25
Junky Yekꞌbꞌil Tiꞌj Te Jwisy: Kye Lajuj Qꞌopoj
1 “Ntons, kyiꞌj kye xjal aj nkyekaj tuj tqꞌabꞌ te Qtat aj nnajan tuj kaꞌj, te nini iktzaꞌ [ja yekꞌbꞌil] ntzani: Tuj jun waꞌamj joyomeꞌ tuq lajuj qꞌopoj tzan kykꞌamon te ichan tuj te jay aj jaꞌ tuq nꞌok te waꞌamj. Oxik kyin te kyqꞌanal bꞌix eꞌex iyol te ichan. 2 Jwebꞌ kxol kyetz kꞌontiꞌl tuq nkyebꞌisun tumeꞌl, bꞌix kye junky jwebꞌ kyetz bꞌan nkyebꞌisun tuq tumeꞌl. 3 Kye aj kꞌontiꞌl tuq nkyebꞌisun tumeꞌl oxik kyin tqatel te kyqꞌanal, per kꞌontiꞌl oxik kyin kyaseyt [tzan tuq tqex kynojsaꞌ junkyꞌel]. 4 Per yatzun kye aj bꞌan nkyebꞌisun tumeꞌl, kyetz oxik kyin junjunky boteychaq kyaseyt te tqatel kyqꞌanal. 5 Ntons yaji te ichan kꞌontiꞌl opon luwew, ntons ebꞌajxnakwin bꞌix ebꞌajkaj bꞌan watl. 6 Ya ma qoꞌok chukaqꞌbꞌil kxik chaꞌon kye xjal nkyesikyꞌin tuq ikxjani: “Tzul te ichan, tzul te ichan; peꞌetetz waq kanol tetz.” 7 Kkyaqil kye qꞌopoj ebꞌajjaw waꞌlet kꞌulul te kyqꞌanal. 8 Ntons kye jwebꞌ aj kꞌontiꞌl tuq nkyebꞌisun tumeꞌl, oxik kyqꞌumaꞌ ikxjani kyukyꞌiꞌl kye aj bꞌan atok tuq kynabꞌl: “Instzaj esiꞌ chꞌin qetza qaseytni tzan tpaj qetza jqꞌanal chꞌinky tqextzaj,” kyekyi. 9 Per kye qꞌopoj aj list tuq ateꞌ oxik kyqꞌumaꞌ kyetz ikxjani: “Nlay tzan tpaj ikxji nlay kanon te qetza bꞌix ax nlay kanon te etetz. Mejor tzan exik loqꞌol aj jaꞌ nkꞌayjik.” 10 Per aj kxik kye jwebꞌ qꞌopoj loqꞌol te kyaseyt, opon te ichan. Yatzun kye aj list tuq akyeqet, ebꞌajꞌox tukyꞌiꞌl tuj te waꞌamj, bꞌix te lamel okaj lamoꞌ. 11 Yaji ebꞌajpon kye txqꞌanky qꞌopoj, oxik kyqꞌumaꞌ ikxjani: “Tat, tat, intox ajaqoꞌ te lamel.” 12 Per yaji tetz oxik tqꞌumaꞌ kyetz ikxjani: “Oxeꞌl nqꞌumaꞌ etetz te bꞌanꞌax, wetz kꞌontiꞌl wotzqiꞌ aꞌix.””
13 [Ntons yaji te Jesus oxik tqꞌumaꞌ ikxjani:] “Ax etetz, peꞌeten waq list tzan tpaj kꞌontiꞌl etebꞌen alkyetz qꞌij bꞌix kꞌontiꞌl etebꞌen alkyetz or [chaꞌoj wul wetz junkyꞌelky].”*
Junky Yekꞌbꞌil Tiꞌj Te Jwisy: Kye Ox Mosj
14 “Komo [chaꞌoj wul wetz junkyꞌelky, owokel] te nini iktzaꞌ jun xjal aj ikjaꞌn tuq txik tuj tbꞌey, etzaj tukꞌleꞌ kye tmos bꞌix oxik tqꞌapoꞌ tiꞌchq tetz tuj kyqꞌabꞌ. 15 Oxik tqꞌapoꞌ te jun te kyetz jwebꞌ tmin xtxꞌotxꞌal tibꞌ,a bꞌix te junky xjal oxik tqꞌapoꞌ tetz kabꞌeꞌ tmin xtxꞌotxꞌal tibꞌ,b bꞌix te junky xjal cha jun tmin xtxꞌotxꞌal tibꞌ.c Ntons ikxji oxik tqꞌapoꞌ te junjun iktzaꞌx te kylistul, bꞌix yaji oxik tuj tbꞌey. 16 Bꞌeyxnajji te aqꞌunon aj okyꞌik tkꞌamoꞌ jwebꞌ, tetz tidiꞌchq oqet txkꞌaꞌmaꞌ tiꞌj bꞌix otkꞌuluj ganar jwebꞌky. 17 Bꞌix ax ikxji otkꞌuluj te aj otkꞌamoj kabꞌeꞌ, tetz otkꞌuluj ganar kabꞌeꞌky. 18 Per te aj okyꞌik tkꞌamoꞌ cha jun, tetz cha oqex tkꞌuꞌuꞌ stumin te tajaw tuj jun jul aj oqex tlukiꞌ tuj txꞌoꞌtxꞌ.
19 Ya ma kyꞌik nim tyemp, te kyajaw kye aj mosjji omeltzꞌjik bꞌix owokten eqꞌil kwent kyukyꞌiꞌl. 20 Tbꞌay opon te aj ojetq tuq kyꞌik tkꞌamoꞌ te jwebꞌ tmin bꞌix oxik tqꞌapoꞌ jwebꞌky te tajaw bꞌix oxik tqꞌumaꞌ ikxjani: “Tat, yatz otzaj asiꞌ jwebꞌ tmin wetz bꞌix ntzani junky jwebꞌ aj maꞌtx nkꞌuluj ganar tukyꞌi atumin.” 21 Ntons te tajaw oxik tqꞌumaꞌ tetz ikxjani: “Byenech awitzaꞌ. Yatz aꞌich jun mosj bꞌan galan bꞌix kꞌontiꞌl nkaj asiꞌ tzan tqet akꞌuluꞌ kyaqil aj ngan. Ajnaꞌl tzan tpaj ma akꞌuluj galan tukyꞌi jun tidiꞌ nyaꞌtx nim, ajnaꞌl oxeꞌl nsiꞌ yatz junky mas nim. Paqꞌijlan wukyꞌiꞌl.” 22 Yaji opon te aqꞌunon aj ojetq tuq kyꞌik tkꞌamoꞌ kabꞌeꞌ tmin bꞌix oxik tqꞌumaꞌ ikxjani: “Tat, yatz otzaj asiꞌ kabꞌeꞌ tmin wetz bꞌix ajnaꞌl ntzani kabꞌeꞌky aj maꞌtx nkꞌuluj ganar.” 23 Yaji te tajaw oxik tqꞌumaꞌ tetz ikxjani: “Byenech awitzaꞌ. Yatz aꞌich jun mosj bꞌan galan bꞌix kꞌontiꞌl nkaj asiꞌ tzan tqet akꞌuluꞌ kyaqil aj ngan. Ajnaꞌl tzan tpaj ma akꞌuluj galan tukyꞌi jun tidiꞌ nyaꞌtx nim, ajnaꞌl oxeꞌl nsiꞌ yatz junky mas nim. Paqꞌijlan wukyꞌiꞌl.”* 24 Yaji, ya ma pon te aqꞌunon aj ojetq tuq kyꞌik tkꞌamoꞌ cha jun tmin, oxik tqꞌumaꞌ te tajaw ikxjani: “Tat, wetz webꞌen tuq, yatz nbꞌantik awitzaꞌ kyaqil mer iktzaꞌ yatz agan, bꞌaꞌn tzan tjaw awin twitz awalj aj jaꞌ kꞌontiꞌl nxhchꞌawan bꞌix njaw awin aj jaꞌ kꞌontiꞌl nchkyiton te ijaj.d 25 Astilji wetz inxobꞌ awitz, wetz cha oqex nmuquꞌ te atumin tuj te txꞌoꞌtxꞌ. Per ntzani te atumin aj otzaj asiꞌ wetz.” 26 Ntons te tajaw oxik tqꞌumaꞌ ikxjani: “Yatz aꞌich jun mosj aj nyaꞌtx galan chnabꞌlin bꞌix kyꞌaj aꞌich. Qa yatz awebꞌen tuq qa njaw win twitz awalj aj jaꞌ kꞌontiꞌl nkyinꞌawan bꞌix qa njaw win aj jaꞌ kꞌontiꞌl nkyinkyiton, 27 ntons oxik-tal awin chꞌin ntumin kyukyꞌi kye swal kyꞌexj, bꞌix wetz aj txkyinmeltzꞌjik, maꞌ-tal nkꞌamoj te ntumin bꞌix te taꞌal tzan kye swal kyꞌexj.” 28 Bꞌix oxik tqꞌumaꞌ ikxjani kye aj akyeqet tuq tzi: “Intel etin te jun tmin bꞌix intxik esiꞌ te aj at lajuj tetz. 29 Komo te aj nkꞌulun tumeꞌl tukyꞌi aj nxik siꞌ tetz, yaji oxeꞌl siꞌ mas tetz bꞌix ikxji owokel nim tetz; per te aj kꞌontiꞌl nkꞌulun tumeꞌl tukyꞌi te aj nxik siꞌ tetz, yaji owelal in kyaqil aj at tetz.e 30 Bꞌix te ja mosj aj kꞌontiꞌl tokenni, bꞌeyx intex etin jwer tuj te qlolj aj jaꞌ ma tzꞌoqꞌ bꞌix ma qitxꞌitxꞌin txeꞌ teꞌ.””*
Oj Stzaj Jwisy Kyajsik Kyaqil Amaqꞌ
31 “Ntons, chaꞌoj wul [wetz] te Ichan Aj Tkꞌwaꞌal Dios [aꞌin] tukyꞌi nim nxhqitzꞌunal bꞌix tukyꞌi nim wajwalil tzan nkꞌulun mandad tiꞌj kyaqil bꞌix kyukyꞌi kyaqil kye ángel, wetz okyinqtel witꞌlet tuj nwitꞌlel aj jaꞌ okyinkꞌuluyon mandad tukyꞌi nim wajwalil tiꞌj kyaqil. 32 Kyaqil kye xjal tuj kyaqil amaqꞌ okyeꞌokel chimoꞌ nwitz, bꞌix okyeꞌelal npawaꞌ txqꞌan kyiꞌj txqꞌanky, iktzaꞌ jun pastoriyon aj nkyeꞌel tpawaꞌ kye karner kyiꞌj kye chib. 33 Kye [aj galan xjal, kyetz okyeqtel nsiꞌ tuj nmanqꞌabꞌ iktzaꞌ jun pastoriyon] nkyeqet tsiꞌ kye karner tuj tbꞌanqꞌabꞌ, bꞌix kye [aj nyaꞌtx galan xjal okyeqtel nsiꞌ tuj nsurt iktzaꞌ jun pastoriyon] nkyeqet tsiꞌ kye chib tuj tsurt. 34 Yaji [wetz] aj nkyinkꞌulun mandad tiꞌj kyaqil oxeꞌl nqꞌumaꞌ kyukyꞌi kye aj akyeqet tuj nmanqꞌabꞌ ikxjani: “Qalan waq etetz aj maꞌtx kxqet kyꞌiwlaꞌ tzan Ntat. Peꞌekꞌamon waq te etajwalil aj oje qet kꞌuluꞌ listar te etetz tzan te Qtata Dios atx aj tqetlen kꞌuluꞌ te twitz txꞌoꞌtxꞌ. 35 Komo wetz owok wen twitz waꞌij, bꞌix yaji etetz otzaj esiꞌ nweꞌ; bꞌix owok wen twitz tzakjel, bꞌix etetz otzaj esiꞌ wukꞌaꞌ; wetz kꞌontiꞌl tuq jaꞌ bꞌaꞌn tzan nkaj, bꞌix otzaj esiꞌ jun nposad; 36 kꞌontiꞌl tuq nqꞌanaq, bꞌix etetz otzaj esiꞌ nqꞌanaq;* wetz inqet yabꞌtik, bꞌix etetz okxpon qꞌolbꞌel wetz; wetz inqex siꞌ tuj pres, bꞌix etetz okxꞌul qꞌolbꞌel wetz.”* 37 Ntons kye aj oje kyeꞌok galan-eꞌ tuj twitz Qtata Dios otzajel kchaꞌoꞌ ikxjani: “Tat, ¿janikꞌle oxhchꞌok qena tukyꞌi waꞌij bꞌix oxik qsiꞌna aweꞌ? ¿Janikꞌle oxhchꞌok qena tukyꞌi tzakjel, bꞌix oxik qsiꞌna awukꞌaꞌ? 38 ¿Janikꞌle kꞌontiꞌl tuq jaꞌ bꞌaꞌn tzan akaj, bꞌix oxik qsiꞌna jun aposad? ¿Bꞌix janikꞌle kꞌontiꞌl tuq aqꞌanaq bꞌix oxik qsiꞌna aqꞌanaq? 39 ¿Janikꞌle yabꞌich tuq qatzun atichqex tuq tuj pres, bꞌix qetza oxwaꞌqna qꞌolbꞌel yatz?” 40 Ntons [wetz] te twitzaleꞌ kꞌulul mandad tiꞌj kyaqil owajel ntzaqꞌbꞌeꞌ ikxjani: “Wetz oxeꞌl nqꞌumaꞌ etetz te bꞌanꞌax, kyaqil aj ekꞌuluj kyukyꞌi kye ja kꞌo wermanni,f ntons wukyꞌiꞌl tuq nꞌekꞌuluꞌ ikxji.”
41 Yaji oxeꞌl nqꞌumaꞌ kyukyꞌi kye aj akyeqet tuj nsurt ikxjani: “Intel epawaꞌ waq etibꞌ wiꞌj, etetz aj qanbꞌenbꞌaj etajsik; pex waq tuj te nim qꞌaqꞌ aj kꞌontiꞌl nqextzaj, aj kꞌulumaj te Tajaw Choj bꞌix kye ángel aj nkyeꞌokslan tetz. 42 Komo wetz at tuq waꞌij wiꞌj, bꞌix etetz kꞌontiꞌl otzaj esiꞌ nweꞌ; at tuq tzajkꞌaj wiꞌj, bꞌix etetz kꞌontiꞌl otzaj esiꞌ wukꞌaꞌ; 43 wetz kꞌontiꞌl tuq jaꞌ bꞌaꞌn tzan nkaj, bꞌix etetz kꞌontiꞌl otzaj esiꞌ jun nposad; kꞌontiꞌl tuq nqꞌanaq, bꞌix etetz kꞌontiꞌl otzaj esiꞌ nqꞌanaq; wetz yabꞌin tuq bꞌix inqexten tuj pres, bꞌix etetz kꞌontiꞌl okxpon qꞌolbꞌel wetz.” 44 Ntons kyetz otzajel kchaꞌoꞌ ikxjani: “Tat, ¿janikꞌle oxhchꞌok qena tukyꞌi waꞌij bꞌix tukyꞌi tzajkꞌaj, qatzun kꞌontiꞌl jaꞌ tuq tzan akaj, qatzun kꞌontiꞌl tuq aqꞌanaq, qatzun yabꞌich tuqji, qatzun aj aqex siꞌ tuj presji, bꞌix kꞌontiꞌl oxhchꞌok qoneꞌna?” 45 Ntons owajel ntzaqꞌbꞌeꞌ kyetz ikxjani: “Wetz oxeꞌl nqꞌumaꞌ etetz te bꞌanꞌax, kyaqil aj kꞌontiꞌl ekꞌuluj kyukyꞌi kye ja kꞌo [wermanni], ntons ax kꞌontiꞌl ekꞌuluj wukyꞌiꞌl.” 46 Ntons kyetz okyexeꞌl aj jaꞌ at xhchoꞌnal te jun-eleꞌx, per yatzun kye aj oje kyeꞌok galan-eꞌ tuj twitz Qtata Dios, kyetz oxeꞌl siꞌ jun kyanqꞌin te jun-eleꞌx.”