15
A Te Jesus Ntzaj Sin Qbalor Tzan Qten Jwert Tukyꞌi Qtata Dios
1 “Wetz aꞌin iktzaꞌ te toqil awalj ub bꞌan bꞌanꞌax, bꞌix a te Ntat a tetz iktzaꞌ te aj kꞌulul kwent te awalj. 2 Kyaqil aj nqꞌabꞌal iktzaꞌ tqꞌabꞌ te awalj bꞌix qa kꞌontiꞌl nwitzan, owelal xtxꞌemuꞌ, per qa nkaj twitz, owelal tisaꞌ tiꞌj tzan twitzan mas. 3 Yatzun etetz saq etanim tzan tpaj te aj nyol oje xik nqꞌumaꞌ etetz. 4 Kꞌon kyinkaj ekolaꞌ; peꞌeten junchꞌin wukyꞌiꞌl bꞌix ikxji wetz okyinqtelten junchꞌin etukyꞌiꞌl; peꞌeten junchꞌin wukyꞌiꞌl iktzaꞌ tqꞌabꞌ awalj nlay kaj twitz qa kꞌontiꞌl lakꞌoꞌ tibꞌ tiꞌj te toq, ax ikxji etetz qa kꞌontiꞌl atikxqet wukyꞌiꞌl. 5 Aꞌin wetz iktzaꞌ toq jun awalj bꞌix aꞌix etetz iktzaꞌ te nqꞌabꞌal iktzaꞌ tqꞌabꞌ te awalj. Abꞌl te aj oteyon junchꞌin wukyꞌiꞌl bꞌix qa wetz akyinqet junchꞌin tukyꞌiꞌl, tetz obꞌantel nim galan titzaꞌ [tzan npaj wetz].a Komo nlay bꞌantik ekꞌulun chꞌinwt qa wetz kꞌontiꞌl akyinqet etukyꞌiꞌl. 6 Abꞌl te aj okyinkajel tkolaꞌ, tetz owelal in iktzaꞌ tqꞌabꞌ te awalj, okyꞌixwel bꞌix ojawel chimoꞌ bꞌix owokex xoꞌoꞌ tuj qꞌaqꞌ bꞌix owokel tqꞌaqꞌbꞌel. 7 Qa etetz nlay kyinkaj ekolaꞌ bꞌix te nyol nlay tzꞌaj enajsaꞌ, ntons bꞌaꞌn tzan txik eqaniꞌ aj tidiꞌ egan bꞌix ikxji oqtel kꞌulet. 8 Ikxji owokel en te tumeꞌl bꞌan bꞌanꞌax tiꞌj te Ntat iktzaꞌxkix tetz, tzan tpaj etetz oqtel ekꞌuluꞌ nim galan [tzan npaj wetz]b bꞌix ikxji etetz nqet eyekꞌuꞌ qa bꞌanꞌax aꞌix nxnaqꞌatz. 9 Wetz nkxqet nganiꞌ iktzaꞌx nkyinqet tganiꞌ te Ntat. Peꞌeten junchꞌin wukyꞌiꞌl tzan tok eten titzaꞌ wetz nkxqet nganiꞌ. 10 Qa etetz oqtel etokslaꞌ kyaqil aj nxik nqꞌumaꞌ ntons etetz atikxqet junchꞌin wukyꞌiꞌl bꞌix owokel eten titzaꞌ nkxqet nganiꞌ. Iktzaꞌx wetz nqet wokslaꞌ aj ntzaj tqꞌumaꞌ te Ntat bꞌix kꞌontiꞌl nkaj nkolaꞌ bꞌix ikxji nꞌok wen titzaꞌ tetz nkyinqet tganiꞌ. 11 Wetz nkyinyolin etukyꞌiꞌl ikxjani tzan echalaj junchꞌin wukyꞌiꞌl bꞌix tzan echalaj bꞌan byenech. 12 Aj ntzani wetz nxik nkꞌuluꞌ mandad te etetz, tzan tqet eganiꞌ etibꞌ* iktzaꞌx wetz nkxqet nganiꞌ. 13 Jun xjal aj bꞌanꞌax nqet tganiꞌ tajyol, dispwest tzan tkamik tzan tpaj tajyol. 14 Etetz aꞌix wajyol qa etetz nqet ekꞌuluꞌ iktzaꞌ wetz nxik nqꞌumaꞌ. 15 Wetz kꞌontiꞌl nꞌok nqꞌumaꞌ etetz nmos, tzan tpaj te jun mosj kꞌontiꞌl nꞌel tnikyꞌ tidiꞌ ntbꞌisuꞌ te tajawil, per etetz aꞌix wajyol tzan tpaj wetz oje xik nqꞌumaꞌ etetz kyaqil aj otzaj tqꞌumaꞌ te Ntat wetz. 16 Etetz nyaꞌtx aꞌix okxꞌel joyon te wetz sinoke aꞌin inꞌel joyon te etetz bꞌix wetz okxkaj nsiꞌ tzan exik tzan ekꞌulun nim galan [tzan npaj wetz]c bꞌix tzan tel jun galan aj nlay ponaj. Ikxji kyaqil aj oxeꞌl eqaniꞌ te Ntat iktzaꞌ nkyꞌixel aꞌix, tetz otzajel tsiꞌ. 17 Wetz nxik nqꞌumaꞌ etetz ntzani: Intqet eganiꞌ etibꞌx exolx.”
Kye Aj Kꞌontiꞌl Nkyexnaqꞌtzan Oqoꞌokel Kyqꞌojiꞌ Iktzaꞌx Owok Kyqꞌojiꞌ Te Jesus
18 “Qa kye xjal okxꞌokel kyqꞌojiꞌ, instzaj enaꞌoꞌ etetz, wetz ax inꞌok qꞌojiꞌ tbꞌay ewitz etetz. 19 Qa etetz parejix-wit naqe kye xjal aj kꞌontiꞌl nkyeꞌokslan, ntons tzun-tal nkxqet kyjiqꞌbꞌaꞌ. Per etetz ya nyaꞌtx aꞌix naqe kye ja xjalni tzan tpaj wetz aꞌin intzaj ukꞌlen te etetz kxol kyetz, astilji kyetz nkxꞌok kyajqꞌojaꞌ. 20 Instzaj enaꞌoꞌ te aj oje xik nqꞌumaꞌ: “Nijunwt mosj mas nim tajwalil twitz te tpatron.”* Iktzaꞌ kye xjal inꞌok kyajqꞌojaꞌ, ax ikxji etetz okxꞌokel kyajqꞌojaꞌ; bꞌix qa kye xjal eꞌokslan tiꞌj aj oxik nqꞌumaꞌ ntons ax ikxji oxeꞌl kyokslaꞌ aj oxeꞌl eqꞌumaꞌ. 21 Kyaqil ntzani okyꞌel etiꞌj tzan tpaj etokslbꞌen wiꞌj, komo kꞌontiꞌl kyotzqiꞌ te Qtata Dios aj otzaj lajon wetz. 22 Kꞌontiꞌl-wit wetz inꞌul bꞌix kꞌontiꞌl-wit inyolin kxol kyetz, ntons kꞌontiꞌl-tal kchoj, per ajnaꞌl kꞌontiꞌl jaꞌ bꞌaꞌn tzan kykolet tiꞌj kchoj. 23 Abꞌl te aj nkyinꞌok tajqꞌojaꞌ, ax nꞌok tajqꞌojaꞌ te Ntat. 24 Qa wetz kꞌontiꞌl-wit oqet nkꞌuluꞌ kxol kyetz te nkꞌulbꞌen aj nijunwt xjal oje qet kꞌulun tetz tbꞌayaꞌ, ntons kyetz kꞌontiꞌl-tal kchoj. Per kyetz oje tzꞌok kyen bꞌix nkyinꞌok kyqꞌojiꞌ bꞌix ax nꞌok kyqꞌojiꞌ te Ntat. 25 Per kyaqil ntzani nkyꞌik tzan tponkix iktzaꞌx tzꞌibꞌankaj tuj te Kawbꞌil ikxjani: “Wetz inꞌok kyqꞌojiꞌ bꞌix kꞌontiꞌl tuq npaj.”* 26 Per chaꞌoj tul te aj owoneyon etukyꞌiꞌl aj otzajel nlajoꞌ, aj tzajnaq tukyꞌi Ntat, te Txew aj jun yolin tiꞌj te bꞌanꞌax, tetz oyoliyon te bꞌanꞌax wiꞌj 27 bꞌix ax etetz okxyoliyon wiꞌj tzan tpaj atx bꞌan tbꞌay-el atikxqet tuq wukyꞌiꞌl.”