18
Te Yekꞌbꞌil Tzan Kꞌon Tkaj Qsiꞌ Tzan Qxnaqꞌtzan
1 Ntons, yaji te Jesus ax oxik tqꞌumaꞌ jun yekꞌbꞌil kyetz tzan kxik tuq txnaqꞌtzaꞌ tzan kxnaqꞌtzan bꞌajqꞌij tukyꞌi Qtata Dios bꞌix kꞌontiꞌl tzan tkaj kykolaꞌ. 2 Oxik tqꞌumaꞌ kyetz ikxjani: “At tuq jun pujul il tuj jun amaqꞌ, tetz kꞌontiꞌl tuq nꞌokslan tiꞌj Qtata Dios bꞌix kꞌontiꞌl tuq nxobꞌ kywitz nijunwt xjal. 3 Bꞌix ax tuj aj amaqꞌji at tuq jun xuj byud, kobꞌchaq tuq npon tukyꞌi te pujul il, nxik tuq tqꞌumaꞌ tetz ikxjani: “Kolon chꞌin wiꞌj, kꞌuluj tumeꞌl tukyꞌi te aj nqꞌojin wiꞌjni.” 4 Te pujul il kꞌontiꞌl otbꞌanij tzan txik tnaꞌoꞌ te xjal, per yaji oqet tbꞌisuꞌ ikxjani: “Anke wetz kꞌontiꞌl nkyinꞌokslan tiꞌj Dios bꞌix kꞌontiꞌl nkyeqet nxobꞌleꞌ xjal, 5 oqtel nkoloꞌ ja byudni, oqtel nkꞌuluꞌ tumeꞌl tukyꞌiꞌl tzan tpaj kꞌontiꞌl nkaj tsiꞌ tzan tkꞌulun joder, kebal otzajel tmeqꞌtzaꞌ nwiꞌ.””
6 Yaji te Jesus oxik tqꞌumaꞌ ikxjani: “Intok esiꞌ ewiꞌ tiꞌj te aj ntyoliꞌ te pujul il aj kꞌontiꞌl Kawbꞌil tuj tqꞌabꞌ. 7 Pyorx-alo te Qtata Dios. ¿Nlay petzun kyeqet tkoloꞌ kye aj nqet kywitz twitz bꞌajqꞌij bꞌix bꞌajaqꞌbꞌil? ¿Oꞌ petzun onachqꞌiyon nim tuj tzan tkolon kyetz? 8 Oxeꞌl nqꞌumaꞌ etetz, tetz tukyꞌi tkawbꞌil tuj tqꞌabꞌ okoloyon kyetz naj. Per chaꞌoj wul [wetz] te Ichan Aj Tkꞌwaꞌal Dios [aꞌin], ¿ateꞌx petzun xjal twitz txꞌoꞌtxꞌ aj tzunx witꞌlik kykꞌuꞌj wiꞌj?”
Te Yekꞌbꞌil Tzan Kꞌon Tqet Qjiqꞌbꞌaꞌ Qibꞌ Twitz Qtata Dios
9 Yaji te Jesus oxik tqꞌumaꞌ junky yekꞌbꞌil ntzani tzan tpaj junjun xjal, kyetz tuj kynabꞌl bꞌan galan-eꞌ tuj twitz te Qtata Dios, bꞌix cha nꞌel tuq kyikꞌoꞌ kye txqꞌanky. Oxik tqꞌumaꞌ kyetz ikxjani: 10 “Kabꞌeꞌ xjal ebꞌajxwaꞌq xnaqꞌtzon tuj te Nin Jay Nabꞌil Qtata Dios, jun aj bꞌuchꞌuj Parisey, bꞌix te junky, tetz jun aj peyul chojenj tuq. 11 Te xjal aj bꞌuchꞌuj Parisey, tetz waꞌlk nxnaqꞌtzan tuq ikxjani: “Tata Dios, wetz nxik nsiꞌ pixon te yatz tzan tpaj wetz nyaꞌtx aꞌin iktzaꞌ kye txqꞌanky xjal, kyetz eleqꞌ-eꞌ bꞌix kꞌontiꞌl kykawbꞌil tuj kyqꞌabꞌ bꞌix nkyekꞌajajin, bꞌix wetz nyaꞌtx aꞌin iktzaꞌ te ja peyul chojenjni. 12 Wetz nkyinꞌipan waꞌij kaꞌmj jun saman [tzan atzaj nnaꞌoꞌ] bꞌix nkaj npawaꞌ te yatz te tlajujiꞌ part tiꞌj kyaqil aj nkyinkꞌulun ganar.” 13 Per yatzun te peyul chojenj, tetz okaj waꞌlet laqꞌchik bꞌix ni kꞌontiꞌl tuq ntnimsaꞌ tkꞌuꞌj tzan tjaw tkaꞌyiꞌ chꞌin jawnaq. Cha tuq nꞌok stinkꞌaꞌ tpech bꞌix nxik tuq tqꞌumaꞌ ikxjani: “Tata Dios, intok loꞌet chꞌin akꞌuꞌj wiꞌj. Wetz aꞌin jun xjal chimol choj tuj awitz.” 14 Ntons, wetz oxeꞌl nqꞌumaꞌ etetz, te aj peyul chojenj tetz aj taj tjay, ojetq tuq qet najsaꞌ xhchoj; yatzun te aj Parisey tetz xhchoj kꞌontiꞌl oqet najsaꞌ. Abꞌl te aj nqet tjiqꞌbꞌaꞌ tibꞌx, owelal eqꞌiꞌ tkyꞌexaw; yatzun te aj nbꞌisun nim tuj twitz Qtata Dios tzan tpaj xhchoj, tetz oqtel jiqꞌbꞌaꞌ.”*
Aj Kyqet Tkyꞌiwlaꞌ Jesus Kye Kꞌwaꞌl
15 Ax nkyepon in tuq twitz Jesus kye tal kꞌwaꞌl tzan tuq tqet tsiꞌ tqꞌabꞌ kyajsik [tzan kyqet tkyꞌiwlaꞌ], per ya ma xik kyen kye txnaqꞌatz, kyetz eꞌaqꞌik tzan tok kyiliꞌ [kye xjal aj nkyepon in tuq kye kꞌwaꞌl]. 16 Ntons te Jesus etzaj tukꞌleꞌ bꞌix oxik tqꞌumaꞌ kyetz ikxjani: “Tzoqpij waq tzan kyul kye kꞌwaꞌl wukyꞌiꞌl bꞌix kꞌon tzꞌel eteqꞌiꞌ gan kyetz tzan tpaj kye aj nkyekaj tuj tqꞌabꞌ te Qtata Dios iktzaꞌ kye aj ntzanijeꞌni. 17 Oxeꞌl nqꞌumaꞌ etetz te bꞌanꞌax, abꞌl aj nlay tkꞌamoj tzan tkꞌulun mandad te Qtata Dios tiꞌj iktzaꞌ jun kꞌwaꞌl [ntkꞌamoꞌ], ntons tetz nlay bꞌantik tzan tkaj tuj tqꞌabꞌ Qtata Dios.”
Aj Tpon Tukyꞌi Jesus Jun Xjal Qꞌinon
18 Ntons tzaj te jun xjal aj bꞌan otzqiꞌmj tuq kxol kye xjal, oxik xhchaꞌoꞌ te Jesus ikxjani: “Xnaqꞌtzon, yatz bꞌan galan aꞌich. ¿Tidiꞌ presis tzan nkꞌulun tzan wanqꞌin te jun-eleꞌx?” 19 Yaji te Jesus owaj stzaqꞌbꞌeꞌ tetz ikxjani: “¿Tistil ntzaj aqꞌumaꞌ wetz qa bꞌan galan aꞌin? Aꞌox at cha jun te aj bꞌan galan: Aꞌox te Qtata Dios. 20 Yatz awebꞌen te aj okaj tqꞌumaꞌ te Qtat oqtxiꞌ: Kꞌon chkꞌajajin,* kꞌon chkansan,* kꞌon xhchꞌelqꞌan,* kꞌon chyolin jun nikꞌbꞌil tiꞌj junky,* bꞌix ax inkyqet awokslaꞌ te anan bꞌix te atat.”* 21 Yaji te xjal oxik tqꞌumaꞌ tetz ikxjani: “Kyaqil nini wetz nqet nkꞌuluꞌ atx aj man tuq kꞌwaꞌl aꞌin.” 22 Ya ma tzꞌok xhchaꞌoꞌ te Jesus ikxji, tetz oxik tqꞌumaꞌ ikxjani: “Atx junky tidiꞌ npaltin aj minaꞌ tqet akꞌuluꞌ: Intxik akꞌayiꞌ kyaqil aj tidiꞌ yatz bꞌix intqet asipaꞌ te twibꞌen kxol kye mebꞌaꞌ xjal bꞌix yaji owokelnoj jun aqꞌinomal tuj kaꞌj, bꞌix pawok lapet wiꞌj.” 23 Yaji, te xjal, ya ma tzꞌok xhchaꞌoꞌ ikxji, tetz oje bꞌisun tzan tpaj tetz jun xjal qꞌinon tuq.
24 Yaji, ya ma tzꞌok ten te Jesus [te xjal bꞌan nbꞌisun tuq], oxik tqꞌumaꞌ ikxjani: “Bꞌan kwest tzan tkꞌamon jun qꞌinon tzan tkaj tuj tqꞌabꞌ Qtata Dios. 25 Komo mas nyaꞌtx kwest tzan tkyꞌik jun kway kamey tuj xhchutil jun akuxh, twitz te jun qꞌinon [tzan tkaj tsiꞌ tqꞌinomal] tzan tkaj tuj tqꞌabꞌ Qtata Dios.” 26 Ntons kye xjal aj nkyechaꞌon tuq tiꞌj oxik kchaꞌoꞌ tetz ikxjani: “Ntons ¿abꞌl obꞌantel tzan tkolet?” 27 Ntons te Jesus oxik tqꞌumaꞌ ikxjani: “Te aj nlay bꞌantik tzan kye xjal, te Qtata Dios bꞌaꞌn tzan tbꞌantik titzaꞌ.” 28 Tzaj te Xhpeꞌy, oxik tqꞌumaꞌ tetz ikxjani: “Tat, qetza oje kaj qsiꞌna kyaqil aj tidiꞌ qetza, bꞌix lapikoꞌna awiꞌj.” 29 Yaji te Jesus owaj stzaqꞌbꞌeꞌ ikxjani: “Oxeꞌl nqꞌumaꞌ etetz te bꞌanꞌax, abꞌl aj nkaj tsiꞌ tjay qatzun te txuꞌjelji qatzun kye terman qatzun kye statji tzan tpaj tkajlen tuj tqꞌabꞌ te Qtata Dios, 30 yaji tetz otkꞌamoꞌtz mas nim tzani twitz txꞌoꞌtxꞌ [twitz te aj oje kaj tsiꞌ tbꞌay], bꞌix mas yaj oj tponaj ja twitz txꞌoꞌtxꞌni, otkꞌamoꞌtz jun tanqꞌin bꞌeyx te jun-eleꞌx.”
Aj Txik Tqꞌumaꞌ Jesus Toxmajjiꞌn-el Tiꞌj Tkamiky
31 Yaji te Jesus etzaj tukꞌleꞌ apart kye kykabꞌlajujil txnaqꞌatz bꞌix oxik tqꞌumaꞌ kyetz ikxjani: “Ajnaꞌl ikjaꞌn qxik tuj Jerusalen aj jaꞌ okyꞌel kyaqil wiꞌj [wetz] te Ichan Aj Tkꞌwaꞌal Dios [aꞌin] iktzaꞌx oje qet tzꞌibꞌaꞌ oqtxiꞌ tzan kye aj yolil tyol Dios. 32 Okyinxeꞌl kyqꞌapoꞌ tuj kyqꞌabꞌ kye kꞌulul mandad aj nyaꞌtx qxjalil aj kꞌontiꞌl nkyeꞌokslan te Qtata Dios, bꞌix okyinꞌokelbꞌaj kxmayiꞌ, bꞌix okyinꞌokelbꞌaj kyyasoꞌ bꞌix okyinꞌokel ktzubꞌaꞌ. 33 Okyinqtelbꞌaj kybꞌujuꞌ bꞌix okyinqtel kykansaꞌ, per yaji tuj toxiꞌn qꞌij okyinjawel anqꞌin.” 34 Ntons [yatzun kye txnaqꞌatz], kyetz kꞌontiꞌl owel kynikyꞌ tiꞌj kyaqil ntzani; qlolj tuq tuj kywitz tiꞌj aj ntyoliꞌ, astilji kꞌontiꞌl owel kynikyꞌ tiꞌj.
Aj Tqet Tqꞌanaꞌ Jesus Jun Moy Tuj Amaqꞌ Jeriko
35 Aj chꞌinky tuq tpon Jesus qaynin tiꞌj te amaqꞌ Jeriko, atqet tuq jun moy tuj bꞌey nqanin tlimosn. 36 Ya ma xik xhchaꞌoꞌ ketant tuq kye xjal nkyekyꞌik tzi, oxik xhchaꞌoꞌ kyukyꞌi txqꞌanky tidiꞌ tuq nkyꞌik. 37 Bꞌix oxik kyqꞌumaꞌ man tuq nkyꞌik te Jesus aj Nasaret. 38 Ntons tetz ojaw sikyꞌin kongan ikxjani: “Yatz Jesus aj tijajil Dawid aꞌich, intok loꞌet chꞌin akꞌuꞌj wiꞌj.” 39 Kye xjal aj ajuneꞌ tuq tbꞌayon twitz [te Jesus] owok kyiliꞌ tzan tlumet, per tetz mas tuq njaw sikyꞌin: “¡Jesus aj tijajil Dawid aꞌich, intok loꞌet chꞌin akꞌuꞌj wiꞌj!” 40 Yaji te Jesus owaꞌlet bꞌix oxik tkꞌuluꞌ mandad tzan tuq tpon kyin tukyꞌiꞌl. Ya ma pon in qaynin twitz, oxik xhchaꞌoꞌ tetz ikxjani: 41 “¿Tidiꞌ agan tzan tok nkꞌuluꞌ awiꞌj?” Yaji te moy owaj stzaqꞌbꞌeꞌ ikxjani: “Tat, ngan tzan nkaꞌyin junkyꞌel.” 42 Ntons te Jesus oxik tqꞌumaꞌ ikxjani: “¡Pakaꞌyin junkyꞌel! Tzan tpaj ma tzꞌok witꞌlet akꞌuꞌj wiꞌj, maꞌtx chbꞌantik.” 43 Bꞌeyxnajji te moy okaꞌyin bꞌix owok lapet tiꞌj Jesus, bꞌix bꞌan nqet tuq tjiqꞌbꞌaꞌ Qtata Dios. Bꞌix ax kyaqil kye xjal aj eꞌok eꞌen ntzani, kyetz ax bꞌan nkyechalajsan tuq tiꞌj Qtata Dios.