26
Aj Kykaj Kye Xjal Tiꞌj Tzan Tjaw Ktzyuꞌ Te Jesus
1 Ya ma xik tqꞌumaꞌ te Jesus kyaqil ntzani, yaji oxik tqꞌumaꞌ kye txnaqꞌatz ikxjani: 2 “Komo etetz etebꞌenky, tuj kabꞌeꞌ qꞌij ajnaꞌl okyꞌel te ninqꞌij Paskw.* Bꞌix [tuj aj ninqꞌijji, wetz] te Ichan Aj Tkꞌwaꞌal Dios [aꞌin] okyinxeꞌl qꞌapoꞌ tzan nqet klabiꞌ twitz krus.”
3 Ntons, [tuj aj tyempji] kye pal aj nim kyajwalil bꞌix kye tijxjal kxol kye aj tijajil Israel owok kchimoꞌ kyibꞌ tuj tjay te Kaypas aj twitzaleꞌ pal. 4 Oqet kybꞌisuꞌ tzan tuq tjaw ktzyuꞌ te Jesus per tukyꞌi jun tumeꞌl nyaꞌtx galan tzan tuq tqet kykansaꞌ. 5 Per okyqꞌumaj ikxjani: “Per mejor nyaꞌtx tuj te ninqꞌij, tzan kꞌon kyjaw labꞌun kye xjal.”
Aj Tqet Jiqꞌbꞌaꞌ Jesus Tzan Jun Xuj
6 Ntons, te Jesus atqet tuq tuj Betany, tuj tjay jun xjal tbꞌi Simon aj yabꞌ tuq tbꞌay tukyꞌi lepr. 7 Ntons, opon laqꞌchet tiꞌj Jesus jun xuj bꞌix eqꞌiꞌ tuq titzaꞌ jun tal qꞌawubꞌ aj xtxꞌotxꞌal abꞌj alabastr, bꞌix te tkꞌokꞌjal aj atqex tuq tuj bꞌan kar. Aj man tuq atqet te Jesus tiꞌj te mes, te xuj oqet tqoꞌ te tkꞌokꞌjal tuj twiꞌ.* 8 Kye txnaqꞌatz, ya ma tzꞌok kyeꞌeꞌ kyetz, ebꞌajjaw qꞌojlik bꞌix owaqꞌik tzan kyyolin ikxjani: “¿Tistil nqet txqꞌelaꞌ kyaqil nini?* 9 Bꞌaꞌn tuq tzan txik kꞌaylet bꞌan kar te jun onbꞌil-tal kye mebꞌaꞌ xjal.” 10 Per te Jesus oxik xhchaꞌoꞌ bꞌix oxik tqꞌumaꞌ kyetz ikxjani: “¿Tistil etetz nqet eyoliꞌ ikxji tiꞌj ja xujni? Te aj maꞌtx tkꞌuluj wiꞌjni, nini jun galan. 11 Kye mebꞌaꞌ xjal okyeqtel tenkix exol,* yatzun wetz nlay kyinqet ten exol. 12 Te aj maꞌtx tkꞌuluj ja xujni aj txqet tqoꞌ te tkꞌokꞌjal wiꞌj, ikxji tetz maꞌtx kyinqet tkꞌuluꞌ listar tzan nmuqet.* 13 Wetz oxeꞌl nqꞌumaꞌ etetz te bꞌanꞌax, jaꞌchq twitz txꞌoꞌtxꞌ kyaqil aj jaꞌ oxeꞌl pakbꞌaꞌ te tpakbꞌalil titzaꞌ te Qtata Dios nkolon qiꞌj, ax oxeꞌl qꞌumlet tiꞌj te aj maꞌtx tkꞌuluj ja xujni tzan stzaj naꞌoꞌ tetz.”*
Aj Tjaw Meltzꞌjik Te Juds Tiꞌj Te Jesus
14 Ntons, jun aj kxol kye kykabꞌlajujil txnaqꞌatz te Jesus, aj tbꞌi Judas Iskaryot, tetz oxwaꞌq yoliyon kyukyꞌi kye pal aj nim kyajwalil. 15 Oxik tqꞌumaꞌ kyetz ikxjani: “¿Tidiꞌ otzajel esiꞌ wetz tzan txik nqꞌapoꞌ te Jesus tuj eqꞌabꞌ?” Ntons kyetz ekaj tiꞌj tzan txik ksiꞌ lajuj tuj kawnaq (30) tmin xtxꞌotxꞌal plat.* 16 Bꞌeyx tuj aj qꞌijji te Juds njoyon tuq tumeꞌl titzaꞌ tzan txik tqꞌapoꞌ te Jesus tuj kyqꞌabꞌ.
Aj Twaꞌan Te Jesus Kyukyꞌi Txnaqꞌatz Tiꞌj Te Ninqꞌij Paskw
17 Ntons, tuj tbꞌay qꞌij tiꞌj te ninqꞌij oj kywaꞌan te wabꞌj aj kꞌontiꞌl malsbꞌil tuj, kye txnaqꞌatz ebꞌajꞌok laqꞌchet tiꞌj bꞌix oxik kchaꞌoꞌ tetz ikxjani: “¿Jaꞌ agan tzan tqet jkꞌuluꞌ kyaqil tzan awaꞌan tiꞌj te qꞌij Paskw?” 18 Tetz oxik tqꞌumaꞌ kyetz ikxjani: “Pex waq tuj te amaqꞌ tuj tjay ja xjalni bꞌix oxeꞌl eqꞌumaꞌ tetz ikxjani: “Te xnaqꞌtzon ma tzaj tqꞌumaꞌ ikxjani: ‘Chꞌinky tpon or wetz bꞌix kyinpon ajay kyukyꞌi kye nxnaqꞌatz tzan nwaꞌan junx kyukyꞌiꞌl tiꞌj te ninqꞌij Paskw.’ ”” 19 Ntons kye txnaqꞌatz oqet kykꞌuluꞌ iktzaꞌx tuq te Jesus ojetq xik tqꞌumaꞌ, bꞌix oqet kykꞌuluꞌ kyaqil tzan kywaꞌan tiꞌj te ninqꞌij Paskw.
20 Ntons, ya ma qoqet yupan, te Jesus witꞌlik tuq tiꞌj mes junx kyukyꞌi kye kykabꞌlajujil txnaqꞌatz. 21 Bꞌix man tuq nkyewaꞌan, oxik tqꞌumaꞌ kyetz ikxjani: “Wetz oxeꞌl nqꞌumaꞌ etetz te bꞌanꞌax, jun aj exol etetz ojawel meltzꞌjik wiꞌj.” 22 Ntons kyetz oje kyebꞌisun, bꞌix junjunchaq eꞌaqꞌik tzan kchaꞌon tukyꞌiꞌl ikxjani: “¿Tat, aꞌin petzun wetz?” 23 Te Jesus oxik tqꞌumaꞌ kyetz ikxjani: “Jun te etetz aj nqex tmuꞌuꞌ tweꞌ junx wukyꞌiꞌl tuj te laq,* aji tetz te aj ojawel meltzꞌjik wiꞌj. 24 [Wetz] te Ichan Aj Tkꞌwaꞌal Dios [aꞌin] okyꞌelkix wiꞌj kyaqil aj ntqꞌumaꞌ te Tuꞌjal Dios. ¡Per last te aj ojawel meltzꞌjik wiꞌj! ¡Mejor-tal kꞌontiꞌl owitzꞌjik!” 25 Ntons te Juds aj ojawel tuq meltzꞌjik tiꞌj oxik xhchaꞌoꞌ tetz ikxjani: “¿Tat, aꞌin petzun wetz?” Yaji te Jesus oxik tqꞌumaꞌ ikxjani: “Aꞌichx maꞌtx tzaj qꞌuman tetz.”
26 Aj man tuq nkyewaꞌan, te Jesus ojaw stzyuꞌ te wabꞌj tuj tqꞌabꞌ bꞌix ya ma xik tsiꞌ pixon te Qtata Dios, oqet tkyꞌiwlaꞌ, oqet tpedasiꞌ bꞌix oxik tsiꞌ kye txnaqꞌatz bꞌix oxik tqꞌumaꞌ ikxjani: “Peꞌewaꞌan waq. Te ntzani te nchiꞌjel.” 27 Yaji ojaw stzyuꞌ tuj tqꞌabꞌ jun ukꞌbꞌil bꞌix ya ma xik tsiꞌ pixon te Qtata Dios, okyꞌik tsiꞌ te ukꞌbꞌil kye txnaqꞌatz bꞌix oxik tqꞌumaꞌ kyetz ikxjani: “Peꞌetukꞌan waq ekyaqil tiꞌj ja ukꞌbꞌilni, 28 tzan tpaj ntzani te nchikyꞌel aj telponx bꞌanꞌax te tumeꞌl akꞌaꞌj aj man nkaj tqꞌumaꞌ [Qtata Dios], te nchikyꞌel aj owelal oj nkamik tzan tqet najsaꞌ kchoj kyꞌilaꞌj xjal.* 29 Per wetz oxeꞌl nqꞌumaꞌ etetz, wetz ya nlay xik wukꞌaꞌ te taꞌal ub, max oj txik wukꞌaꞌ junkyꞌel junx etukyꞌiꞌl oj kykaj kyaqil tuj tqꞌabꞌ Ntat.”
Aj Txik Tqꞌumaꞌ Te Jesus Kkyaqil Kye Txnaqꞌatz Okajel Tuq Kykolaꞌ Tetz
30 Yaji ya ma xik kybꞌitzaꞌ jun bꞌitz, ebꞌajxik twiꞌ witz aj tbꞌi witz Olib. 31 Bꞌix te Jesus oxik tqꞌumaꞌ kyetz ikxjani: “Ekyaqil etetz ja aqꞌbꞌilni okyinkajel ekolaꞌ. Komo ikxji nyolin tuj te Tuꞌjal Qtata Dios: “Oqtel nkansaꞌ te pastoriyon bꞌix kye taloꞌ okyeꞌelal slabꞌeꞌ.”* 32 Per oj njaw anqꞌin, wetz okyinxeꞌl tuj Galiley tbꞌayon ewitz etetz.”* 33 Yaji te Xhpeꞌy oxik tqꞌumaꞌ tetz ikxjani: “Anke kyaqil ochkajel kykolaꞌ, per wetz nlay chkaj nkolaꞌ.” 34 Te Jesus oxik tqꞌumaꞌ tetz ikxjani: “Wetz oxeꞌl nqꞌumaꞌ yatz te bꞌanꞌax, yatz ja aqꞌbꞌil ntzani minaꞌ tuq tjaw oqꞌ te toꞌk, yatz oxmaj ojetq qet awewaꞌ qa awotzqimin.” 35 Per yaji te Xhpeꞌy oxik tqꞌumaꞌ ikxjani: “Qa wetz presis tzan nkamik junx awukyꞌiꞌl, wetz nlay qet wewaꞌ qa wotzqimich.” Bꞌix kkyaqil kye txqꞌanky txnaqꞌatz okyqꞌumaj ikxji.
Aj Txnaqꞌtzan Te Jesus Tuj Jetzemani
36 Ntons yaji te Jesus oxik kyukyꞌi txnaqꞌatz tuj jun luwar Jetzemani tbꞌi bꞌix oxik tqꞌumaꞌ kyetz ikxjani: “Peꞌekajten etetz tzani bꞌix wetz ma kyinxik xnaqꞌtzon txini.” 37 Ntons ebꞌajxik tin tukyꞌiꞌl, te Xhpeꞌy bꞌix kye kykabꞌil tkꞌajol Sebedeya bꞌix te Jesus owaqꞌik tzan tbꞌisun bꞌix bꞌan nchoꞌon tuq tanim. 38 Oxik tqꞌumaꞌ kyetz ikxjani: “Wetz nnaꞌoꞌ tuj wanim jun bꞌis iktzaꞌ chꞌinky nkamik. Peꞌekajten etetz tzani bꞌix peꞌeten itzꞌoj wukyꞌiꞌl.” 39 Yaji te Jesus oxik chꞌinky ikxjani bꞌix oqet mejlet tukyꞌi tajsik twitz max twitz txꞌoꞌtxꞌ bꞌix owaqꞌik tzan txnaqꞌtzan, oxik tqꞌumaꞌ ikxjani: “Tat, qa yatz agan, kyinꞌel akoloꞌ chꞌin tiꞌj te ja nyaꞌtx galan aj okyꞌel wiꞌjni, per kꞌontiꞌl tzan tbꞌantik iktzaꞌ wetz ngan sinoke aꞌox iktzaꞌ yatz agan.” 40 Yaji omeltzꞌjik aj jaꞌ tuq akyeqet kye txnaqꞌatz bꞌix etzaj tkambꞌaꞌ nkyewitan tuq, bꞌix oxik tqꞌumaꞌ tukyꞌi te Xhpeꞌy ikxjani: “¿Kꞌontiꞌl ma etipaj ni jun or tzan eten itzꞌoj junx wukyꞌiꞌl? 41 Peꞌeten waq list bꞌix peꞌexnaqꞌtzan waq tzan kꞌon eqet tzꞌaqik. Etetz tuj etanim egan tzan ekꞌulun te galan, yatzun tukyꞌi te echiꞌjel nyaꞌtx jwert aꞌix [tzan ekꞌulun ikxji].”b 42 Yaji oxik junkyꞌel tkaꞌmjjiꞌn-el xnaqꞌtzon bꞌix oxik tqꞌumaꞌ ikxjani: “Tat, qa nlay bꞌantik tzan tel te ja xhchoꞌnalni sinoke okyꞌelkix wiꞌj, ntons intbꞌantik iktzaꞌ yatz agan.”
43 Ya ma meltzꞌjik, etzaj tkꞌulbꞌaꞌ junkyꞌel kye txnaqꞌatz ojetq tuq kyewitan tzan tpaj bꞌan nkyexnakwin tuq tzan te kywatl. 44 Ntons ekaj tsiꞌ bꞌix oxik junkyꞌel toxmajjiꞌn-el xnaqꞌtzon, bꞌix oxik tqꞌumaꞌ junkyꞌel te tyol iktzaꞌx ojetq tuq xik tqꞌumaꞌ tbꞌay. 45 Ntons omeltzꞌjik junkyꞌel aj jaꞌ tuq akyeqet kye txnaqꞌatz bꞌix oxik tqꞌumaꞌ kyetz ikxjani: “¿Tiꞌtzun, tzunx nkxwitan bꞌix nkxꞌojlan? Maꞌtx pon or te [wetz] te Ichan Aj Tkꞌwaꞌal Dios [aꞌin], okyinxeꞌl qꞌapoꞌ tuj kyqꞌabꞌ kye joyol choj. 46 Kare waq, sekꞌ ejaw waꞌlet, chꞌinky tul te aj maꞌtx jaw meltzꞌjik wiꞌj.”
Aj Tjaw Tzyuꞌ Te Jesus
47 Tzunx tuq nyolin te Jesus aj tpon te Juds, jun aj kxol tuq kye kykabꞌlajujil txnaqꞌatz, kyukyꞌi kyꞌilaꞌj xjal aj eqꞌiꞌ tuq kymachit aj qꞌojbꞌil bꞌix ktzeꞌ. Lajomeꞌ tuq tzan kye pal aj nim kyajwalil bꞌix tzan kye tijxjal kxol kye aj tijajil Israel. 48 Te Juds aj ojaw meltzꞌjik tiꞌj Jesus, tetz ojetq tuq xik tqꞌumaꞌ kyetz jun tumeꞌl titzaꞌ tuq owelal kynikyꞌ tiꞌj, ojetq tuq xik tqꞌumaꞌ kyetz ikxjani: “Aj wetz oxeꞌl nlimaꞌ iktzaꞌ jun wamiw,c atzunji, bꞌix ojawel etzyuꞌ.” 49 Ikxji ya ma tzꞌok laqꞌchet tiꞌj Jesus oxik tqꞌumaꞌ ikxjani: “Xnaqꞌtzon, nkyinliman te yatz.” Bꞌix owel stzꞌubꞌaꞌ. 50 Per te Jesus oxik tqꞌumaꞌ ikxjani: “Wajyol, kꞌuluj kyaqil aj ma tzul akꞌuluꞌtz.” Ntons eꞌok laqꞌchet tiꞌj Jesus, eꞌok labꞌun tiꞌj bꞌix ojaw ktzyuꞌ.
51 Ntons jun kxol kye aj akyeqet tuq tukyꞌi Jesus ojatz tin tmachit tuj tjay bꞌix owel xtxꞌemuꞌ jun txkyin te tmos te twitzaleꞌ pal. 52 Yaji te Jesus oxik tqꞌumaꞌ ikxjani: “Intqex akꞌuꞌuꞌ te amachit tuj tjay. Kyaqil xjal aj nkyeqꞌojin tukyꞌi machit kansbꞌil ax tukyꞌi teꞌ machit kansbꞌil okyekamel. 53 ¿Tiꞌtzun kꞌontiꞌl awebꞌen qa wetz bꞌaꞌn tzan txik nqaniꞌ tukyꞌi Ntat, bꞌix tetz bꞌaꞌn tzan stzaj tlajoꞌ [te kolol wetz] bꞌeyx ajnaꞌl bꞌan kyꞌilaꞌj ángel aj kꞌontiꞌl nbꞌantik kyajlet?d 54 Per qa ikxji-wit, ¿titzaꞌ opoyon aj ntqꞌumaꞌ te Tuꞌjal Dios aj a tgan tzan tkyꞌik wiꞌj?”
55 Bꞌeyxnajji te Jesus oxik tqꞌumaꞌ kye xjal ikxjani: “¿Tistil etetz maꞌtx kxꞌul tukyꞌi emachit kansbꞌil bꞌix tukyꞌi etzeꞌ tzan njaw etzyuꞌ iktzaꞌ wetz aꞌin jun eleqꞌ?* Kyaqil qꞌij wetz nkyinqet tuq witꞌlet tuj te Nin Jay Nabꞌil Qtata Dios xnaqꞌtzal kye xjal bꞌix kꞌontiꞌl injaw etzyuꞌ tzi.* 56 Per kyaqil ntzani nkyꞌik tzan tponkix te aj oqet ktzꞌibꞌaꞌ kye aj yolil tyol Dios oqtxiꞌ.” Ntons kkyaqil kye txnaqꞌatz okaj kykolaꞌ bꞌix ebꞌajꞌoqik.*
Aj Tpon Eqꞌiꞌ Te Jesus Kywitz Kye Aj Nim Kyajwalil
57 Yaji kye aj ojetq tuq jaw ktzyuꞌ te Jesus oxik kyeqꞌiꞌ tjay Kaypas, aj twitzaleꞌ pal, bꞌix tzi chimoꞌ kyibꞌ tuq kye xnaqꞌtzal Kawbꞌil bꞌix kye tijxjal kxol kye aj tijajil Israel. 58 Yatzun te Xhpeꞌy owok lapet kyiꞌj laqꞌchikx chꞌin, bꞌix opon max tzijay tjay te twitzaleꞌ pal. Tzi oqet witꞌlet kyukyꞌi kye aj xbꞌuqil te Nin Jay Nabꞌil Qtata Dios, tzan tok ten tuq tidiꞌ okyꞌel. 59 Kye pal aj nim kyajwalil bꞌix kye tijxjal aj at nim kyajwalil, kyetz nkyejoyon tuq xjal tzan kyyolin jun til te Jesus anke nyaꞌtx bꞌanꞌax, per tzan tuq txik kyqꞌapoꞌ tzan tqet kansaꞌ. 60 Per kꞌontiꞌl owoknoj jun tidiꞌ kyitzaꞌ anke kyꞌilaꞌj xjal oxik kyqꞌumaꞌ tidiꞌchq til aj nyaꞌtx tuq bꞌanax. Yaji ebꞌajpon kabꞌeꞌky 61 bꞌix oxik kyqꞌumaꞌ ikxjani: “Ja xjal ntzani oxik tqꞌumaꞌ ikxjani: “Wetz bꞌaꞌn tzan tqet nxituꞌ te Nin Jay Nabꞌil Qtata Dios bꞌix bꞌaꞌn tzan tjaw nkꞌuluꞌ junkyꞌel tuj oxe qꞌij.””* 62 Ntons te twitzaleꞌ pal ojaw waꞌlet bꞌix oxik xhchaꞌoꞌ te Jesus ikxjani: “¿Tiꞌtzun nlay tzꞌajtz atzaqꞌbꞌeꞌ chꞌinwt? ¿Tidiꞌ kyaqil aj nkyqꞌumaꞌni?” 63 Per te Jesus kꞌontiꞌl tidiꞌ otqꞌumaj. Ntons te twitzaleꞌ pal oxik tqꞌumaꞌ tetz ikxjani: “Nxik nkꞌuluꞌ mandad te yatz tzan tjatz aqꞌumaꞌ te bꞌanꞌax tukyꞌi tbꞌi te Qtata Dios aj itzꞌoj; instzaj aqꞌumaꞌ qa aꞌich yatz te Koloyon Aj Qꞌumankaj Oqtxiꞌ, aj Tkꞌwaꞌal Qtata Dios.” 64 Yaji te Jesus owaj tqꞌumaꞌ tetz ikxjani: “[Bꞌanꞌax aꞌin] iktzaꞌx maꞌtx tzaj aqꞌumaꞌni. Bꞌix wetz oxeꞌl nqꞌumaꞌ etetz, okyinxeꞌl eteꞌeꞌ [wetz] te Ichan Aj Tkꞌwaꞌal Dios [aꞌin] witꞌlikin tuj tbꞌanqꞌabꞌ te Qtata Dios aj at nim tajwalil, bꞌix okyinxeꞌl eteꞌeꞌ oj ntzaj txekaꞌj tuj muj.”*
65 Ntons te twitzaleꞌ pal owel tlaquꞌ tqꞌanaqx tiꞌj,e [tzan tqet tyekꞌuꞌ tqꞌoj tiꞌj tyol Jesus], bꞌix oxik tqꞌumaꞌ ikxjani: “¡Nxmayin tiꞌj Qtata Dios! ¿Tistil owokel qchaꞌoꞌ txqꞌanky xjal tzan stzaj kyqꞌumaꞌ til? Etetz maꞌtx stzꞌok echaꞌoꞌ tetz nxmayin tiꞌj Qtata Dios. 66 ¿Titzaꞌ etetz tuj enabꞌl?” Yaji kye xjal owaj ktzaqꞌbꞌeꞌ ikxjani: “¡Tmeres tzan tnaj!”* 67 Ntons eꞌaqꞌik tzan tox ktzubꞌaꞌ tuj twitz bꞌix oqetbꞌaj kytinkꞌaꞌ. Junjunky owok kyloqtzaꞌ tqꞌoꞌtx,* 68 bꞌix oxik kyqꞌumaꞌ tetz ikxjani: “Yatz aj aꞌich te Koloyon Aj Qꞌumankaj Oqtxiꞌ [kyi], pakanonchaq tiꞌj abꞌl ma tzꞌok bꞌujun te yatz.”
Aj Txik Tqꞌumaꞌ Xhpeꞌy Kꞌontiꞌl Tuq Totzqiꞌ Te Jesus
69 Ntons, te Xhpeꞌy witꞌlik tuq jwer tzijay. Yaji tzaj te jun kryad, owok laqꞌchet tiꞌj bꞌix oxik tqꞌumaꞌ ikxjani: “Ax yatz ajunich tuq tukyꞌi Jesus aj Galiley.” 70 Per te Xhpeꞌy oqet tewaꞌ kywitz kyaqil, oxik tqꞌumaꞌ ikxjani: “Wetz kꞌontiꞌl webꞌen tidiꞌ aj nꞌaqꞌumaꞌni.” 71 Yaji oxik te Xhpeꞌy stziꞌ te lamel bꞌix junky xjal oxik teꞌeꞌ bꞌix oxik tqꞌumaꞌ kye txqꞌanky ikxjani: “Aj xjal nini, tetz ajun tuq tukyꞌi Jesus aj Nasaret.” 72 Junkyꞌel te Xhpeꞌy oqet tewaꞌ bꞌix oxik tsiꞌ tjurament. “Wetz kꞌontiꞌl wotzqiꞌ aj xjal nini.” 73 Mas yaj chꞌinky, kye aj akyeqet tuq tzi ebꞌajꞌok laqꞌchet tiꞌj te Xhpeꞌy bꞌix oxik kyqꞌumaꞌ tetz ikxjani: “Bꞌanꞌax yatz aꞌich jun kxol kye aj lapikeꞌ tuq tiꞌj, komo tzan tpaj titzaꞌ yatz chyolin nꞌel qnikyꞌ awiꞌj.” 74 Ntons tetz owaqꞌik tzan tqanbꞌen bꞌix tzan txik tqꞌumaꞌ tjurament, bꞌix oxik tqꞌumaꞌ ikxjani: “Wetz kꞌontiꞌl wotzqiꞌ aj xjal niꞌn.” Bꞌeyxnajji ojaw oqꞌ jun toꞌk. 75 Ntons te Xhpeꞌy otzaj tiktzꞌan tiꞌj tanim aj ojetq tuq xik qꞌumaꞌ tetz tzan Jesus: “Aj minaꞌ tuq tjaw oqꞌ te toꞌk ojetq tuq qet awewaꞌ oxmaj qa awotzqimin.” Yaji te Xhpeꞌy owetz tuj aj luwarji bꞌix owokten oqꞌel tukyꞌi nim xhchoꞌnal tuj tanim.