16
1 “Kyaqil ntzani maꞌtx xik nqꞌumaꞌ etetz tzan kꞌon tkaj ekolaꞌ tzan tok witꞌlet ekꞌuꞌj wiꞌj. 2 Okxꞌelatz kyin kyuj kye jay nabꞌil Dios bꞌix tzul jun tyemp abꞌl aj okxtel kykansaꞌ okyqꞌumaꞌtz jun galan nkyekꞌulun te Qtata Dios. 3 Kyetz oqtel kykꞌuluꞌ ikxjani tzan tpaj kꞌontiꞌl kyotzqiꞌ te Ntat bꞌix ax kꞌontiꞌl kyotzqimin wetz. 4 Per wetz maꞌtx xik nqꞌumaꞌ kyaqil ntzani etetz ikxji oj tkyꞌik kyaqil ntzani otzajel enaꞌoꞌ wetz ikxji oxik nqꞌumaꞌ. Kꞌontiꞌl oxik nqꞌumaꞌ etetz oqtxiꞌ tzan tpaj wetz akyinqet tuq exol.”
A Te Txew Dios Nnimsan Jkꞌuꞌj
5 “Wetz ajnaꞌl ma kyinxik tukyꞌi te aj otzaj lajon te wetz bꞌix nijunwt te etetz ntzaj xhchaꞌoꞌ jaꞌ ma kyinx. 6 Te etanim bꞌan nbꞌisun tzan tpaj maꞌtx xik nqꞌumaꞌ etetz ntzani. 7 Per wetz oxeꞌl nqꞌumaꞌ te bꞌanꞌax etetz, wetz a tgan tzan nxik tzan tok jun galan te etetz, qa wetz nlay kyinxik ntons nlay tzul te aj owoneyon etukyꞌiꞌl. Qa wetz ma kyinxik ntons otzajel nlajoꞌ. 8 Oj tul tetz, tetz oxeꞌl tyoliꞌ tuj kyanim kye xjal tiꞌj te kchoj bꞌix tiꞌj te tumeꞌl tzan kybꞌet bꞌix tiꞌj te jwisy. 9 Oxeꞌl tyoliꞌ tiꞌj kyaqil te kchoj tzan tpaj kꞌontiꞌl nkyeꞌokslan wiꞌj. 10 Bꞌix oxeꞌl tyoliꞌ tuj kyanim titzaꞌ tzan kybꞌet tuj tumeꞌl tzan tpaj ma kyinxik tukyꞌi Ntat bꞌix ya nlay kyinꞌok eten. 11 Bꞌix oxeꞌl tyekꞌuꞌ tiꞌj te jwisy tzan tpaj oje kaj qꞌumaꞌ tzan txik siꞌ tuj il te twitzaleꞌ [tiꞌj te nyaꞌtx galan] twitz ja txꞌoꞌtxꞌni. 12 At tidiꞌchq aj presis tzan txik nqꞌumaꞌ etetz per ajnaꞌl nlay xik nqꞌumaꞌ tzan tpaj owokel bꞌan kwest te etetz. 13 Per oj tul te Txew aj bꞌanꞌax yolin, tetz oxeꞌl tyekꞌuꞌ etetz kyaqil te bꞌanꞌax tzan tpaj tetz nlay yolin cha tibꞌx-oq sinoke oxeꞌl tqꞌumaꞌ aj otzajel qꞌumaꞌ tetz bꞌix oxeꞌl tqꞌumaꞌ kyaqil aj okyꞌel. 14 Tetz oxeꞌl tyekꞌuꞌ te tumeꞌl bꞌanꞌax wiꞌj wetz iktzaꞌxkix aꞌin tzan tpaj tetz oxeꞌl tqꞌumaꞌ etetz kyaqil wiꞌj wetz. 15 Kyaqil aj at te Ntat kyaqil wetz, astilji wetz ma xik nqꞌumaꞌ etetz kyaqil aj wetz oxeꞌl tqꞌumaꞌ te etetz. 16 Nyaꞌtx nim tyemp okyinqteltenky exol, ya nlay kyinꞌok eten per mas yaj okyinꞌokel eten junkyꞌel.”
Aj Tyolin Jesus Tiꞌj Te Bꞌis Bꞌix Tiꞌj Te Chalajbꞌil Aj Owokel Kyen Kye Txnaqꞌatz
17 Ntons junjun kye txnaqꞌatz nkyeyolin tuq kyibꞌkyibꞌx ikxjani: “¿Tidiꞌ telponx aj ntzaj tqꞌumaꞌ qetzni, “nyaꞌtx nim tyemp okyinqteltenky exol, ya nlay kyinꞌok eten per mas yaj okyinꞌokel eten junkyꞌel”? ¿Bꞌix tidiꞌ telponx “ma kyinxik tukyꞌi Ntat”?” 18 Nkyqꞌumaꞌ tuq ikxjani: “¿Tidiꞌ telponx “nyaꞌtx nim tyemp”? Kꞌontiꞌl nꞌel qnikyꞌ tiꞌj tidiꞌ aj ntqꞌumaꞌni.” 19 Te Jesus owel tnikyꞌ kyiꞌj, kyetz kygan tuq tzan txik kchaꞌoꞌ tetz, astilji oxik tqꞌumaꞌ kyetz ikxjani: “Etetz nkxqanin etibꞌx tidiꞌ telponx aj xtxik nqꞌumaꞌ wetz “nyaꞌtx nim tyemp akyinqet exol, ya nlay kyinꞌok eten per mas yaj okyinꞌokel eten junkyꞌel.” 20 Wetz oxeꞌl nqꞌumaꞌ etetz bꞌan bꞌanꞌax, etetz okxꞌoqꞌel bꞌix otzajel enaꞌon tetz, bꞌix kye xjal aj kꞌontiꞌl nkyeꞌokslan wiꞌj okyechalajel; yatzun etetz okxbꞌisuyon, per mas yaj okxchalajel. 21 Oj talan jun xuj, bꞌan nbꞌisun tzan tpaj maꞌtx pon tyemp, per oj titzꞌjik te kꞌwaꞌl ya kꞌontiꞌl ntzaj tnaꞌoꞌ te xhchoꞌnal aj owok ten, tzan tpaj bꞌan nchalaj tiꞌj te neꞌ aj maꞌtx tzꞌitzꞌjik.a 22 Ax ikxji etetz bꞌan nkxbꞌisun ajnaꞌl, per wetz okyinꞌulel junkyꞌel eꞌel etetz bꞌix okxchalajel tuj etanim, bꞌix te chalajbꞌil tuj etanim nijunwt abꞌl owelal in tetz. 23 Bꞌix tuj aj qꞌijji nlay tzaj echaꞌoꞌ wetz chꞌinwt, wetz oxeꞌl nqꞌumaꞌ etetz bꞌan bꞌanꞌax, kyaqil aj oxeꞌl eqaniꞌ te Ntat iktzaꞌ nkyꞌixel aꞌix, tetz otzajel tsiꞌ. 24 Etetz ajnaꞌl minaꞌ txik eqaniꞌ chꞌinwt iktzaꞌ nkyꞌixel aꞌix. Intxik eqaniꞌ bꞌix [te Ntat] otzajel tsiꞌ tzan echalaj nim.*
25 Kyaqil aj ntzani maꞌtx xik nqꞌumaꞌ etetz pur tukyꞌi yekꞌbꞌil, per tzul jun tyemp aj nyaꞌtx tukyꞌi yekꞌbꞌil sinoke oxeꞌl nqꞌumaꞌ kyaqil xtxolil etetz tiꞌj te Ntat. 26 Tuj aj qꞌijji oxeꞌl eqaniꞌ tukyꞌi te Ntat iktzaꞌ nkyꞌixel aꞌix, bꞌix ya nyaꞌtx presis tzan nyolin wetz etiꞌj twitz tetz 27 tzan tpaj te Ntat nkxqet tganiꞌ nim tzan tpaj etetz nkyinqet eganiꞌ bꞌix etetz nꞌetokslaꞌ qa wetz tzajnaqin tukyꞌi Qtata Dios. 28 Wetz tzajnaqin tukyꞌi Ntat bꞌix inꞌul tzani twitz txꞌoꞌtxꞌ, per ajnaꞌl okajel nsiꞌ junkyꞌel te twitz txꞌoꞌtxꞌ bꞌix ma kyinxik tukyꞌi Ntat.”
29 Yaji kye txnaqꞌatz oxik kyqꞌumaꞌ ikxjani: “Ajnaꞌl bꞌanꞌax nchyolin xtxolil, ajnaꞌl kꞌontiꞌl nchyolin tukyꞌi yekꞌbꞌil. 30 Ajnaꞌl maꞌtx tzꞌel qnikyꞌa awiꞌj, yatz awebꞌen kyaqil bꞌix nyaꞌtx presis tzan txik qaniꞌ [qa bꞌanꞌax awitzaꞌ]. Tzan tpaj ntzani, qetza nqokslaꞌna yatz tzajnaqich tukyꞌi Qtata Dios.” 31 Yaji te Jesus oxik tqꞌumaꞌ kyetz ikxjani: “¿Ntons ajnaꞌl nꞌetokslaꞌ? 32 Intok esiꞌ enabꞌl, maꞌtx pon or bꞌix etetz oxeꞌl eslabꞌuꞌ etibꞌ, okxꞌajel ejay bꞌix okyinkajel ekolaꞌ nchukel per nyaꞌtx nchukel akyinqet tzan tpaj te Ntat atqet wukyꞌiꞌl. 33 Wetz nxik nqꞌumaꞌ etetz ntzani tzan xhchewxik ekꞌuꞌj tzan tpaj woklen etotzqilaꞌ. Twitz ja txꞌoꞌtxꞌni, etetz owokel eten xhchoꞌnal, per kꞌon kxbꞌisun, wetz oje tzꞌajtz tiꞌj witzaꞌ kyaqil te aj nyaꞌtx galan twitz txꞌoꞌtxꞌ.”*