24
Aj Tyolin Jesus Titzaꞌ Okyꞌel Oj Tul Te Jwisy
1 Te Jesus owetz tuj te Nin Jay Nabꞌil Qtata Dios bꞌix ikjaꞌn tuq tex, kye txnaqꞌatz eꞌok laqꞌchet tiꞌj, eꞌaqꞌik tzan kyyolin tukyꞌiꞌl titzaꞌ tuq kꞌulbꞌen tetz te Nin Jay Nabꞌil Qtata Dios. 2 Yaji te Jesus oxik tqꞌumaꞌ ikxjani: “¿Nꞌok eten etetz kyaqil ntzani? Wetz oxeꞌl nqꞌumaꞌ etetz te bꞌanꞌax, tzani nlay kaj ni jun pant tajsik junky. Kyaqil oqtel tiluꞌ.”
3 Ntons yaji [aj kypon] twiꞌ te witz Olib te Jesus oqet witꞌlet tzi bꞌix apart kywitz kyaqil, kye txnaqꞌatz ebꞌajꞌok laqꞌchet tiꞌj, oxik kchaꞌoꞌ tetz ikxjani: “Instzaj aqꞌumaꞌ chꞌin janikꞌbꞌaꞌn kyꞌik kyaqil aj ma tzaj aqꞌumaꞌni bꞌix tidiꞌ seny owokel qen tzan tel qnikyꞌ qa chꞌinky awul bꞌix qa chꞌinky tul te jwisy.”
4 Yaji te Jesus owaj stzaqꞌbꞌeꞌ kyetz ikxjani: “Intok esiꞌ waq enabꞌl tzan kꞌon eqet eqꞌiꞌ tzan nijunwt. 5 Komo kyeꞌul kyꞌilaꞌj xjal, okyeyoliyon tukyꞌi nbꞌi iktzeꞌxtzun aꞌin wetz, oxeꞌl kyqꞌumaꞌ ikxjani: “Wetz aꞌin te Koloyon aj Qꞌumankaj Oqtxiꞌ.” Bꞌix ikxji kyetz okyeqtel kyeqꞌiꞌ kyꞌilaꞌj xjal. 6 Etetz owokel echaꞌoꞌ jaꞌchq nꞌok qꞌoj bꞌix nqꞌumjik owokel qꞌoj jaꞌchq, per yatzun etetz kꞌontiꞌl tzan exobꞌ, tzan tpaj ikxjikix okyꞌel per nyaꞌtx a te tmankbꞌil twitz txꞌoꞌtxꞌji. 7 Kyijajil txqꞌan xjal okyeqꞌojiyonkix tiꞌj kyijajil txqꞌanky xjal, bꞌix txqꞌan amaqꞌ okyeqꞌojiyon kyiꞌj txqꞌanky amaqꞌ, bꞌix jaꞌchq owokel en twitz waꞌij, bꞌix jaꞌchq okyꞌel kyꞌilaꞌj kabꞌjunabꞌ. 8 Per kyaqil nini man tuq nꞌaqꞌik te xhchoꞌnal. 9 Ntons etetz [aj nkyinꞌetokslaꞌ] okxeꞌl qꞌapoꞌ tuj kyqꞌabꞌ xjal aj nyaꞌtx galan aj owokel ksiꞌ nim xhchoꞌnal etiꞌj, bꞌix okxtel kansaꞌ, bꞌix okxꞌokel ajqꞌojaꞌ tuj kyaqil amaqꞌ twitz txꞌoꞌtxꞌ tzan tpaj etokslbꞌen wiꞌj.* 10 Tuj aj tyempji kyꞌilaꞌj xjal okajel ksiꞌ tzan tok witꞌlet kykꞌuꞌj wiꞌj. Kxolx kyetz oxeꞌl kyqꞌapoꞌ kyibꞌx, owokel kyajqꞌojaꞌ kyibꞌx. 11 Kyꞌilaꞌj xjal okyeꞌulel, okyqꞌumaꞌtz qa kyetz aꞌeꞌ aj yolil tyol Dios, per nyaꞌtx bꞌanꞌax kyitzaꞌ, bꞌix kyꞌilaꞌj xjal okyeqtel kyeqꞌiꞌ. 12 Bꞌix tzan tpaj kye xjal mas kyekꞌuluyon tidiꞌchq nyaꞌtx galan, kyꞌilaꞌj okajel ksiꞌ tzan tqet kyen kyibꞌ galan kyukyꞌi txqꞌanky. 13 Per te aj nlay kyinkaj tkolaꞌ bꞌix otipaꞌtz kyaqil max oj tmankun, tetzji okoletel.* 14 Bꞌix te ja tpakbꞌalil galan tiꞌj te tumeꞌl titzaꞌ tzan kykaj kye xjal tuj tqꞌabꞌ Qtata Dios, oxeꞌl pakbꞌlet tuj kyaqil twitz txꞌoꞌtxꞌ, tzan tok kchaꞌoꞌ kyaqil amaqꞌ, bꞌix maxji tzul te jwisy.*
15 (Ntons abꞌl te aj njaw teꞌeꞌ, intox tuj twiꞌ ntzani:) Chaꞌoj tok eten te aj oqet stzꞌibꞌaꞌ te Xhweꞌk aj yolil tyol Dios oqtxiꞌ, tiꞌj te xmayiyon aj xituyon, ntons qa maꞌtx pon nini tuj te Luwar Aj Bꞌan Xjan [tuj te Nin Jay Nabꞌil Qtata Dios],* 16 ntons yaji kye aj akyeqet tuj tkwentil Judey inkxik oqik twiꞌ witz, 17 bꞌix kye [aj Judey] aj atejax twiꞌ jay, kꞌontiꞌl tzan kyqetz eqꞌil jun tidiꞌ tuj kyjay [sinoke tzan kyoqik naj], 18 bꞌix kye aj nkyeꞌaqꞌunan tuj kꞌul, kꞌontiꞌl tzan kymeltzꞌjik kyjay eqꞌil jun ktxoꞌw.*
19 ¡Lasteꞌ kye xuj [aj Judey] aj chꞌinky kkyꞌix tuj aj qꞌijji, bꞌix kye xuj aj man nkyetxuꞌun kyal! 20 Peꞌexnaqꞌtzan waq tukyꞌi Qtata Dios tzan kꞌon tkyꞌik ntzani tuj jabꞌalil qatzun tuj jun qꞌij ojlaꞌmjji. 21 Komo owokel en twitz jun xhchoꞌnal bꞌan nim,* per jun xhchoꞌnal aj minaꞌ tkyꞌik ni jun-el atx aj tqetlen kꞌuluꞌ te twitz txꞌoꞌtxꞌ bꞌix yaji ya nlay kyꞌik junkyꞌel. 22 Cha nyaꞌtx-wit cha kabꞌe qꞌij oteyon te nini, ntons nijunwt-tal abꞌl otipaꞌtz, kyaqil-tal okyekamel, per cha kabꞌe qꞌij okyꞌel tzan tpaj [te Qtata Dios nꞌok loꞌet tkꞌuꞌj kyiꞌj] kye aj joyomeꞌ titzaꞌ.
23 Ntons qa at abꞌl otzajel tqꞌumaꞌ etetz, “¡Instzaj eten! Tzani atqet te Koloyon aj Qꞌumankaj Oqtxiꞌ,” qatzun otzajel kyqꞌumaꞌ, “Txini atqet,” ntons yatzun etetz, kꞌon xik etokslaꞌ. 24 Komo kyeꞌul xjal aj sqꞌoꞌl-eꞌ aj kyqꞌumaꞌtz aꞌeꞌ kyetz te Koloyon Aj Qꞌumankaj Oqtxiꞌ, per nyaꞌtx bꞌanꞌax kyitzaꞌ, bꞌix kyeꞌul kye aj okyqꞌumaꞌtz aꞌeꞌ kyetz aj yolil tyol Dios, per nyaꞌtx bꞌanꞌax kyitzaꞌ. Bꞌix oqtel kykꞌuluꞌ tidiꞌchq yekꞌbꞌil tukyꞌi nim kyajwalil bꞌix tidiꞌchq aj okyelabꞌayon kye xjal tiꞌj tzan kyqet-tal kyeqꞌiꞌ kye xjal, bꞌix kygan-tal tzan kyqet kyeqꞌiꞌ kye aj joyomeꞌ tzan Qtata Dios. 25 Intok esiꞌ waq enabꞌl tiꞌj kyaqil aj maꞌtx xik nqꞌumaꞌ etetzni bꞌix minaꞌ tkyꞌik. 26 Astilji qa at abꞌl otzajel qꞌuman etetz, “Instzaj eten, tetz atqet tuj te kyꞌixkꞌoj txꞌoꞌtxꞌ,” etetz kꞌon kxik eꞌel tetz. Bꞌix qa otzajel qꞌumaꞌ etetz, “Instzaj eten, tzani atqet ewaꞌ tuj jay,” etetz kꞌon xik etokslaꞌ. 27 Komo iktzaꞌx jun xhlikyꞌlikaꞌj nkyꞌik twitz kaꞌj [kꞌontiꞌl nkaj ewj], ax ikxji oj wul [wetz] te Ichan Aj Tkꞌwaꞌal Dios [aꞌin]. 28 [Ntzani bꞌanꞌax iktzaꞌx] jaꞌ nkyelabꞌun kye loxh at jun tidiꞌ kamnaq txini.*
29 Chaꞌoj tkyꞌik kyaqil aj tyemp nim xhchoꞌnal, bꞌeyxnajji te qꞌij oqloljxbꞌel twitz, te qyaꞌ ya nlay qꞌanalin, bꞌix kye cheꞌw okyetzajel tzꞌaqik twitz kaꞌj, bꞌix kyaqil [malspirit] aj nim kyajwalil twitz kaꞌj okyejawel kyitoꞌ.* 30 Ntons oxeꞌl eꞌeꞌ twitz kaꞌj te jun seny aj telponx wiꞌj [wetz] te Ichan Aj Tkꞌwaꞌal Dios [aꞌin], bꞌix kyaqil kyijajil xjal twitz txꞌoꞌtxꞌ ma kyeꞌoqꞌ tzan kxobꞌal.* Bꞌix okyinxeꞌl kyeꞌeꞌ wetz ikjaꞌn ntzaj tuj te muj tukyꞌi wajwalil bꞌix tukyꞌi nim nxhqitzꞌunal. 31 Bꞌix tukyꞌi [twiꞌ] jun nim trompet okyexeꞌl nlajoꞌ kye ángel, bꞌix kyetz okyeꞌokel kchimoꞌ kye aj joyomeꞌ witzaꞌ, otzajelbꞌaj ksutiꞌ kyaqil twitz txꞌoꞌtxꞌ bꞌix twitz kaꞌj.
32 Intok esiꞌ waq enabꞌl tiꞌj jun yekꞌbꞌil tiꞌj te wiꞌ igos. Chaꞌoj stzaj kꞌuplet txaq, etetz nꞌel enikyꞌ chꞌinky qok kwares. 33 Ax ikxji tiꞌj te aj maꞌtx xik nqꞌumaꞌni, tzan tpaj chaꞌoj tok eten aj nkyꞌik ikxji twitz txꞌoꞌtxꞌ, owelal enikyꞌ telponx chꞌinky wulky wetz.* 34 Wetz oxeꞌl nqꞌumaꞌ etetz te bꞌanꞌax, kyaqil ntzani okyꞌel minaꞌ kykamik kye ja qijajilni. 35 Te twitz kaꞌj bꞌix te twitz txꞌoꞌtxꞌ okyepoyonaj, per wetz nyol nlay ponaj, [opoyonkixiꞌ kyaqil aj maꞌtx xik nqꞌumaꞌni].*
36 Nijunwt abꞌl tebꞌen janikꞌbꞌaꞌn tkyꞌik ja ntzani; ni kye ángel tuj kaꞌj kꞌontiꞌl kyebꞌen, ni wetz Tkꞌwaꞌal Dios kꞌontiꞌl webꞌen; aꞌox te Qtat [aj atjax tuj kaꞌj tebꞌenky janikꞌbꞌaꞌn tkyꞌik ja ntzani].* 37 Iktzaꞌx okyꞌik tuj aj tyemp aj itzꞌoj tuq te Noe, ax ikxji okyꞌel oj wul [wetz] te Ichan Aj Tkꞌwaꞌal Dios [aꞌin].* 38 Tuj aj tyempji aj minaꞌ tuq stzaj te nim jabꞌ bꞌix maxkix aj tox te Noe tuj te bark, kye xjal cha nkyeꞌukꞌan tuq bꞌix nkyewaꞌan tuq bꞌix nkyeꞌok tuq junan. 39 Kꞌontiꞌl tuq bꞌisuꞌ kyitzaꞌ qa owulel tuq te nim jabꞌ, per yaji owul te nim jabꞌ bꞌix ebꞌajponaj kkyaqil. Ax ikxji okyꞌel oj wul [wetz] te Ichan Aj Tkꞌwaꞌal Dios [aꞌin].* 40 Tuj aj qꞌijji qa kabꞌeꞌ xjal nkyeꞌaqꞌunan tuj kꞌul, jun te kyetz oxeꞌl eqꞌiꞌ [tuj kaꞌj] bꞌix te junky okajel siꞌ. 41 Qa kabꞌeꞌ xuj nkyekyeꞌen tiꞌj kaꞌ, jun te kyetz oxeꞌl eqꞌiꞌ [tuj kaꞌj] bꞌix te junky okajel siꞌ.
42 Etetz peꞌeten waq list tzan tpaj kꞌontiꞌl etebꞌen alkyetz qꞌij okyinꞌulel wetz aj Etajawil aꞌin. 43 Intel enikyꞌ tiꞌj te ntzani: Qa jun tajaw jay tebꞌen-wit janikꞌbꞌaꞌn tzul te eleqꞌ elqꞌon tuj tjay, ntons oteyon-tal list bꞌix nlay-tal stzoqpij tzan tox nijunwt tuj tjay elqꞌon. 44 Bꞌix ax ikxji etiꞌj etetz, a tgan tzan eten waq list tzan tpaj kyinꞌul [wetz] te Ichan Aj Tkꞌwaꞌal Dios [aꞌin] tuj jun qꞌij aj kꞌontiꞌl nkyeꞌiyon kye xjal wiꞌj, [astilji a tgan tzan eten waq list].”*
Jun Mosj Aj Galan Nabꞌlin Otkambꞌaꞌtz Jun Tidiꞌ Galan, Bꞌix Jun Mosj Aj Nyaꞌtx Galan Nabꞌlin Oxeꞌl Siꞌ Jun Xhchoꞌnal Tiꞌj
45 “¿Titzaꞌ nabꞌlin jun mosj aj bꞌan tumeꞌl nbꞌisun bꞌix nkꞌulun kyaqil iktzaꞌ te tpatron tgan, bꞌix te tpatron nkaj tsiꞌ te kꞌulul mandad kxol kye txqꞌanky tmos tuj tjay, tzan kxik tkꞌaꞌchaꞌ oj tpon or?
46 Galanx-alo te aj mosjji qa oj tul te tpatron bꞌix tetz nkꞌulun te aj okaj qꞌumaꞌ tetz. 47 Wetz oxeꞌl nqꞌumaꞌ etetz te bꞌanꞌax, te tpatron okajel tsiꞌ te kꞌulul mandad tiꞌj kyaqil tidiꞌ tetz.
48 Per qa jun mosj aj nyaꞌtx galan nabꞌlin otqꞌumaꞌtz tuj tanim “te npatron nlay tzul luwew,” 49 bꞌix qa owaqꞌel tzan kyqet tkꞌuluꞌ joder kye txqꞌanky mosj bꞌix qa cha owaꞌyon bꞌix owokelten ukꞌal kxol kye bol, 50 te tpatron te aj mosjji owulel tuj jun qꞌij aj kꞌontiꞌl tuq iyoꞌ titzaꞌ, bꞌix tuj jun or aj kꞌontiꞌl tuq tebꞌen. 51 Ntons oxeꞌl tsiꞌ jun xhchoꞌnal nim tiꞌj bꞌix okajel tsiꞌ kxol kye aj xmeletzꞌ. Bꞌix tzi owoqꞌel bꞌix ma qitxꞌitxꞌin txeꞌ teꞌ.”