14
Aj Tqet Kybꞌisuꞌ Kye Xjal Titzaꞌ Tuq Tzan Tqet Kykansaꞌ Te Jesus
1 Ntons atx tuq kabꞌeꞌky qꞌij tzan taqꞌik kabꞌeꞌ ninqꞌij aj kyiqan kyibꞌx, te jun te ninqꞌij Paskw* bꞌix te junky ninqꞌij chaꞌoj kywaꞌan wabꞌj pan aj kꞌontiꞌl malsbꞌil tuj. Kye pal aj nim kyajwalil kyukyꞌi kye xnaqꞌtzal Kawbꞌil, kyetz nkyjoyoꞌ tuq tumeꞌl titzaꞌ tuq tzan tjaw ktzyuꞌ te Jesus ewj bꞌix tzan tqet kykansaꞌ. 2 Kyetz nkyyoliꞌ tuq kyibꞌkyibꞌx ikxjani: “Mejor kꞌon jaw qtzyuꞌ mer tuj te ninqꞌij tzan tpaj kye xjal okyejawel labꞌun qꞌojiyon qiꞌj.”
Aj Tqet Kꞌuluꞌ Abyar Tibꞌ Te Jesus Tiꞌj Tkamiky
3 Bwen, te Jesus atqet tuq tuj amaqꞌ Betany tjay Simon aj oje tzꞌel tukyꞌi lepr bꞌix witꞌlik tuq tiꞌj mes. Yaji opon jun xuj bꞌix eqꞌiꞌ titzaꞌ jun chꞌi tal qꞌawubꞌ nekit. Te xtxꞌotxꞌal te tal qꞌawubꞌ bꞌan tbꞌanil, jun abꞌj alabastr tbꞌi bꞌix atqex tuq tuj, jun tkꞌokꞌjal xhchukeltibꞌ taꞌal jun kꞌul nardo bꞌix bꞌan kar tuq tiꞌj; bꞌix te xuj ojaw tpinkꞌuꞌ talq te tal qꞌawubꞌ bꞌix oqet xhchuliꞌ kyebꞌaꞌ tuj twiꞌ Jesus.a
4 Ntons, junjun aj akyeqet tuq tzi, kyetz otzaj kyqꞌoj tiꞌj te xuj, bꞌix kyekyi ikxjani: “¿Tistil maꞌtx qet txqꞌelaꞌ te ja tkꞌokꞌjalni? 5 Bꞌaꞌn tuq tzan txik kꞌaylet tzan twiꞌ tkꞌuꞌj jun xjal te jun aqꞌbꞌib bꞌix yaji tzan txik oylet te twibꞌen kye mebꞌaꞌ xjal.” Ikxji owok kyiliꞌ te xuj. 6 Per te Jesus oxik tqꞌumaꞌ kyetz ikxjani: “Kꞌon tzꞌok etiliꞌ. ¿Tistil nkxkꞌulun joder tiꞌj? Te aj maꞌtx tkꞌulujni, galan. 7 Kye mebꞌaꞌ xjal kyaqil qꞌij ateꞌ* bꞌix etetz bꞌaꞌn tzan etonen kyiꞌj alchaqkyetz qꞌij egan. Per wetz nlay kyinqeten etukyꞌiꞌl bꞌajqꞌij. 8 Te ja xujni maꞌtx tkꞌuluj te aj janikꞌpon ma bꞌantik titzaꞌ, maꞌtx tzꞌok tsiꞌ tkꞌokꞌjal wiꞌj tzan nten list te muqbꞌil wetz. 9 Oxeꞌl nqꞌumaꞌ etetz te bꞌanꞌax, jaꞌchq twitz txꞌoꞌtxꞌ kyaqil aj jaꞌ oxeꞌl pakbꞌlet te tpakbꞌalil galan tiꞌj Dios, ax oxeꞌl qꞌumlet tiꞌj aj maꞌtx tkꞌuluꞌ ja xujni tzan stzaj naꞌoꞌ te tkꞌulbꞌen.”
Aj Tkawlan Te Juds Kyukyꞌi Kye Aj Nim Kyajwalil
10 Yaji te Judas Iskaryot, jun aj kxol kye kykabꞌlajujil tukyꞌiꞌl Jesus, aj tmankun tyolin te Jesus, tetz owex yoliyon kyukyꞌi kye pal aj nim kyajwalil tzan txik tuq tqꞌapoꞌ te Jesus tuj kyqꞌabꞌ. 11 Yatzun kyetz aj tok kchaꞌoꞌ ikxji, oje kyechalaj bꞌix oxik ksiꞌ kyyol tukyꞌiꞌl tzan txik kchojoꞌ twiꞌ tkꞌuꞌj. Yaji te Juds otjoyoj tumeꞌl titzaꞌ tuq tzan txik tqꞌapoꞌ Jesus tuj kyqꞌabꞌ.
Aj Kxik Tlajoꞌ Jesus Kabꞌeꞌ Tukyꞌiꞌl Tzan Tqet Kykꞌuluꞌ Te Kyweꞌ Tiꞌj Te Tqꞌijlal Paskw
12 Ntons, tuj te tbꞌay qꞌij oj taqꞌik te ninqꞌij chaꞌoj kywaꞌan te wabꞌj pan aj kꞌontiꞌl malsbꞌil tuj bꞌix oj txik kyqꞌapoꞌ te tal karner te jun present tiꞌj te tqꞌijlal Paskw, ntons aj qꞌijji kye txnaqꞌatz oxik kchaꞌoꞌ te Jesus ikxjani: “¿Jaꞌ agan tzan qxikna kꞌulul te qweꞌ tiꞌj te Ninqꞌij Paskw?” 13 Ntons yaji tetz exik tlajoꞌ kabꞌeꞌ txnaqꞌatz, bꞌix oxik tqꞌumaꞌ kyetz ikxjani: “Pex waq tuj amaqꞌc bꞌix tzi owokel ekꞌulbꞌaꞌ jun ichan tuj bꞌey eqꞌiꞌ jun qꞌawubꞌ aꞌ titzaꞌ. Ntons okxeꞌl lapet tiꞌj. 14 Tuj te jay aj jaꞌ owokex, tzi oxeꞌl eqꞌumaꞌ tukyꞌi te tajawjay ikxjani: “Te Xnaqꞌtzon ma qotzaj tlajoꞌna awukyꞌiꞌl qanil tetz jaꞌ oqowaꞌyona tiꞌj te Ninqꞌij Paskw.” 15 Bꞌix tetz otzajel tyekꞌuꞌ jun nim kwart aj atjax jawnaq tkabꞌiꞌ txol. Bꞌix tzi at mes, at witꞌlelj, at kyaqil. Tzi oqtel ekꞌuluꞌ tzan qwaꞌan.” 16 Ntons kye kabꞌeꞌ txnaqꞌatz ebꞌajxik, bꞌix ebꞌajpon tuj amaqꞌ bꞌix ikxji okyꞌik iktzaꞌx txiklen qꞌumaꞌ kyetz tzan Jesus. Ntons oqet kykꞌuluꞌ tzan kywaꞌan tiꞌj te Ninqꞌij Paskw.
Aj Kybꞌajwaꞌan Jesus Kyukyꞌi Txnaqꞌatz Tiꞌj Te Ninqꞌij Paskw
Exo 12:1-28
17 Ntons ya ma qoxmutxꞌeꞌ, opon te Jesus kyukyꞌi kye kykabꞌlajujil txnaqꞌatz waꞌil. 18 Aj man tuq nkyewaꞌan tiꞌj mes, te Jesus oxik tqꞌumaꞌ kyetz ikxjani: “Oxeꞌl nqꞌumaꞌ etetz te bꞌanꞌax, jun aj exol etetz aj nwaꞌan junx wukyꞌiꞌl tzani ojawel meltzꞌjik wiꞌj, okyinxeꞌl tqꞌapoꞌ tuj kyqꞌabꞌ kye aj okykꞌuluꞌtz nyaꞌtx galan wiꞌj.” 19 Yaji kyetz oje kyebꞌisun bꞌix oxik kyqꞌumaꞌ kyetz tetz ikxjani: “¿Abꞌltzun te aj nꞌayoliꞌni? ¡Wetz nlay!” 20 Yaji tetz oxik tqꞌumaꞌ ikxjani: “Bꞌanꞌax jun exol etetz ekabꞌlajujil aj nwaꞌan junchꞌin wukyꞌiꞌlni ojawel meltzꞌjik wiꞌj. 21 [Wetz] te Ichan Aj Tkꞌwaꞌal Dios [aꞌin] okyꞌel wiꞌj iktzaꞌ tkajlen tzꞌibꞌaꞌ wiꞌjx oqtxiꞌ.* Per last te aj xjal aj ojawel meltzꞌjik wiꞌj. Mejor-tal kꞌontiꞌl otzaj alaꞌ.”
22 Ntons aj man tuq nkyewaꞌan, te Jesus ojaw tin jun wabꞌj bꞌix ya ma xik tsiꞌ pixon te Dios tiꞌj, oqet tpedasiꞌ, bꞌix oxik tsipaꞌ te wabꞌj te junjun. Oxik tqꞌumaꞌ ikxjani: “Se ewaꞌan waq tzan tpaj te ntzani [te] nchiꞌjel.” 23 Yaji ojaw tin jun ukꞌbꞌil bꞌix oxik tsiꞌ pixon te Dios bꞌix yaji oxik tsipaꞌ chꞌinchꞌinaq te junjun bꞌix oxik kyukꞌaꞌ kkyaqil. 24 Bꞌix oxik tqꞌumaꞌ kyetz ikxjani: “Te ja ntzani te nchikyꞌel [aj telponx bꞌanꞌax] te tumeꞌl akꞌaꞌj aj man nkaj tqꞌumaꞌ [Qtata Dios], te nchikyꞌel aj owelal oj nkamik te jun galan kye kyꞌilaꞌj xjal.* 25 Oxeꞌl nqꞌumaꞌ etetz te bꞌanꞌax, ya nlayky wukꞌaj te taꞌal ub max oj txik wukꞌaꞌ junkyꞌel oj kykaj kyaqil tuj tqꞌabꞌ Ntat.”*
Aj Tjaw Tzyuꞌ Jesus Tzan Kye Xjal
26 Ntons ya ma xik kybꞌitzaꞌ jun kybꞌitz nabꞌil te Dios, eꞌex tzi bꞌix exik twiꞌ te witz Olib. 27 Te Jesus oxik tqꞌumaꞌ kye txnaqꞌatz ikxjani: “Ekyaqil etetz okyinkajel ekolaꞌ, opoyon iktzaꞌx tzꞌibꞌankaj tuj Tuꞌjal Dios aj jaꞌ nyolin, “Oqtel nkansaꞌ te pastoriyon bꞌix yatzun kye taloꞌ okyeꞌelal slabꞌeꞌ.”* 28 Per chaꞌoj njaw anqꞌin, okyinxeꞌl tbꞌayon ewitz tuj Galiley.”* 29 Yaji te Xhpeꞌy oxik tqꞌumaꞌ ikxjani: “Qa kyaqil ochkajel kykolaꞌ bꞌix okyeqtel tzꞌaqik, per wetz nlay.” 30 Yaji te Jesus oxik tqꞌumaꞌ: “Wetz oxeꞌl nqꞌumaꞌ yatz te bꞌanꞌax, yatz ja aqꞌbꞌil ntzani minaꞌ tuq tjaw oqꞌ te toꞌk tkaꞌmjjiꞌn-el, yatz ojetq qet awewaꞌ oxmaj qa awotzqimin.” 31 Per te Xhpeꞌy oxik tqꞌumaꞌ junkyꞌelky: “Anke wetz ma kyinqet kansaꞌ junchꞌin awukyꞌiꞌl, ntons oꞌkix kyinkamel per nlay qet wewaꞌ qa wotzqimich.” Yaji ax ikxji okyqꞌumaj kyaqil kye txqꞌanky.
Aj Txnaqꞌtzan Jesus Tuj Jetzemani
32 Ntons yaji epon tuj jun luwar Jetzemani tbꞌi. Aj kypon tzi, te Jesus oxik tqꞌumaꞌ kye txnaqꞌatz ikxjani: “Peꞌeqet witꞌlet tzani bꞌix wetz ma kyinxik xnaqꞌtzon tukyꞌi Ntat txini.” 33 Ntons exik tin tukyꞌiꞌl te Xhpeꞌy, Jacobo,d Waꞌnch. Yaji otzaj jun nim xobꞌalj tiꞌj bꞌix oxik tanim tuj bꞌis. 34 Oxik tqꞌumaꞌ kyetz ikxjani: “Wetz nnaꞌoꞌ maꞌtx xik wanim tuj bꞌis, per jun bꞌis bꞌan jwert, nnaꞌoꞌ iktzaꞌ chꞌinky nkamik. Peꞌekajten waq tzani bꞌix se eten waq list.”
35 Yaji te Jesus owel laqꞌchet chꞌin kyiꞌj bꞌix oqet mejlet bꞌix oqet tsiꞌ twitz twitz txꞌoꞌtxꞌ. Yaji oxik tqaniꞌ te Qtata Dios tzan kꞌon-wit tkyꞌik tiꞌj te xhchoꞌnal aj chꞌinky tuq tok ten. 36 Oxik tqꞌumaꞌ ikxjani: “Ntat,e Ntat, yatz bꞌaꞌn tzan tbꞌantik kyaqil awitzaꞌ, astilji oxeꞌl nqaniꞌ chꞌin awukyꞌiꞌl tzan wel akoloꞌ tzan tel laqꞌchet te nyaꞌtx galan aj okyꞌel wiꞌjni.f Per mejor kꞌon, tzan tpaj wetz ngan tzan tkyꞌik wiꞌj aꞌox iktzaꞌ yatz agan.”
37 Yaji tetz omeltzꞌjik, opon aj jaꞌ tuq akyeqet te Xhpeꞌy tukyꞌi Jacobo bꞌix Waꞌnch, bꞌix kyetz nkyewitan tuq. Oxik tkꞌasuꞌ te Xhpeꞌy bꞌix oxik tqꞌumaꞌ ikxjani: “Simon,g nchwitan. ¿Tiꞌtzun, kꞌontiꞌl ma bꞌantik tzan aten list cha jun rat?h 38 Peꞌeten waq list, bꞌix peꞌexnaqꞌtzan waq tzan kꞌon eqet tzꞌaqik. Etetz tuj etanim egan tzan ekꞌulun te galan, yatzun tukyꞌi te echiꞌjel nyaꞌtx jwert aꞌix [tzan ekꞌulun ikxji].”*
39 Yaji tetz oxik junkyꞌelky xnaqꞌtzon tukyꞌi Stat iktzaꞌx tbꞌay-el.
40 Yaji opon junkyꞌelky kyukyꞌi kye txnaqꞌatz bꞌix kyetz nkyewitan tuq junkyꞌelky tzan tpaj ojetq tuq tzaj noj watl kyiꞌj bꞌix kꞌontiꞌl okyipaj tzan kyten itzꞌoj. Te tbꞌaqꞌ kywitz bꞌan kyaqchapun tuq tzan watl bꞌix aj kxik tkꞌasuꞌ, kyetz kꞌontiꞌl tidiꞌ otzaj kanet tuj kyanim tzan taj ktzaqꞌbꞌeꞌ.
41 Yaji tetz opon junkyꞌelky, toxmajjiꞌn-el, oxik tqꞌumaꞌ kyetz ikxjani: “¿Tiꞌtzun, tzunx nkxwitan bꞌix tzunx nkxꞌojlan? Kabal nini. Maꞌtx pon or bꞌix [wetz] te Ichan Aj Tkꞌwaꞌal Dios [aꞌin] okyinxeꞌl qꞌapoꞌ tuj kyqꞌabꞌ kye aj joyol choj. 42 ¡Sekꞌ ejaw waꞌlet! ¡Qwaꞌq! Intxik eteꞌeꞌ tzul te aj oxeꞌl qꞌapon wetz.”
Aj Tjaw Tzyuꞌ Jesus
43 Man tuq nyolin Jesus kyukyꞌiꞌl, tpon te Judas Iskaryot, jun aj kye kykabꞌlajujil tuq. Ajuneꞌ tuq tukyꞌiꞌl jun bꞌuchꞌuj xjal eqꞌiꞌ kymachit kansbꞌil tukyꞌi kytortol. Kyetz cha lajomeꞌ tzan kye pal aj nim kyajwalil bꞌix kye xnaqꞌtzal Kawbꞌil kyukyꞌi kye kywitzaleꞌ aj nim kyajwalil kxol tijajil Israel. 44 Komo te Juds ojetq tuq qet tkawlaꞌ kyukyꞌi kye xjal ikxjani: “Aj wetz owokel nlimaꞌ iktzaꞌ bꞌan qukyꞌiꞌl qibꞌ,i atzunji. Ojawel etzyuꞌ bꞌix oxeꞌl etin kyebꞌaꞌ.”
45 Ntons owok laqꞌchet naj tiꞌj Jesus bꞌix oxik tqꞌumaꞌ ikxjani: “Xnaqꞌtzon, Xnaqꞌtzon.” Yaji owok tlimaꞌ iktzaꞌ bꞌan kyukyꞌiꞌl kyibꞌ.j 46 Yaji kye xjal nkyexik naj tzyul te Jesus bꞌix oxik kyin. 47 Ntons jun txnaqꞌatz te Jesus ojatz tin tmachit aj kansbꞌil tuj tjay bꞌix owel xtxꞌemuꞌ jun txkyin jun tmos te twitzaleꞌ pal. 48 Yaji te Jesus oxik tqꞌumaꞌ kye xjal ikxjani: “¿Tistil ma kxtzaj tzyul wetz tukyꞌi emachit aj eqꞌojbꞌil bꞌix tukyꞌi etortol? ¿Aꞌin petzun wetz jun eleqꞌ? 49 Wetz nkyinxnaqꞌtzan tuq bꞌajqꞌij kye xjal tuj te Nin Jay Nabꞌil Qtata Dios* bꞌix aꞌilji kꞌontiꞌl injaw etzyuꞌ. Per te ntzani nkyꞌik wiꞌj iktzaꞌx tzꞌibꞌankaj tuj Tuꞌjal Dios.” 50 Ntons yaji kyaqil kye txnaqꞌatz okaj kykolaꞌ bꞌix ebꞌajꞌoqik.
51 Ntons, atqet tuq jun kuꞌxon aj lapik tuq tiꞌj Jesus, bꞌix te tqꞌanaq cha sukuꞌ tuq jun nim xqꞌapj tiꞌj. Ax tetz ojaw tzyuꞌ tzan kye xjal 52 per owel chꞌoqan te nim xqꞌap tiꞌj, bꞌix sqit owoqik.
Aj Txik Kyyoliꞌ Tidiꞌ Tuq Til Te Jesus
53 Yaji oxik kyin te Jesus twitz te twitzaleꞌ pal, bꞌix tzi owok kchimoꞌ kyibꞌ kkyaqil kye txqꞌanky pal aj nim kyajwalil kyukyꞌi kyaqil kye kywitzaleꞌ aj nim kyajwalil kxol kye tijajil Israel kyukyꞌi kyaqil kye xnaqꞌtzal Kawbꞌil. 54 Yatzun te Xhpeꞌy oxik lapet laqꞌchik kyiꞌj bꞌix owox lapet kyiꞌj tzijay tuj tjay te twitzaleꞌ pal bꞌix oqet witꞌlet qꞌexnel qꞌaqꞌ kyukyꞌi kye mulon aj ateꞌox tzi.
55 Ntons kye pal aj nim kyajwalil kyukyꞌi kyaqil kye kywitzaleꞌ aj nim kyajwalil kxol kye tijajil Israel, kyetz kygan tuq tzan tkamik te Jesus, astilji nkyjoyoꞌ tuq jun abꞌl aj otqꞌumaꞌtz tidiꞌ tuq til. Per nijunwt abꞌl owoknoj kyitzaꞌ. 56 Kyꞌilaꞌj tuq njaw kynikꞌoꞌ tidiꞌ tuq til per nyaꞌtx parej tuq nxik kyqꞌumaꞌ. 57 Yaji junjun kxol ojaw kynikꞌoꞌ ikxjani: 58 “Qetza owok qchaꞌoꞌna, aj txik tyoliꞌ, “Wetz oqtel nxituꞌ ja Nin Jay Nabꞌil Qtata Dios aj kykꞌulbꞌen xjal, bꞌix tuj toxiꞌn qꞌij tqetlen nxituꞌ, ojawel nkꞌuluꞌ junkyꞌel aj nyaꞌtx kykꞌulbꞌen xjal.””* 59 Per ax ni tiꞌj te ntzani nyaꞌtx tuq parej te aj nxik kyqꞌumaꞌ.
60 Ntons ojaw waꞌlet te twitzaleꞌ pal bꞌix oxik tqꞌumaꞌ tetz te Jesus ikxjani: “¿Tistil kꞌontiꞌl ntzaj atzaqꞌbꞌeꞌ? ¿Tidiꞌ awil aj ntzaj kyqꞌumaꞌni?” 61 Per te Jesus kꞌontiꞌl tidiꞌ tuq ntqꞌumaꞌ chꞌinwt. Yaji oxik xhchaꞌoꞌ junkyꞌel te pal: “¿Bꞌanꞌax peꞌ aꞌich yatz te Koloyon Aj Qꞌumankaj Oqtxiꞌ? ¿Bꞌanꞌax peꞌ aꞌich te Tkꞌwaꞌal Qtata Dios aj ntzaj qnaꞌoꞌ?” 62 Ntons te Jesus oxik tqꞌumaꞌ ikxjani: “Aꞌin, bꞌix jun qꞌij, [wetz] te Ichan Aj Tkꞌwaꞌal Dios [aꞌin], okyinꞌokel eten witꞌlikin tuj kaꞌj tuj tbꞌanqꞌabꞌk Qtata Dios aj at mas nim tajwalil kywitz kyaqil. Ax okyinxeꞌl eten tuj muj chaꞌoj wul junkyꞌelky tzani twitz txꞌoꞌtxꞌ.”* 63 Yaji te twitzaleꞌ pal toklen xhchaꞌoꞌ ikxji, tetz owel tlaquꞌ tqꞌanaq tiꞌjx [tzan tqꞌoj tiꞌj tyol Jesus.] Bꞌix oxik tqꞌumaꞌ: “¿Tistil owokel qchaꞌoꞌ mas xjal qꞌumal mas til? [¡Kabal aꞌox tzan tpaj aj tyol nini!] 64 Etetz maꞌtx tzꞌok echaꞌoꞌ tyol titzaꞌ nxmayin tiꞌj Qtata Dios. ¿Titzaꞌ etetz tuj enabꞌl? ¿Titzaꞌ oteyon qitzaꞌ?” Yaji kkyaqil oxik kyqꞌumaꞌ tzan tqet kanslet te Jesus.* 65 Yaji junjun ebꞌajꞌaqꞌik tzan tok ktzubꞌaꞌ tiꞌj bꞌix owok ktxayiꞌ twitz bꞌix owok kybꞌujuꞌ bꞌix oxik kyqꞌumaꞌ ikxjani: “Qa ochkanoyon tiꞌj, ¿abꞌl ma tzꞌok bꞌujun yatz?”l Yaji, [oxik qꞌapoꞌ tuj kyqꞌabꞌ] kye mulon bꞌix kyetz owok kypoqꞌchaꞌ.
Aj Txik Tqꞌumaꞌ Te Xhpeꞌy Kꞌontiꞌl Totzqiꞌ Te Jesus
66 Bwen, yatzun te Xhpeꞌy atqet tuq tzijay tjaqꞌ bꞌix opon jun tkryad te twitzaleꞌ pal. 67 Oxik teꞌeꞌ tetz te Xhpeꞌy nqꞌexnen tuq qꞌaqꞌ bꞌix owox teꞌeꞌ tuj twitz bꞌix oxik tqꞌumaꞌ ikxjani: “Yatz aꞌich jun aj tukyꞌiꞌl Jesus aj Nasaret.” 68 Per te Xhpeꞌy oqet tewaꞌ, oxik tqꞌumaꞌ ikxjani: “Kꞌontiꞌl wotzqiꞌ bꞌix jeꞌky tidiꞌ-alo nꞌayoliꞌ.” Yaji te Xhpeꞌy owel laqꞌchet, owex stziꞌ lamel. Aj orji ojaw oqꞌ jun toꞌk. 69 Yatzunji te kryad oxik teꞌeꞌ junkyꞌelky bꞌix oxik tqꞌumaꞌ kye aj nkyeqꞌexnen tuq tzi, oxik tqꞌumaꞌ ikxjani: “Aj xjal nini tetz jun tukyꞌiꞌl Jesus.” 70 Per te Xhpeꞌy oqet tewaꞌ junkyꞌelky. Ntons chꞌintkyqnajji, kye xjal aj akyeqet tuq qaynin tzi oxik kyqꞌumaꞌ te Xhpeꞌy ikxjani: “Bꞌanꞌax yatz aꞌich jun tukyꞌiꞌl Jesus tzan tpaj yatz aꞌich aj Galiley iktzaꞌ kye aj tukyꞌiꞌl Jesus.”m 71 Yatzun te Xhpeꞌy otqꞌumaj tzan tok ten twitz xhchoꞌnal qa nyaꞌtx bꞌanꞌax tuq aj ojetq xik tqꞌumaꞌ bꞌix oxik tsiꞌ tjurament bꞌanꞌax kyaqil aj ojetq xik tqꞌumaꞌ, oxik tqꞌumaꞌ ikxjani: “¡Jeꞌky! Wetz kꞌontiꞌl wotzqiꞌ aj xjal aj nꞌeqꞌumaꞌ etetzni. ¡Jeꞌky abꞌl-alo!” 72 Aꞌilnajji otzaj oqꞌ junkyꞌelky te toꞌk bꞌix te Xhpeꞌy otzaj tnaꞌoꞌ aj otqꞌumaj te Jesus tetz. Komo atx maꞌin tuq txiklen qꞌumaꞌ tetz tzan Jesus, “Minaꞌ tjaw oqꞌ te toꞌk tkaꞌmjjiꞌn-el, yatz ojetq kyinqet awewaꞌ oxmaj.” Ntons te Xhpeꞌy aj stzaj tnaꞌoꞌ ntzani, owokten oqꞌel.