞌbꞌaꞌ Qtata Dios, oxik tqꞌumaꞌ ikxjani: “Bꞌanꞌax ja xjal ntzani kꞌontiꞌl tuq til.”
48 Kyaqil kye xjal aj akyeqet tuq, ya ma tzꞌok kyen kyaqil aj ojetq kyꞌik, ebꞌajꞌaj kyjay bꞌix nꞌok tuq kytinkꞌaꞌ kypechx [tzan tpaj ntzaj tuq kynaꞌon tetz]. 49 Per kyaqil kye aj otzqilal tuq te Jesus bꞌix kye xuj aj ebꞌajtzaj lapet tiꞌj max Galiley, ebꞌajkajten tzi, cha ebꞌajxik kaꞌyin laqꞌchik tiꞌj kyaqil tuq aj nkyꞌik.*
Aj Txwaꞌq Muqbꞌaj Te Jesus
50 Ntons at tuq jun xjal tbꞌi Chep, tetz jun kxol kye aj tijxjal kꞌulul mandad kxol kye aj tijajil Israel, bꞌix tetz jun xjal bꞌan galan tuq nabꞌlin, bꞌix nbꞌet tuq tuj tumeꞌl. 51 Tetz nyaꞌtx dyakwerd tuq tukyꞌi te aj oxik kyqꞌumaꞌ kye txqꞌanky ni tukyꞌi te aj oqet kykꞌuluꞌ. Tetz jun aj Arimatey tuq, jun kyamaqꞌ kye aj tijajil Israel, bꞌix tetz loꞌik tuq tkꞌuꞌj te Qtata Dios okoloyon kyiꞌj kye tijajil. 52 Ntons oxwaꞌq tukyꞌi Pilat bꞌix oxik tqaniꞌ tzan tqetz tin tuq xhchiꞌjel te Jesus twitz krus. 53 Ya ma qetz tin twitz te krus owok tbꞌatzꞌoꞌ tiꞌj jun xqꞌapj xtxꞌotxꞌal lino, bꞌix owox tmuquꞌ tuj jun jul muqbꞌil anim kꞌulumaj tuq twitz jun peky bꞌix nijunwt tuq anim ojetq kyeꞌox muquꞌ tzi. 54 Ntons aj qꞌijji presis tuq tzan tqet kykꞌuluꞌ kyaqil, chꞌinky tuq taqꞌik te qꞌij ojlaꞌmj.
55 Kye xuj aj ebꞌajtzaj tukyꞌiꞌl max Galiley, ax kyetz ebꞌajxik lapet kyiꞌj kye aj eꞌox muqun te Jesus bꞌix owok kyeꞌeꞌ jaꞌ owox muquꞌ bꞌix titzaꞌ oqet siꞌ te txlimal. 56 Yaji ebꞌajmeltzꞌjik [tuj kyposad] bꞌix oqet kykꞌuluꞌ tiꞌchq txakl tkꞌokꞌjal [aj owokeyon tuq tiꞌj te kamnaq]. Yaji tzan tpaj qꞌij ojlaꞌmj, a tgan tuq tzan kyojlan iktzaꞌx tuq tzꞌibꞌankaj tuj te Kawbꞌil.*