17
A Tgan Tzan Kyqet Qnajsaꞌ Kye Aj Nkyekꞌulun Nyaꞌtx Galan Qiꞌj
1 Ntons te Jesus oxik tqꞌumaꞌ kye txnaqꞌatz ikxjani: “Okyꞌelkix tidiꞌchq aj bꞌaꞌn tzan tqet tzꞌaqik jun xjal titzaꞌ. Per last te aj otkꞌuluꞌtz tzan kyjoyon choj txqꞌanky. 2 Mejor-talo tzan tkꞌalet jun chman kaꞌ talq bꞌix tzan tqex xoꞌoꞌ tuj te nim aꞌ, bꞌix ikxji kꞌontiꞌl tzan kyqet tzꞌaqik nijunwt kye ja kꞌwaꞌl ntzanijeꞌni. 3 Intok esiꞌ waq enabꞌl etiꞌjx etetz, qa jun eterman njoyon choj, intxik ekawiꞌ; bꞌix qa otzajel tnaꞌon tetz ntons intqet enajsaꞌ te xhchoj.* 4 Qa wuq-el jun qꞌij nkꞌulun nyaꞌtx galan etiꞌj, bꞌix qa wuq-el owulel etukyꞌiꞌl bꞌix oxeꞌl tqꞌumaꞌ etetz ikxjani: “Najsaj chꞌin, ntzaj nnaꞌon tetz,” ntons yatzun etetz intqet enajsaꞌ.”
A Tgan Tzan Tok Qwitꞌbꞌaꞌ Jkꞌuꞌj Tiꞌj Qtata Dios Tukyꞌi Jun Jkꞌuꞌj
5 Tzaj kye tkyꞌixel Jesus, oxik kyqaniꞌ tukyꞌiꞌl ikxjani: “Qoꞌok awoneꞌ chꞌin tzan tok witꞌlet jkꞌuꞌj mas byenech tiꞌj te Qtata Dios.” 6 Ntons te Qajawil oxik tqꞌumaꞌ ikxjani: “Cha witꞌlikok-wit ekꞌuꞌj chꞌimuꞌs iktzaꞌ jun tbꞌaqꞌ mostas [bꞌan chꞌi nekit],* ntons bꞌaꞌn-tal tzan txik eqꞌumaꞌ te ja nim tzeꞌ sicomrni,a “intjatz atxꞌoqoꞌ awibꞌx bꞌix intqex awawaꞌ awibꞌ tuj te nim aꞌ,” ntons te ja tzeꞌni okxtel-tal tokslaꞌ.”
Te Tumeꞌl Titzaꞌ Tzan Tqet Qbꞌisuꞌ Tiꞌj Qaqꞌun Te Qtata Dios
7 [Ntons yaji oxik tqꞌumaꞌ Jesus ikxjani]: “Qa jun te etetz at jun tmos bꞌix te xjal omeltzꞌjel aqꞌunon tuj te awalj qatzun pastoril karnerji, ¿tzun petzun nxik eqꞌumaꞌ tetz “pakyꞌik tiꞌj mes, paqet witꞌlet waꞌil”? 8 Kꞌontiꞌl, sinoke nxik eqꞌumaꞌ tetz ikxjani: “Intqet akꞌuluꞌ chꞌin te nweꞌ, intok asiꞌ aqꞌanaq galan bꞌix kyintzaj akꞌaꞌchaꞌ. Wetz okyinwaꞌyon bꞌix oj tmankun wetz nwaꞌan, ntons bꞌaꞌn tzan awaꞌan yatz.” 9 Bꞌix ax kꞌontiꞌl nxik esiꞌ pixon te jun emos tzan tpaj tqetlen tkꞌuluꞌ taqꞌun aj oxik eqꞌumaꞌ. 10 Ax ikxji etetz oj tmankun ekꞌulun kyaqil aj otzaj tqꞌumaꞌ [te Qtata Dios] tzan tqet ekꞌuluꞌ, presis tzan txik eqꞌumaꞌ ikxjani: “Qetz aqoqet tzan jkꞌulun te aj tgan te Qajawil bꞌix kꞌontiꞌl nqajoꞌ jun tidiꞌ tzan tpaj cha aꞌox ma qet jkꞌuluꞌ aj ma kaj qꞌumaꞌ qetz.””
Aj Kyqet Tqꞌanaꞌ Jesus Lajuj Xjal Nqꞌay Tuq Kchiꞌjel
11 Ntons, aj ikjaꞌn tuq txik te Jesus tuj Jerusalen, man tuq ikjaꞌn tkaj tsiꞌ tkwentil Galiley tzan tox tuj tkwentil Samary, 12 bꞌix ya ma pon tuj jun aldey, eꞌetz kanol tetz lajuj yabꞌ aj nqꞌay tuq kchiꞌjel tukyꞌi lepr. Kyetz ebꞌajqet waꞌlet laqꞌchik 13 bꞌix oxik kyqꞌumaꞌ kongan ikxjani: “¡Jesus! ¡Xnaqꞌtzon! ¡Intok loꞌet chꞌin akꞌuꞌj qiꞌja!” 14 Ya ma kyexik teꞌeꞌ, tetz oxik tqꞌumaꞌ kyetz ikxjani: “Pex waq bꞌix pex yekꞌul etibꞌ kywitz kye pal.”* Ntons, aj man tuq ikjaꞌn kxik nkyebꞌet tuq tuj bꞌey, te kyyabꞌil owel in kyiꞌj. 15 Ntons jun te kyetz, ya ma tzꞌok ten ojetq tuq bꞌantik, omeltzꞌjik bꞌix bꞌan nqet tuq tjiqꞌbꞌaꞌ Qtata Dios tukyꞌi nim twiꞌ. 16 Bꞌix oqet mejlet twitz txꞌoꞌtxꞌ twitz Jesus, nxik tsiꞌ tuq pixon tetz. Bꞌix te ja xjal ntzani, tetz jun aj Samary tuq. 17 Yaji te Jesus oxik tqꞌumaꞌ ikxjani: “¿Nyaꞌtx petzun lajuj kybꞌet tuq kye aj ma tzꞌel in kyyabꞌil? Bꞌix kye bꞌeljujky, ¿jaꞌ akyeqet? 18 ¿Tiꞌtzun, nijunwt te kyetz ma kyemeltzꞌjik tzan txik ksiꞌ pixon te Dios sinoke aꞌox ja xjal aj nyaꞌtx bꞌan qxjalilni?” 19 Yaji te Jesus oxik tqꞌumaꞌ tukyꞌi te xjal ikxjani: “Pax, pajaw waꞌlet. Ajnaꞌl maꞌtx chbꞌantik tzan tpaj ma tzꞌok witꞌlet akꞌuꞌj wiꞌj.”
Titzaꞌ Owulel Te Ichan Aj Tkꞌwaꞌal Dios
20 Ntons jun-el, kye aj bꞌuchꞌuj Parisey oxik kchaꞌoꞌ tukyꞌi Jesus tujbꞌaꞌn tuq okꞌuluyon mandad te Qtata Dios [tzan kykolpjik kye aj Israel]. Tetz owaj stzaqꞌbꞌeꞌ ikxjani: “Tzan tkꞌulun mandad te Qtata Dios [tzan kykolpjik] kye qxjalil, te nini jun tidiꞌ aj cha ojawel jalet, 21 bꞌix nlay bꞌantik tzan jqꞌuman “atqet tzani” qatzun “txini atqet” tzan tpaj te Qtata Dios ajnaꞌl qxol nkꞌulunkix mandad tuj kyanim kye xjal.”
22 Yaji oxik tqꞌumaꞌ kye txnaqꞌatz ikxjani: “Tzul jun tyemp aj etetz owelal eqꞌajabꞌ tzan tok eteꞌeꞌ jun qꞌij aj akyinqet [wetz] te Ichan Aj Tkꞌwaꞌal Dios [aꞌin], per nlay tzꞌok eten. 23 Junjun okyqꞌumaꞌtz “tzani atqet” qatzun oxeꞌl kyqꞌumaꞌ “txini atqet” per etetz kꞌon kxik aj jaꞌ okyqꞌumaꞌtz bꞌix kꞌon kxꞌok lapet kyiꞌj. 24 Komo iktzaꞌx te ray oj tjaw xhlikyꞌkꞌan txeꞌ kaꞌj bꞌix nxik tqꞌanaliꞌ te txeꞌ kaꞌj max junky palaj, ax ikxji [bꞌan ebꞌajil] oj wul [wetz] te Ichan Aj Tkꞌwaꞌal Dios [aꞌin]. 25 Per tbꞌay presis tzan tok wen twitz xhchoꞌnal bꞌix tzan wel ikꞌoꞌ tzan kye xjal tuj ja tyempni. 26 Iktzaꞌx okyꞌik tuj aj tyemp aj atqet tuq te Noe [bꞌan oqtxiꞌ],* ax ikxji okyꞌel tuj te tyemp oj wul [wetz] te Ichan Aj Tkꞌwaꞌal Dios [aꞌin]. 27 Kye xjal tuj aj tyempji, nkyewaꞌan tuq bꞌix nkyeꞌukꞌan bꞌix nkyeꞌok junan bꞌix nkyeqꞌapon tuq kykꞌwaꞌal tzan kyjunan bꞌix yaji te Noe owox tuj te bark bꞌix owul te ninjabꞌ bꞌix kkyaqil ebꞌajkamik.* 28 Bꞌix ax ikxji okyꞌik iktzaꞌx tuj te tyemp aj atqet tuq te Lot. Kye xjal nkyewaꞌan tuq bꞌix nkyeꞌukꞌan bꞌix nkyeloqꞌon bꞌix nkyekꞌayin tuq, nkyeꞌawan tuq bꞌix nkyekꞌulun tuq kyjay, 29 per ya ma tzꞌetz te Lot tuj te amaqꞌ Sodom, otzaj twitz kaꞌj qꞌaqꞌ tukyꞌi asupr oqetz iktzaꞌ jabꞌ, bꞌix kkyaqil kye xjal ebꞌajkamik.* 30 Ax ikxji okyꞌel oj wul [wetz] te Ichan Aj Tkꞌwaꞌal Dios [aꞌin], [kye xjal nyaꞌtx list ateꞌ]. 31 Tuj aj qꞌijji abꞌl te aj atjax twiꞌ jay, bꞌix qa te tidiꞌchq tetz atox tuj jay, kꞌontiꞌl tzan tox eqꞌil tetz, bꞌix te aj atqet tuj kꞌul kꞌontiꞌl tzan tmeltzꞌjik tjay.* 32 Instzaj enaꞌoꞌ aj okyꞌik tiꞌj te txuꞌjel te Lot.* 33 Abꞌl te aj owokel tsiꞌ tkꞌuꞌj tzan tkolon tanqꞌin, okamel kixiꞌ; per abꞌl te aj [tzan npaj wetz] kꞌontiꞌl nkolon tibꞌx tzan tanqꞌin, tetz owanqꞌiyon kixiꞌ.* 34 Oxeꞌl nqꞌumaꞌ etetz, tuj aj aqꞌbꞌilji, kabꞌeꞌ aj nkyewitan tuj jun watubꞌj, jun te kyetz ojawel eqꞌiꞌ bꞌix te junky okajel siꞌ. 35 Kabꞌeꞌ xuj aj nkyebꞌaqꞌun junx, jun te kyetz ojawel eqꞌiꞌ bꞌix te junky okajel siꞌ. 36 [Bꞌix ax kabꞌeꞌ xjal aj nkyeꞌaqꞌunan junx tuj kꞌul, jun te kyetz ojawel eqꞌiꞌ bꞌix te junky okajel siꞌ.]”b 37 Ntons [kye txnaqꞌatz] oxik kchaꞌoꞌ tetz ikxjani: “Tat, ¿jaꞌ okyꞌel kyaqil ntzani?” Ntons te Twitzaleꞌ oxik tqꞌumaꞌ kyetz: “Aj jaꞌ at jun txkup kamnaq ax tzi nkyelabꞌtik kye loxh.”