15
Aj Tpon Qꞌapbꞌaj Jesus Tukyꞌi Pilat
1 Ntons tuj junky iwitq bꞌan qꞌeqoꞌ, kye pal aj nim kyajwalil owok kchimoꞌ kyibꞌ kyukyꞌi kye tijxjal bꞌix kyukyꞌi kye xnaqꞌtzal Kawbꞌil bꞌix kyaqil kye kywitzaleꞌ aj nim kyajwalil kxol tijajil Israel, kyetz oxik kywakuꞌ te Jesus bꞌix oxwaꞌq kyqꞌapoꞌtz tukyꞌi te Pilat aj kꞌulul mandad tzi. 2 Te Pilat oxik xhchaꞌoꞌ te Jesus ikxjani: “¿Bꞌanꞌax peꞌ qa yatz aꞌich te twitzaleꞌ kꞌulul mandad kxol kye axjalilni?” Yaji te Jesus oxik tqꞌumaꞌ: “Bꞌanꞌax iktzaꞌx aj nꞌaqꞌumaꞌni.” 3 Yaji kye pal aj nim kyajwalil, kyetz nxik kyqꞌumaꞌ tuq te Pilat tidiꞌchq til. 4 Yaji te Pilat oxik tqaniꞌ te Jesus ikxjani: “¿Nlay peꞌ tzaj atzaqꞌbꞌeꞌ? Komo kyetz maꞌtx tzaj kyqꞌumaꞌ tidiꞌchq awiꞌj.” 5 Per te Jesus kꞌontiꞌl tidiꞌ oxik tqꞌumaꞌ; astilji te Pilat oje labꞌan tiꞌj.
Aj Tkaj Tqꞌumaꞌ Te Pilat Tzan Tqet Kansaꞌ Te Jesus
6 Ntons komo ninqꞌij tuq, te Pilat, tetz aqꞌbꞌiaꞌ tuq tuj te ninqꞌij nxik tuq stzoqpiꞌ jun aj pres aj kye xjal nkyqaniꞌ tzan txik stzoqpiꞌ. 7 At tuq jun aj pres Barabas tbꞌi, bꞌix tetz atqex tuq tuj pres kyukyꞌi txqꞌanky tukyꞌiꞌl lamomeꞌ tzan tpaj kykansbꞌen xjal tzan tpaj nkyeqꞌojin tuq tiꞌj te gobyern. 8 Ntons [komo ninqꞌij tuq], kye xjal ebꞌajjakon kchimoꞌ kyibꞌ bꞌix oxik kyqaniꞌ te Pilat tzan txik stzoqpiꞌ tuq jun aj pres iktzaꞌx tuq modin aqꞌbꞌiaꞌ. 9 Yaji te Pilat oxik xhchaꞌoꞌ kye xjal ikxjani: “¿Egan peꞌ tzan txik ntzoqpiꞌ te aj nꞌok qꞌumaꞌ te twitzaleꞌ kꞌulul mandad etiꞌj etetz aj tijajil Israel?”a 10 Komo te Pilat ojetq tuq tzꞌel tnikyꞌ kye pal aj nim kyajwalil oxik kyqꞌapoꞌ te Jesus tzan tpaj cha nkyeꞌekꞌawin tuq tiꞌj. 11 Per yaji kye pal oxik kykubꞌsaꞌ kykꞌuꞌj kye xjal tzan txik kyqaniꞌ tzan txik tzoqplet te Barabas. 12 Ntons te Pilat oxik tqaniꞌ junkyꞌel kyetz ikxjani: “¿Tidiꞌ egan tzan tqet nkꞌuluꞌ tukyꞌi te aj nꞌok eqꞌumaꞌ te twitzaleꞌ kꞌulul mandad etiꞌjni?” 13 Yaji kyaqil kye xjal ejaw sikyꞌin: “Intok klablet twitz krus.” 14 Yaji te Pilat oxik tqꞌumaꞌ ikxjani: “¿Tistil? ¿Tidiꞌ til maꞌtx tzaj xhchukuꞌ?” Per kye xjal mas tuq nkyejaw sikyꞌin kongan, nkyqꞌumaꞌ tuq ikxjani: “Intok klablet twitz krus.” 15 Te Pilat, tetz tgan tuq tzan tkaj galan kyukyꞌi kye xjal, ntons oxik stzoqpiꞌ te Barabas. Oxik tqꞌumaꞌ kyukyꞌi kye soldad tzan tqet kyjubꞌchaꞌ te Jesus bꞌix yaji tzan tok kyklabiꞌ twitz krus.
16 Yaji kye soldad oxik kyin te Jesus tuj junky luwar ax tzi tuj tjay te gobernador, bꞌix etzaj kyukꞌleꞌ kyaqil kye txqꞌanky soldad tzan tok kchimoꞌ kyibꞌ. 17 Owok ksiꞌ tiꞌj jun tkap kyaq qꞌeqmuqin [te xmaybꞌil tetz].b Bꞌix oqet kxpatxꞌiꞌ jun tkoron pur kyꞌiꞌx bꞌix ojax ksiꞌ tuj twiꞌ [cha te xmaybꞌil tetz].c 18 Yaji eꞌokten limal tetz [per nyaꞌtx tuq bꞌanꞌax kyitzaꞌ]. Oxik kyqꞌumaꞌ ikxjani: “Tzꞌokxwit jun galan awiꞌj yatz te twitzaleꞌ kꞌulul mandad kye aj tijajil Israel.” 19 Nꞌok tuq kyjituꞌ tiꞌj twiꞌ tukyꞌi jun suꞌan saqskyꞌiꞌl bꞌix yaji nꞌok tuq ktzubꞌaꞌ tiꞌj bꞌix nkyeqet mejlet twitz [iktzaꞌ twitz jun twitzaleꞌ kꞌulul mandad] tzan tqet kylimaꞌ. [Per nyaꞌtx bꞌanꞌax tuq kyitzaꞌ, cha nkyexmayin tuq tiꞌj.] 20 Yatzun toklenbꞌaj kxmayiꞌ, owel kyin te tkap tiꞌj bꞌix owok ksiꞌ te tqꞌanaqx tiꞌj.d
Aj Tkamik Jesus Twitz Krus
21 Yaji kye soldad owex kyin xtxaꞌm amaqꞌ tzan tok kyklabiꞌ twitz krus. Bꞌix man tuq nkyebꞌet tuj bꞌey, owok kykꞌulbꞌaꞌ te Simon aj Siren, stat Jant bꞌix Rúfo,* tetz tzajnaq tuq tuj kꞌul. Ntons owok kylajoꞌ alajwers tzan txik tiqaꞌ tkurus Jesus. 22 Ntons oxik kyin te Jesus tuj jun luwar tbꞌi Gólgota. “Gólgota” tuj kyyol kyetz telponx iktzaꞌ “Te Luwar Aj Tbꞌaqil Twiꞌ Xjal.” 23 Kye soldad oxik ksuquꞌ te Jesus taꞌal ub samoꞌ tukyꞌi taꞌal jun kꞌul mir tbꞌi [tzan tel tuq te xhchoꞌnal] per te Jesus kꞌontiꞌl oxik tkꞌamoꞌ. 24 Ntons owok kyklabiꞌ twitz krus. Bꞌix oqet ksaqchbꞌilaꞌ loteriy tiꞌj tqꞌanaq aber abꞌl tuq jun te kyetz aj okambꞌayon, ikxji oqet kypawaꞌ te tqꞌanaq kxol.*
25 Ntons owok kyklabiꞌ twitz krus te toxiꞌ or qꞌeqoꞌe 26 bꞌix owok ktzꞌibꞌaꞌ jun yol twiꞌ te krus, nyolin tuq te yol tiꞌj til ikxjani: Te Twitzaleꞌ Kꞌulul Mandad Kyiꞌj Kye Aj Tijajil Israel. 27 Axkix aj orji owok kyklabiꞌ kabꞌeꞌ eleqꞌ naql tiꞌj, jun te tbꞌanqꞌabꞌ bꞌix jun te tsurt bꞌix tiꞌj kykurusxchaq te junjun. 28 Ikxji oponkix te aj tzꞌibꞌankaj tuq oqtxiꞌ tuj Tuꞌjal Dios, aj nyolin ikxjani: “Tetz oxik samoꞌ kxol kye xjal nyaꞌtx okslal kawbꞌil.”*
29 Ntons, kye aj nkyekyꞌik tuq tzi njaw tuq kyyakꞌuꞌ kywiꞌ* bꞌix nꞌok tuq kyiliꞌ ikxjani: “Yatz nꞌayoliꞌ tuq tzan tqet axituꞌ te Nin Jay Nabꞌil Qtata Dios bꞌix tuj toxiꞌn qꞌij bꞌaꞌn tuq tzan tjaw akꞌuluꞌ junky akꞌaꞌj.* 30 Ajnaꞌl kolpij awibꞌx bꞌix paqetz twitz krus.” 31 Ax kye pal aj nim kyajwalil kyukyꞌi kye xnaqꞌtzal Kawbꞌil, ax kyetz nkyexmayin tuq tiꞌj, nxik tuq kyqꞌumaꞌ ikxjani: “Tetz okolon kyiꞌj txqꞌanky per nlay bꞌantik tzan tkolpin tibꞌx. 32 Qa bꞌanꞌax tetz aji te Koloyon Aj Qꞌumankaj Oqtxiꞌ bꞌix qa bꞌanꞌax tetz aji te twitzaleꞌ kꞌulul mandad, ntons intqetz najji tibꞌx twitz krus tzan tok qen qa bꞌanꞌax titzaꞌ bꞌix tzan qokslan tiꞌj.” Ax kye eleqꞌ aj klabimeꞌ tuq junx tukyꞌiꞌl, ax kyetz nkyeꞌilin tuq tiꞌj Jesus.
33 Ntons ya ma qoꞌok mer chijqꞌij, oqloljxbꞌik kyaqil twitz txꞌoꞌtxꞌ bꞌix te qlolj onachqꞌin oxe or max tuj toxiꞌ or te qaleꞌ.f 34 Yatzun ma qoꞌok toxiꞌ or te qaleꞌ,g te Jesus ojaw wayun bꞌix kyi ikxjani: “Eloy, Eloy, ¿lama sabaktani?” Tuj qyol ja ntzani telponx iktzaꞌ “Tata Dios, Tata Dios, ¿tistil maꞌtx kyinkaj akolaꞌ?”* 35 Ntons junjun kye xjal aj akyeqet tuq tzi, oxik kyqꞌumaꞌ ikxjani: “Intxik echaꞌoꞌ waq tyol; ntzaj tukꞌleꞌ Eliys.” 36 Yaji jun te kyetz oxik karedin bꞌix oqex tmuꞌuꞌ jun esponj tuj taꞌal ub tukyꞌi minagr bꞌix yaji oqet tkotbꞌaꞌ te esponj twiꞌ jun suꞌan bꞌix ojax tsiꞌ tzan txik stzꞌubꞌaꞌ tuq te Jesus [tzan tipan chꞌinky].* Kyi te xjal kyukyꞌi kye aj atebꞌajqet tuq tzi: “Qaltetzchaq, owokel qen aber qa tzul te Eliys tzan tqetz tin tiꞌj krus.” 37 Per te Jesus ojaw wayun kongan bꞌix yaji okamik.
38 Aꞌilnajji, max tuj amaqꞌ, te nin xqꞌapj te pawbꞌilh tuj te Nin Jay Nabꞌil Qtata Dios oqetz laqik qetnaq.
39 Ntons, te kapitan kyiꞌj kye soldad aj atqet tuq twitz Jesus, ya ma tzꞌok ten titzaꞌ te Jesus aj tel tkꞌuꞌj, oxik tqꞌumaꞌ ikxjani: “Bꞌanꞌax tetz jun Tkꞌwaꞌal Dios tuq.”
40 Ax txqꞌan xuj nkyexik kaꞌyin tuq laqꞌchik tiꞌj Jesus. Jun, Liy aj Magdála, bꞌix junky Liy te alon kyiꞌj Jacobiti bꞌix Chep, bꞌix junky xuj Salomey. 41 Komo kyetz, aj tbꞌajten Jesus tuj Galiley, kyetz nkyeꞌok lapet tuq tiꞌj bꞌix nkyeꞌonen tuq tukyꞌiꞌl.* Ax akyeqet tuq txqꞌanky xuj kyukyꞌiꞌl aj ejakon Jerusalen tukyꞌi Jesus tuj te ninqꞌij bꞌix kyꞌilaꞌj kybꞌet tuq.
Aj Tox Muquꞌ Jesus
42 Bwen, yatzun aj ikjaꞌn tuq tex qꞌij bꞌix komo aj qꞌij tuqji te qꞌij tzan kykꞌulun kyibꞌ tiꞌj te qꞌij ojlaꞌmj [ntons nyaꞌtx galan tuq tzan tkaj te anim tiꞌj krus.] 43 Tzaj te Chep jun xjal aj Arimatey, jun tijxjal kxol kye kywitzaleꞌ nim kyajwalil bꞌix tetz bꞌan jiqꞌbꞌaꞌ tuq kyitzaꞌ, per loꞌik tuq tkꞌuꞌj tujbꞌaꞌn te Qtata Dios kolpiyon kye aj nkyeꞌokslan tiꞌj.j Tetz otnimsaj tkꞌuꞌj tzan txik qanil permis tukyꞌi Pilat tzan tqetz tin te txlimal Jesus tiꞌj krus [tzan tox tmuquꞌ]. 44 Ntons te Pilat, aj tok xhchaꞌoꞌji, tetz oje labꞌan tiꞌj te Jesus tzan tpaj kꞌontiꞌl onachqꞌin bꞌix jun rat tkamik. Astilji oxik tlajoꞌ jun ukꞌlel te kapitan tzan tul tukyꞌiꞌl aber qa bꞌanꞌax ojetq tuq kamik te Jesus. 45 Aj tpon te kapitan, oxik tqꞌumaꞌ te Jesus bꞌanꞌax ojetq tuq kamik. Ntons te Pilat oxik stzaqꞌbꞌeꞌ tzan tqetz eqꞌiꞌ te anim tzan te Chep. 46 Ntons te Chep oqetz teqꞌiꞌ txlimal te Jesus bꞌix owok tbꞌalqꞌiꞌ tiꞌj jun xqꞌapj bꞌan tbꞌanil aj ojetq tuq tzaj tloqꞌoꞌ. Yaji owox tmuquꞌ te anim tuj jun pantyon, jun nim jul kꞌuluꞌ tuq twitz jun abꞌj. Yaji oxik stoliꞌ te lambꞌil stziꞌ te pantyon jun nim abꞌj kꞌulumaj tuq. 47 Yatzun te Liy aj Magdála* bꞌix te Liy* aj tnan Chep, kyetz okyeꞌej jaꞌ owox muquꞌ te anim.