19
Aj Txik Qꞌumaꞌ Tzan Tkamik Te Jesus
1 Ntons te Pilat oxik tqꞌumaꞌ tzan txik kyin te Jesus bꞌix tzan txik siꞌ xhchikot. 2 Ntons kye soldad oqet kxpatxꞌiꞌ jun koron pur kyꞌiꞌxa bꞌix ojax ksiꞌ tuj twiꞌ, bꞌix owok ksiꞌ jun tqꞌanaq kyaq qꞌeqmuqin [te xmaybꞌil tetz].b 3 Bꞌix nkyeꞌok tuq laqꞌchet tiꞌj bꞌix nxik tuq kyqꞌumaꞌ ikxjani: “Tzꞌokxwit jun galan awiꞌj yatz aj twitzaleꞌ kꞌulul mandad kyiꞌj kye aj tijajil Israel.” Per yaji nꞌok tuq kyloqiꞌ tqꞌoꞌtx. 4 Yaji owetz junkyꞌel te Pilat bꞌix oxik tqꞌumaꞌ kye xjal ikxjani: “Instzaj eten, wetz maꞌtx tzꞌetz win tzan tok eten, wetz kꞌontiꞌl jun til nꞌoknoj witzaꞌ.” 5 Ntons te Jesus owetz bꞌix atjax tuq te koron kyꞌiꞌx tuj twiꞌ bꞌix atok tuq tqꞌanaq kyaq qꞌeqmuqin. Te Pilat oxik tqꞌumaꞌ kyetz ikxjani: “Ntzani te xjal.” 6 Ya ma xik kyeꞌeꞌ kye pal aj nim kyajwalil bꞌix kye mulon aj te Nin Jay Nabꞌil Qtata Dios oxik kyqꞌumaꞌ kongan ikxjani: “¡Intqet klablet tiꞌj krus, intqet klablet tiꞌj krus!” Te Pilat oxik tqꞌumaꞌ kyetz ikxjani: “Mejor intxik etin etetz bꞌix intqet eklabiꞌ tiꞌj krus. Wetz kꞌontiꞌl jun til nꞌoknoj witzaꞌ.” 7 Ntons kye xjal aj tijajil Israel owaj ktzaqꞌbꞌeꞌ: “Qetza at jun jkawbꞌilna bꞌix iktzaꞌx nyolin tuj jkawbꞌilna tetz a tgan tzan tkamik tzan tpaj tetz nꞌok tqꞌumaꞌ tibꞌx qa aji te Tkꞌwaꞌal Dios.” 8 Ya ma xik xhchaꞌoꞌ te Pilat aj nkyyoliꞌ tuq, tetz otzaj nim txobꞌal 9 bꞌix owox junkyꞌel tuj te tdespach bꞌix oxik tqꞌumaꞌ tetz te Jesus ikxjani: “¿Jaꞌ tzajnaqich yatz?” Per te Jesus kꞌontiꞌl tidiꞌ owaj stzaqꞌbꞌeꞌ. 10 Ntons te Pilat oxik tqꞌumaꞌ ikxjani: “¿Tiꞌtzun, nlay kyintzaj atzaqꞌbꞌeꞌ? ¿Tiꞌtzun, kꞌontiꞌl awebꞌen wetz at wajwalil tzan axik ntzoqpiꞌ bꞌix ax at wajwalil tzan aqet nklabiꞌ twitz krus?” 11 Ntons te Jesus owaj stzaqꞌbꞌeꞌ ikxjani: “Yatz kꞌontiꞌl-tal awajwalil cha nyaꞌtx-wit a te Qtata Dios aj tuj kaꞌj otzaj sin te awajwalil. Astilji te aj oxik qꞌapon te wetz tuj aqꞌabꞌ at mas nim xhchoj awitz yatz.”
12 Astilji te Pilat njoyon tuq tumeꞌl titzaꞌ tzan txik stzoqpiꞌ per yatzun kye xjal oxik kyqꞌumaꞌ kongan ikxjani: “Qa yatz oxeꞌl atzoqpiꞌ, ntons nyaꞌtx aꞌich tajyol te twitzaleꞌ kꞌulul mandadc tzan tpaj maꞌtx xik atzoqpiꞌ te aj nꞌok tqꞌumaꞌ tibꞌx qa aji te twitzaleꞌ kꞌulul mandad qxol, bꞌix ikxji tetz cha njaw meltzꞌjik tiꞌj te twitzaleꞌ.”d 13 Te Pilat ya ma tzꞌok xhchaꞌoꞌ ikxji, ntons tetz oxik tqꞌumaꞌ tzan tetz kyin te Jesus; yaji oxik tuj junky txoljay aj Tzꞌaqoꞌabꞌj tbꞌi, bꞌix ax nꞌok tuq qꞌumaꞌ Gabat tuj yol ebrey, bꞌix tzi oqet witꞌlet tuj twitꞌlel aj jaꞌ npujun tuq kyil kye xjal. 14 Atx tuq junky qꞌij tzan taqꞌik te qꞌij Paskw, bꞌix qanq mer chijqꞌij aj txik tqꞌumaꞌ te Pilat kye xjal aj tijajil Israel ikxjani: “Intxik eten, atqet te twitzaleꞌ kꞌulul mandad exol.” 15 Per kye xjal ebꞌajjaw sikyꞌin ikxjani: “¡Intel awin tetz qxol! ¡Intqet aklabiꞌ twitz krus!” Ntons te Pilat oxik tqꞌumaꞌ kyetz ikxjani: “¿Tiꞌtzun, oqtel nklabiꞌ twitz krus te aj twitzaleꞌ kꞌulul mandad exol?” Ntons kye pal aj nim kyajwalil owaj ktzaqꞌbꞌeꞌ: “Qetza aꞌox te César te twitzaleꞌ kꞌulul mandad qiꞌja, bꞌix kꞌontiꞌl junky.” 16 Ntons te Pilat okaj tqꞌapoꞌ te Jesus tuj kyqꞌabꞌ kye soldad tzan tqet tuq kyklabiꞌ twitz krus bꞌix kyetz oxik kyin.
Aj Tqet Klabiꞌ Jesus Twitz Krus
17 Ntons te Jesus oxik tiqaꞌ te tkurusx bꞌix oxik eqꞌiꞌ tuj jun luwar tbꞌi “Aj Tbꞌaqil Twiꞌ Xjal” bꞌix tuj yol ebrey aj kyyol kyetz tbꞌi “Gólgota.” 18 Tzi oqet kyklabiꞌ twitz jun krus bꞌix ax eqet kyklabiꞌ tukyꞌiꞌl kabꞌeꞌky xjal, junjunchaq junjun palaj tetz bꞌix tetz okaj xolj. 19 Te Pilat oqet stzꞌibꞌaꞌ [jun tpakbꞌalil aj owok siꞌ] tajsik te krus junjun yol ikxjani: Te Jesus Aj Nasaret Aj Twitzaleꞌ Kꞌulul Mandad Kye Xjal Aj Tijajil Israel. 20 Te aj yol ntzani kyꞌilaꞌj kye xjal aj tijajil Israel ojaw eꞌen tetz tzan tpaj nyaꞌtx tuq laqꞌchik tiꞌj te amaqꞌ aj jaꞌ owok klabiꞌ. Bꞌix tzꞌibꞌanqet tuq tuj yol ebrey bꞌix yol latin bꞌix yol gryeg. 21 Kye pal aj nim kyajwalil oxik kyyoliꞌ te Pilat ikxjani: “Kꞌon qet atzꞌibꞌaꞌ “Te Twitzaleꞌ Kꞌulul Mandad Kye Xjal Aj Tijajil Israel” sinoke “Tetz Aj Ntqꞌumaꞌ Aji Te Twitzaleꞌ Kꞌulul Mandad Kye Xjal Aj Tijajil Israel.”” 22 Per te Pilat owaj stzaqꞌbꞌeꞌ ikxjani: “Aj maꞌtx qet ntzꞌibꞌaꞌ, nimod maꞌtx qet ntzꞌibꞌaꞌ.”
23 Ntons kye soldad tqetlen kyklabiꞌ te Jesus twitz krus, bꞌix yatzun te tqꞌanaq oqet kykabꞌinsaꞌ tuj kaje pedas, junjun pedas te junjun. Per te tqꞌanaq aj xluj kꞌontiꞌl tuq slapbꞌen tetz sinoke kyimoꞌ tuq parej kyaqil, 24 astilji okyyolij ikxjani: “Kꞌon qet jkabꞌinsaꞌ sinoke qobꞌajsaqchbꞌilan loteriy tiꞌj aber abꞌl oxeꞌl in tetz.” Ntons ikxji okyꞌik tzan tpon kixiꞌ iktzaꞌx tzꞌibꞌankaj tuj Tuꞌjal Qtata Dios ikxjani: “Oqet kypawaꞌ te nqꞌanaq kxol bꞌix ax oqet ksaqchbꞌilaꞌ loteriy tiꞌj nqꞌanaq aj xluj.”* Astilji kye soldad oqet kykꞌuluꞌ ikxji.
25 Ntons qaynin tiꞌj te krus akyeqet tuq te tnan, bꞌix titzik tnan, bꞌix te Liy aj txuꞌjel Kliops, bꞌix te Liy aj Magdála. 26 Te Jesus ya ma xik ten te tnan bꞌix te txnaqꞌatz aj bꞌan nqet tuq tganiꞌ nim, ntons oxik tqꞌumaꞌ te tnan ikxjani: “Nan, tzaj awen, [ajnaꞌl tetz iktzaꞌ] awal.” 27 Yaji ax oxik tqꞌumaꞌ te txnaqꞌatz ikxjani: “Tzaj awen [erman], [ajnaꞌl tetz iktzaꞌ] anan.” Ntons bꞌeyx tuj aj qꞌijji te txnaqꞌatz okꞌamon tetz tuj tjay.
Aj Tel Tkꞌuꞌj Jesus Twitz Krus
28 Ya ma kyꞌik kyaqil ntzani, komo te Jesus tebꞌenky tuq, ojetq qet tkꞌuluꞌ kyaqil tzan tponkix iktzaꞌx tzꞌibꞌankaj tuj Tuꞌjal Dios, yaji oxik tqꞌumaꞌ: “Nkyinkꞌachjik.”* 29 Atqet tuq tzi jun xar nojnaq tuq tukyꞌi minagr, yaji oqex kymuꞌuꞌ jun esponj tuj te minagr, te esponj oqet kykotbꞌaꞌ twiꞌ jun suꞌan, isopo tbꞌi, bꞌix owox ksiꞌ tuj stziꞌ. 30 Ya ma xik tukꞌaꞌ te Jesus te minagr oxik tqꞌumaꞌ ikxjani: “Maꞌtx mankun.” Yaji otzaj mokꞌlet twiꞌ bꞌix okamik.*
31 Ntons komo atx tuq cha junky qꞌij te ninqꞌij Paskw, kye xjal aj tijajil Israel kꞌon tuq kygan tzan tkaj te kylimal kye kamnaq twitz krus tuj te qꞌij ojlaꞌmj, tzan tpaj te aj qꞌij ojlaꞌmjji jun ninqꞌij bꞌan xjan tuq. Astilji oqet kywitz twitz te Pilat tzan txik tkꞌuluꞌ mandad tzan tok qꞌuchiꞌ twitz kyoq kye aꞌeꞌ aj eꞌok klabiꞌ twitz krus [tzan kykamik] tzan kyqetz in naj. 32 Etzaj kye soldad, owok kyqꞌuchiꞌ kyoq kykabꞌil kye xjal aj eꞌok klabiꞌ junx tukyꞌi Jesus. 33 Ya ma kyeꞌok laqꞌchet tiꞌj te Jesus owok kyen ojetq tuq kamik ntons kꞌontiꞌl owok kyqꞌuchiꞌ twitz toq. 34 Jun soldad owox tokꞌonsaꞌ tuj txuꞌuk tukyꞌi tmachit kansbꞌil, bꞌix otzaj kyikꞌ tukyꞌi aꞌ. 35 Wetz owok wen nini tukyꞌi kykabꞌil nwitz, bꞌix maꞌtx xik nqꞌumaꞌ tuj tumeꞌl, bꞌix webꞌen te aj maꞌtx xik nqꞌumaꞌni bꞌanꞌax bꞌix nqet ntzꞌibꞌaꞌ tzan etokslan etetz. 36 Okyꞌik kyaqil ntzani tzan tponkix tuq te aj nyolin tuj te Tuꞌjal Dios ikxjani: “Nlay tzꞌok qꞌuchiꞌ nijunwt tbꞌaqil.”* 37 Bꞌix ax at jaꞌ nyolin tuj te Tuꞌjal Dios ikxjani: “Oxeꞌl kyen te aj owox kyokꞌonsaꞌ tuj txuꞌuk.”*
Aj Tox Muquꞌ Jesus
38 Ya ma kyꞌik kyaqil ntzani, tzaj te jun xjal aj Arimatey, Chep tbꞌi, tetz jun txnaqꞌatz tuq te Jesus per kꞌontiꞌl kchabꞌen tuq kye xjal tzan tpaj tetz nxobꞌ tuq kyiꞌj kye txqꞌanky txjalil aj tijajil Israel; ntons tetz oqet twitz twitz Pilat tzan tqetz tin tuq txlimal te Jesus. Ntons tzaj te Pilat oxik stzaqꞌbꞌeꞌ, yaji te Chep oqetz tin te txlimal bꞌix oxik tin. 39 Yaji ax te Nicodemo aj opon jun qonikꞌan tukyꞌi Jesus,* tetz opon tukyꞌi oqal (100) libr tkꞌokꞌjal xtxꞌotxꞌal mir samoꞌ tukyꞌi aloe. 40 Ikxji te Chep bꞌix te Nicodemo oqetz kyin te txlimal bꞌix owok kybꞌatzꞌoꞌ tiꞌj tukyꞌi xqꞌapj bꞌan muꞌuꞌ tukyꞌi aj tkꞌokꞌjalji, iktzaꞌx kyemodin kxol kye aj tijajil Israel tzan kymuqun jun anim. 41 Qaynin tuj te luwar aj jaꞌ owok klabiꞌ twitz krus, at tuq jun luwar aj jaꞌ tuq at awalj bꞌix tzi at tuq jun muqbꞌil anim akꞌaꞌj aj jaꞌ minaꞌ tuq tox muquꞌ nijunwt. 42 Tzi owox kymuquꞌ te Jesus tzan tpaj qaynin tuq bꞌix tzan tpaj a tuq te qꞌij tzan tqet kykꞌuluꞌ kyibꞌ tzan kynaꞌon te qꞌij ojlaꞌmj.