19
Aj Tok Otzqilaꞌ Te Sakey Tzan Jesus
1 Ntons te Jesus opon Jeriko, bꞌix ikjaꞌn tuq tkyꞌik tuj te amaqꞌ. 2 Ntons, tuj aj amaqꞌji nnajan tuq jun xjal Sakey tbꞌi. Tetz jun kꞌulul mandad tuq kxol kye aj peyul chojenj te amaqꞌ Rom, bꞌix bꞌan qꞌinon tuq. 3 Tetz tgan tuq tzan tok totzqilaꞌ Jesus, per kꞌontiꞌl tuq nbꞌantik tzan tpaj ajun xjal tuq, bꞌix te Sakey, nyaꞌtx tuq nim twaꞌlkal. 4 Astilji tetz oxik tbꞌayon bꞌix ojax twiꞌ jun tzeꞌ sikómoro, qaynin aj jaꞌ tuq chꞌinky tkyꞌik te Jesus. 5 Yaji ya ma kyꞌik te Jesus tjaqꞌ te tzeꞌ, ojax tkaꞌyiꞌ jawnaq bꞌix oxik tqꞌumaꞌ tetz ikxjani: “Sakey, paqetz naj tzan tpaj ajnaꞌl a tgan tzan nkaj ajay.” 6 Ntons te Sakey oqetz naj bꞌix nchalaj tuq tzan tkꞌamon te Jesus tuj tjay.
7 Ya ma tzꞌok kyeꞌeꞌ kye xjal ntzani, owaqꞌik tzan kyyolin nyaꞌtx galan tiꞌj Jesus. Nkyqꞌumaꞌ tuq ikxjani: “Tetz maꞌtx xik tjay jun chimol choj.” 8 Yatzun te Sakey, tetz ojaw waꞌlet [kxol kye xjal tuj tjay] bꞌix oxik tqꞌumaꞌ te Jesus ikxjani: “Tat, tzaj aweꞌeꞌ, wetz oxeꞌl nsiꞌ kye mebꞌaꞌ xjal lamitan te aj at te wetz, bꞌix qa wetz owel welqꞌaꞌ jun tidiꞌ te junky, ajnaꞌl owajel nsiꞌ kajmaj mas twitz te aj owel welqꞌaꞌ.” 9 Ntons te Jesus oxik tqꞌumaꞌ ikxjani: “Tuj ja qꞌij ajnaꞌl tuj ja jay ntzani, maꞌtx kꞌamet te tumeꞌl titzaꞌ te Qtata Dios nkolon kye xjal tzan tpaj te ja xjalni ax jun aj nꞌokslan te Qtata Dios iktzaꞌ te Abran.* 10 Komo [wetz] te Ichan Aj Tkꞌwaꞌal Dios [aꞌin] maꞌtx kyinꞌul joyol bꞌix kolol te aj ojetq tuq xiknaj.”*
Te Yekꞌbꞌil Tiꞌj Titzaꞌ Tzan Jkꞌulun Tukyꞌi Te Aj Ntzaj Tsiꞌ Te Qtata Dios Qetz
11 Ntons, man tuq nkyechaꞌon kye xjal tiꞌj Jesus, tetz oxik tqꞌumaꞌ jun yekꞌbꞌil tzan tpaj qaynin tuq atqet tiꞌj Jerusalen, bꞌix kyetz nkybꞌisuꞌ tuq te Qtata Dios chꞌinky tuq tkꞌulun mandad tzan tkolpin kye aj tijajil Israel. 12 Oxik tqꞌumaꞌ kyetz ikxjani: “At tuq jun xjal, tlimaqal xjal tuq, bꞌix oxik tuj junky amaqꞌ bꞌan laqꞌchik kꞌamol te tajwalil tzan tuq tmeltzꞌjik kꞌulul mandad tuj tamaqꞌx. 13 Ntons aj minaꞌ tuq txik tuj tbꞌey, eꞌok xhchimoꞌ lajuj tmos bꞌix oxik tqꞌapoꞌ junjun te kyetz nim tmina bꞌix oxik tqꞌumaꞌ ikxjani: “Peꞌexkꞌaꞌman tukyꞌi ja tminni max oj nmeltzꞌjik.” 14 Per kye xjal tuj aj amaqꞌji, kyetz kꞌon kygan tuq tzan tkꞌulun mandad te xjal kyiꞌj. Astilji oxik kylajoꞌ jun bꞌuchꞌuj xjal tiꞌjx tzan kypon aj jaꞌ tuq opoyon te xjal kꞌamol tajwalil bꞌix tzan tuq txik kyqꞌumaꞌ ikxjani: “Qetza kꞌon qgan tzan tok ja xjal ntzani te kꞌulul mandad qetza.”
15 Per te xjal, otzaj siꞌ tajwalil tzan tkꞌulun mandad bꞌix yaji omeltzꞌjik tuj tamaqꞌ. Ya ma tzul tuj te tamaqꞌ, eꞌok xhchimoꞌ kye tmos aj jaꞌ ojetq tuq xik tsiꞌ te tmin kyetz tzan tuq tok xhchaꞌoꞌ tidiꞌ oqet kykꞌuluꞌ tukyꞌi te tmin. 16 Opon te tbꞌay bꞌix oxik tqꞌumaꞌ ikxjani: “Tat, yatz atumin maꞌtx talaj lajuj-el mas nim twitz aj otzaj aqꞌapoꞌ wetz.” 17 Yaji te kꞌulul mandad oxik tqꞌumaꞌ ikxjani: “Byenech awitzaꞌ, yatz aꞌich jun mosj bꞌan galan. Bꞌix ajnaꞌl tzan tpaj galan ma akꞌuluj tukyꞌi jun tidiꞌ aj nyaꞌtx nim, ajnaꞌl oxhchꞌokel nsiꞌ kꞌulul mandad tiꞌj lajuj amaqꞌ.” 18 Yaji opon junky tmos bꞌix oxik tqꞌumaꞌ ikxjani: “Tat, te atumin maꞌtx talaj jwebꞌ-el mas nim twitz aj otzaj aqꞌapoꞌ wetz.” 19 Yaji ax oxik tqꞌumaꞌ te kꞌulul mandad tetz ikxjani: “Ax yatz, oxhchꞌokel kꞌulul mandad kyiꞌj jwebꞌ amaqꞌ.”
20 Per yaji opon junky tmos bꞌix oxik tqꞌumaꞌ ikxjani: “Tat, ntzani te atumin. Wetz cha owox nkꞌuꞌuꞌ tuj jun kꞌalbꞌilj, 21 tzan tpaj wetz ochqet nxobꞌleꞌ tzan tpaj yatz aꞌich jun xjal bꞌan kaw bꞌix njaw awin aj jaꞌ kꞌontiꞌl oqet asiꞌ, bꞌix njaw awin aj jaꞌ kꞌontiꞌl oxhchꞌawan.” 22 Ntons te kꞌulul mandad oxik tqꞌumaꞌ tetz ikxjani: “Yatz aꞌich jun mosj aj nyaꞌtx galan chnabꞌlin. Otxeꞌl nsiꞌ tuj il tzan tpaj aj maꞌtx ayolijni. Qa yatz awebꞌen tuq qa wetz aꞌin jun xjal aj kaw kyinnabꞌlin, bꞌix qa wetz njaw weqꞌiꞌ aj jaꞌ kꞌontiꞌl nqet nsiꞌ bꞌix qa njaw weqꞌiꞌ aj jaꞌ kꞌontiꞌl inꞌawan, 23 ¿tistil kꞌontiꞌl oxik asiꞌ ntumin kyukyꞌi kye swal kyꞌexj tzan nkꞌamon wetz junkyꞌel tukyꞌi taꞌal ntumin oj nmeltzꞌjik njay?” 24 Yaji te kꞌulul mandad oxik tqꞌumaꞌ kye aj akyeqet tuq tzi, oxik tqꞌumaꞌ ikxjani: “Intel etin te tmin tetz, bꞌix intxik eswaꞌ te aj otalaj lajuj-el mas nim.” 25 Yaji kye xjal oxik kyqꞌumaꞌ ikxjani: “Tat, per tetz maꞌtx tkꞌamoj lajuj tmin.” 26 Yaji te kꞌulul mandad oxik tqꞌumaꞌ ikxjani: “Wetz oxeꞌl nqꞌumaꞌ etetz, abꞌl te aj at nim tetz, oxeꞌl siꞌlet mas, per te aj nyaꞌtx nim tetz, te aj nyaꞌtx nim owelal iqꞌlet.b 27 Bꞌix kye aj wajqꞌoj aj kꞌon kygan tuq tzan nkꞌulun mandad kyiꞌj, inktzaj eteqꞌiꞌ tzani, bꞌix inkyqet ekansaꞌ nwitz wetz.””
Aj Tox Te Jesus Tuj Jerusalen
28 Ya ma xik tqꞌumaꞌ te Jesus ikxjani, tetz oxik tbꞌayon kywitz kye txnaqꞌatz tuj tbꞌeyil Jerusalen. 29 Ya ma pon qaynin tiꞌj te [aldey] Betfaje bꞌix te [aldey] Betany, tiꞌj te witz aj tbꞌi Olib, exik tlajoꞌ kabꞌeꞌ txnaqꞌatz, 30 oxik tqꞌumaꞌ kyetz ikxjani: “Pex waq tuj te aldey aj nxik qen qwitzni, bꞌix oj epon txini, owokelnoj ewitz jun tal bur, aj nijunwt xjal oje jaw tiqaꞌ ni jun-el. Owelal epujuꞌ bꞌix otzajel etin tzani. 31 Qa at abꞌl otzajel qanin etetz tistil nꞌel epujuꞌ ntons owajel etzaqꞌbꞌeꞌ: “Te Qajawil owokeyon titzaꞌ.””
32 Ntons kye aj ebꞌajxik lajoꞌ, kyetz ebꞌajxik, bꞌix owoknoj kywitz iktzaꞌx ojetq tuq xik qꞌumaꞌ kyetz. 33 Aj man tuq nꞌel kypujuꞌ te tal bur, kye tajaw oxik kchaꞌoꞌ ikxjani: “¿Tistil nꞌel epujuꞌ te tal bur?” 34 Yaji kyetz oxik kyqꞌumaꞌ ikxjani: “Tzan tpaj te Qajawil owokeyon titzaꞌ.”
35 Ntons opon kyin te tal bur tukyꞌi Jesus, bꞌix ojax ksiꞌ te ktxoꞌw tajsik bꞌix te Jesus ojaw iqaꞌ. 36 Bꞌix aj man tuq nbꞌet tuj tbꞌey, kye xjal nqet tuq ksakoꞌ te ktxoꞌw tuj bꞌey [tzan tkyꞌik tajsik tzan kykꞌamon tetz tukyꞌi jun tumeꞌl bꞌan galan]. 37 Aj chꞌinky tuq taqꞌik tzan tqetlin te witz Olib, kyaqil kye aj txnaqꞌatz bꞌan nkyechalaj tuq, eꞌaqꞌik tzan kchalajsan te Qtata Dios tukyꞌi jun kywiꞌ bꞌan nim tzan tpaj ojetq tuq tzꞌok kyeꞌeꞌ tidiꞌchq tkꞌulbꞌen Jesus tukyꞌi nim tajwalil Qtata Dios. 38 Nxik tuq kyqꞌumaꞌ kongan ikxjani: “Galanxwit kyꞌik tiꞌj te kꞌulul mandad aj tzul aj tlajen Qajawil. [Te Qtata Dios aj atjax] tuj kaꞌj chewsaꞌ tkꞌuꞌj bꞌix nim chalajbꞌil nkyꞌik tuj kaꞌj.”* 39 Ntons junjun aj te bꞌuchꞌuj Parisey aj akyeqet tuq kxol kye xjal oxik kyqꞌumaꞌ ikxjani: “Xnaqꞌtzon, inkxik amiyoꞌ kye aj lapikeꞌ awiꞌjni.” 40 Per yaji te Jesus owaj stzaqꞌbꞌeꞌ kyetz ikxjani: “Oxeꞌl nqꞌumaꞌ etetz, qa kyetz okyelumetel, ntons kye abꞌj [stziꞌ bꞌey] okyejawel sikyꞌin.”
41 Ya ma pon qaynin tiꞌj Jerusalen bꞌix ya ma xik teꞌeꞌ te amaqꞌ, ntons te Jesus owokten oqꞌel tiꞌj, 42 oxik tqꞌumaꞌ ikxjani: “Cha tzun-wit nꞌox tuj ewiꞌ, nkesey-tal max ajnaꞌl te aj bꞌaꞌn tzan xhchewsan ekꞌuꞌj. Per tzunx qlolj tuj ewitz. 43 Tzul jun tyemp aj okyꞌel nim nyaꞌtx galan etiꞌj, bꞌix kye etajqꞌoj owokel kchꞌuqiꞌ txꞌoꞌtxꞌ tiꞌj te loqꞌ tiꞌj etamaqꞌ, ikxji tzan kyox bꞌix okyeꞌokel noj etiꞌj kyaqil palaj okyeqꞌojiyon etiꞌj. 44 Bꞌix te etamaqꞌ oqtelbꞌaj kxituꞌ kyaqil. Okxtel kykansaꞌ ekyaqil aj nkxnajan tzi bꞌix ni nlay kaj ksiꞌ ni jun pant abꞌj tajsik junky, okyꞌel kyaqil ntzani tzan tpaj kꞌontiꞌl owel enikyꞌ aj tul te Qtata Dios kolol etetz.”
Aj Kyex Tlajoꞌ Jesus Kye Kꞌayiyon Tuj Te Nin Jay Nabꞌil Qtata Dios
45 Yaji te Jesus owox tuj te Nin Jay Nabꞌil Qtata Dios, bꞌix owaqꞌik tzan kyex tlajoꞌ kye aj nkyekꞌayin tuq tzi. 46 Oxik tqꞌumaꞌ kyetz ikxjani: “Tzꞌibꞌankaj ikxjani: “Wetz njay owokeyon tzan kxnaqꞌtzan wiꞌj.”* Per yatzun etetz maꞌtx ekꞌuluj tzan token etitzaꞌ iktzaꞌ kyjay eleqꞌ.”*
47 Ntons, kyaqil qꞌij te Jesus nxnaqꞌtzan tuq kye xjal tuj te Nin Jay Nabꞌil Qtata Dios bꞌix kye aj kꞌulul mandad kye pal bꞌix kye aj xnaqꞌtzal Kawbꞌil bꞌix kye aj at kyajwalil kxol kye xjal, kyetz nkyejoyon tuq tumeꞌl titzaꞌ tzan tqet kykansaꞌ. 48 Per kꞌontiꞌl tuq nꞌoknoj jun tumeꞌl titzaꞌ tzan tqet kykansaꞌ tzan tpaj kyaqil tuq kye xjal nkyechaꞌon tuq tiꞌj.