13
Aj Tel Xtxꞌajoꞌ Jesus Tiꞌj Kyok Kye Txnaqꞌatz
1 Ntons atx chꞌinky tuq tzan taqꞌik te qꞌij Paskw, te Jesus tebꞌenky tuq ya ojetq tuq pon or tzan tkaj tsiꞌ ja twitz txꞌoꞌtxꞌni bꞌix tzan txik tuq junkyꞌel tukyꞌi Stat, bꞌix komo nkyeqet tganiꞌ tuq kyaqil kye aj nkyeꞌokslan tuq tiꞌj tzani twitz txꞌoꞌtxꞌ, tetz dispwest tuq tzan tkamik tzan kypaj. 2 Man tuq nkyewaꞌan te qaleꞌ, bꞌix komo te Tajaw Choj ojetq tuq xik tqꞌumaꞌ tuj tanim te Judas Iskaryot aj tkꞌajol Simon Iskaryot tzan txik tqꞌapoꞌ te Jesus, 3 ntons te Jesus, tetz tebꞌen tuq te Qtata Dios ojetq tuq kaj tsiꞌ kyaqil tuj tqꞌabꞌ tetz, bꞌix tebꞌen tuq, tetz tzajnaq tukyꞌi Qtata Dios bꞌix tzikix tuq ma tzꞌaj junkyꞌel. 4 Ntons, man tuq nkyewaꞌan, ojaw waꞌlet bꞌix owel tin te xtxoꞌw bꞌix otzaj tin jun twayj, owok tkꞌaloꞌ twiꞌ tkux, 5 bꞌix yaji oqex tsiꞌ aꞌ tuj jun tukꞌlal bꞌix owokten txꞌajol tiꞌj kyok kye txnaqꞌatz bꞌix owel tkyꞌixwinsaꞌ tukyꞌi te twayj aj atok tuq twiꞌ tkux.
6 Ya ma tzꞌel xtxꞌajoꞌ tuq tiꞌj toq te Simon Xhpeꞌy, te Simon Xhpeꞌy oxik tqꞌumaꞌ: “Tat, ¿tiꞌtzun, aꞌich yatz oxhchꞌelal txꞌajon tiꞌj woq?” 7 Yaji te Jesus oxik tqꞌumaꞌ: “Ajnaꞌl kꞌontiꞌl nꞌel anikyꞌ tiꞌj aj nqet nkꞌuluꞌni, per mas yaj owelal anikyꞌ tiꞌj.” 8 Yaji te Xhpeꞌy oxik tqꞌumaꞌ: “Wetz nlay. Kꞌon tzꞌel atxꞌajoꞌ tiꞌj woq.” Ntons te Jesus oxik tqꞌumaꞌ tetz: “Qa nlay tzꞌel ntxꞌajoꞌ tiꞌj awoq, ntons nlay bꞌantik tzan awok lapet wiꞌj.”a 9 Tzaj te Simon Xhpeꞌy, oxik tqꞌumaꞌ: “Qa ikxji, ntons nyaꞌtx aꞌox tiꞌj woq sinoke kyaqil nqꞌabꞌ bꞌix nwiꞌ.” 10 Oxik tqꞌumaꞌ junkyꞌel te Jesus: “Abꞌl te aj maꞌtx tzꞌichin nyaꞌtx presis tzan tel xtxꞌajoꞌ kyaqil xhchiꞌjel sinoke aꞌox te toq tzan tpaj saq kyaqil xhchiꞌjel. Etetz saq etanim, anke nyaꞌtx ekyaqil.” 11 Tetz oxik tqꞌumaꞌ, “Nyaꞌtx ekyaqil [saq etanim]” tzan tpaj tebꞌenky tuq abꞌl te aj oxeꞌl qꞌapon tetz.
12 Ya ma mankun xtxꞌajon tiꞌj kyoq kye txnaqꞌatz, owok tsiꞌ junkyꞌel te xtxoꞌw bꞌix oqet witꞌlet junkyꞌel kxol bꞌix oxik tqꞌumaꞌ ikxjani: “¿Nꞌel etetz enikyꞌ tiꞌj aj maꞌtx qet nkꞌuluꞌni? 13 Etetz nꞌok eqꞌumaꞌ wetz “Xnaqꞌtzon” bꞌix “Qajawil,” bꞌix ikxji nkxyolin galan tzan tpaj aꞌinkix wetz iktzaꞌ aj nꞌeqꞌumaꞌni. 14 Qa wetz ma tzꞌel ntxꞌajoꞌ tiꞌj etoq etetz bꞌix wetz aꞌin te xnaqꞌtzon bꞌix te etajawil, ntons presis tzan ekꞌulun ikxji etetz exolx tzan tel etxꞌajoꞌ tiꞌj etoq. 15 Wetz maꞌtx kaj nyekꞌuꞌ etetz, iktzaꞌx maꞌtx qet nkꞌuluꞌ ax ikxji etetz intqet ekꞌuluꞌ.* 16 Wetz oxeꞌl nqꞌumaꞌ etetz bꞌan bꞌanꞌax, kꞌontiꞌl jun mosj mas nim tajwalil twitz te tpatron* bꞌix kꞌontiꞌl jun mandader mas nim tajwalil twitz te aj otzaj lajon tetz. 17 Galan okyꞌel etiꞌj tzan Qtata Dios qa nꞌox tuj ewiꞌ kyaqil ntzani bꞌix qa nqet ekꞌuluꞌ. 18 Kꞌontiꞌl nkyinyolin etiꞌj etetz ekyaqil. Wetz webꞌen abꞌleꞌ aj oje kyeꞌel njoyoꞌ, per nkyinyolin ikxjani tzan tpaj okyꞌelkix iktzaꞌx tzꞌibꞌankaj tuj te Tuꞌjal Dios aj jaꞌ nyolin ikxjani: “Te aj nxik nmojlaꞌ nlaq tukyꞌiꞌl, ojawel meltzꞌjik wiꞌj.”* 19 Wetz nxik nqꞌumaꞌ bꞌeyx etetz ajnaꞌl, ikxji oj tkyꞌik ntzani oxeꞌl etokslaꞌ wetz aꞌin kixiꞌ [Dios]. 20 Wetz oxeꞌl nqꞌumaꞌ etetz bꞌan bꞌanꞌax, abꞌl aj okyetkꞌamoꞌtz abꞌleꞌchq aj okyexeꞌl nlajoꞌ te nkyꞌixel, nkyintkꞌamoꞌ aꞌin; bꞌix abꞌl te aj nkyintkꞌamoꞌ, ntkꞌamoꞌ te aj otzaj lajon wetz.”*
Aj Tyolin Jesus Tiꞌj Te Aj Oxeꞌl Qꞌapon Tuq Tetz Tzan Tkamik
21 Yaji, ya ma xik tqꞌumaꞌ te Jesus kyaqil ntzani, oxik tanim tuj bꞌis bꞌix oxik tqꞌumaꞌ bꞌan xtxolil kyetz ikxjani: “Wetz oxeꞌl nqꞌumaꞌ etetz bꞌan bꞌanꞌax, jun aj etetz exol okyinxeꞌl tqꞌapoꞌ.” 22 Ntons kye txnaqꞌatz eꞌaqꞌik tzan tox kyen tuj kywitz, kꞌontiꞌl tuq kyebꞌen abꞌl tuq qiꞌj nyolin ikxji. 23 Jun txnaqꞌatz aj nqet tuq bꞌan tganiꞌ witꞌlikqet tuq qaynin tkꞌatzaj, 24 bꞌix yaji te Simon Xhpeꞌy oxik tsiꞌ jun señ te tetz tzan tuq txik xhchaꞌoꞌ tetz te Jesus abꞌl tuq qiꞌj nyolin. 25 Yaji te aj junky owok laqꞌchet chꞌinky tiꞌj te Jesus, oxik xhchaꞌoꞌ ikxjani: “Tat, ¿abꞌltzun aj oxeꞌl qꞌapon te yatz?” 26 Te Jesus owaj stzaqꞌbꞌeꞌ ikxjani: “Wetz oqtex nmuꞌuꞌ jun pedas wabꞌj, abꞌl qetz oxeꞌl nsiꞌ, ajitzun tetz.” Ntons yaji oqex tmuꞌuꞌ jun wabꞌj bꞌix oxik tsiꞌ te Judas Iskaryot aj tkꞌwaꞌal Simon Iskaryot. 27 Ya ma kyꞌik tkꞌamoꞌ te Juds te wabꞌj bꞌeyxnajji te Satanas oqex tuj tanim te Juds. Astilji te Jesus oxik tqꞌumaꞌ tetz: “Aj presis tzan tqet akꞌuluꞌ, inqet akꞌuluꞌ naj.” 28 Kyaqil kye aj nkyewaꞌan tuq twiꞌ te mes, nijunwt owel tnikyꞌ tistil tuq te Jesus nxik tqꞌumaꞌ tetz ikxji. 29 Komo te Juds aji tuq tetz kꞌuꞌul te tqatel tmin, ntons junjun kyetz tuj kynabꞌl qa te Jesus nxik tuq tqꞌumaꞌ tzan stzaj tuq tloqꞌoꞌ kyaqil tidiꞌchq aj owokeyon tuq te kyetz tzan tpaj te qꞌij, qatzun aj presis kye mebꞌaꞌ xjalji. 30 Ntons ya ma kyꞌik tkꞌamoꞌ te Juds te wabꞌj, bꞌeyx owetz, bꞌix ojetq tuq qoyupan.
Aj Tkaj Tqꞌumaꞌ Jesus Tzan Kyqet Qganiꞌ Qerman
31 Ya ma tzꞌetz te Juds, te Jesus oxik tqꞌumaꞌ ikxjani: “Ajnaꞌl owokel en te tumeꞌl bꞌanꞌax wiꞌj iktzaꞌxkix [wetz] te Ichan Aj Tkꞌwaꞌal Dios [aꞌin] bꞌix tzan tpajji owokel en te tumeꞌl bꞌanꞌax tiꞌj te Qtata Dios iktzaꞌxkix tetz. 32 Bꞌix qa tzan npaj wetz owokel en te tumeꞌl bꞌan bꞌanꞌax tiꞌj te Qtata Dios iktzaꞌxkix tetz, ntons ax tiꞌjx te Qtata Dios oxeꞌl tyekꞌuꞌ te tumeꞌl bꞌan bꞌanꞌax wiꞌjx wetz, bꞌix oxeꞌl tyekꞌuꞌ naj. 33 Etetz nkꞌwaꞌal, wetz ya nlay kyinqeten etukyꞌiꞌl nim tyempky. Iktzaꞌx oxik nqꞌumaꞌ kye xjalb ax oxeꞌl nqꞌumaꞌ etetz: “Etetz okxjoyoyon wiꞌj, per aj jaꞌ ma kyinxik wetz, etetz nlay bꞌantik tzan exik wukyꞌiꞌl.”* 34 Ajnaꞌl okajel nqꞌumaꞌ jun tumeꞌl akꞌaꞌj titzaꞌ ngan tzan ekꞌulun: Intqet eganiꞌ etibꞌ exolx. Iktzaꞌx wetz okxꞌel nganiꞌ, ax ikxji intxik etin etibꞌ etetz.* 35 Qa etetz oqtel eganiꞌ etibꞌx exol ntons ikxji kye xjal owokel kyeꞌeꞌ qa etetz aꞌix nxnaqꞌatz.”
Aj Txik Tqꞌumaꞌ Jesus Te Xhpeꞌy Oqtel Tewaꞌ Qa Totzqiꞌ Tetz
36 Yaji te Simon Xhpeꞌy oxik tqꞌumaꞌ tetz ikxjani: “Tat, ¿jaꞌ yatz ma txik?” Yaji te Jesus owaj stzaqꞌbꞌeꞌ tetz: “Ajnaꞌl aj jaꞌ wetz ma kyinx, yatz nlay bꞌantik tzan axik wukyꞌiꞌl, per otxeꞌl mas yaj.” 37 Ntons te Xhpeꞌy oxik tqꞌumaꞌ: “Tat, ¿tistil wetz nlay bꞌantik tzan nxik awukyꞌiꞌl ajnaꞌl? Wetz dispwest atin ajnaꞌl tzan nkamik tzan apaj yatz.” 38 Te Jesus oxik tqꞌumaꞌ tetz: “¿Bꞌanꞌax dispwest atich tzan akamik tzan npaj wetz? Oxeꞌl nqꞌumaꞌ yatz te bꞌanꞌax, minaꞌ tuq tjaw oqꞌ te toꞌk, yatz ojetq qet awewaꞌ oxmaj qa yatz awotzqimin.”