18
Aj Tjaw Tzyuꞌ Jesus
1 Ya ma xik tqꞌumaꞌ te Jesus kyaqil ntzani, owex tzi kyukyꞌi txnaqꞌatz bꞌix exik tuj jun luwar junxlaꞌ te jokoꞌj Sedron bꞌix eꞌox aj jaꞌ tuq at awalj. 2 Ax te Juds aj ojaw meltzꞌjik tiꞌj Jesus, tetz ax totzqiꞌ tuq te aj luwarji tzan tpaj kyꞌilaꞌj-el te Jesus owok xhchimoꞌ tibꞌ kyukyꞌi txnaqꞌatz tzi. 3 Ntons yaji te Juds oxik tin jun bꞌuchꞌuj soldad tukyꞌi junjun mulon aj lajomeꞌ tuq tzan kye pal aj nim kyajwalil bꞌix tzan kye aj bꞌuchꞌuj Parisey, bꞌix kyetz eqꞌiꞌ tuq kyqꞌanal bꞌix kykandil bꞌix eqꞌiꞌ tuq kymachit kykansbꞌil. 4 Ntons komo te Jesus tebꞌenky tuq tidiꞌ aj okyꞌel tiꞌj, ntons tetz owetz, otzaj laqꞌchet kanol kyetz, bꞌix oxik tqꞌumaꞌ ikxjani: “¿Abꞌl nꞌejoyoꞌ?” 5 Yaji kyetz oxik kyqꞌumaꞌ tetz ikxjani: “Nqojoyona te Jesus aj Nasaret.” Yaji te Jesus oxik tqꞌumaꞌ kyetz: “Aꞌin wetz.” Te Juds aj nxik tuq qꞌapon tetz atqet tuq kyukyꞌiꞌl. 6 Ya ma xik tqꞌumaꞌ te Jesus qa aji tuq tetz, kyetz ebꞌajꞌaj tzꞌaqik kyiꞌjx twitz txꞌoꞌtxꞌ. 7 Yaji oxik tqaniꞌ te Jesus kyetz junkyꞌel: “¿Abꞌl aj nꞌejoyoꞌ?” Yaji kyetz oxik kyqꞌumaꞌ junkyꞌel: “Nqojoyona te Jesus aj Nasaret.” 8 Ntons te Jesus oxik tqꞌumaꞌ kyetz ikxjani: “Wetz maꞌtx xik nqꞌumaꞌ etetz, aꞌin wetz. Qa aꞌin wetz nkyinꞌejoyoꞌ, inkxik etzoqpiꞌ kye txqꞌanky.” 9 Kyaqil ntzani okyꞌik tzan tponkix tuq iktzaꞌx ojetq tqꞌumaj te Jesus, “Tat, nijunwt ma kyexiknaj kye aj etzaj asiꞌ wetz.” 10 Ntons te Simon Xhpeꞌy at tuq jun tkꞌuxbꞌal tuj tqꞌabꞌ, ojatz tin tuj tjay bꞌix owel stzꞌitoꞌ txkyin aj tbꞌanqꞌabꞌ te jun xjal tbꞌi Malk, jun tmos te twitzaleꞌ pal. 11 Te Jesus oxik tqꞌumaꞌ te Xhpeꞌy ikxjani: “Intqex asiꞌ te akꞌuxbꞌal tuj tjay. Qa te Ntat tgan tzan tkyꞌik wiꞌj te aj nyaꞌtx galanni,a ¿tiꞌtzun, nlay nkꞌamoj?”*
Aj Tpon In Jesus Twitz Tjiꞌ Te Twitzaleꞌ Pal
12 Ntons te bꞌuchꞌuj soldad tukyꞌi te kꞌulul mandad kyiꞌj bꞌix kyukyꞌi kye mulon aj nkyeꞌaqꞌunan tuq kye aj nim kyajwalil kxol kye aj tijajil Israel, kyetz ojaw ktzyuꞌ te Jesus bꞌix oqet kykꞌaloꞌ [tqꞌabꞌ]. 13 Tbꞌay oxik kyin tukyꞌi Anas, tjiꞌ Kaypas te twitzaleꞌ pal tuj aj aqꞌbꞌiji. 14 Te Kaypas, aji tuq tetz te aj ojetq xik qꞌuman [kyukyꞌi kye bꞌuchꞌuj tijxjal aj mas nim kyajwalil kxol] tijajil Israel qa bꞌaꞌn tuq qa jun xjal ma kamik tzan kypaj kyaqil kye xjal.*
Aj Txik Tqꞌumaꞌ Te Xhpeꞌy Kꞌontiꞌl Tuq Totzqiꞌ Te Jesus
15 Ntons te Simon Xhpeꞌy bꞌix junky txnaqꞌatz Jesus exik lapet tiꞌj Jesus [aj txik eqꞌiꞌ tzan kye xjal]. Komo te junky otzqiꞌmj tuq tzan te twitzaleꞌ pal, owox tukyꞌi Jesus stziꞌ tjay te pal. 16 Te Xhpeꞌy ax tuq atqet stziꞌ te lamel tzijay, astilji owetz te junky aj tukyꞌiꞌl bꞌix oyolin tukyꞌi te aj nxbꞌuqin tuq te lamel bꞌix oxik tqꞌumaꞌ tzan tox tin tuq te Xhpeꞌy tukyꞌiꞌl tuj tjay te pal. 17 Ntons te xuj aj nxbꞌuqin tuq te lamel oxik tqꞌumaꞌ te Xhpeꞌy ikxjani: “¿Tiꞌtzun, nyaꞌtx aꞌich yatz jun kye aj txnaqꞌatz te aj xjal niꞌn?” Ntons te Xhpeꞌy oxik tqꞌumaꞌ tetz: “Nyaꞌtx aꞌin wetz.” 18 Ntons, tzan tpaj ajun cheꞌw tuq, kye mosj bꞌix kye mulon oqet ksiꞌ kyqꞌaqꞌ, nkyeqꞌexnen tuq bꞌix ax tuq te Xhpeꞌy nqꞌexnen tuq junchꞌin kyukyꞌiꞌl.
Aj Tqet Pichꞌoꞌ Jesus Tzan Te Twitzaleꞌ Pal
19 Bwen, te twitzaleꞌ pal owaqꞌik tzan txik tqaniꞌ tukyꞌi Jesus kyiꞌj kye txnaqꞌatz bꞌix tiꞌj te aj nxik tuq txnaqꞌtzaꞌ. 20 Ntons te Jesus oxik tqꞌumaꞌ ikxjani: “Wetz nxik nqꞌumaꞌ tuq kyaqil tumeꞌl kywitz kyaqil xjal, nkyinxnaqꞌtzankix tuq kye xjal kyuj kye jay nabꞌil Dios, bꞌix tuj te Nin Jay Nabꞌil Qtata Dios aj jaꞌ kyaqil kye xjal aj tijajil Israel nꞌok kchimoꞌ kyibꞌ, bꞌix kꞌontiꞌl tidiꞌ maꞌtx nyolij ewj-wit. 21 ¿Tistil ntzaj achaꞌoꞌ wetz? Intxik achaꞌoꞌ kyukyꞌi kye aj inꞌok kchaꞌoꞌ bꞌix tidiꞌ aj nxik nqꞌumaꞌ tuq kyetz, komo kyetz kyebꞌen aj nxik tuq nqꞌumaꞌ kyetz.” 22 Txiklen tqꞌumaꞌ te Jesus ikxji, tzaj te jun mulon aj atqet tuq tkꞌatzaj te Jesus, owok tloqiꞌ tqꞌoꞌtx te Jesus bꞌix oxik tqꞌumaꞌ ikxjani: “¿Tiꞌtzun, ikxji nꞌaj atzaqꞌbꞌeꞌ te twitzaleꞌ pal?” 23 Ntons te Jesus owaj stzaqꞌbꞌeꞌ ikxjani: “Qa nyaꞌtx galan aj maꞌtx xik nqꞌumaꞌni, intxik ayoliꞌ alkyetz te aj nyaꞌtx galan. Per komo galan te aj maꞌtx xik nqꞌumaꞌ, ¿tistil nkyinꞌok abꞌujuꞌ?” 24 Tzaj te Anas, oxik tsamaꞌ bꞌan wakuꞌ tukyꞌi Kaypas te twitzaleꞌ pal.
Aj Txik Tqꞌumaꞌ Te Xhpeꞌy Junkyꞌel Kꞌontiꞌl Tuq Totzqiꞌ Te Jesus
25 Ntons yatzun te Xhpeꞌy, tetz atqet tuq nqꞌexnen tuq teqꞌaqꞌ bꞌix oxik chaꞌoꞌ tetz ikxjani: “¿Nyaꞌtx petzun yatz aꞌich jun kye aj txnaqꞌatz ja xjalni?” Yaji tetz oqet tewaꞌ bꞌix oxik tqꞌumaꞌ ikxjani: “Nyaꞌtx aꞌin wetz.”
26 Yaji tzaj jun tmos te twitzaleꞌ pal, jun xjal aj kyfamily kyibꞌ tuq tukyꞌi te aj owel tzꞌitoꞌ txkyin tzan te Xhpeꞌy, tzaj tetz, oxik tqꞌumaꞌ ikxjani: “¿Tiꞌtzun, nyaꞌtx aꞌich yatz oxhchꞌokwen ajunich tuq tukyꞌiꞌl tuj te awalj?” 27 Yaji te Xhpeꞌy oqet tewaꞌ junkyꞌel, bꞌeyxnajji ojaw oqꞌ jun toꞌk.
Aj Tpon In Jesus Twitz Pilat
28 Ntons owetz kyin te Jesus tuj tjay te Kaypas bꞌix oxik kyin tuj tdespach te Pilat te twitzaleꞌ kꞌulul mandad aj Rom. Komo ya chꞌinky tuq qxhkꞌateꞌ [tzan tpon te qꞌij bꞌan xjan], kye xjal aj tijajil Israel kꞌontiꞌl eꞌox tuj te despach tzan kꞌon ktzꞌilan tuj kyanim tzan kywaꞌan tuj te qꞌij Paskw. 29 Ntons te Pilat owetz yoliyon kyukyꞌiꞌl bꞌix oxik tqꞌumaꞌ kyetz ikxjani: “¿Tidiꞌ til ja xjal aj maꞌtx tzul etin tzanini?” 30 Ntons kyetz owaj ktzaqꞌbꞌeꞌ ikxjani: “Qa nyaꞌtx-wit jun xjal aj at til, kꞌontiꞌl-tal ma tzul jqꞌapoꞌtzna awukyꞌiꞌl.” 31 Ntons te Pilat oxik tqꞌumaꞌ kyetz ikxjani: “Intxik etin etetz, peꞌekꞌulun etetz tukyꞌiꞌl iktzaꞌx nyolin tuj ekawbꞌil.” Yaji kyetz oxik kyqꞌumaꞌ tetz ikxjani: “Per qetza qxjalil kꞌontiꞌl qoklena tzan tqet jkansaꞌ jun xjal.” 32 Ikxji okyꞌik tzan tponkix tyol te Jesus aj txik tqꞌumaꞌ titzaꞌ tuq tetz okamel.*
33 Yaji te Pilat owox tukꞌleꞌ te Jesus tuj te tdespach bꞌix oxik tqaniꞌ tetz ikxjani: “¿Aꞌich peꞌ yatz te twitzaleꞌ kꞌulul mandad kxol kye axjalil aj tijajil Israel?” 34 Te Jesus oxik tqꞌumaꞌ ikxjani: “¿Aj ntzaj achaꞌoꞌ wetzni, tuj awiꞌx peꞌ nꞌetz awin qatzun cha oxik qꞌumaꞌ wiꞌj tzan junkyji?” 35 Ntons te Pilat owaj stzaqꞌbꞌeꞌ tetz ikxjani: “¿Aꞌin petzun wetz jun aj tijajil Israel? Kye axjalil bꞌix kye pal aj nim kyajwalil maꞌtx chkaj kyqꞌapoꞌ tuj nqꞌabꞌ. ¿Tidiꞌ ma akꞌuluj?” 36 Te Jesus oxik tqꞌumaꞌ ikxjani: “Wetz wajwalil tzan nkꞌulun mandad nyaꞌtx iktzaꞌ kye xjal nkyekꞌulun mandad twitz ja txꞌoꞌtxꞌni. Qa cha iktzaꞌ-wit kyetz nkyekꞌulun mandad tzani twitz ja txꞌoꞌtxꞌni, ntons kye aj nkyeꞌonen te wetz okyeqꞌojiyon-tal tzan kykolon wiꞌj tzan kꞌon nxik qꞌapoꞌ tuj kyqꞌabꞌ kye xjal aj tijajil Israel [aj nkyeqꞌojin wiꞌj]. Wetz wajwalil tzan nkꞌulun mandad nyaꞌtx iktzaꞌ kye xjal tzani twitz txꞌoꞌtxꞌ.” 37 Ntons te Pilat oxik xhchaꞌoꞌ tetz: “¿Ntons yatz bꞌanꞌax peꞌ aꞌich jun twitzaleꞌ kꞌulul mandad?” Te Jesus owaj stzaqꞌbꞌeꞌ: “Iktzaꞌx maꞌtx tzaj aqꞌumaꞌni, wetz aꞌin jun twitzaleꞌ kꞌulul mandad. Astilji wetz inꞌul, inꞌitzꞌjik tzani twitz txꞌoꞌtxꞌ, tzan txik nyoliꞌ te tumeꞌl bꞌanꞌax, bꞌix kyaqil kye aj nkyeꞌokslan te bꞌanꞌax, nꞌok kysiꞌ kywiꞌ wiꞌj.” 38 Ntons te Pilat oxik xhchaꞌoꞌ: “¿Tidiꞌ te bꞌanꞌax?” Ntons owetz junkyꞌel bꞌix oxik tqꞌumaꞌ junkyꞌel kye xjal ikxjani: “Wetz nꞌel tuj nwitz te ja xjalni kꞌontiꞌl jun til. 39 Per komo etetz naqꞌikixkixiꞌ tzan txik ntzoqpiꞌ jun aj pres tuj te qꞌij Paskw, ¿egan peꞌ tzan txik ntzoqpiꞌ te aj [nꞌok qꞌumaꞌ te] twitzaleꞌ kꞌulul mandad etiꞌjni?”b 40 Ntons kyaqil ebꞌajjaw sikyꞌin kongan, oxik kyqꞌumaꞌ ikxjani: “¡Kꞌon xik atzoqpiꞌ te nini! ¡Mejor intxik atzoqpiꞌ te Barabas!” Komo te Barabas jun xjal aj [kygan tuq kye xjal tzan tpaj tetz] nqꞌojin tuq kyiꞌj kye kꞌulul mandad [aj Rom].*