11
Aj Tjaw Anqꞌin Te Lásaro Tzan Jesus
1 Ntons at tuq jun xjal yabꞌ, Lásaro tbꞌi. Tetz tjay tuj Betany aj jaꞌ nkyenajan tuq kye tanabꞌ te Liy tukyꞌi Maꞌt.* 2 Te Liy aj titzꞌin Lásaroni axkix te aj owok tsiꞌ tkꞌokꞌjal tiꞌj toq te Jesus bꞌix yaji owok tkyꞌixwinsaꞌ tukyꞌi stzamal twiꞌx.* 3 Ntons kye tanabꞌ te Lásaro oxik kylajoꞌ jun kymandader qꞌumal tukyꞌi Jesus ikxjani: “Tat, te ataykꞌuꞌuj aj nqet aganiꞌ nim, tetz bꞌan yabꞌ.” 4 Ya ma tzꞌok xhchaꞌoꞌ te Jesus ikxji, oxik tqꞌumaꞌ ikxjani: “Te aj yabꞌilni nlay kansan sinoke owokeyon tzan tok en tajwalil te Qtata Dios tiꞌj te kamikyj, ikxji tzan tok en wajwalil wetz aj Tkꞌwaꞌal aꞌin.” 5 Te Jesus bꞌan nkyeqet tuq tganiꞌ te Lásaro kyukyꞌi aꞌeꞌ tanabꞌ, 6 per ya ma tzꞌok xhchaꞌoꞌ qa te Lásaro bꞌan yabꞌ tuq, ntons okajten kabꞌeꞌky qꞌij aj jaꞌ tuq atqet. 7 Mas yaj oxik tqꞌumaꞌ kyukyꞌi kye txnaqꞌatz ikxjani: “Qwaꞌq junkyꞌel tuj Judey.” 8 Yaji kye txnaqꞌatz oxik kyqꞌumaꞌ tetz ikxjani: “Xnaqꞌtzon, yatz awebꞌen kye aj tijajil Israel kygan tuq tzan aqet kykansaꞌ tukyꞌi abꞌj. ¿Tiꞌtzun, agan axik junkyꞌel txini?” 9 Yaji te Jesus oxik tqꞌumaꞌ kyetz [jun yekꞌbꞌil] ikxjani: “¿Kꞌontiꞌl etebꞌen etetz te qꞌij at kabꞌlajuj or tuj? Qa qetz nqobꞌet chijqꞌij, nlay qojaw xpetkꞌan tzan tpaj nxik qen te chkꞌatunal. 10 Per qa nqobꞌet qonikꞌan, nqojaw xpetkꞌan tzan tpaj kꞌontiꞌl chkꞌatunal tuj qwitz.” 11 Yaji oxik tqꞌumaꞌky ikxjani: “Te qtaykꞌuꞌuj Lásaro cha maꞌtx witan, per wetz ma kyinxik kꞌasul tetz.” 12 Yaji kye txnaqꞌatz oxik kyqꞌumaꞌ tetz ikxjani: “Tat, qa tetz cha maꞌtx witan [tzan tpaj tyabꞌil], ntons obꞌantel.” 13 Per aj txik tqꞌumaꞌ te Jesus ikxji telponx tuq te Lásaro ojetq tuq kamik, per kyetz tuj kynabꞌl qa cha nwitan tuq. 14 Ntons te Jesus oxik tqꞌumaꞌ bꞌan bꞌanꞌax kyetz ikxjani: “Te Lásaro maꞌtx kamik, 15 bꞌix wetz nkyinchalaj kꞌontiꞌl atinqet tuq txini tzan tpaj ajnaꞌl galan tzan etokslan etetz wiꞌj. Qwaꞌq eꞌel tetz.” 16 Ntons te Maxh, aj nꞌok qꞌumaꞌ tbꞌi Yuxh, oxik tqꞌumaꞌ kye txqꞌanky txnaqꞌatz Jesus ikxjani: “Ax qwaꞌq qetz tzan jkamik junx tukyꞌiꞌl.”
17 Ya ma pon te Jesus opon tuj Betany [aj tamaqꞌ te yabꞌ], ojetq tuq pon tkajiꞌ qꞌij toklen muquꞌ te Lásaro. 18 Bꞌix komo te Betany qaynin tuq tiꞌj Jerusalen, qanq cha ox kilómetr tuq, 19 kyꞌilaꞌj kye xjal aj tijajil Israel ojetq tuq kyepon qꞌolbꞌel te Liy tukyꞌi te Maꞌt tzan tpaj tkamlen te kyitzik. 20 Ya ma tzꞌok xhchaꞌoꞌ te Maꞌt qa te Jesus ikjaꞌn tuq tpon, ntons owetz kanol tetz, per te Liy okaj ten tjay. 21 Yaji te Maꞌt oxik tqꞌumaꞌ te Jesus ikxjani: “Tat, cha atichqet-wit tuq tzani te witzik, kꞌontiꞌl-tal ma kamik. 22 Per wetz webꞌen, te Dios otzajel tsiꞌ kyaqil aj oxeꞌl aqaniꞌ yatz tetz ajnaꞌl.” 23 Yaji te Jesus owaj stzaqꞌbꞌeꞌ tetz ikxjani: “Te awitzik ojawel anqꞌin junkyꞌel.” 24 Yaji te Maꞌt oxik tqꞌumaꞌ tetz: “Bꞌanꞌax wetz webꞌenky ojawel anqꞌin junkyꞌel oj kyjaw anqꞌin kyaqil kye kamnaq oj tpon or te jwisy.”* 25 Ntons te Jesus oxik tqꞌumaꞌ ikxjani: “Aꞌin wetz aj nkyejaw anqꞌin kye xjal witzaꞌ bꞌix nxik nsiꞌ kyanqꞌin abꞌl aj owokslayon wiꞌj, anke ma kamik per owanqꞌiyon,* 26 bꞌix kyaqil kye aj itzꞌojeꞌ qa nkyeꞌokslan wiꞌj, nlay kyekamik te jun-eleꞌx. ¿Nꞌawokslaꞌ yatz nini?”
27 Yaji te Maꞌt oxik tqꞌumaꞌ tetz: “Bꞌanꞌax tat, wetz nwokslaꞌ yatz aꞌich te Koloyon Aj Qꞌumankaj Oqtxiꞌ, aj Tkꞌwaꞌal Dios aj owulelkix tuq twitz txꞌoꞌtxꞌ.”
28 Ya ma xik tqꞌumaꞌ ntzani oxik ukꞌlel te titzik aj Liy bꞌix oxik tjaskꞌaꞌ tetz ikxjani: “Te xnaqꞌtzon maꞌtx tzul bꞌix tgan yolin awukyꞌiꞌl.” 29 Ya ma tzꞌok xhchan te Liy, ojaw naj waꞌlet bꞌix oxik naj qꞌolbꞌel te Jesus. 30 Te Jesus minaꞌ tuq tpon tuj te amaqꞌ, tzunx tuq atqet aj jaꞌ owok tkꞌulbꞌaꞌ te Maꞌt. 31 Ya ma xik kyen kye xjal aj akyeqet tuq tjay aj nkyeqꞌolbꞌen tuq te Liy, ya ma xik kyen tjaw karre te Liy, kyetz ebꞌajꞌok lapet tiꞌj, kyetz tuj kynabꞌl tuq qa ikjaꞌn txik oqꞌeyon tajsik anim. 32 Ya ma pon te Liy aj jaꞌ tuq atqet te Jesus, oqet mejlet twitz tukyꞌi twitz max twitz txꞌoꞌtxꞌ bꞌix oxik tqꞌumaꞌ ikxjani: “Tat, cha atichqet-wit tuq yatz tzani, te witzik kꞌontiꞌl-tal ma kamik.” 33 Ya ma xik ten te Jesus te Liy bꞌan nꞌoqꞌ tuq bꞌix kye kxjalil aj tijajil Israel aj ajuneꞌ tuq tukyꞌiꞌl ax nkyeꞌoqꞌ tuq, tetz otzaj choꞌon tanim bꞌix oje bꞌisun. 34 Yaji oxik xhchaꞌoꞌ kyetz: “¿Jaꞌ oqex emuquꞌ?” Kyetz oxik kyqꞌumaꞌ: “Qalan eꞌel tetz, tat.” 35 Yaji te Jesus owokten oqꞌel. 36 Yaji kyekyi kye xjal aj tijajil Israel ikxjani: “Intxik eten, bꞌan nqet tuq tganiꞌ.” 37 Yatzun junjunky nkyqꞌumaꞌ tuq ikxjani: “Komo tetz obꞌantik tzan tjaw tjaqoꞌ twitz te moy, ¿tiꞌtzun kꞌontiꞌl-tal ma bꞌantik titzaꞌ tzan kꞌon tkamik ja xjalni?”
38 Yaji te Jesus junkyꞌel otzaj choꞌon tanim, owok laqꞌchet tiꞌj te jul aj jaꞌ oqex muquꞌ, jun jul lamoꞌ tuq stziꞌ tukyꞌi jun nim abꞌj. 39 Yaji te Jesus oxik tqꞌumaꞌ ikxjani: “Intel etin te abꞌj.” Ntons te Maꞌt aj titzꞌin te kamnaq oxik tqꞌumaꞌ: “Tat, oje tzuꞌwxik tzan tpaj kaje qꞌijxiꞌ tnajlen.” 40 Yaji te Jesus oxik tqꞌumaꞌ tetz ikxjani: “¿Kꞌontiꞌl petzun ma xik nqꞌumaꞌ yatz qa awokslaꞌtz owokel awen tajwalil te Qtata Dios?” 41 Ntons owel kyin te abꞌj bꞌix te Jesus ojax ten twitz kaꞌj bꞌix oxik tqꞌumaꞌ ikxjani: “Tat, wetz nxik nsiꞌ pixon te yatz tzan tpaj maꞌtx kyintzaj achaꞌoꞌ. 42 Wetz webꞌen yatz ntzaj asiꞌkix awiꞌ wiꞌj, per wetz nxik nqꞌumaꞌ ntzani tzan tok jun galan kye ja xjalni bꞌix tzan kyokslan aꞌich lajol te wetz.” 43 Ya ma xik tqꞌumaꞌ ikxji, owox qꞌolbꞌen tiꞌj kongan: “Lásaro, pawetz tzi.” 44 Yaji te aj kamnaq tuq owetz tuj te jul bꞌix tzunx tuq kꞌalomeꞌ kye toq bꞌix tqꞌabꞌ, bꞌix te twitz tzunx bꞌatzꞌoꞌ tukyꞌi jun xqꞌapj. Yaji te Jesus oxik tqꞌumaꞌ kyetz: “Intel epujuꞌ bꞌix intxik etzoqpiꞌ.”
Aj Kykaj Tiꞌj Kye Aj Bꞌuchꞌuj Parisey Tzan Tqet Kykansaꞌ Te Jesus
45 Ntons tzan tpaj te nini, kyꞌilaꞌj xjal aj tijajil Israel aj ajuneꞌ tuq tukyꞌi Liy owok kyen te aj oqet tkꞌuluꞌ te Jesus, bꞌix eꞌokslan tiꞌj. 46 Per ateꞌ junjun ebꞌajxik yoliyon kyukyꞌi kye aj bꞌuchꞌuj Parisey bꞌix oxik kyqꞌumaꞌ te aj ojetq tuq tkꞌuluj te Jesus. 47 Ntons kye aj bꞌuchꞌuj Parisey bꞌix kye pal aj nim kyajwalil owok kchimoꞌ kyibꞌ kyukyꞌi kye aj bꞌuchꞌuj tijxjal aj mas nim kyajwalil kxol kye aj tijajil Israel, bꞌix oxik kyyoliꞌ ikxjani: “¿Tidiꞌ ojkꞌuluꞌtz ajnaꞌl tukyꞌi ja ichanni? Nqet tkꞌuluꞌ kyꞌilaꞌj seny labꞌal tukyꞌi nim tajwalil. 48 Qa cha owokel qen ikxji, kyaqil xjal okyeꞌokslayon tiꞌj bꞌix kye aj Rom owelal kyin lad tzan qnaꞌon te Qtata Dios tuj te Nin Jay bꞌix owelal kyin lad tzan jkꞌulun mandad kxol qxjalil.” 49 Yaji jun kxol kyetz aj tbꞌi Kaypas, aj twitzaleꞌ pal tuj aj aqꞌbꞌiji, tetz oxik tqꞌumaꞌ kyetz ikxjani: “Etetz kꞌontiꞌl etebꞌen chꞌinwt. 50 Kꞌontiꞌl nꞌok esiꞌ enabꞌl mejor qa ma naj cha jun xjal tzan tpaj te qamaqꞌ bꞌix nyaꞌtx tzan tponaj kyaqil te qamaqꞌ.” 51 Per te Kaypas nyaꞌtx cha tuj twiꞌxwit tetz owetz tin aj txik tqꞌumaꞌ ikxji. Komo tetz te twitzaleꞌ pal, astilji oxik tqꞌumaꞌ ikxji tzan tpaj te Qtata Dios oyolin tuj tanim qa te Jesus maꞌkix tuq kamik te jun galan kye txjalil, 52 bꞌix nyaꞌtx tuq aꞌox kyiꞌj kyetz sinoke tzan kyok iktzaꞌ jun bꞌuchꞌuj kyaqil kye aj tkꞌwaꞌal Dios aj slabꞌumeꞌ tuq kyibꞌ jaꞌchq. 53 Tuj aj qꞌijji te bꞌuchꞌuj tijxjal aj mas nim kyajwalil kxol kye aj tijajil Israel ekaj tiꞌj tzan tqet tuq kykansaꞌ te Jesus. 54 Astilji te Jesus ya kꞌontiꞌl ojawbꞌet tzi kywitz kye txjalil aj tijajil Israel, sinoke owex tzi, oxik tuj junky amaqꞌ tbꞌi Chayin, qaynin tiꞌj te kyꞌixkꞌoj txꞌoꞌtxꞌ aj jaꞌ kꞌontiꞌl najayon, bꞌix tzi oqeten kyukyꞌi txnaqꞌatz.
55 Chꞌinky tkanon tuq te qꞌij aj tbꞌi Paskw aj nqet tuq kyqꞌijlaꞌ kye xjal aj tijajil Israel, bꞌix kyꞌilaꞌj xjal tuj kyꞌilaꞌj luwar ebꞌajxik Jerusalen atx tuq chꞌinky tzan tkanon te ninqꞌij, ebꞌajxik tzan kykꞌulun kykostumbr tzan tkaj saq kyanim tuj twitz Dios. 56 Kye xjal tuj te qꞌij nqet tuq kyjoyoꞌ te Jesus tuj te Nin Jay Nabꞌil Qtata Dios bꞌix nkyqꞌumaꞌ tuq ikxjani: “¿Titzaꞌ etetz tuj enabꞌl, tzul petz-talo tuj te qꞌij qa nlayji?” 57 Kye aj bꞌuchꞌuj Parisey kyukyꞌi kye pal aj nim kyajwalil ojetq tuq xik kyqꞌumaꞌ qa at abꞌl tuq tebꞌen jaꞌ atqet te Jesus a tgan tuq tzan stzaj tqꞌumaꞌ ikxji tzan tuq tjaw ktzyuꞌ.