12
Aj Tqet Kꞌuluꞌ Abyar Jesus Tiꞌj Tkamiky
1 Aj atx tuq waqaq qꞌij tzan tkanon te qꞌij aj tbꞌi Paskw, te Jesus oxwaꞌq tuj Betany aj tamaqꞌ Lásaro aj ojaw anqꞌin titzaꞌ. 2 Tzi oqet ksiꞌ jun tweꞌ te Jesus tzan kywaꞌan te qaleꞌ, bꞌix te Maꞌt nsipan tuq te wabꞌj bꞌix te Lásaro jun kxol kye aj nkyewaꞌan tuq twiꞌ mes kyukyꞌi kye aj ukꞌlemeꞌ. 3 Te Liy otzaj tin jun libr tkꞌokꞌjal xhchukeltibꞌ aj taꞌal nardo bꞌix bꞌan tbꞌanil tuq, bꞌan kar tiꞌj bꞌix owok tsiꞌ tiꞌj toq Jesus bꞌix owel tkyꞌixwinsaꞌ tukyꞌi stzamal twiꞌ.* Bꞌix kyaqil te jay onoj tukyꞌi tkꞌokꞌjal. 4 Ntons te Judas Iskaryot jun te aj txnaqꞌatz te Jesus bꞌix aj ojawel tuq meltzꞌjik tiꞌjky, tetz oxik tqꞌumaꞌ ikxjani: 5 “¿Tistil kꞌontiꞌl ma xik kꞌaylet te ja tkꞌokꞌjalni tzan twiꞌ tkꞌuꞌj jun xjal te jun aqꞌbꞌia bꞌix maꞌ-tal xik siꞌlet kye aꞌeꞌ mebꞌaꞌ xjal?” 6 Per te Juds oxik tqꞌumaꞌ ntzani nyaꞌtx tzan tpaj-wit nꞌok loꞌet tkꞌuꞌj kyiꞌj kye mebꞌaꞌ xjal, sinoke komo tetz aji tuq te kꞌuꞌul tmin, ntons oxik tqꞌumaꞌ ikxji tzan tuq tel telqꞌaꞌ chꞌin tiꞌj. 7 Yaji te Jesus oxik tqꞌumaꞌ tetz ikxjani: “Kꞌon chyolin tiꞌj ja xujni, tetz cha kꞌuꞌuꞌ tuq titzaꞌ tzan nqet tkꞌuluꞌ bꞌex ajnaꞌl chaꞌoj nmuqet. 8 Bꞌix yatzun kyiꞌj kye mebꞌaꞌ xjal, kyetz bꞌajqꞌij okyeqtelten exol* per wetz nlay kyinqeten exol.”
Aj Tqet Kybꞌisuꞌ Tzan Tqet Kykansaꞌ Te Lásaro
9 Yaji kyꞌilaꞌj kye aj tijajil Israel owok kchaꞌoꞌ qa te Jesus atqet tuq tuj Betany, ntons ebꞌajxwaꞌq tjay Lásaro nyaꞌtx aꞌox eꞌel Jesus sinoke ax eꞌel tuq te Lásaro aj ojaw anqꞌin tzan te Jesus. 10 Ntons kye pal aj nim kyajwalil oqet kybꞌisuꞌ tzan tuq tqet kykansaꞌ ax te Lásaro, 11 tzan tpaj kyꞌilaꞌj tuq kye xjal aj tijajil Israel nꞌel kypawaꞌ tuq kyibꞌ kyiꞌj kyetz tzan kyokslan tuq tiꞌj te Jesus tzan tpaj te Lásaro.
Titzaꞌ Okꞌamjik Te Jesus Tzan Kye Xjal Aj Jerusalen
12 Tuj junky iwitq kyꞌilaꞌj xjal aj ojetq tuq kyejakon tuj te qꞌij te Paskw, owok kchaꞌoꞌ qa te Jesus opoyon tuq Jerusalen, 13 ntons kyetz otzaj kyiqaꞌ txaq rams bꞌix eꞌex kanol tetz, bꞌix nkyesikyꞌin tuq ikxjani: “¡Galanxwit kyꞌik tiꞌj te aj ma tzul kolol qetza!* ¡Galanxwit kyꞌik tiꞌj te aj tzul aj tlajen Qajawil! ¡A tetz te twitzaleꞌ kꞌulul mandad te qamaqꞌ Israel!” 14 Te Jesus, oxik siꞌ tetz jun chꞌi tal bur, bꞌix ojaw iqaꞌ tzan te tal bur, ikxji okyꞌik kixiꞌ iktzaꞌx nyolin tuj te Tuꞌjal Dios, 15 “Etetz aꞌix aj amaqꞌ Jerusalen,b kꞌon kxobꞌ. Intxik eten te twitzaleꞌ kꞌulul mandad te etetz, tzul iqaꞌ tzan jun chꞌi tal bur.”*
16 Tbꞌay kye txnaqꞌatz te Jesus kꞌontiꞌl owox tuj kywiꞌ kyaqil aj ntzani, per ya ma jakon tuj twitꞌlel tuj kaꞌj ntons maxji otzaj kynaꞌoꞌ kyaqil aj okyꞌik tiꞌj aj qꞌijji, komo ya tzꞌibꞌankaj tuq tiꞌj oqtxiꞌ. 17 Ntons kye xjal aj akyeqet tuq tukyꞌi Jesus aj tetz tukꞌleꞌ te Lásaro aj tjaw anqꞌin titzaꞌ, kyetz nxik tuq kypakbꞌaꞌ kyaqil aj ojetq tuq tzꞌok kyen. 18 Astilji kye xjal eꞌetz kanol tetz tzan tpaj ojetq tuq tzꞌok kchaꞌoꞌ tiꞌj te seny aj oqet tkꞌuluꞌ tukyꞌi tajwalil Dios. 19 Yatzun kye aj bꞌuchꞌuj Parisey nkyqꞌumaꞌ tuq kyibꞌkyibꞌx ikxjani: “Intok eten waq etetz, ikxji nlay bꞌantik tidiꞌ qitzaꞌ, intxik eten kyaqil kye xjal nkyeꞌok lapet tiꞌj.”
Aj Tpon Joybꞌaj Jesus Tzan Xjal Aj Nyaꞌtx Txjalil
20 Ntons, kxol kye xjal aj ejakon naꞌol Dios tuj te qꞌij, ateꞌ junjun xjal aj nyaꞌtx tijajil Israel. 21 Kyetz eꞌok laqꞌchet tiꞌj te Lip aj Betsayd jun amaqꞌ tuj tkwentil Galiley, bꞌix oqet kywitz twitz, oxik kyqꞌumaꞌ ikxjani: “Tat, qetza qgana tzan tok qen te Jesus.” 22 Ntons te Lip oxik tqꞌumaꞌ te Lexh bꞌix kykabꞌil exwaꞌq qꞌumal tukyꞌi Jesus. 23 Ntons te Jesus oxik tqꞌumaꞌ: “Maꞌtx pon or tzan tok en te tumeꞌl bꞌan bꞌanꞌax iktzaꞌxkix [wetz aꞌin] te Ichan Aj Tkꞌwaꞌal Dios [aꞌin]. 24 Oxeꞌl nqꞌumaꞌ etetz bꞌan bꞌanꞌax, qa jun twitz triw nqet tuj txꞌoꞌtxꞌ bꞌix qa nlay naj, ntons xhchukel tetz atqet, per qa okamel ntons opuquyon mas. 25 Abꞌl te aj nꞌok tsiꞌ tkꞌuꞌj tzan tkolon tanqꞌin, tetz okamel; yatzun te aj kꞌon tgan tzan tkolon tanqꞌin iktzaꞌ kyanqꞌin kye xjal aj tzani twitz txꞌoꞌtxꞌ, tetz owanqꞌiyon kixiꞌ.* 26 Abꞌl aj tgan tzan nqet tokslaꞌ, ntons intok lapet wiꞌj, bꞌix aj jaꞌ wetz okyinqtelten, ax tzi oqtelten tetz. Abꞌl aj nkyinqet tokslaꞌ, oqtel jiqꞌbꞌaꞌ tzan Ntat.”
Aj Txik Tqꞌumaꞌ Jesus Titzaꞌ Tuq Ntnaꞌoꞌ Tuj Tanim Tzan Tpaj Chꞌinky Tuq Tkamik
27 “Wetz ajnaꞌl tuj wanim maꞌtx kyinxik tuj bꞌis, bꞌix ¿tidiꞌ nyoliꞌtz wetz? ¿Oꞌ petzun oxeꞌl nqꞌumaꞌ “Tat, kyinꞌel akoloꞌ tiꞌj aj okyꞌel wiꞌj tuj ja orni”? ¡Nlay! Komo wetz inꞌul tzan tkyꞌikkix wiꞌj aj okyꞌel tuj ja orni. 28 Tat, intqet ayekꞌuꞌ te tumeꞌl bꞌan bꞌanꞌax awiꞌj iktzaꞌxkix yatz aꞌich.” Yaji oxik chaꞌoꞌ tuj kaꞌj ikxjani: “Wetz oje qet nyekꞌuꞌ te tumeꞌl bꞌanꞌax wiꞌj iktzaꞌxkix wetz aꞌin bꞌix oqtel nkꞌuluꞌ junkyꞌel.” 29 Ntons kye xjal aj akyeqet tuq tzi, oxik kchaꞌoꞌ, bꞌix nkyqꞌumaꞌ tuq qa jun ray ma tzaj, bꞌix junjunky nkyqꞌumaꞌ tuq jun ángel ma tzaj yolin tukyꞌiꞌl. 30 Yaji te Jesus oxik tqꞌumaꞌ ikxjani: “Nyaꞌtx tzan tnimsan nkꞌuꞌj wetz aj ma tzaj qꞌumaꞌni sinoke te jun galan te etetz. 31 Maꞌtx pon or tzan txik qꞌumaꞌ te bꞌanꞌax kyiꞌj kye xjal twitz ja txꞌoꞌtxꞌni, bꞌix maꞌtx pon or tzan tex lajoꞌ te twitzaleꞌ tiꞌj te nyaꞌtx galan twitz ja txꞌoꞌtxꞌni. 32 Bꞌix wetz, oj njaw eqꞌiꞌ wetz tajsik txꞌoꞌtxꞌ, okyetzajel wukꞌleꞌ kyaqil xjal wiꞌj.” 33 Ntons tetz, aj nxik tuq tyoliꞌ ikxjani telponx tiꞌj titzaꞌ tuq tetz okamel. 34 Kye xjal owaj kyqaniꞌ tetz ikxjani: “Qetza oje tzꞌok qchaꞌoꞌna tuj te Kawbꞌil, te Koloyon Aj Qꞌumankaj Oqtxiꞌ oqteltenkix te jun-eleꞌx.* ¿Titzaꞌ txiklen ayol ikxnini qa te Ichan Aj Tkꞌwaꞌal Dios ojawel eqꞌiꞌ twitz txꞌoꞌtxꞌ? ¿Abꞌl te Ichan Aj Tkꞌwaꞌal Dios nꞌaqꞌumaꞌni?” 35 Ntons te Jesus oxik tqꞌumaꞌ kyetz: “Ya nyaꞌtx nim tyemp tzan nten exol etetz tzan nswan chkꞌatunal tuj ewitz. Peꞌebꞌet tuj ja chkꞌatunalni minaꞌx tuq tul te qlolj etiꞌj tzan tpaj te aj nbꞌet tuj qlolj kꞌontiꞌl tebꞌen jaꞌ ikjaꞌn txik. 36 Peꞌetokslan waq wiꞌj man atinqet exol tzan nswan chkꞌatunal tuj ewitz, bꞌix ikxji tzan etok etetz xjal aj xhkꞌatun tuj ewitz.” Ya ma xik tqꞌumaꞌ kyaqil ntzani, te Jesus owex kxol bꞌix owewan kywitz.
Aj Tyolin Jesus Kyiꞌj Kye Aj Kꞌontiꞌl Tuq Nkyeꞌokslan
37 Anke te Jesus ojetq tuq qet tkꞌuluꞌ tidiꞌchq yekꞌbꞌil kywitz kye xjal tukyꞌi tajwalil Dios, per kꞌontiꞌl tuq nkyeꞌokslan [kyꞌilaꞌj xjal] tiꞌj. 38 Presiskix tuq tzan tpon tyol te Chay aj yolil tyol Dios oqtxiꞌ, aj jaꞌ nyolin ikxjani: “Tat, nijunwt abꞌl oje xik okslan te aj nxik qpakbꞌaꞌna. ¡Per aꞌeꞌxk kyetz oje tzꞌok kyen apoder yatz!”c 39 Astilji kꞌontiꞌl tuq nxik kyokslaꞌ. Komo ax oqet stzꞌibꞌaꞌ te Chay ikxjani: 40 “Te Qtata Dios oje qet xtxayiꞌ te kywitz, oje qet xtxayiꞌ twitz te kyanim, tzan kꞌon tel kynikyꞌ, tzan kꞌon kyok lapet wiꞌj tzan kybꞌantik.”*
41 Aj ntzani oqet stzꞌibꞌaꞌ te Chay tzan tpaj tetz owok jotoꞌ tuj twitz tidiꞌchq aj telponx te Qtata Dios atqet tuq tukyꞌi te [Koloyon Aj Qꞌumankaj Oqtxiꞌ] bꞌix oqet stzꞌibꞌaꞌ tiꞌj. 42 Per yatzun kxol kye xjal aj nim kyajwalil [kxol kye aj tijajil Israel], kyꞌilaꞌj kxol kyetz kygan tuq tzan kyokslan tiꞌj, per tzan tpaj kye aj bꞌuchꞌuj Parisey kꞌontiꞌl tuq nxik kyqꞌumaꞌ kywitz xjal tzan kꞌon tuq kyetz eqꞌiꞌ tuj te jay nabꞌil Dios. 43 Mas kygan tuq tzan kyqet jiqꞌbꞌaꞌ tzan kye xjal bꞌix nyaꞌtx tzan Qtata Dios.
44 Ntons te Jesus oxik tqꞌumaꞌ kongan [aj jaꞌ tuq npakbꞌan kxol kye xjal]: “Abꞌl te aj nꞌokslan wiꞌj, nyaꞌtx cha aꞌox wiꞌj nꞌokslan sinoke ax tiꞌj te aj otzaj lajon wetz. 45 Bꞌix abꞌl te aj nkyinꞌok totzqilaꞌ ax nꞌok totzqilaꞌ te aj otzaj lajon wetz. 46 Aꞌin wetz swal chkꞌatunal tuj kywitz kye xjal, bꞌix maꞌtx kyinꞌul tzani twitz txꞌoꞌtxꞌ tzan kꞌon kyten tuj qlolj kyaqil kye aj okyeꞌokslayon wiꞌj. 47 Qa at abꞌl nꞌok xhchan te nyol bꞌix kꞌontiꞌl nqet tokslaꞌ, wetz kꞌontiꞌl nxik nswaꞌ xhchoꞌnal tiꞌj tzan tpaj wetz nyaꞌtx swal xhchoꞌnal kyiꞌj kye xjal inꞌul twitz txꞌoꞌtxꞌ sinoke tzan nkolon kyiꞌj. 48 Abꞌl te aj okyinꞌelal tikꞌoꞌ bꞌix nlay xik tokslaꞌ te nyol, chaꞌoj tul te jwisy at titzaꞌ oxeꞌl swaꞌ tuj il, komo wetz nyol aj oje xik nqꞌumaꞌ, max tuj te jwisy otzajelkix naꞌoꞌ tzan txik swaꞌ tuj il te aj xjalji. 49 Tzan tpaj wetz kꞌontiꞌl nkyinyolin cha tuj nwiꞌx-wit nꞌetz win, sinoke te Ntat aj otzaj lajon wetz aji ntzaj qꞌuman wetz kyaqil aj a tgan tzan txik nqꞌumaꞌ. 50 Bꞌix wetz webꞌen kyaqil aj ntzaj tqꞌumaꞌ te Ntat te jun qanqꞌin te jun-eleꞌx. Ntons, iktzaꞌx te aj oje tzaj tqꞌumaꞌ te Ntat ax ikxji wetz nxik nqꞌumaꞌ.”