14
Aj Txik Tqꞌumaꞌ Jesus Tzan Tmeltzꞌjik Eqꞌil Kye Aj Nkyeꞌokslan Tiꞌj
1 “Kꞌon kxbꞌisun etetz tuj etanim; intok witꞌlet ekꞌuꞌj tiꞌj te Qtata Dios bꞌix intok witꞌlet ekꞌuꞌj wiꞌj wetz. 2 Tuj tjay Ntat ketant jaꞌ tzan eten; qa nyaꞌtx-wit ikxji, wetz oxik-tal nqꞌumaꞌ etetz. Per wetz okyinxeꞌl kꞌulul jun luwar te etetz. 3 Qa wetz ma kyinx kꞌulul jaꞌ tzan eten, wetz kyinꞌul junkyꞌel bꞌix okxeꞌl weqꞌiꞌ. Ikxji okxteyon etetz aj jaꞌ wetz okyinqtelten. 4 Bꞌix etetz etebꞌen te bꞌey aj jaꞌ wetz okyinxeꞌl.” 5 Yaji oxik tqꞌumaꞌ te Maxh tetz: “Tat, qetza kꞌontiꞌl qebꞌena aj jaꞌ otxeꞌl. ¿Titzaꞌ owelal qnikyꞌa tiꞌj te bꞌey?” 6 Ntons te Jesus oxik tqꞌumaꞌ: “Aꞌin wetz te bꞌey bꞌix te bꞌanꞌax bꞌix te aj nxik sin etanqꞌin; aꞌox tzan npaj wetz bꞌaꞌn tzan epon tukyꞌi Ntat.* 7 Komo etetz etotzqiꞌ aꞌin, ax etotzqiꞌ te Ntat. Ajnaꞌl oje tzꞌok etotzqilaꞌ te Ntat bꞌix oje tzꞌok eten.” 8 Yaji te Lip oxik tqꞌumaꞌ ikxjani: “Tat, instzaj ayekꞌuꞌ chꞌin te Qtata Dios tzan txik qen. Aj nini kabal te qetza.” 9 Yaji te Jesus oxik tqꞌumaꞌ: “Lip, wetz kyꞌilaꞌj tyemp nqetlenten etukyꞌiꞌl, bꞌix ¿minaꞌ tel anikyꞌ wiꞌj? Abꞌl te aj oje kyinꞌok ten, oje tzꞌok ten te Qtat. ¿Tistil ntzaj eqaniꞌ tzan txik nyekꞌuꞌ te Qtat etetz? 10 ¿Kꞌontiꞌl nꞌawokslaꞌ qa wetz tukyꞌi Qtat cha jun-oq aꞌoꞌ, bꞌix te Qtat wukyꞌiꞌl ax jun-oq aꞌoꞌ? Kyaqil aj nyol aj nxik nqꞌumaꞌ etetz, nyaꞌtx cha nyolx-oq [sinoke te Qtat], bꞌix te Qtat aj jun-oq wukyꞌiꞌl, aji tetz nkꞌulun te aj nqet nkꞌuluꞌ. 11 Peꞌetokslan waq, wetz tukyꞌi Qtat cha jun-oq aꞌoꞌ, bꞌix te Qtat wukyꞌiꞌl ax jun-oq aꞌoꞌ; peꞌetokslan waq nkesey cha aꞌox tiꞌj aj nqet nkꞌuluꞌ tzan tpaj tetz. 12 Wetz oxeꞌl nqꞌumaꞌ etetz bꞌan bꞌanꞌax, abꞌl aj owokslayon wiꞌj, kyaqil aj nqet nkꞌuluꞌ wetz ax tetz oqtel tkꞌuluꞌ, bꞌix oqtel tkꞌuluꞌ mas nim twitz te aj oje kyeqet nkꞌuluꞌ wetz tzan tpaj wetz ma kyinxik aj jaꞌ atqet te Qtat. 13 Bꞌix kyaqil aj oxeꞌl eqaniꞌ iktzaꞌ nkyꞌixel aꞌix, wetz oqtel nkꞌuluꞌ tzan tok en te tumeꞌl bꞌan bꞌanꞌax tiꞌj te Ntat iktzaꞌxkix tetz, ikxji owokel en tzan npaj wetz aj tkꞌajol aꞌin. 14 Qa at tidiꞌ aj otzajel eqaniꞌ iktzaꞌ nkyꞌixel aꞌix, wetz oqtel nkꞌuluꞌ.”*
A Te Jesus Swal Txew Dios Tuj Qanim
15 “Qa etetz nkyinqet eganiꞌ, intqet etokslaꞌ te aj nxik nqꞌumaꞌni. 16 Bꞌix wetz oqtel nwitz twitz te Qtat tzan stzaj tlajoꞌ junky oneyon te etetz tzan sten etukyꞌiꞌl bꞌeyx te jun-eleꞌx. 17 A te Txew aj nyolin te tumeꞌl tiꞌj te bꞌanꞌax, bꞌix kye xjal aj kꞌontiꞌl nkyeꞌokslan nlay bꞌantik tzan kykꞌamon tetz tzan tpaj kꞌontiꞌl nꞌok kyen bꞌix kꞌontiꞌl nꞌok kyotzqilaꞌ. Yatzun etetz oje tzꞌok etotzqilaꞌ tzan tpaj atqet etukyꞌiꞌl bꞌix oqtexten tuj etanim. 18 Wetz nlay kxkaj nkolaꞌ; okyinmeltzꞌjel junkyꞌel etukyꞌiꞌl. 19 Ya nyaꞌtx nim tyemp akyinqet tzani, kye xjal aj kꞌontiꞌl nkyeꞌokslan wiꞌj nlay kyinꞌok kyen. Per yatzun etetz okyinꞌokel eten tzan tpaj wetz itzꞌojin, bꞌix ax etetz okxꞌanqꞌiyon. 20 Tuj aj qꞌijji etetz owelal enikyꞌ, wetz akyinqet tukyꞌi Ntat, bꞌix akyinqet etukyꞌiꞌl bꞌix etetz atikxqet wukyꞌiꞌl. 21 Abꞌl te aj ntkꞌamoꞌ te aj nxik nqꞌumaꞌ bꞌix nqet tkꞌuluꞌ ikxji, ntons nqet tyekꞌuꞌ bꞌan bꞌanꞌax nkyinqet tganiꞌ, bꞌix te Ntat oqtel tganiꞌ abꞌl aj nkyinqet tganiꞌ, bꞌix ax wetz oqtel nganiꞌ bꞌix onkꞌuluꞌtz tzan wok totzqilaꞌ.” 22 Ntons te Juds oxik xhchaꞌoꞌ tetz, nyaꞌtx Juds aj Iskaryot sinoke te junky Juds, oxik xhchaꞌoꞌ tetz ikxjani: “Tat, ¿tistil ayekꞌuꞌtz awibꞌ aꞌox te qetza bꞌix nyaꞌtx kywitz kyaqil kye xjal twitz txꞌoꞌtxꞌ?” 23 Yaji te Jesus oxik tqꞌumaꞌ tetz: “Abꞌl aj nkyinqet tganiꞌ, nqet tokslaꞌ te nyol bꞌix te Ntat oqtel tganiꞌ tetz, wetz tukyꞌi Ntat oqoꞌulelna najayon tuj tanim. 24 Abꞌl te aj kꞌontiꞌl nkyinqet tganiꞌ, kꞌontiꞌl nqet tokslaꞌ te aj nxik nyoliꞌ. Te nyol aj nxik nqꞌumaꞌ etetz nyaꞌtx cha tuj nwiꞌx-oq sinoke tyol Ntat, te Ntat aj otzaj lajon wetz. 25 Wetz nxik nqꞌumaꞌ kyaqil ntzani te etetz tzunxk tuq akyinqet etukyꞌiꞌl. 26 Per yaji te Ntat otzajel tlajoꞌ te Txew te nkyꞌixel aj owoneyon etukyꞌiꞌl, bꞌix tetz oxeꞌl txnaqꞌtzaꞌ tidiꞌchq etetz bꞌix otzajel tnaꞌoꞌ tuj etanim kyaqil aj maꞌtx xik nqꞌumaꞌ te etetz. 27 Aꞌin wetz nkyinchewsan ekꞌuꞌj bꞌix nyaꞌtx iktzaꞌ kye xjal nkyechewsan kyanim xjal. Kꞌon kxbꞌisun tuj etanim bꞌix kꞌon kxobꞌ. 28 Etetz oje tzꞌok echaꞌoꞌ aj oje xik nqꞌumaꞌ etetz, wetz okyinxeꞌl bꞌix kyinꞌul junkyꞌel etukyꞌiꞌl. Qa etetz nkyinqet eganiꞌ, ntons nkxchalaj-talo tzan tpaj wetz okyinxeꞌl tukyꞌi Ntat, komo te Ntat mas nim tajwalil nwitz wetz. 29 Wetz maꞌtx xik nqꞌumaꞌ etetz ntzani minaꞌx tuq tkyꞌik, ikxji chaꞌoj tkyꞌik, etetz etokslaꞌtz. 30 Nlay bꞌantik tzan nyolin nim etukyꞌiꞌl tzan tpaj tzul te twitzaleꞌ tiꞌj [te nyaꞌtx galan] twitz ja txꞌoꞌtxꞌni. Tetz kꞌontiꞌl tajwalil tzan tkꞌulun mandad wiꞌj, 31 per a tgan tzan tok kchaꞌoꞌ kyaqil kye xjal, wetz nqet nganiꞌ te Qtata Dios bꞌix nqet nkꞌuluꞌ iktzaꞌ tetz otzaj tqꞌumaꞌ. ¡Peꞌejaw waꞌlet waq! ¡Qwaꞌq!”