17
Aj Txnaqꞌtzan Te Jesus Kyiꞌj Txnaqꞌatz Tzan Tonen Te Qtata Dios Kyiꞌj
1 Txiklen tqꞌumaꞌ Jesus ikxjani, yaji ojax ten twitz kaꞌj bꞌix oxik tqꞌumaꞌ ikxjani: “Tat, maꞌtx pon or, instzaj ayekꞌuꞌ chꞌin te tumeꞌl bꞌan bꞌanꞌax wiꞌj wetz iktzaꞌxkix wetz aj akꞌwaꞌal aꞌin, tzan txik nyekꞌuꞌ te tumeꞌl bꞌan bꞌanꞌax awiꞌj yatz iktzaꞌxkix yatz aꞌich. 2 Komo yatz oje tzaj asiꞌ wajwalil kyiꞌj kyaqil xjal, tzan txik nsiꞌ kye kkyaqil aj etzaj asiꞌ wetz jun kyanqꞌin te jun-eleꞌx. 3 Bꞌix te jun kyanqꞌin te jun-eleꞌx tzan awok kyotzqilaꞌ yatz aj bꞌan bꞌanꞌax Dios aꞌich bꞌix tzan wok kyotzqilaꞌ wetz aj lajomin awitzaꞌ. 4 Wetz tzani twitz txꞌoꞌtxꞌ maꞌtx xik nyekꞌuꞌ te tumeꞌl bꞌan bꞌanꞌax awiꞌj yatz iktzaꞌxkix yatz aꞌich, ikxji maꞌtx mankun nkꞌulun kyaqil aj okaj aqꞌumaꞌ wetz. 5 Ajnaꞌl Tat, tzoqpij chꞌin tzan nqet witꞌlet tuj nwitꞌlel tuj kaꞌj iktzaꞌxkix tuq witꞌlikin tuj nwitꞌlel aj akyinqet tuq tbꞌay awukyꞌiꞌl yatz aj minaꞌ tuq tqet kꞌuluꞌ te twitz txꞌoꞌtxꞌ
6 Wetz oje chqet nyekꞌuꞌ kywitz kkyaqil kye aj eꞌel ajoyoꞌ kxol kye aj twitz txꞌoꞌtxꞌ tzan ktzaj asiꞌ wetz. Kyetz aꞌeꞌkix tuq yatz, bꞌix ebꞌajtzaj asiꞌ wetz bꞌix kyetz nqet kyokslaꞌ te ayol. 7 Ajnaꞌl oje tzꞌel kynikyꞌ, kyaqil aj otzaj asiꞌ wetz, aꞌich ostzaj sin tetz 8 tzan tpaj wetz maꞌtx xik nqꞌumaꞌ kyaqil aj otzaj aqꞌumaꞌ wetz, bꞌix kyetz maꞌtx xik kyokslaꞌ bꞌix maꞌtx stzꞌel kynikyꞌ bꞌanꞌax wetz tzajnaqin awukyꞌiꞌl bꞌix maꞌtx kyokslaj qa aꞌich oxhstzaj lajon wetz. 9 Wetz nqet nwitz awitz kyiꞌj kyetz bꞌix nyaꞌtx kyiꞌj kye aj kꞌontiꞌl nkyeꞌokslan, sinoke kyiꞌj kye aj etzaj asiꞌ wetz, tzan tpaj ax kyetz aꞌeꞌ te yatz. 10 Kyaqil aj te wetz ax te yatz, bꞌix kyaqil aj te yatz ax te wetz, bꞌix kyiꞌj kyetz oje tzꞌok en te tumeꞌl bꞌanꞌax wiꞌj iktzaꞌxkix wetz aꞌin. 11 Wetz ya nlay kyinqeten twitz ja txꞌoꞌtxꞌni, per kyetz okyeqtelten, bꞌix wetz ma kyinxik awukyꞌiꞌl. Yatz tat, aj bꞌan kꞌontiꞌl achoj, [nqet nwitz awitz] tzan kyqet akꞌuluꞌ kwent chꞌin kye [aj oje kyetzaj asiꞌ wetz], inkyqet akꞌuluꞌ kwent chꞌin tukyꞌi awajwalila aj otzaj asiꞌ wetz, tzan txik kyeqꞌiꞌ kyibꞌ junchꞌin iktzaꞌ qetz eqꞌiꞌ qibꞌ junchꞌin. 12 Aj akyinqet tuq kyukyꞌiꞌl, wetz nkyeqet tuq nkꞌuluꞌ kwent tukyꞌi awajwalil aj otzaj asiꞌ wetz, bꞌix nijunwt te kyetz exiknaj, aꞌox te jun aj tkajlen siꞌkix tuj il tzan tkyꞌik iktzaꞌx tzꞌibꞌankaj tuj te Awuꞌjal.* 13 Ajnaꞌl wetz ma kyinxik aj jaꞌ yatz atichqet bꞌix wetz man akyinqet tzani twitz txꞌoꞌtxꞌ nkyinyolin awukyꞌiꞌl tzan kchalaj bꞌan bꞌanꞌax mer ikx titzaꞌ wetz nkyinchalaj. 14 Wetz maꞌtx xik npakbꞌaꞌ te apakbꞌalil kyetz, bꞌix nkyeꞌok ajqꞌojaꞌ tzan kye xjal, komo kyetz nyaꞌtx iktzaꞌ kye xjal aj kꞌontiꞌl nkyeꞌokslan, iktzaꞌx wetz nyaꞌtx aꞌin iktzaꞌ kye xjal aj kꞌontiꞌl nkyeꞌokslan. 15 Wetz nqet nwitz awitz nyaꞌtx tzan kyel awin kxol kye xjal twitz ja txꞌoꞌtxꞌni, sinoke tzan kyqet akoloꞌ chꞌin tiꞌj te Twitzaleꞌ Joyol Qꞌoj. 16 Kyetz nyaꞌtx iktzaꞌ kye xjal aj kꞌontiꞌl nkyeꞌokslan, iktzaꞌx wetz nyaꞌtx aꞌin iktzaꞌ kye xjal aj kꞌontiꞌl nkyeꞌokslan. 17 Inkyel apawaꞌ aꞌox te yatz iktzaꞌxkix te tumeꞌl bꞌanꞌax, yatz ayol a te tumeꞌl bꞌanꞌaxji. 18 Wetz maꞌtx kyexik nlajoꞌ kxol kye xjal tzani twitz txꞌoꞌtxꞌ iktzaꞌx yatz intzaj alajoꞌ kxol. 19 Wetz oje tzꞌel npawaꞌ wibꞌx aꞌox te yatz tzan kypawlet ax kyetz aꞌox te yatz.b
20 Wetz nqet nwitz awitz nyaꞌtx aꞌox kyiꞌj kyetz sinoke ax kyiꞌj kye txqꞌanky aj okyeꞌokslayon wiꞌj tzan tpaj kyyol kyetz aj oxeꞌl kyqꞌumaꞌ wiꞌj wetz. 21 Ikxji okyeꞌokel cha jun-oq iktzaꞌx yatz Tat atichqet wukyꞌiꞌl bꞌix wetz akyinqet awukyꞌiꞌl, ax ikxji kyetz inkyok qukyꞌiꞌl tzan kyokslan kye xjal qa yatz aꞌich oxhstzaj lajon wetz. 22 Iktzaꞌx yatz oje tzaj asiꞌ jun woklen awukyꞌiꞌl, ax wetz oje xik nsiꞌ kyetz jun kyoklen tzan kyok jun-oq qukyꞌiꞌl iktzaꞌx qetz cha jun-oq aꞌoꞌ. 23 Ikxji wetz atinqet kyukyꞌiꞌl bꞌix yatz atichqet wukyꞌiꞌl tzan kyok bꞌanꞌax naqekix jun xjal. Ikxji kye xjal owelal kynikyꞌ bꞌanꞌax yatz aꞌich oxhstzaj lajon wetz bꞌix nkyeqet aganiꞌ kye aj lapikeꞌ wiꞌj parej iktzaꞌxkix wetz nkyinqet aganiꞌ. 24 Tat, aꞌich oxhstzaj sin kyetz te wetz bꞌix ngan tzan kyten wukyꞌiꞌl aj jaꞌ wetz okyinteyon tzan tok kyen nxhqitzꞌunal. Aꞌich oxhtzaj sin tetz tzan tpaj ojetq tuq kyinqet aganiꞌ aj minaꞌ tuq tbꞌantik kyaqil ja twitz txꞌoꞌtxꞌni.
25 Tat, yatz aj kꞌontiꞌl achoj, kye xjal kꞌontiꞌl kyotzqiꞌ aꞌich per wetz wotzqiꞌ aꞌich bꞌix kye ja ntzanijeꞌ, kyetz kyebꞌen aꞌich oxhstzaj lajon wetz. 26 Oje xik nqꞌumaꞌ kyetz titzaꞌ yatz aꞌich bꞌix oxeꞌl nqꞌumaꞌ masky tzan tok kyen titzaꞌ nkyeqet aganiꞌ iktzaꞌ wetz nkyinqet aganiꞌ bꞌix tzan nten kxol.”