22
Aj Tkawlan Te Juds Kyukyꞌi Kye Kywitzaleꞌ Tzan Txik Tqꞌapoꞌ Jesus Tuj Kyqꞌabꞌ
1 Ntons, chꞌinky tuq tkanon te ninqꞌij aj jaꞌ tuq nkyewaꞌan te wabꞌj pan aj kꞌontiꞌl malsbꞌil tuj, te qꞌij aj Paskw tbꞌi.* 2 Kye pal aj nim kyajwalil, bꞌix kye xnaqꞌtzal Kawbꞌil, kyetz nkyejoyon tuq jun tumeꞌl titzaꞌ tuq tzan tqet kykansaꞌ te Jesus ewj, tzan tpaj nkyexobꞌ tuq kywitz kye xjal.
3 Ntons te Satanas [aj Tajaw Choj] oqex tuj tanim te Juds aj nꞌok qꞌumaꞌ tuq Iskaryot bꞌix jun tuq aj kxol kye kykabꞌlajujil tkyꞌixel Jesus. 4 Tetz oxwaꞌq yoliyon kyukyꞌi kye pal aj nim kyajwalil bꞌix kye aj kꞌulul mandad tuj te Nin Jay Nabꞌil Qtata Dios, oyolin kyukyꞌiꞌl titzaꞌ tuq bꞌaꞌn tzan txik tqꞌapoꞌ te Jesus tuj kyqꞌabꞌ. 5 Kyetz oje kyechalaj bꞌix oxik kyqꞌumaꞌ tetz tzan tqet kchojoꞌ tzan tpaj nini. 6 Ntons te Juds oqet tuj twitz, bꞌix njoyon tuq jun tyemp aj kꞌontiꞌl tuq kyꞌilaꞌj xjal tzan tuq txik tqꞌapoꞌ te Jesus tuj kyqꞌabꞌ.
Aj Kywaꞌan Tiꞌj Te Tqꞌijlal Paskw
7 Ntons opon te qꞌij aj jaꞌ tuq nkyewaꞌan te wabꞌj pan aj kꞌontiꞌl malsbꞌil tuj, bꞌix oj tqet tuq kansaꞌ te tal karner tzan txik qꞌapoꞌ te jun present te Qtata Dios tiꞌj te tqꞌijlal Paskw. 8 Te Jesus exik tlajoꞌ te Xhpeꞌy bꞌix te Waꞌnch bꞌix oxik tqꞌumaꞌ kyetz ikxjani: “Pex waq kꞌulul kyaqil aj presis tzan qwaꞌan tiꞌj te qꞌij Paskw.” 9 Yaji kyetz oxik kchaꞌoꞌ ikxjani: “¿Jaꞌ agan tzan tqet jkꞌuluꞌ abyar te wabꞌj?” 10 Yaji te Jesus owaj stzaqꞌbꞌeꞌ kyetz ikxjani: “Oj etox etetz tuj te amaqꞌ, owokelnoj etitzaꞌ jun ichan eqꞌiꞌ jun qꞌawubꞌ aꞌ titzaꞌ. Okxꞌokel lapet tiꞌj bꞌix okxꞌokex tuj te jay aj jaꞌ owokex. 11 Bꞌix oxeꞌl eqꞌumaꞌ te tajaw jay ikxjani: “Te xnaqꞌtzon ntzaj xhchaꞌoꞌ ikxjani: ‘¿Jaꞌ okyinwaꞌyon kyukyꞌi nxnaqꞌatz?’ ” 12 Ntons tetz otzajel tyekꞌuꞌ jun txol jay tajsik bꞌix nim bꞌix kꞌulumaj. Bꞌix tzi intqet ekꞌuluꞌ kyaqil tiꞌj te qꞌij.” 13 Ntons kyetz ebꞌajxik, bꞌix owoknoj kyitzaꞌ kyaqil iktzaꞌxkix aj ojetq tuq xik qꞌumaꞌ kyetz tzan te Jesus, bꞌix tzi oqet kykꞌuluꞌ kyaqil tiꞌj te qꞌij.
14 Ntons ya ma pon or tzan kywaꞌan tiꞌj te qꞌij Paskw, te Jesus bꞌix kye tkyꞌixel eqet witꞌlet tiꞌj mes. 15 Ntons te Jesus oxik tqꞌumaꞌ kyetz ikxjani: “Wetz bꞌan ngan tuq tzan nwaꞌan etukyꞌiꞌl tiꞌj ja qꞌij ntzani minaꞌx tuq tok wen twitz nkamiky. 16 Wetz oxeꞌl nqꞌumaꞌ etetz, nlay kyinwaꞌan junkyꞌel te ntzani sinoke max oj tponkix te qꞌij chaꞌoj tkꞌulun mandad te Qtata Dios tukyꞌi jun tajwalil kxol kye xjal.”
17 Ntons ojaw stzyuꞌ tuj tqꞌabꞌ jun ukꞌbꞌil bꞌix oxik tsiꞌ pixon te Qtata Dios, bꞌix oxik tqꞌumaꞌ ikxjani: “Intkyꞌik ekꞌamoꞌ ntzani bꞌix intqet esipaꞌ exol. 18 Oxeꞌl nqꞌumaꞌ etetz, wetz nlay xik wukꞌaꞌ masky taꞌal ub, sinoke max oj tkꞌulun mandad te Qtata Dios tukyꞌi jun nim tajwalil.” 19 Ntons yaji ojaw stzyuꞌ te wabꞌj bꞌix ya ma xik tsiꞌ pixon te Qtata Dios, oxik tqꞌumaꞌ ikxjani: “Te ntzani te nchiꞌjel aj oxeꞌl qꞌapoꞌ te jun galan te etetz. Intxik ewaꞌaꞌ ntzani tzan ntzaj enaꞌoꞌ.” 20 Bꞌix ikxji otkꞌuluj tukyꞌi te ukꞌbꞌil aj tmankun kywaꞌan, bꞌix oxik tqꞌumaꞌ ikxjani: “Te ja qukꞌaꞌ ntzani telponx tiꞌj te tyol Qtata Dios aj man tkajlen tsiꞌ etukyꞌiꞌl, bꞌix owokel ikxji tzan tpaj nchikyꞌel aj owelal oj nkamik te jun galan te etetz.* 21 Per ajnaꞌl te aj ojawel meltzꞌjik wiꞌj, atqet junchꞌin wukyꞌiꞌl tzani tiꞌj mes.* 22 Komo [wetz] te Ichan Aj Tkꞌwaꞌal Dios [aꞌin], presiskix tzan tkyꞌik wiꞌj iktzaꞌxkix oje qet bꞌisuꞌ tiꞌj, per last-talo te aj ojawel meltzꞌjik wiꞌj.” 23 Ntons ebꞌajꞌaqꞌik tzan kchaꞌon kyibꞌkyibꞌx abꞌl tuq te aj ojawel meltzꞌjik tiꞌj.
Aj Kybꞌisun Kye Txnaqꞌatz Jesus Abꞌl Tuq Te Aj Mas Nim Tajwalil Kxol Kyetz
24 Ntons, kye txnaqꞌatz Jesus ebꞌajꞌaqꞌik tzan kywululun kxol, abꞌl tuq kxol kyetz te aj mas nim tajwalil.* 25 Ntons te Jesus oxik tqꞌumaꞌ kyetz ikxjani: “Kye kꞌulul mandad kxol kye aj nyaꞌtx qxjalil tijajil Israel aj kꞌontiꞌl nkyeꞌokslan Dios bꞌix kye aj at nim kyajwalil, kyetz nꞌel kyetzaꞌ kye kxjalilx bꞌix nkyeꞌok qꞌumaꞌ “galan xjal.” 26 Per exol etetz kꞌontiꞌl tzan tkyꞌik ikxji, sinoke te aj at nim tajwalil exol etetz inkxik tnaꞌoꞌ kye txqꞌanky iktzaꞌ jun aj nyaꞌtx nim tajwalil, bꞌix te aj nkꞌulun mandad a tgan tzan taqꞌunan kye txqꞌanky.* 27 ¿Abꞌl te aj at mas tajwalil, qa te aj nqet witꞌlet tiꞌj mes waꞌil, qatzun te aj nkyꞌik swan te wabꞌj twiꞌ mesji? ¿Nyaꞌtx petzun te aj nqet witꞌlet tiꞌj mes? Per wetz akyinqet exol etetz iktzaꞌ te aj nkyꞌik swan te wabꞌj twiꞌ mes.* 28 Etetz maꞌtx kxtenkix wukyꞌiꞌl tuj kyaqil xhchoꞌnal aj maꞌtx tzꞌok wen. 29 Ntons komo iktzaꞌx te ntat oje tzaj tsiꞌ wetz wajwalil tzan nkꞌulun mandad, ax wetz oxeꞌl nsiꞌ jun etajwalil 30 tzan eten junchꞌin wukyꞌiꞌl oj nkꞌulun mandad. Okxwaꞌyon bꞌix okxꞌukꞌayon tiꞌj mes wukyꞌiꞌl, bꞌix okxtel witꞌlet tuj ewitꞌlel tzan txik eqꞌumaꞌ tumeꞌl tiꞌj te kykꞌulbꞌen kye kykabꞌlajujil bꞌuchꞌuj tijajil Israel.”*
Aj Txik Tqꞌumaꞌ Jesus Te Xhpeꞌy Oqtel Tuq Tewaꞌ Qa Totzqiꞌ Tetz
31 [Bꞌix ax oxik tqꞌumaꞌ te Jesus ikxjani]: “Simon, Simon, tzaj achaꞌoꞌ, te Satanas maꞌtx tzaj tqaniꞌ etiꞌj etetz tzan eqet tkꞌuluꞌ probar,a 32 per wetz maꞌtx qet nwitz twitz Qtat tzan kꞌon tkaj asiꞌ yatzb tzan tok witꞌlet akꞌuꞌj wiꞌj. Bꞌix yatz oj tjaw awin akꞌuꞌj, intxik animsaꞌ kykꞌuꞌj kye txqꞌanky qerman.” 33 Ntons te Xhpeꞌy oxik tqꞌumaꞌ ikxjani: “Tat, dispwest atin tzan nxik awukyꞌiꞌl qa okyinqtex siꞌ pres qatzun tzan tok wen twitz nkamikyji.” 34 Per te Jesus oxik tqꞌumaꞌ ikxjani: “Wetz oxeꞌl nqꞌumaꞌ yatz Xhpeꞌy, oj tjaw oqꞌ te toꞌk, yatz oxmaj ojetq qet awewaꞌ qa awotzqimin.”
35 Bꞌix oxik tqꞌumaꞌ kye kkyaqil ikxjani: “Aj exik nlajoꞌ jun-el, kꞌontiꞌl tuq tzan txik etin ebꞌeꞌeq bꞌix etumin bꞌix te exajabꞌ, ¿opaltin petzun jun tidiꞌ te etetz?”* Yaji kyetz oxik kyqꞌumaꞌ: “Kꞌontiꞌl.” 36 Ntons oxik tqꞌumaꞌ kyetz ikxjani: “Ajnaꞌl te aj at tbꞌeꞌeq intxik tin tukyꞌi stumin, bꞌix intqet ekꞌuluꞌ etibꞌ tzan eten list oj tkyꞌik te nyaꞌtx galan aj tzul naj.c 37 Wetz oxeꞌl nqꞌumaꞌ etetz, presiskix tzan tkyꞌik wiꞌj kyaqil aj tzꞌibꞌankaj oqtxiꞌ ikxjani: “Bꞌix tetz owok en iktzaꞌ jun joyol choj.” Komo kyaqil aj tzꞌibꞌaꞌ wiꞌj wetz okyꞌelkix ikxji.”* 38 Ntons kyetz oxik kyqꞌumaꞌ ikxjani: “Tat, tzani ateꞌ kabꞌeꞌ machit qꞌojbꞌil.” Yaji kyi tetz: “Qaltetz.”d
Aj Txnaqꞌtzan Te Jesus Tuj Jetzemani
39 Yaji te Jesus owex tzi bꞌix oxik twiꞌ te witz Olib, komo tzi naqꞌik tuq tzan txik xnaqꞌtzon, bꞌix kye txnaqꞌatz eꞌok lapet tiꞌj. 40 Ya ma pon tzi, oxik tqꞌumaꞌ kyetz ikxjani: “Peꞌexnaqꞌtzan waq tzan kꞌon eqet tzꞌaqik.” 41 Ntons owel laqꞌchet chꞌin kyiꞌj, qanq iktzaꞌ jun xoꞌon abꞌj aj jaꞌ opoyon, bꞌix oqet mejlet bꞌix owokten xnaqꞌtzon. 42 Bꞌix oxik tqꞌumaꞌ ikxjani: “Tat, qa yatz agan, bꞌaꞌn tzan akolon chꞌin wiꞌj tiꞌj ja xhchoꞌnal ntzani, per kꞌontiꞌl tzan tbꞌantik iktzaꞌ wetz ngan sinoke intbꞌantik iktzaꞌ yatz agan.” 43 Ntons jun ángel aj tzajnaq tuj kaꞌj ojaw kanet twitz tzan tjaw tin tkꞌuꞌj. 44 Te Jesus nꞌok ten tuq twitz nim xhchoꞌnal, per mas tuq nxnaqꞌtzan nim, bꞌix te aꞌ aj nꞌel tuq tiꞌj iktzaꞌ kyikꞌ nqet tuq tzꞌaqik twitz txꞌoꞌtxꞌ. 45 Ya ma mankun txnaqꞌtzan, ojaw waꞌlet bꞌix opon aj jaꞌ tuq akyeqet kye txnaqꞌatz, bꞌix etzaj tkꞌulbꞌaꞌ ojetq tuq kyewitan tzan tpaj kybꞌis. 46 Bꞌix oxik tqꞌumaꞌ kyetz ikxjani: “¿Tistil nkxwitan? Sekꞌ ejaw waꞌlet, bꞌix peꞌexnaqꞌtzan waq tzan kꞌon eqet tzꞌaqik.”
Aj Tjaw Tzyuꞌ Jesus
47 Man tuq nyolin te Jesus, kypon labꞌun kyꞌilaꞌj xjal. Te eqꞌil kybꞌey a tuq te Juds aj jun tuq kxol kye kykabꞌlajujil txnaqꞌatz Jesus. Tetz owok laqꞌchet tiꞌj Jesus limal tetz tukyꞌi jun limbꞌil iktzaꞌ jun tajyol.e 48 Per te Jesus oxik tqꞌumaꞌ tetz ikxjani: “Juds, ¿nkyinꞌok alimaꞌ naqextzun qajyol qibꞌf bꞌix ikxji nchjaw meltzꞌjik wiꞌj wetz te Ichan Aj Tkꞌwaꞌal Dios?” 49 Kye aj akyeqet tuq tukyꞌi Jesus, ya ma tzꞌok kyen tidiꞌ nkyꞌik, oxik kchaꞌoꞌ kyetz te Jesus ikxjani: “Tat, ¿oqoqꞌojiyona kyiꞌj tukyꞌi qmachit kansbꞌil?” 50 Yaji jun txnaqꞌatz te Jesus oxik sililin, oqet tokꞌonsaꞌ tmos te twitzaleꞌ pal, owel xtxꞌemuꞌ txkyin aj tbꞌanqꞌabꞌ. 51 Yaji te Jesus oxik tqꞌumaꞌ ikxjani: “¡Qaltetz! ¡Ya kꞌonky!” Ntons te Jesus owok tmakoꞌ txkyin te xjal bꞌix oqet tqꞌanaꞌ. 52 Bꞌix oxik tqꞌumaꞌ kyukyꞌi kye pal aj nim kyajwalil bꞌix kye kꞌulul mandad tuj te Nin Jay Nabꞌil Qtata Dios, bꞌix kye tijxjal kxol kye xjal aj tijajil Israel aj ojetq tuq kyepon tzyul tetz, oxik tqꞌumaꞌ ikxjani: “¿Tistil etetz maꞌtx kxꞌul tzani tukyꞌi emachit kansbꞌil bꞌix tukyꞌi exbꞌaqꞌen, iktzaꞌ wetz aꞌin jun eleqꞌ? 53 Kyaqil qꞌij wetz akyinqet tuq etukyꞌiꞌl tuj te Nin Jay Nabꞌil Qtata Dios, bꞌix tzi kꞌontiꞌl injaw etzyuꞌ.* Per ajnaꞌl maꞌtx pon or bꞌix at etajwalil tzan te Tajaw Choj tzan ekꞌulun etetz tidiꞌchq aj nyaꞌtx galan aj egan tzan ekꞌulun.”
Aj Tqet Ewaꞌ Jesus Tzan Xhpeꞌy
54 Ntons ojaw ktzyuꞌ te Jesus bꞌix oxik kyeqꞌiꞌ twitz te twitzaleꞌ pal. Yatzun te Xhpeꞌy, tetz lapik tuq laqꞌchik. 55 Stziꞌ tjay te pal ojetq tuq qet kybꞌichkꞌaꞌ kyqꞌaqꞌ, ntons kye xjal ebꞌajqet witꞌlet tiꞌj bꞌix ax te Xhpeꞌy ax oqet witꞌlet kxol. 56 Ntons te jun kriad ya ma xik teꞌeꞌ te Xhpeꞌy, okaj kaꞌyin tiꞌj bꞌix oxik tqꞌumaꞌ ikxjani: “Tetz, ax ajun tuq tukyꞌi Jesus.” 57 Per te Xhpeꞌy oqet tewaꞌ, oxik tqꞌumaꞌ ikxjani: “Yen, wetz kꞌontiꞌl wotzqiꞌ tetz.” 58 Mas yaj tzaj te junky xjal, ax oxik tqꞌumaꞌ te Xhpeꞌy ikxjani: “Ax yatz aꞌich jun aj kyukyꞌiꞌl.” Per yaji te Xhpeꞌy owaj stzaqꞌbꞌeꞌ: ¡Nyaꞌtx bꞌanꞌax awitzaꞌ! 59 Yaji jun or mas yajky, junky xjal oxik tqꞌumaꞌ ikxjani: “Bꞌanꞌax tetz atqet tuq tukyꞌiꞌl, komo ax tetz jun aj Galiley.” 60 Yaji te Xhpeꞌy oxik tqꞌumaꞌ ikxjani: “Tzaj achaꞌoꞌ, wetz kꞌontiꞌl webꞌen tidiꞌ aj nꞌayoliꞌni.” Ntons, bꞌeyxnajji aj man tuq nyolin te Xhpeꞌy, ojaw oqꞌ jun toꞌk. 61 Ntons te Qajawil owaj kaꞌyin tiꞌj te Xhpeꞌy, bꞌix te Xhpeꞌy otzaj tiktzꞌan tiꞌj tanim aj ojetq tuq xik qꞌumaꞌ tetz ikxjani: “Bꞌex minaꞌ tjaw oqꞌ te toꞌk, ojetq tuq kyinqet awewaꞌ oxmaj.” 62 Ntons te Xhpeꞌy owetz tzi, bꞌix owokten oqꞌel.
Aj Tok Kxmayiꞌ Jesus
63 Ntons, kye xjal aj nkyexbꞌuqin tuq te Jesus, nqet tuq bꞌaj kxmayiꞌ bꞌix nꞌok tuq bꞌaj kybꞌujuꞌ. 64 Owok ktxayiꞌ twitz, bꞌix oxik kchaꞌoꞌ tetz ikxjani: “Pakanonchaq tiꞌj abꞌl ma tzꞌok bꞌujun te yatz.” 65 Bꞌix nꞌok tuq bꞌaj kyyasoꞌ, tidiꞌchq tuq nꞌok kyqꞌumaꞌ tetz.
Aj Tpon In Jesus Kywitz Kyaqil Kye Tijxjal Kꞌulul Mandad
66 Ya ma qo xhkꞌateꞌ, owok kchimoꞌ kyibꞌ [junjun] kye tijxjal kꞌulul mandad kxol kye xjal aj tijajil Israel —kye pal aj nim kyajwalil kyukyꞌi kye xnaqꞌtzal Kawbꞌil— bꞌix kyetz oxik kyin te Jesus kywitz kye txqꞌanky tijxjal kꞌulul mandad. Bꞌix oxik kchaꞌoꞌ te Jesus ikxjani: 67 “Tzaj aqꞌumaꞌ ¿aꞌich peꞌ yatz te Koloyon Aj Qꞌumankaj Oqtxiꞌ?” Ntons tetz oxik tqꞌumaꞌ kyetz ikxjani: “Qa wetz oxeꞌl nqꞌumaꞌ qa aꞌin, nlay kyinxik etokslaꞌ; 68 bꞌix qa oxeꞌl nchaꞌoꞌ jun tidiꞌ, etetz nlay bꞌantik tzan tajtz etzaqꞌbꞌeꞌ. 69 Per bꞌeyx ajnaꞌl [wetz] te Ichan Aj Tkꞌwaꞌal Dios [aꞌin] okyinqtel witꞌlet tuj tbꞌanqꞌabꞌ te Qtata Dios aj at nim tajwalil.” 70 Yaji kyaqil exik chaꞌon tetz ikxjani: “¿Ntons aꞌich yatz te Tkꞌwaꞌal Dios?” Yaji tetz oxik tqꞌumaꞌ: “Aꞌixk etetz maꞌtx tzaj eqꞌumaꞌ qa aꞌin.” 71 Ntons kyetz okyqꞌumaj ikxjani: “¿Tistil mas xjal tzan kyyolin tidiꞌ til? Aꞌoꞌxk maꞌtx tzꞌok qchaꞌoꞌ, tuj stziꞌx maꞌtx tzꞌetz.”